“Tëgekyë tyäˈädë madakën, yëˈë dëˈën yajkypy ja Espiritë Santë.” (1 KOR. 12:11)

1. ¿Tijaty nnijawëyäˈänëm mä tyäˈädë artikulo?

MÄ JA Pentekostes xëë, mä jëmëjt 33, mëjwiin kajaa diˈib tuun jäjtë. ¡Ja mä Dios ttuknigejxyë myëjää pënaty mëduunëp! (Apos. 2:1-4.) Ets ja dyajtuuntsondakyë myëjää parë ttuˈumoˈoy ja kyäjpn mä nëˈë tuˈu jembyë. Mä ja tuˈukpë artikulo ojts nˈijxëm wiˈixë Jyobaa dyajtuunyë myëjää parë tpudëjkë pënaty mëduunë ets ttundët diˈib tsip nimëjää. Per mä primer siiglë, wiingë net ojts tyuny ja Diosë myëjää. ¿Wiˈix? ¿Ets ti mbäät nduˈunëm parë xypyudëjkëmë Diosë myëjää? Yëˈë diˈib nnijawëyäˈänëm.

“Ëjtsë dëˈën Dios mëduumbë”

2. ¿Wiˈixë netyë María të tˈixy tyuny ja Diosë myëjää?

² María tamë nety yajpääty mët ja Dios  mëduumbëty diˈib të tyuˈukmuktë Jerusalén ko Dios tkejxyë myëjää diˈibë netyë Jesus të twandaˈaky (Apos. 1:13, 14). María të nety tˈixy wiˈixë Jyobaa ttuny tijaty mët yëˈëgyëjxmë myëjää. Pes 30 jëmëjtë nety të nyaxy ko “Espiritë Santë kyëjxp” ojts wyeˈemy uˈunkmëët, ko Jyobaa ojts dyajtëgäjtsë Jesusë jyukyˈäjtën ets tpëjtaky María jyodoty (Mat. 1:20, Nuevo Testamento de Mazatlán).

3, 4. ¿Ti jäˈäyˈäjtën yaˈijxë María, ets wiˈix mbäät nbanëjkxëmë yˈijxpajtën?

³ ¿Tiko Jyobaa twinˈijxyë María? Ko yˈanmääyë ja anklës ti netyë Dios tuktunanëp, ta yˈatsooy: “Ëjtsë dëˈën Dios mëduumbë. Waˈanëts ja Dios xytyuktuny extëmëts mij të xyˈanëëmë” (Luk. 1:38). Ko duˈun yˈatsooy, ta dyaˈijxë wiˈixë nety jyaˈayˈaty, listë nety yˈity parë ttunäˈäny ti Jyobaa tsyejpy. María kyaj dyajtëëy ja anklës wiˈix ja jäˈäy wyinmaytyët ko yˈixëdët uˈunkmëët o tsyëˈëgët ko ja José kyanekypyëkäˈänëdët. Ko María jyënany ko yëˈë Dios mëduumbë, ta dyaˈijxë ko amumduˈukjot tmëbekyë Jyobaa.

⁴ ¿Mjäˈäwëp näˈäty ko mëjwiin kajaa xynyikëjxmˈatyë Diosë tyuunk ets ko kyaj xymyëmadaktäˈäyët? Pën duˈun, oy ko nnayajtëˈëwëm: “¿Nmëbëjkypyëts amumduˈukjot ko Jyobaa yëˈëjëts xypyudëkëyäämp parëts tukëˈëyë ndunët extëm ttseky? ¿Ijtpëts listë parëts ndunët tijatyëts yëˈë xytyukˈanaˈamp?”. Mbäät nˈijtëm seguurë ko Jyobaa xymyoˈoyäˈänëmë myëjää pën nmëbëjkëm amumduˈukjot ets pën nmëmëdoˈojëm extëmë Anaˈambë (Apos. 5:32).

Pedro pudëjkë Diosë myëjää

5. Mä tkapäätynyëm ja Pentekostes xëë, mä jëmëjt 33, ¿wiˈixë netyë Pedro të tˈixy tyunyë Diosë myëjää?

⁵ Duˈun extëmë María, Pedro nan të nety këˈëm ttimˈixy wiˈix tyunyë Diosë myëjää mä tkapäätynyëm ja Pentekostes xëë, mä jëmëjt 33. Të nety myoˈoyëtyë Jesusë mëjää mët ja wiinkpë apostëlëtëjk parë tkajxpëtsëmdëdë kaˈoybyë (Mar. 3:14-16). Tyäˈädë kyaj nëgoo Biiblyë tmaytyaˈaky, per nyigajpxypy ko Pedro yajtuunë tyäˈädë mëjää. Extëm ko Jesus yˈanmääyë ets nyiminëdët yeˈepy nëëwingëjxy, ojts duˈun ttuny mët yëˈëgyëjxmë Diosë myëjää (käjpxë Matewʉ 14:25-29). Pedro nan tyuunë miläägrë mët ko pyudëjkë Diosë myëjää. Per tim tsojkë netyë Diosë myëjää tyëkëyaˈany tuumbë extëm kyajnëm tyuny mä Pedro ets mä wiinkpë apostëlëty.

