“Wijy mˈittët mët ëj.” (MAT. 26:38)

1-3 ¿Wiˈix tyëgooytyë ja apostëlëtëjk ja ux mä netyë Jesus yajmatsanë, ets wiˈix nnijäˈäjëm ko ok kyaj duˈun nyekyjäjttë?

OKPAWINMAY ti tuun jäjtë ja ux mä netyë Jesus yajmatsanë. Jam ojts nyëjkxtë Getsemaní mëdë yˈapostëlëty, tuˈugë lugäär diˈib yëˈë jyantsy yˈoyˈijxypy. Kanäk pekyë nety diˈib wyinmaapy ets anaytyuˈuktuuyë nety nyëjkxäˈäny nuˈkxtakpë (Mat. 26:36; Fwank 18:1, 2).

² Ko jyäjttë Getsemaní, ta Jesus twooy yëˈëyë Pedro, Santiago etsë Juan mä nyëjkxäˈäny anaytyuˈuktuuy. Ets mä kyanëjkxynyëm nuˈkxtakpë, ta tˈanmääyë tyäˈädë nidëgëëkpë: “Wëˈëmdë miits ja yää es wijy mˈittët mët ëj” (Mat. 26:38). Ko Jesus jyëmbijty, të nety myanäjxtäˈäytyë, ta jatëgok tˈanmääy: “Wijtë”. ¡Per majtskˈok jatëgok myanäjxtë! Ets ko waanë yˈijty, ta niˈamukë nyaygyumanäjxëdë ets myastuttë ja Jesus ets kyaktë (Mat. 26:38, 41, 56).

³ Per mëk tjäˈäwëdë ko kyanayaˈijtëdë wijy, ets ok, kyaj nyekynyaygyumanäjxëdë. ¿Tiko duˈun njënäˈänëm? Yëˈko mä Hechos o Apostʉlʉty tnimaytyaˈaky ko ok, ojts dyaktë tuˈugë oybyë ijxpajtën parë kyaj yajkumanaxëdë Diosë jyaˈa. Ets may ja Dios mëduumbë diˈib jukyˈäjttë mä tadë tiempë ojts tpanëjkxtë ja apostëlëtëjkë yˈijxpajtën. Mä tyäˈädë tiempë jëjpˈam ets kyaj ngumanäjxëmë Diosë jyaˈa (Mat. 24:42). Mä tyäˈädë artikulo nˈixäˈänëm tëgëk peky diˈib xytyukniˈˈijxëm ja apostëlëtëjkë yˈijxpajtën, diˈib yajmaytyakp mä Apostʉlʉty.

WIJY YˈIJTTË PARË KYÄJPXWÄˈKXÄˈÄNDË MÄ TYIMˈYAJKAXTË

4, 5. ¿Wiˈixë Pablo mët ja jyamyëëdëty tyuˈumoˈoyëdë Diosë myëjää?

⁴ Tim jawyiin, ja apostëlëty listë yˈijttë parë kyäjpxwäˈkxäˈändë mä tyimˈyajkaxtë. Tëgokë Jesus yëˈë  yajtuunë Diosë myëjää parë ttuˈumooy ja apostëlë Pablo mëdë myëguˈuktëjk mä ojts ttukˈyoˈoytyë ja it naxwinyëdë (Apos. 2:33). Min nˈokˈijxëm ti tuun jäjtë (käjpxë Apostʉlʉty 16:6-10).

