KO PËN mˈanëˈëmxëdët ko kyaj nyekyˈayoˈonbëjtäˈägäˈäny tijaty, ¿wiˈix xyˈatsowët? Waˈan xyˈanëëmët: “Mgumääbëdaa mijts, xëmë tijaty yˈayoˈonbëjtaˈaky”. O waˈan mwinmayët ko lokën mˈixyëty ets pääty duˈun mˈanëˈëmxëty.

Mbäät pën wyinmay ko xëmë tijaty yˈayoˈonbëjtäˈägäˈäny, per min nˈokˈijxëm tiko mbäät nmëbëjkëm ko jëjptëgoyäämp. Naxwinyëdë jäˈäy kyaj mbäät tjëjpkuwäˈägë. Pes tsip tmëwinmäˈänybyäädët wiˈix tyuny tijatyë mëkˈäjtënë myëdäjtypy, extëmë nëë tuu o ko naxwinyëdë yuˈkxy, ets tsip tˈanaˈamët o dyajtëgatsët. Rey Salomón, diˈib jantsy wijy ijt ets yˈijx nyijäˈäwë tijaty, jyënany: “Yëˈë naxwinyëdë jäˈäy kyaj mbäät tpayoˈoy tijaty të yajtuny xëë batkëˈëy; oy kajaa ets oy mëk jyatundë naxwinyëdë jäˈäy mä tpayoˈoy, per kyaj tnijawëdë. Ets oyxyëp jyajënäˈändë ko jantsy wyijˈyëty parë tnijawëdët, kyaj mbäät tnijawëdë” (Eclesiastés 8:17).

Naxwinyëdë jäˈäy kyaj mbäät tjëjpkuwäˈägë tijaty ayoˈonbëjtakp. ¿Pën mbäät tjëjpkuwäˈägë? Biiblyë jyënaˈany ko yëˈë Dios diˈib të xyajkojëm. Mët ko yëˈë tyukniwijtsëtyaay wiˈix tyunët tijatyë mëkˈäjtën myëdäjtypy, extëm mä wiˈix myinyë nëˈë tuu ets jyëmbity jatëgok tsäjpotm (Eclesiastés 1:7). Dios kyaj dyuˈunëty extëmë naxwinyëdë jäˈäy, pes ninäˈä myëkˈäjtën kyakugëxë. Ja kugajpxy Jeremías jyënany: “¡Wintsën Yajkutujkpë Jyobaa! Okˈix, mijts të xyajkojˈyë tsäjp etsë nax mët ko mëkˈäjtën xymyëdaty mëjwiin kajaa ets mët ko mxäjtëy. Ets tukëˈëyë tyäˈädë kyaj mijts mëjˈixy mëjmëdoy xyjawë” (Jeremías 32:17). Komë Dios yëˈë të dyajkojˈyë Naxwinyëdë ets tijaty jaˈäjtp, extëmë nëë, poj etsë jëën, pääty tnijawë wiˈix mbäädë jäˈäy jyukyˈattë agujk jotkujk ets kyaj tsyëˈëk jyawëdët (Salmo 37:11; 115:16).

Per ¿wiˈixë Dios dyajtëgatsäˈäny? Tijaty tyam tuun jäjtëp yëˈë xytyukˈijxëm ko “pyatnëp ja tiempë mä jyëjptëgoyanë tyäˈädë jukyˈäjtën”. Jesus jyënaˈany: “Ko xyˈixtët [tyun jyatyëty] tadë diˈibë të nˈanëëmë, mnijawëdëp ko të wyingony ja Diosë kyutujkën” (Mateo 24:3, Traducción del Nuevo Mundo; Lukʉs 21:31). Tyäˈädë Kutujkën, yëˈë tuˈugë gobiernë diˈibë Dios të tpëjtaˈaky tsäjpotm, ets mëjwiin kajaa dyaˈoyëyaˈanyë tyäˈädë Naxwinyëdë ets tjëjpkuwäˈägëyaˈany tijatyë mëjää myëdäjtypy extëmë nëë tuu etsë poj. Jyobaa myëdäjtypyë mëjää parë duˈun ttunët, per yëˈë të ttuknipekyë yˈUˈunk, diˈib ja kugajpxy Daniel myaytyakypy: “Ets yëˈë yajmooy ja anaˈamdakn etsë mëjˈäjtën etsë kutujkën parë myëdunëdët tukëˈëyë ja nax käjpn, nasionk etsë jäˈäy diˈib kyajpxypy oytyim diˈibëtyë ayuk” (Daniel 7:14).

Jesukristë, Diosë yˈUˈunk, të tˈaxäjë ja kutujkën parë dyaˈoyëdë Naxwinyëdë mä mbäät ntsënäˈäyëm agujk jotkujk ets kyaj ntsëˈk njäˈäwëm. Tam nyëjkxnë majtsk mil jëmëjt, ko Jesus dyaˈijxë ja mëkˈäjtën diˈib myëdäjtypy parë  tˈanaˈamët tijaty mbäät yˈayoˈonbëjtaˈaky. Extëm tëgok, ko nety mëdë yˈëxpëjkpëty yajpäättë barkoty mä ja mejny diˈib Galilea, “ta myiiny tuˈugë mëk poj. Es ko ja nëë nyikapy tëjkëp barkoty, net ja barkë yˈutsanë mëdë nëë”. Ta ja yˈëxpëjkpëty tsyëˈkëdë ko yˈooktët ets yˈamdoojëdë naybyudëkë. ¿Ti Jesus tyuun? Jeˈeyë tˈanmääy ja mejny: “¡Amonyë! ¡Tëmijtkë! Ta ja poj myoˈty, es tëgekyë oj wyëˈëmëtyaˈay amonyë es [tëmijkyë]”. Ta ja yˈëxpëjkpëty duˈunyë yˈijx jyäˈäwëdë ets jyënandë: “¿Pënë dëˈënë tyäˈädë, ko axtë yëˈë poj esë mejny mëmëdoojëp?” (Markʉs 4:37-41).