6. ¿Ti tyuunë Pedro mët ko pyudëjkë Diosë myëjää mä ja Pentekostes xëë ets mä tiempë yˈaknäjxy?

⁶ Mä ja Pentekostes xëë, Pedro mëdë wiinkpë Jesusë yˈëxpëjkpëty ojts pyudëkëdë Diosë myëjää parë kyäjpxtët kanäk ayuk extëm ja jäˈäyëty diˈibë nety të jyäˈttë Jerusalén. Pedro ta tyënääyeˈky ets ojts tmëgajpxy ja mayjyaˈay (Apos. 2:14-36). Pedro diˈibë nety të myëmadaˈagyëtyë tsëˈëgë ets diˈib kyaj tniwinmayë tijaty tyuumpy, ojts tˈaxäjë jotmëkˈäjtën parë tnimaytyäˈägëdë Jesus oy ja jäˈäy dyajkubojktë ets pyajëdijtëdë (Apos. 4:18-20, 31). Nan ojtsë Diosë myëjää tyuknijawëty diˈibë nety kyaj tnijawë (Apos. 5:8, 9). Ets axtë mëjämooyë parë dyajjukypyejky tuˈugë oˈkpë (Apos. 9:40).

7. ¿Tijatyë Pedro jyaygyujkë ko ja Diosë myëjää tyuknijäˈäjë ko të yajwinˈixy parë nyëjkxët tsäjpotm?

⁷ Mä tkapäätynyëm ja Pentekostes xëë, të netyë Pedro tjaygyukë kanäk peky ja tëyˈäjtën diˈibë Jesus tukniˈˈijxë (Mat. 16:16, 17; Fwank 6:68). Per tamˈäjtpë nety diˈib kyaj yajxon tjaygyukë, extëm ko Jesus jyukypyëkäˈäny kyumdëgëk xëë mëdë nyiniˈkx diˈib kyaj yaˈixy, ets ko ja Anaˈamën yˈitäˈäny tsäjpotm (Fwank 20:6-10; Apos. 1:6). Nan kyaj nety tjaygyukë wiˈix näägë jäˈäy jyukypyëkäˈändë extëmë anklës ets yˈanaˈamäˈändë tsäjpotm. Jaanëmë Pedro tjaygyujkë mä ja Pentekostes xëë ko ja Diosë myëjää tyuknijäˈäjë ko yëˈë të yajwinˈixy parë nyëjkxët tsäjpotm.

8. ¿Ti tyam mbäät tnijawëdë duˈun diˈib nëjkxandëp tsäjpotm ets duˈun ja “wiinkpëty ja [borreegë]”?

 ⁸ Ko ja Jesusë yˈëxpëjkpëty ojts tˈaxäjëdë Diosë myëjää, ta tjaygyujkëdë diˈibë nety kyaj të tjaygyukëdë. Diosë myëjää yëˈë winmäˈänymyooyëdë parë tjääytyë Escrituras Griegas Cristianas, mä tnimaytyaktë tijatyë Jyobaa tyuknibëjtakëp (Éfe. 3:8-11, 18). Tyam, duˈun diˈib nëjkxandëp tsäjpotm ets duˈun ja “wiinkpëty ja [borreegë]”, mbäät tˈëxpëktë ets tjaygyukëdë tyäˈädë tëyˈäjtën (Fwank 10:16). ¿Mmëjäˈäwëp ko Diosë myëjää mbudëkëty parë xyjaygyukëdë Diosë yˈAyuk?

Pablo tuktëjkë Diosë myëjää

9. ¿Tijaty tyuunë Pablo ko ojts tˈaxäjë Diosë myëjää?