⁵ Pablo, Silas mëdë Timoteo jamë nety të tsyoondë Listra diˈib yajpatp Galacia nyääxoty. Ko nyajxy tuk xëë majtsk xëë, ta tˈabattë ja romanë jäˈäyë tyuˈu diˈib ojts myënëjxëdë nuˈun ja yˈit lyugäärë Asia. Ko tpëjktë tyäˈädë tuˈu, yëˈë nety parë milˈamë jäˈäy ttuknijawëyäˈändë ja Kristë mäjaty ja nax käjpn. Per kyaj jam yajnaˈijxtë, pes mä bersikulo 6 jyënaˈany: “Pääblë mëdë jyamyëëdëty jyakäjxwäˈxandë ja Diosë yˈayuk mä nyaxwinyëdë Asyë, per ja espiritë santë kyaj tkupejky. Net nyäjxtë mä nyaxwinyëdë Frijˈyë esë Galasyë”. Kyaj nnijäˈäjëm tiko kyaj yajnaˈijxtë ets kyäjpxwäˈkxtët mä ja nyaxwinyëdë Asia. Tyäˈädë xytyukˈijxëm ko Jesus mët yëˈëgyëjxmë Diosë myëjää, wiinktsoo nety dyajnëjkxäˈänyë Pablo mët ja jyamyëëdëty.

6, 7. 1) ¿Ti tuun jäjtë ko netyë Pablo mët ja jyamyëëdëty tyëkëyanëdë Bitinia? 2) ¿Ti net tyuundë, ets wiˈix wyimbëtseemy?

⁶ ¿Mä net ojts nyëjkxtë Pablo mët ja jyamyëëdëty? Bersikulo 7 jyënaˈany: “Es jyäjttë mä tsyibäˈän ja Misyë. Esë Pääblë twinmääy es tyëkëyaˈany mä nyaxwinyëdë Bitinyë, per ja Jesusë [myëjää] kyaj tkupejky”. Kom kyaj nety të yajnaˈixtë parë kyäjpxwäˈkxtët Asia, ta Pablo mëdë jyamyëëdëty tpëjktë wiink tuˈu parë tkäjpxwäˈkxäˈändë ja oybyë ayuk mä yˈit lyugäärë Bitinia. Per ko nety tmëwingoonëdë ja lugäär, ta jatëgokë Jesus dyajtuunyë Diosë myëjää parë kyaj jam kyäjpxwäˈkxtët. ¡Kyaj tjaygyujkëdë tiko! Nyijäˈäjëbë nety ti kyäjpxwäˈkxtëp ets wiˈix ttundët, per kyaj nety tnijawëdë mää. Mbäät njënäˈänëm ko nëgoobë jyäjttë Asia. Ta net ojts jyanëjkxtë Bitinia, per nan kyaj jam yajnaˈijxtë. ¿Waˈandaa yˈëxtëkëwäˈktë? ¡Kyaj!

⁷ ¿Ti net tyuundë? Mä bersikulo 8 jyënaˈany: “Net nyäjxtë kajaa Misyë nyääxoty, es jyënäjktë mä Troës käjpn”. Waˈanë tyäˈädë naa tëgatsy tˈijxtë, pes ja nety ttukˈyoˈoyäˈändë 563 kilometrë, ets tninäjxtë kanäägë käjpn axtë jyäjttë Troas, mä ojts tsyoondë parë ojts nyëjkxtë Macedonia. Ets jamnëm ojts yˈawäˈätsy ja jyënˈää tyëjkˈää parë kyäjpxwäˈkxtët. Mä bersikulo 9 tnigajpxy ti tuun jäjtë: “Es ja kootsë Pääblë yˈijxmäˈty, es tˈijxy tuˈugë Masedonyë yetyëjk tyanë es myënuˈkxtaˈagyëty: Tunë mayˈäjtën, min Masedonyë es xypyudëkëdëts”. Taanëmë Pablo tnijäˈäjë mää kyäjpxwäˈkxët. Ta netyë tyëjkëdë barkoty parë ojts nyëjkxtë Macedonia.

8, 9. ¿Ti xytyukniˈˈijxëm mä ja Pablo ojts jyëdity?

