Abrahán: myëdäjtë mëbëjkën
Abrahán koots tpatˈixy ja mëtsäˈä ets tjamyetsy ko Dios tyukwandakë myayëyaˈany ja tyëëm yˈääts extëmë myëtsäˈä (Génesis 15:5). Parë yëˈë, ko tˈixy ja mëtsäˈä kyaj jeˈeyë tyukjamyetsyëty ja Jyobaa wyandakën, nanduˈunën ko seguurë tkuytyunäˈäny. Pes pënë Jyobaa ojts tmëmadaˈaky dyajkojët tukëˈëyë tijaty ijtp tsäjpotm, ¿kyaj nety mbäädë Abrahán mëdë Sara tmoˈoy tuˈugë yˈuˈunk? ¡Jantsy oyë ijxpajtën dyajky!
¿TI YˈANDIJPY MËBËJKËN? Biiblyë jyënaˈany ko jäˈäy diˈib myëdäjtypyë mëbëjkën, yëˈë diˈib jyantsy myëbejkypy diˈib kyaj tˈixy, mët ko tam tiko tmëbeky. Pääty, pënaty myëbëjktëbë Dios, seguurë yˈity ko Jyobaa yaˈˈadëwaampy tijaty të twandaˈaky, duˈunxyëp extëm të yˈadëëdäˈäy.
¿WIˈIXË ABRAHÁN DYAˈIJXË MËBËJKËN? Yajnigëxëˈk ko myëbëjk tijatyë Dios tukwandakë. Mëbëjkëngyëjxm tnikeky ja nyax kyäjpn mä nety të myaxuˈunkˈaty, ets ijt seguurë ko Jyobaa tyukˈixäˈänyëtyë wiinkpë nax. Mëbëjkëngyëjxm tsyënääyëdijty Canaán, ets ijt seguurë ko ja tyëëm yˈääts tjaˈˈatäˈäny ja it lugäär. Ets nan mëbëjkëngyëjxm tmëmëdooyë Dios ets tjatukwintsëˈëgëyany ja Isaac, seguurë yˈijty ko Jyobaa mbäät dyajjukypyeky parë dyaˈˈadëwët ja wyandakën (Ebreeʉsʉty 11:8, 9, 17-19).
Jam ja wyinmäˈäny tpëjtaky mä tijatyë nety jyëjpˈijxypy ets kyaj mä tijaty të tnikeˈeky. Waˈanë Abrahán mëdë Sara mas oyë nety ja jyukyˈäjtënë dyajnaxtë jam Ur ets kyaj dyuˈunëty Canaán. Yëˈëjëty kyaj “twinmäˈänyˈ[äjttë] ja nyax kyäjpn mä të tsyoondë” (Ebreeʉsʉty 11:15). Jamë wyinmäˈäny tpëjtaktë mä wiˈixë Dios kyunuˈkxäˈänëdë mët ja tyëëm yˈääts (Ebreeʉsʉty 11:16).
¿Nëgoobëdaa Abrahán tmëbejkyë Dios? Kyaj. Pesë Jyobaa kyuytyuundääy tuˈuk tuˈugë wyandakën. Ja tyëëm yˈääts ojts jyantsy myayë, diˈib ok jäjt ja nasionk diˈib Israel. Ja israelitëty jam tsyënääytyaknbëjktë Canaán, ja naxwinyëdë diˈibë nety të yajtukwandaˈagyë Abrahán (Josué 11:23).
¿TI XYTYUKNIˈˈIJXËM? Ko mbäät nmëbëjkëm ko Jyobaa yaˈˈadëwaampy tijaty të twandaˈaky. Oyë naxwinyëdë jäˈäy wyinmaytyët ko tsip duˈun tyun jyatëdët, ëtsäjtëm, tsojkëp nmëbëjkëm ko “Dios mbäät ttuny tëgekyë” (Matewʉ 19:26).
Yˈijxpajtën Abrahán nan yëˈë xytyukniˈˈijxëm ets ja winmäˈäny nbëjtakëm mä tijatyë njëjpˈijxëm ets kyaj mä tijaty të nmastutëm. Yëˈë diˈib tyuumbyë Jason, tuˈugë yetyëjk diˈib të xyujxtäˈäyë nyiniˈkx kyëbäjk mët ko tmëdaty tuˈugë mëk päˈäm diˈib wanaty wanaty yajwindëgooyëp. Yëˈë jyënaˈany: “Näˈäty yëˈëjëts nwinmaapy tijatyëts kyaj mbäät nˈoktuunë, nwinˈayoobyëts diˈib kyaj tyim mëjwiin tyim kajaajëty, extëm nmënanëdëtsë nnëdoˈoxy Amanda”.
Perë Jason myëbejkypy ko Jyobaa yaˈˈadëwaampy tijaty të twandaˈaky, extëm ko dyajjëmbitäˈänyë Naxwinyëdë extëm tuˈugë lugäärë tsujpë, dyakäˈänyë jukyˈäjtën winë xëë etsë oyˈäjt mëkˈäjtën (Salmo 37:10, 11, 29; Isaías 35:5, 6; Diˈibʉ Jatanʉp [Apocalipsis] 21:3, 4). * Jason jyënaˈany: “Nduumbyëtsë mëjää parëts njamyetsy ko wingoomp tuˈugë oybyë jukyˈäjtën ets ko tim tsojk jyëjptëgoyanë moˈon tujkën, mëkxaj okxajën, këjx anuˈkxën ets kyaj pën axëëk nyekynyayjawëyaˈanyëty”. ¡Mëjwiin kajaa tmëdatyë mëbëjkën extëmë Abrahán!
[Notë diˈib noky ëxˈääy]
^ parr. 9 Jap mas niˈigyë yajnimaytyaˈaky mä wiˈixë naxwinyëdë jyëmbitäˈäny extëm tuˈugë it lugäärë tsujpë mä liibrë ¿Ti tëyˈäjtën jantsy tukniˈijxëbë Biiblyë?, kapitulo 3, 7 etsë 8, diˈib yajpëtsëëmdëbë Jyobaa tyestiigëty.