⁹ Naa tyuk jëmëjtëbë nety të nyaxy ja Pentekostes xëë, ko Saulo, diˈib ok yaˈixyˈäjt extëmë apostëlë Pablo, ojts tˈaxäjë Diosë myëjää. Yëˈë mooyë ja madakën parë ttunët tijaty diˈib axtë tyambäät ndukˈoyˈäjtëm. Extëm nˈokpëjtakëm, ojts pyudëkëty parë tjäˈäyët mäjmäjktsë liibrë diˈib yajpatp mä Biiblyë. Pablo nan ojts pyudëkëtyë Diosë myëjää, duˈun extëm pyudëjkë Pedro, parë tjaygyukët ko pënaty nëjkxtëp tsäjpotm ninäˈä kyaˈoogäˈändë ets kyawindëgoyäˈändë nyiniˈkx kyëbäjk. Nan yëˈë pudëjkë Diosë myëjää parë dyaˈˈagëdakyë päˈäm jäˈäy, tkajxpëtseemyë kaˈoybyë ets axtë dyajjukypyejkyë oˈkpë. Per nan mëjämooyë parë dyajtuˈuyoˈoyët ja tuunk diˈib mas jëjpˈam, diˈib axtë tyambäät nyajtuˈuyoˈoyëm, per kyaj myëjˈäjtëngyëjxmëty.

10. ¿Wiˈixë Diosë myëjää tpudëjkë Pablo parë kyäjpxët?

¹⁰ Ko Pablo yˈijty Chipre, netë Diosë myëjää tyuktëjkë ets amëk jotmëk ojts tmëgajpxy tuˈugë brujë. Ja jäˈäy diˈibë nety anaˈamp mä tadë lugäär ojts tmëdoy wiˈix ja Pablo jyënaˈany, ta “dëˈënyë [ojts] wyëˈëmë mët ja Nintsënˈäjtëmë [Jyobaa] yˈëxpëjkën”, ets ojts tˈaxäjë tëyˈäjtën (Apos. 13:8-12). Extëm nˈijxëm, Pablo nyijäˈäbë nety ko Diosë myëjää mbäät myoˈoyëty ja madakën parë tnimaytyäˈägët ja tëyˈäjtën amëk jotmëk (Mat. 10:20, Traducción del Nuevo Mundo [NM]). Pääty ok tˈanmääy ja Dios mëduumbëty diˈib Éfeso parë nyinuˈkxtäägëdët etsë Dios myoˈoyëdët ja madakën parë kyäjpxët (Éfe. 6:18-20).

11. ¿Wiˈixë Pablo tyuˈumooyë Diosë myëjää?

¹¹ Pablo ojts pyudëkëtyë Diosë myëjää parë kyäjpxwäˈkxët mä näägë lugäär, per tam mä kyaj tnasˈijxë. Nan xëmë ojts tyuˈumoˈoyëty ko ojts nyijkxy wiink it wiink lugäär käjpxwäˈkxpë (Apos. 13:2; käjpxë Apostʉlʉty 16:6-10). Jyobaa yajtuumpy axtë tyambäädë myëjää parë xytyuˈumoˈoyëm mä ngäjpxwäˈkxëm. Ets duˈun extëmë Pablo, ëtsäjtëm nan nduˈunëmë mëjää parë nmëdoˈojëm ets ngäjpxwäˈkxëm ja tëyˈäjtën xondaˈakyˈää xondaˈakyjyot ets amëk jotmëk. Oy tyamë Dios tkayajtunyë myëjää parë xytyuˈumoˈoyëm extëm ttuˈumooyë Pablo, ijtëm seguurë ko xytyukniwoˈojëmë jäˈäy diˈib jyantsy nyijawëyaambyë tëyˈäjtën (Fwank 6:44).

Diosë myëjää wiˈixëm tyuny

12-14. ¿Tuknax tyunyë Diosë myëjää mä niˈamukë Dios mëduumbë? Nimaytyäˈäk.

¹² Xymyëjämoˈoyëm mëjwiin kajaa ko ngäjpxëm wiˈixë Jyobaa ojts tkunuˈkxy mä  primer siiglë ja Dios mëduumbëty diˈib nëjkxandëp tsäjpotm. Min nˈokˈijxëm wiˈixë Pablo tˈanmääy ja naymyujkën diˈib Corinto mä ja madakën diˈib yajkypyë Diosë myëjää: “Taa kanäk nax ja madakën, per [yëˈëyë] ja Espiritë Santë diˈibë madakën yajkypy. Taa kanäk nax wiˈix nmëduˈunëm ja Nintsënˈäjtëm, per tiˈigyë dëˈën jeˈeyë Nintsënˈäjtëm diˈibë nmëduˈunëm. Taa kanäk naxë tuunk diˈibë mëkˈäjtën mët yajtuny, per tiˈigyë ja Dios diˈibë mëdë myëkˈäjtën yajtuny tëgekyë” (1 Kor. 12:4-6, 11). Yä Pablo jyënany ko Diosë myëjää wiˈixëm tyuny mä tuˈuk tuˈugë Dios mëduumbë parë ttunët extëm të yajtuknibëjtäägë. Ets mëjwiin kajaa tpudëkë ja “tuk mutsk kajpëˈëgë borreegë” diˈibë Kristë jyaˈäjtypy ets nanduˈun ja wiinkpë borreegë (Luc. 12:32, NM; Fwank 10:16). Perë Diosë myëjää kyaj tuknax tyuny mä tuˈuk tuˈugë Dios mëduumbë.