⁸ ¿Ti tyäˈädë xytyukniˈˈijxëm? Pes ko Diosë myëjää ja tyëjkë tuumbë ko netyë Pablo të tsyoony ets nyijkxy Asia. Ok, ta Jesus tˈanmääyë Pablo ti tyundëp ko nety jyäˈtanëdë Bitinia. Tim ok, ta jatëgokë Jesus yˈanmääyëdë ets nyëjkxtët Macedonia ko nety të jyäˈttë Troas. Mä tyäˈädë tiempë, Jesus diˈib nyigëbäjkˈäjtypyë naymyujkën, nan mbäät duˈun xytyuˈumoˈoyëm (Kol. 1:18). Extëm nˈokpëjtakëm, waˈan njatunäˈänëm prekusoor o mä niˈigyë tyëgoyˈatyë käjpxwäˈkxpë. Per mbäädë Jesus xytyuˈumoˈoyëm mët yëˈëgyëjxmë espiritë santë, ko nety të nduˈuntsondakëm. ¿Tiko? Nˈokpëjtakëm tuˈugë ijxpajtën. Tuˈugë tsyofeer kyaj mbäät twiˈtminy twiˈtxëpyë kyarrë pën kyaj jawyiin dyajˈyoˈoytsyoony. Nanduˈun ëtsäjtëm, kyaj mbäädë Jesus xytyuˈumoˈoyëm pën kyaj nduˈunëmë mëjää ets nduˈuntsondakëm diˈib të nduknibëjtakëm.

⁹ ¿Ets pën kyaj netyë nˈijxëm wiˈix ja nduunkˈäjtëm wyimbëtsemy? ¿Yëˈë nety yˈandijpy ko kyaj xytyuˈumoˈoyëmë Diosë myëjää? Nˈokjamyajtsëm ko Pablo nan ojts nyëˈëˈaduky tyuˈuˈaduky. Per yˈëxtääy ja nëˈë tuˈu axtë ko ojts tpääty mä tyunët. Nanduˈun ëtsäjtëm, pën kyaj jabäät nduˈuwëˈëmëm,  mbäät yˈawäˈätsyë nëˈë tuˈu ets mas niˈigyë nduˈunëmë Diosë tyuunk (1 Kor. 16:9).

OJTS XËMË TMËNUˈKXTÄˈÄKTË DIOS

10. ¿Wiˈix nnijäˈäjëm ko jëjpˈam ets nuˈkxtakëm parë kyaj nnaygyumanäjxëm?

¹⁰ Min nˈokˈijxëmë myëmajtsk pekypyë ti xytyukniˈˈijxëm ja Jesusë yˈëxpëjkpëty parë nnayaˈijtëm wijy: ja Dios mëduumbëty diˈib mä primer siiglë xëmë ojts tmënuˈkxtäˈäktë Dios (1 Peed. 4:7). Parë kyaj ngumanäjxëmë tyuunk, jëjpˈam ets xëmë nmëgäjpxëmë Jyobaa. Mä netyë Jesus kyayajmatsynyëm jam Getsemaní, ta tˈanmääy ja nidëgëëkpë yˈapostëlë: “Wijtë es käjxtäˈäktë [o nuˈkxtäˈäktë]” (Mat. 26:41).

11, 12. ¿Tiko Herodes tpajëdijttsondaky pënaty myëbëjktëbë Jesus ets ja Pedro, ets wiˈix ttuuny?

¹¹ Pedro diˈibë nety jam yajpatp, ojts tˈixy ok, ko nuˈkxtakën myëdäjtypyë mëkˈäjtën (käjpxë Apostʉlʉty 12:1-6). Extëm myaytyaktsoonyë kapitulo 12, ja nˈijxëm ko ja rey Herodes ojts tpajëdijttsondaˈaky pënaty myëbëjktëbë Jesus parë yˈaxäjëdët ja judiyëtëjk. Waˈan tnijäˈäjë ko Santiago yëˈë tuˈugë Jesusë yˈapostëlë ets ko yëˈë nety mëët të jyëdittë. Pääty mä bersikulo 2 jyënaˈany: “[Dyaˈoˈky] mët ja espäädë”. ¡Jantsy mëk tjäˈäwëdë ja myëguˈuktëjk ko tˈijxtëgooytyë tyäˈädë apostëlë diˈibë nety mëk tsyojktëp!