Ko Jesus pyatëjkë tsäjpotm, ta mas niˈigyë ja kutujkënë ets ja mëkˈäjtënë yajmooy. Tyam ko tyuny Rey mä Diosë Kyutujkën, myëdäjtypy ja madakënë parë dyajtëgatsët tijaty të wyindëgoy yä Naxwiiny, duˈuntsoo mbäädë jäˈäy jyukyˈaty agujk jotkujk ets kyaj ti ttsëˈëk tjawët.

Mët ko naxwinyëdë jäˈäy yˈatsoktë ets ko yëˈëyë tijaty nyaytyukmëtsokëdë, ta niˈigyë dyajmäˈättë naxwinyëdë etsë net yˈayoˈonbëjtaˈaky tijaty. ¿Wiˈix jyatäˈäny pënaty kyaj nyayajtëgatsyëty ko myinët ja Anaˈam Kutujkën? Biiblyë jyënaˈany ko Jesus tsyoonäˈäny “tsäjpotm jënˈyaˈangoty mët ja mëkpë yˈanklësëty. Tyëytyunaampy ja diˈibë kyaj tˈixyˈattë ja Dios es ni tkatundë kuentë ja oybyë ayuk diˈibë nyimaytyakypy ja Nintsënˈäjtëm Jesukristë”. Ets “[dyajkutëgoyaˈany] ja diˈibaty yajmäˈttëp ja naxwinyëdë” (2 Tesalónikʉ 1:7, 8; Diˈibʉ Jatanʉp 11:18).

Ok, ta Jesukristë diˈib “Reyˈäjtp mä reyëty” dyajtunäˈäny ja kyutujkën mä tijatyë mëkˈäjtën myëdäjtypy (Diˈibʉ Jatanʉp 19:16). Yëˈë naytyuknipëkanëp parë kyaj yˈayoˈonbäädët ja naxwinyëdë jäˈäy diˈibë nety yˈaneˈempy. Yëˈë yajtunaambyë myëjää parë dyaˈoyëyaˈany ja tiempë extëm mbäädë naxwinyëdë jäˈäy ttukˈoyˈaty. Duˈunë Jyobaa tkuytyunäˈäny diˈibë kyäjpn tyukwandak: “Ngaxëbëts yëˈë nëë tuu mä tnixëëw nijëmëjtˈatyën, ets yëˈë ääy kepy oy tsuj tyëëmpˈattëty mëdiˈibë kamwinm tuˈuwinm yajpattëbën” (Levítico 26:4, Mʉgoxpʉ ja̱ noky mʉdiˈibʉ jyaayʉn Moisés). Nëjkxëbë jäˈäy tkojäˈändë jyëën tyëjk ets kyaj tsyëˈëgëyäˈändë ko ti ayoˈon myinët diˈib yajwindëgoyëp. Biiblyë twandaˈaky: “Tkojäˈändë jëën tëjk, ets dyajtunäˈändë; ets [...] tniˈibäˈän tkojäˈändë uubës ets tjëˈxäˈändë tyëëm” (Isaías 65:21).

Seguurë ko duˈun extëm mayë jäˈäy, mijts mjukyˈatäämp mä ja jembyë jukyˈäjtënë mä kyaj ti nyekyˈayoˈonbëjtäˈägäˈäny. ¿Ti mbäät xytyuny parë jam myajpäädët? Pënaty “kyaj tˈixyˈattë ja Dios es ni tkatundë kuentë ja oybyë ayuk” kyaj jam yajpäädäˈändë. Pääty jyëjpˈamëty ets tyam xynyijawët ti Dios tsyejpy ets xypyuwäˈägët extëm të ttuknibëjtäägë tˈanaˈamäˈänyë Naxwinyëdë. Yëˈë tsyejpy ets nˈixyˈäjtëm ets nmëmëdoˈojëm ja oybyë ayuk diˈib nyimaytyakypy ja Anaˈamën diˈib të tmoˈoyë Jesus.

Ets diˈib mbäät mas niˈigyë xytyuknijäˈäjëm, yëˈë ko nˈëxpëjkëmë Biiblyë, mä tnigajpxy tijaty mbäät nduˈunëm parë nëjkx njukyˈäjtëm mä ja lugäär diˈib seguurë, diˈib xymyoˈoyäˈänëm ja Anaˈamën. ¿Tiko xykyaˈˈanëëmë Jyobaa tyestiigë parë mdukniˈˈixëdët wiˈixë Biiblyë jyënaˈany? Yëˈëjëty mbudëkëyanëdëp. Mbäät mˈity seguurë ko pën mduumbyë mëjää parë xyˈixyˈatëdë Dios ets xymyëmëdowët, ta nëjkx yˈadëyë tyäˈädë yˈayuk diˈib yajpatp mä Proverbios 1:33: “Diˈibëts xymyëmëdoop, nëjkxëp yajpääty seguurë ets kyaj ti tmëmay tmëdäjët mët ko ttsëˈëgët ja ayoˈon”.