¹³ Extëm nˈokpëjtakëm, mët yëˈëgyëjxmë Diosë myëjää të yajtuunkmoˈoytyë mëjjäˈäytyëjk (Apos. 20:28). Per kyaj niˈamukë tyundë mëjjäˈäy pënaty nëjkxandëp tsäjpotm. Tyäˈädë yëˈë xytyukˈijxëm ko Diosë myëjää wiˈixëm tyuny mä Dios mëduumbë.

¹⁴ Pënaty nëjkxandëp tsäjpotm, yëˈë Jyobaa tuknijäˈädëp ko yajnäjxëdëp “extëmë yˈuˈungën” ets yëˈë yajtuumbyë myëjää parë ttuknijawëdë. Nan yëˈë tyäˈädë mëjää yajtuun parë dyajjukypyejkyë Jesus ets jyukyˈatët tsäjpotm (käjpxë Romanʉs 8:11, 15). Jyobaa nan yëˈë yajtuunë tyäˈädë mëjää parë ojts dyajkojy tukëˈëyë tijaty jaˈäjtp (Gén. 1:1-3). Nan yëˈë pudëjkë Bezalel parë ojts dyaˈoˈoyëtyaˈay ja mueeblë mä ja tabernakulo, dyajkumëjäädakyë Sansón ets ojts dyajˈyoˈoyë Pedro nëëwingëjxy. Per tëgatsy ko tuˈugë jäˈäy pyudëkëtyë Diosë myëjää ets nan tëgatsy ko yajwinˈixy mët yëˈëgyëjxmë tyäˈädë mëjää parë nyëjkxët tsäjpotm, duˈun ja tuk peky tyunyë Diosë myëjää. Etsë Jyobaa yëˈë diˈib wyinˈijxypy pën nëjkxëp tsäjpotm.

15. ¿Jëjpkëxäämp mä yajwinˈixy pënaty nëjkxandëp tsäjpotm? Nimaytyäˈäk.

¹⁵ Nuˈun kujkë tiempë nyaxy, Jyobaa wiˈixëm të tpudëkë mëdë myëjää pënaty mëduunëp. Ets mä Pentekostes, mä jëmëjt 33, ja twinˈijxtsondaky mëdë myëjää pënaty nëjkxandëp tsäjpotm, per jäˈtäämbë tiempë mä jyëjpkëxäˈäny. Jyobaa duˈunyëm xymyoˈoyäˈänëmë myëjää parë nduˈunëm tijaty yëˈë tsyejpy winë xëë winë tiempë.

16. ¿Tijaty tyam tyuundëbë Dios mëduumbë mët ko pyudëkëdë Diosë myëjää?

¹⁶ ¿Tijaty tyam tyuundëbë Dios mëduumbë mët ko pyudëkëdë Diosë myëjää? Mä Diˈibʉ Jatanʉp 22:17 tˈatsoojëmbity: “Yëˈë Espiritë Santë esë Borreeguˈungë nyëdoˈoxy, [...] jënandëp: ¡Min! Es diˈibë myëmëdeepy, waˈan nandëˈën tjënäˈäny: ¡Min! Es diˈibaty tëtsëdëp, waˈan tmindë es tˈaxäjëdët nadëˈënyë ja nëë diˈibë yajkypy ja jikyˈäjtën winë xëë winë tiempë”. Diosë myëjää yëˈë diˈib xypyudëjkëm parë nwoˈojëm “diˈibaty tëtsëdëp” ets tˈaxäjëdët ja nëë diˈibë Jyobaa yajkypy. Pënaty nëjkxandëp tsäjpotm, yëˈë nyigëbäjkˈäjttëbë tyäˈädë tuunk, ets pënaty jukyˈatandëp yä Naxwiiny yëˈë pudëjkëdëp, ets yëˈë Diosë myëjää tuˈumooyëdëp. Per oy mä tˈawixtët ja jukyˈäjtën, të nyaytyukëdëkëdë Jyobaa ko të nyëbattë “xyëëgyëjxmë Dios Teety, [...] ja yˈUˈunk, es ja Espiritë Santë” (Mat. 28:19). Ets yaˈijxëdëp ja jäˈäyˈäjtën diˈib yajkypyë Diosë myëjää (Gal. 5:22, 23). Niˈamukë tnasˈixëdë etsë Diosë myëjää pyudëkëdët parë tmëmëdowdëdë Diosë yˈanaˈamën ets nyayaˈitëdët wäˈäts (2 Kor. 7:1; Diˈibʉ Jat. 7:9, 14).