¹² ¿Ti netë Herodes tyuun? Mä bersikulo 3 jyënaˈany ko Herodes tˈijxy ja judiyëtëjk ttukjotkëdäˈäktë ko duˈun yˈadëˈëtsy, ta ojts tniˈanaˈamë “es yajtsumët ja Peedrë”. Perë tyäˈädë apostëlë mët ja myëguˈuktëjk të netyë Dios yˈokˈyajpëtsëëmëbë pujxndëgoty (Apos. 5:17-20). Herodes waˈanë nety tnijawë tyäˈädë. Pääty dyajtäˈtspejky ja Pedro parë kyaj kyaˈagët. Mä bersikulo 4 tmaytyaˈaky ti tyuun: “Ko yajmäjtsy ja Peedrë, net yajpëjtaky pujxndëgoty es kyuentˈatyëty taxk peky ja soldäädëty. Ja wyinëty nidëgekyë nimäjmokx tuˈuk diˈibë kuentˈäjtëdëp nimäjtaxkaty. Eroodës yëˈë jyudaampy ja Peedrë ko ja paskë xëë nyaxët”. ¡Okpawinmay! Herodes ojts tniˈanaˈamë ets mëdë kadenë yajtukmëwëënët majtskë soldäädë, ets ttuknipejky 16 diˈib nayajtëgatsëdëp parë tkuentˈatët ja Pedro xëëny koots ets kyaj kyaˈagët. Herodes duˈunë nety wyinmay ko ja dyajpëtsëmäˈäny mä ja Paskë xëë parë ttuknikäjpxpatäˈänyë oˈkën ets ja nax käjpn jyotkujkˈattët. Per ¿ti nety mbäät ttundë ja Dios mëduumbë mä tyäˈädë jotmay?

13, 14. 1) ¿Ti tyuundë ja Dios mëduumbë ko Pedro yajtsuumy? 2)  ¿Ti xytyukniˈˈijxëm ko nnijäˈäjëm ti tyuundë ja Dios mëduumbë?

¹³ Niˈamukë ja Dios mëduumbë nyijäˈäjëbë nety ti tyundëp. Mä bersikulo 5 jyënaˈany: “Es dëˈën ja Peedrë yˈijty pujxndëgoty jantsy kuentˈaty, per ja mëbëjkpëtëjk jyantsy kyäjxtaktë es ja Dios dyajtsoˈogët ja Peedrë”. Extëm nˈijxëm, ja mëbëjkpëtëjk ojts tjantsy nyinuˈkxtäägëdë ja myëguˈuk Pedro. Oyë nety ja Santiago të yˈooky, kyaj myëmadakëdë ja jotmay ets nan kyaj wyinmääytyë ko kyaj tsyobääty ja nuˈkxtakën. Nyijäˈäjëbë nety ko Jyobaa myëdoobyë nyuˈkxtakën pënaty mëduunëp ets ko yˈatsoojëmbijtypy ko yaˈˈamdoy diˈib tuˈugyëp mëdë tsyojkën (Ebre. 13:18, 19; Sant. 5:16).

¹⁴ ¿Ti xytyukniˈˈijxëm ko nnijäˈäjëm ti tyuundë ja Dios mëduumbë? Ko parë nnayaˈijtëm wijy, jëjpˈam ets nuˈkxtakëm, per kyaj jeˈeyë ëtsäjtëm naynyinuˈkxtakëm, nanduˈun ninuˈkxtakëmë nmëguˈukˈäjtëm (Éfe. 6:18). ¿Jam pën xynyijawë diˈib yajnäjxypy amay jotmay? Extëm ko nmëguˈukˈäjtëm nyibëdëˈëgëdë jäˈäy, ko gobiernë dyajkubokyë Diosë tyuunk o ko tijaty yˈayoˈonbëjtaˈaky. ¿Këdii oyxyëp ko ninuˈkxtakëm? Waˈan nanduˈun nnijäˈäjëm ko ta näägë nmëguˈukˈäjtëm diˈib pyattëbë jotmay diˈib kyaj wiink jäˈäy tnijawë,  extëmë familyë diˈib kyaj oy yˈittë, tmëdatyë yuu päˈäm o diˈib kyaj oy nyayjawëty. Oy ko nwinmäˈäyëm pënaty mbäät ninuˈkxtakëm ko nmëgäjpxëmë Jyobaa diˈib “m[y]ëdooˈijtypyë nuˈkxtakën” (Sal. 65:2).

