¿Tiko mbäät njukyˈäjtëm extëmë Biiblyë jyënaˈany?
¿MËKË Biiblyë yˈanaˈamën o të nyidiempë nyäjxnë extëm tmaytyaˈagyë ijt tsënaaky? Kyaj. Pes pënaty pyanëjkxtëbë kyäjpxwijën kyaj tpäättë tyäˈädë jotmay:
▪ päˈäm diˈib ninäjxp ko jäˈäy yˈit tsyëënëdë
▪ wyëˈëmët uˈunkmëët
▪ dyajmäˈädët ja tsyënäˈäy jyukyˈäjtën
▪ nyayjawëdët axëëk
▪ nyayjawëdët ko kyaj ti ttsoojëty
Jyobaa Dios * yëˈë të xyajkojëm ets yëˈë tsyejpy ets ndukxondakëm tukëˈëyë diˈibë të xymyoˈoyëm. Mä Isaías 48:17 jyënaˈany ko xytyukniˈˈijxëm parë këˈëm ndukˈoyˈäjtëm. Pääty, pënaty pyanëjkxtëbë Biiblyë kyäjpxwijën:
▪ kupëjkëdëbë Dios
▪ kyaj ti yˈatsipëdë mä jyot wyinmäˈäny
▪ jantsy oy yˈittë mä kyasäädëˈattë
▪ oy yajnimaytyäˈäktë
▪ nayjäˈäwëdëp ko tsobattëp
¿Ets pën kyaj tyam njukyˈäjtëm extëmë Diosë yˈAyuk tniˈanaˈamë? ¿Mbäät nyajtëgäjtsëmë jukyˈäjtën? ¿Waˈandaa nëjkxë Dios xytyukjamyajtsëm wixaty të nˈadëtsëm?
Okwinmayë tyäˈädë: ja Dios mëduumbëty diˈib mä primer siiglë, tamë nety nääk diˈib të myëˈindundë, diˈib të tsyëënëdë mëdë wiinkpë ets diˈibë nety të tsyëënëdë ak yetyëjk, ojts dyajtëgatstë jyukyˈäjtën ets ojtsë Dios pyokymyaˈkxëdë (1 Korintʉ 6:9-11). Mä tyäˈädë tiempë, nan të milˈamë jäˈäy dyajtëgatstë jyukyˈäjtën abëtsemy nyaxwinyëdë. Duˈun tyam jyukyˈattë extëm jyënaˈanyë Diosë yˈAyuk ets të tmastuˈuttë ja axëëkpë tuˈunën. Të tˈixtë niˈamukë wiˈix ttukˈoyˈattë, extëmë Sara diˈib të yajmaytyaˈaky mä myëduˈukpë artikulo.
“Netyëts jantsy oy nnayjäˈäwë”
Sara ojts tpekyë kuentë ko extëmë nety jyukyˈaty, nitii jotkujkˈäjtënë tkapääty ets kyaj nety nyayjawëty awäˈätstuuy extëm tjatseky. Yëˈë jyënaˈany: “Tëjëtsë netyë nwinmäˈäny jyuˈunë. Per tsoytyuˈun mëdëtsë nety njukyˈaty ets tsëˈkëbëts nwëˈëmët uˈunkmëët o kojëts ti päˈäm nyajtukpäädët. Ninäˈätsë Dios ngajäˈäytyëgooy ets nnijäˈäbëtsë nety ko extëmëts njukyˈaty, axëëgë Dios nyayjawëty. Kyajtsë nety wäˈäts nnayjawëty ets duˈunëts njäˈäwë extëmëts nwindëgoy jodoty”.
Ko ja tiempë nyajxy, ta Sara jyotmëktaky parë dyajtëgäjtsyë jyukyˈäjtën. Ojts tninëjkxy ja tyääk tyeety diˈib Testiigëty, ets ja mëjjäˈäytyëjk diˈib tuundëp mä naymyujkën. Sara jyënaˈany: “Jantsy jotkujkëts nnayjäˈäwë extëmëts ja ndääk ndeety xytyukˈijxtë ja tsyojkën ets nanduˈun ja mëjjäˈäytyëjk. Netyëts jantsy oy nnayjäˈäwë”.
Mä tyäˈädë tiempë, Sara majtskë yˈuˈunk. Ets yëˈë jyënaˈany: “Tëjëts ndukmëtmaytyäˈäktë wiˈixëts të njukyˈaty. Ntsejpyëts ets tjaygyukëdët wiˈixëts njäjty kojëts ngamëmëdooyë Diosë kyäjpxwijën extëm jyënaˈany mä ijt tsënaaky ets tˈixtët ko yajtukˈoyˈäjtp mä niniˈkx këbäjk, mä jot winmäˈäny ets mä wiˈix nnayjäˈäwëm. Jantsy jënäämbëtsë net ko päätyë Dios të tpëjtaˈagyë yˈanaˈamën parë kyaj nˈayoˈojëm”.
Mbäät niˈamukë ndukˈoyˈäjtëm ko nbanëjkxëm ja käjpxwijën diˈibë Dios yajkypy. Biiblyë jyënaˈany ko “tijatyë Jyobaa nyiˈanaˈamëp tëy yëˈë, yajxondakypyë korasoon” ets ko “yˈanaˈamënë [...] wäˈäts yëˈë, yajtëˈkxy yajjajpyë wiin”. Ets nan jënäämp ko pënaty mëdoodëp yˈaxäjëdëp “mëjwiin kajaa kumäˈäyën” (Salmo 19:8, 11). *
[Notë diˈib noky ëxˈääy]
^ parr. 8 Biiblyë jyënaˈany ko Dios txëˈaty Jyobaa.
^ parr. 20 Pën mˈaknijawëyaambyë Biiblyë kyäjpxwijën, anëëmë tuˈugë Jyobaa tyestiigë diˈib mä mnax mgäjpn. Nan mbäät xynyijayë mä direksion diˈib miimp mä pajina 4 o mä sitio oficial mä Internet www.watchtower.org/mx.
[Letrë diˈib miimp mä dibujë mä pajina 8]
Pënaty kyaj tmëmëdowdë Biiblyë kyäjpxwijën yäjktëbë jäj jëmuˈumën
[Letrë diˈib miimp mä dibujë mä pajina 9]
Pënaty myëmëdoodëbë Diosë yˈanaˈamën kyaj ti yˈatsipëdë mä jyot wyinmäˈäny ets jantsy oy kyasäädëˈattë