Nˈokˈamdoˈojëm xëmë Diosë myëjää

17. ¿Wiˈix nyajnigëxëˈkëm ko Diosë myëjää yˈity mä ëtsäjtëm?

¹⁷ Pääty, oy njukyˈatäˈänëm yä Naxwiiny o tsäjpotm, Jyobaa xymyoˈoyëmë “mëkˈäjtën” mëjwiin kajaa parë nmëmadakëm oytyim tiijëty ets nbatëm ja kumäˈäyën (2 Kor.  4:7). Näˈäty xytyukxikëmë jäˈäy mët ko xëmë ngäjpxwäˈkxëmë Diosë yˈAnaˈamën. Nˈokjamyajtsëm ko pääty axëëk nyajtuˈunëm mët ko nbanëjkxëmë Jesukristë. Per pën xëmë ngäjpxwäˈkxëm, nëjkxëp jotkujk nyajpatëm ets nyajnigëxëˈkëm ko Diosë myëjää yˈity mä ëtsäjtëm (1 Peed. 4:14).

18, 19. ¿Wiˈixë Jyobaa xypyudëkëyäˈänëm mëdë myëjää, ets ti mbäät xëmë nduˈunëm?

¹⁸ Jyobaa myoobyë myëjää pënaty amdoojëp amumduˈukjot. Ets yajkajaajëp ja wijyˈäjtën ets ja tsojkën parë mas oy nmëduˈunëm. Biiblyë jyënaˈany: “Mët ko duˈunë Dios ttseky, tyuny mä miitsëty, parë miitsëty xymyëdatët ja tsojkën ets parë nanduˈun xytyunäˈändët”. Ko xypyudëjkëmë Diosë myëjää ets ko mëk nnaygyumäjtsëm mä yˈayuk diˈib yajkypyë jukyˈäjtën, yëˈë nëjkx xypyudëjkëm parë nduˈunëm mëdë tsëˈk jäˈäwën tijaty mbäät xyajnitsokëm (Fili. 2:12, 13, 16, NM).

¹⁹ Pën nmëbëjkëm amumduˈukjot ko mbäät xypyudëjkëmë Diosë myëjää, ta nbëjtakëmë jot mëjää mä ja tuunk diˈib yajtuknipëjkëm ets tuˈuk tuˈugë xëë nduˈunëm mas oy ets nˈanmäˈäyëmë Jyobaa parë xypyudëjkëm (Sant. 1:5). Jyobaa nyijäˈäp wiˈix xypyudëkëyäˈänëm parë njaygyujkëmë yˈAyuk, nwinguwäˈkëmë jotmay diˈib nbatëm ets parë ngäjpxwäˈkxëm ja oybyë ayuk. Ko nˈamdoˈojëmë myëjää, oy ko njamyajtsëmë tyäˈädë tekstë: “Amdowdë Dios, es mmoˈoyëdët; ëxtäˈäytyë, es xypyäättët; kugäjxëdë mä tëjk ää, es myaˈˈawatsxëdëp” (Luk. 11:9, 13). Duˈunë duˈun, nˈokmënuˈkxtakëm xëmë Jyobaa parë xymyoˈoyëmë myëjää, duˈun extëm tmooy pënaty tëëyëp mëduunëdë.

¿Mbäät xynyimaytyaˈaky?

• ¿Diˈibë jyaˈayˈäjtënë María mbäät niˈˈijxtutëm parë nˈaxäjëmë kunuˈkxën?

• ¿Wiˈixë Pablo tyuˈumooyë Diosë myëjää?

• ¿Wiˈix tyam xytyuˈumoˈoyëmë Diosë myëjää?

[Yajtëˈëwën]

[Letrë diˈib miimp mä dibujë mä pajina 26]

Pablo yëˈë pudëjkë Diosë myëjää parë tmëmadaky ja kaˈoybyë myëjää

[Letrë diˈib miimp mä dibujë mä pajina 28]

Dios xymyoˈoyëmë myëjää niˈamukë, oy njukyˈatäˈänëm tsäjpotm o yä Naxwiiny