15, 16. 1) ¿Wiˈixë Diosë yˈanklës dyaˈˈawäˈätspëtseemyë Pedro? (Ixë dibujë.) 2) ¿Tiko xymyëjämoˈoyëm extëmë Jyobaa dyaˈˈawäˈätspëtseemyë Pedro?

¹⁵ Per ¿wiˈix ja Pedro jyajty? Mä nety ja tuk tsuˈum yˈakmäˈäjäˈäny pujxndëgoty, ta ojts myanaxy mä ja nimajtskpë soldäädë diˈibë nety kuentˈäjtëp, ta tyuun jyäjtë diˈib mëjˈixy mëjmëdoy (käjpxë Apostʉlʉty 12:7-11). Ajotkumonë ja pujxndëjk jyantsy tyukjäjëtyaay. Ets tyëjkë tuˈugë Diosë yˈanklës ets ja soldäädëty kyaj tˈijxy ja anklës, ta dyujxy mëktaˈaky ja Pedro. Ets ta ja kadenë kyäˈädääy diˈibë nety të yajtukëxotsy oyë nety täˈtspeky yˈity. Ta ja anklës wyoobëtsëëmë pujxndëgoty ets soldäädë winduuy yajmënäjxy, ets ko jyäjttë mä ja mëj pujxndëjkˈää, ta “këˈëm yˈawatsy”. Ko pyëtsëëmdë tuˈääy, ta ja anklës tyëgooy. ¡Të nety ja Pedro yˈawäˈätspëtsemy!

¹⁶ Mëjwiin kajaa dyajkëktëkë mëbëjkën ko nnijäˈäjëm wiˈixë Jyobaa tmëdatyë mëjää parë dyaˈˈawäˈätspëtsemy pënaty mëduunëp. Ets oy tyam kyaj nˈawijxëm ets xyaˈˈawäˈätspëtsëˈëmëm mëjˈäjtëngyëjxm, ijtëm seguurë ko duˈunyëm tpudëkëyaˈanyë nyax kyäjpn (2 Cró. 16:9). Yëˈë xymyoˈoyëmë myëjää parë nmëmadakëm oytyim diˈibëtyë jotmay (2 Kor. 4:7; 2 Peed. 2:9). Ets tim tsojk mët yëˈëgyëjxmë Jesus dyajjukypyëkäˈäny miyonkˈamë oˈkpë diˈib yajpattëp extëmxyëp yˈittë pujxndëgoty (Fwank 5:28, 29). Ko nmëbëjkëm tijatyë Jyobaa të twandaˈaky xymyëjämoˈoyëm parë nwinguwäˈkëmë jotmay.

KÄJPXWÄˈKXTË OY TI JOTMAY TPATTË

17. ¿Ti oybyë ijxpajtën yäjkë Pablo ko tjotmooyë Diosë tyuunk ets ttukjotëgooy?

¹⁷ Myëdëgëk peky diˈib xytyukniˈˈijxëm ja apostëlëtëjk parë nnayaˈijtëm wijy, yëˈë ko ojts kyäjpxwäˈkxtë oy ti jotmay tpattë. Parë nnayaˈijtëm wijy, jëjpˈam ets njotmoˈoyëmë Diosë tyuunk ets nyaˈijtëm winmäˈänyoty ko tyäˈädë tiempë niˈigyë kyuxuˈtsënë. Pablo ojts dyaky tuˈugë oybyë ijxpajtën ko nyaygyëyäjkë mä ja Diosë tyuunk, kajaa it kajaa lugäär ojts ttukˈyoˈoy ets dyajnaxkëdaky kanäägë naymyujkën. Ets oy wiˈixëm twinguwäˈkë ayoˈon jotmay, xëmë ttukxondaky ja Diosë tyuunk ets ttukjotëgooy (2 Kor. 11:23-29).

18. ¿Ti Pablo tyuun parë mbäät kyäjpxwaˈkxy mientrësë nety yˈity tsumy Roma?

¹⁸ Min nˈokˈijxëm mä Apostʉlʉty kapitulo 28, wiˈixë Pablo yˈakˈyajnimaytyaˈaky. Jamë netyë Pablo të jyaˈty Roma parë twinguwäˈägëyaˈany ja anaˈambë Nerón. Kuentˈatyë nety yˈity, ets waˈan yajtukëtsuˈumë tuˈugë soldäädë. Per kyaj jyamˈäjty nituˈugë kadenë diˈib yaˈˈamoonë, xëmë ojts tˈëxtäˈäyë winmäˈäny wiˈix kyäjpxwäˈkxët  (käjpxë Apostʉlʉty 28:17, 23, 24). Ko nyajxy tëgëk xëë, ta tnigajxë ja judiyëtëjk diˈib mëj ijttëp parë tmëtmaytyäˈägäˈäny. Ta net twinˈijxy tuˈugë xëë parë niˈigyë mëët yˈaktimaytyäˈäktët. Bersikulo 23 jyënaˈany: “Net tpëjtaktë tuˈugë xëë es jyäjttë may ja jäˈäy mä yëˈë Pablo. Es jepyëp tsyondaky es axtë kyutsuˈujë Pääblë tnigajxy ja Diosë kyutujkën, es dëˈën ttukˈijxtë ja jäˈäy pën wiˈix jyënandë yëˈë Moisés es ja Diosë kyugäjxpëty es ja jäˈäy ttukmëbëktët ko yëˈë Jesus yëˈë dëˈën ja Kristë”.

19, 20. 1) ¿Tiko yˈoybyëtseemy extëmë Pablo ojts kyäjpxwaˈkxy? 2) ¿Ojtsë Pablo axëëk nyayjawëty ko kyaj niˈamukë jäˈäy ojts tˈaxäjëdë ja oybyë ayuk?

¹⁹ ¿Tiko yˈoybyëtseemy extëmë Pablo ojts kyäjpxwaˈkxy? Min nˈokˈijxëm taxk peky mä bersikulo 23. 1) Yëˈë nyimaytyak ja Diosë yˈAnaˈam Kyutujkën etsë Jesukristë. 2) Nyimaytyak tijaty extëm mbäädë jäˈäy tmëbeky. 3) Yëˈë tyukkäjpxpajtë Biiblyë. 4) Kyaj ojts tˈëxtäˈäy diˈib këˈëm tyukˈoyˈatëp, pes jopyëp tyuuntsondaky axtë kyutsuˈujë. Pablo jantsy oy tjanimaytyaky ja tëyˈäjtën, per kyaj niˈamukë jäˈäy ojts tˈaxäjëdë ja oybyë ayuk. Pes mä bersikulo 24 jyënaˈany: “Es nijaˈajëty tkupëjktë extëm ja Pääblë jyënany, per yëˈë wiinkpë kyaj tmëbëjktë”. Pääty jamyë nyaynyiwäˈkëdë ets ta ojts tsyoˈondääynyëdë.

²⁰ ¿Ojtsë Pablo axëëk nyayjawëty ko kyaj niˈamukë jäˈäy ojts tˈaxäjëdë ja oybyë ayuk? Kyaj. Pes mä Apostʉlʉty 28:30, 31 jyënaˈany: “Es ja Pääblë yˈijty majtsk jëmëjt kaˈpxy mä tyëjk ajuytyiky es tˈaxäjë nidëgekyë diˈibë nimiinëp es tkäjxwaˈxy wiˈix ja Diosë kyutujkën. Es ttukˈëxpëktë nandëˈën mët yëˈëgyëjxm ja Nintsënˈäjtëm Jesukristë. Nipën kyaˈˈatsipyëty”. Duˈun jantsy oy kyugëxë tyäˈädë maytyaˈaky diˈib miimp mä Apostʉlʉty.

21. ¿Ti xytyukniˈˈijxëmë Pablo yˈijxpajtën oyë nety kuentˈaty yˈity mä tuˈugë tëjk?

²¹ ¿Ti xytyukniˈˈijxëmë Pablo yˈijxpajtën ko nety yˈity kuentˈaty? Ko kyaj ojts yajtuˈudukyëty oyë nety mbäät kyanekykyäjpxwaˈkxy tëjkm dëjkm, myëtmaytyak pënaty timninëjkxë. Tyam nanduˈun jyaty, mayë nmëguˈukˈäjtëm yˈittë pujxndëgoty mët ko tmëdundë Dios, per xëmë jotkujk nyayjawëdë ets kyäjpxwäˈkxtë oy duˈun yajpäättë. Ets may kyaj mbäät nyëjkxtë käjpxwäˈkxpë mët ko të myëjjäˈäyënë o mët ko pyëk yˈixëdë ets kyaj mbäät tyëjkpëtsëmdë. Per duˈunyëm ttsoktë Jyobaa. Myëtmaytyaktëbë doktoor, pënaty kuˈijxëdëp etsë wiinkpë jäˈäy. Tyäˈädë nmëguˈukˈäjtëm jyantsy tsyojkënyëˈäjttëp tnimaytyäˈägäˈändë Diosë yˈAnaˈamën. ¡Mëjwiin kajaa xypyudëjkëmë yˈijxpajtën!

22. 1) ¿Diˈibë ëxpëjkpajn mbäät xypyudëjkëm parë mas niˈigyë ndukˈoyˈäjtëm diˈib yajnimaytyakp mä Apostʉlʉty? (Ixë rekuäädrë diˈib anëkëjxy.) 2) ¿Ti mbäät nduˈunëm mientrës jyaˈty ja tiempë mä jyëjpkëxanë tyäˈädë axëëkpë jukyˈäjtën?

²² ¿Këdii mëjwiin kajaa xymyëjämoˈoyëm ko të nnijäˈäjëm tuk peky majtsk peky tijaty tyuundë ja apostëlëty ets ja Dios mëduumbëty diˈib yajmaytyakp mä Apostʉlʉty? Mientrës jyaˈty ja tiempë mä jyëjpkëxäˈänyë tyäˈädë axëëkpë jukyˈäjtën, nˈokpanëjkxëm ja yˈijxpajtënë mä wiˈix dyaˈijxëdë jotmëkˈäjtën ets wiˈix tjotmooytyë Diosë tyuunk. Pes nitii tuunk duˈun kyamëjëty extëm ko ngäjpxwäˈkxëm ja oybyë ayuk diˈib nyimaytyakypyë Diosë yˈAnaˈamën (Apos. 28:23).

[Yajtëˈëwën]

[Rekuäädrë diˈib miimp mä pajina 17]

“NINÄˈÄNËMTSË NETY DUˈUN NGAˈIXYË TADË LIIBRË APOSTɄLɄTY EXTËMËTS TYAM NˈIXY”

Ko tuˈugë sirkuitë tkäjpxtääyë tadë liibrë “Testimonio cabal” del Reino de Dios, ta jyënany: “Ninäˈänëmtsë nety duˈun ngaˈixyë tadë liibrë Apostʉlʉty extëmëts tyam nˈixy. Tëjëts jantsy kanäkˈok njakajpxy, per seerë kudëˈkxyëts të nduˈuyoˈoy ets mëdëtsë nwinˈijxn diˈib jääm jok yajtukˈijxp. Tyamnëmtsë net nˈixy yajxon extëmxyëbëts xykyudëˈkxy xykyujäjˈyë xëë”.

[Letrë diˈib miimp mä dibujë mä pajina 16]

Tuˈugë anklës dyajpëtseemy ja Pedro mä ja mëj pujxndëjkˈää