Abrahán pyoˈkxy wyitëjk patkëˈëy mët ko jyantsy yˈany. Ko tˈijxmiiny tëgëëgë jabyoˈkxy. * Ta pojënë ojts tninëjkxy ets tˈanmääy parë tyuˈuboˈkxtët. Oy tˈawäˈänë tuk pedasë tsäjpkaaky, ojts yajxon dyajkay dyaˈuuktë, tmooyë an tsäjpkaaky, mantekiyë, letsyë etsë tsuˈutsy. Ko duˈun dyajkääy dyaˈuktë, ta dyaˈijxë ko jantsy oyjyaˈay, per nanduˈun ko jantsy tudaˈaky, extëm nˈixäˈänëm (Génesis 18:1-8).

¿TI YˈANDIJPY TUDAˈAKYˈÄJTËN? Tuˈugë jäˈäy diˈib tudaˈaky, yëˈë diˈib kyaj nyaymyëjkugajpxyëty ets kyaj nyayjawëty mëj këjxm. Diˈib tudaˈaky, yˈëxkajpy ko winwäˈknäjxëbë wiink jäˈäy (Filipʉs 2:3). Nan kyupejkypy ko pën kyäjpxwijˈyëty ets tyukmëduumbyë myëguˈuk diˈibë wiink jäˈäy kyaj ttunäˈänët.

¿WIˈIXË ABRAHÁN DYAˈIJXË TUDAˈAKYˈAT? Ko tmëduunyë wiinkpë xondaˈakyˈää xondaˈakyjyot. Pes extëm të yajmaytyaˈaky mä të tsyondaˈagyë tyäˈädë artikulo, jyënaˈany ko jantsy jeˈeyë tˈijxpaty ja nidëgëëkpë yetyëjk, ta tyëjkë tuumbë. Ja nyëdoˈoxy, Sara, peˈtypy ojts dyaˈoyë ja kaaky tojkx. Etsë Abrahán kyaj jeˈeyë twoodë kaabyë, ojtsën pëyeˈegyë tninëjkxy tuˈugë tsäjpkää parë dyaˈoˈky etsë net tˈabëjkë ja käˈäy ukën. Kyaj ojts ttukˈaneˈemy ja tyuumbëtëjk, yëˈë këˈëm ojts ttuny. Abrahán mëj nyayjäˈäwë ko tmëduuny ja wiinkpë.

Ojts tkupeky wiˈix yaˈˈanmääy. Mä Biiblyë kyaj nëgoo tmaytyaˈaky wiˈixë Abrahán mëdë Sara ojts kyäjpx myaytyäˈäktë. Per myaytyakypy majtskˈok ko Abrahán ojts ttuny extëm ja Sara yˈanmääyë (Génesis 16:2; 21:8-14). Ets tëgok “jantsy axëëk”  tmëdooy wiˈix yˈanmääyë. Per ko Jyobaa yˈanmääyë ko oy extëmë Sara jyënaˈany, ta Abrahán yujy tudaˈaky tkupeky ets ttuuny.

¿TI XYTYUKNIˈˈIJXËM? Pën jantsy ijtëm yujy tudaˈaky, ta xondaˈakyˈää xondaˈakyjyot nmëduˈunëmë nmëguˈukˈäjtëm. Ets nëjkxëp nˈijtëm jotkujk ko ja nmëguˈukˈäjtëm oy nyajnayjäˈäwëm.

Extëm nˈatsoˈojëm ko pën xyˈanmäˈäyëm ti mbäät nduˈunëm, ja nyigëxëˈëgäˈäny pën ijtëm yujy tudaˈaky. Diˈib mas oy, yëˈë ngupëjkëm wiˈix nyaˈˈanmäˈäyëm ets kyaj njëjpkugäjpxëm mët ko kyaj të nmëwinmäˈänybyatëm (Proverbios 15:22). Pënaty nyikëjxmˈäjttëbë tuunk, mbäät niˈigyë pyudëkëdë ko duˈun jyaˈayˈattët. Tuˈugë superbisoor diˈib xyëˈäjtypy John, jyënaˈany: “Nuˈunëts kujk kanäk jëmëjt nduny, yëˈëjëts të njaty ko tuˈugë wintsën diˈib oy tuump, yëˈë diˈib kyaj pën tsyëˈëgëty parë yˈanëˈëmxëdët wiˈix wyinmay”. Ets ta yˈakjënäˈäny: “Tsojkëbë tudaˈakyˈat parë ngupëjkëm ko mas oy extëm wyinmay ja jäˈäy diˈib naxypyë kutujkën myëdäjtypy. Nituˈugë jäˈäy mbäät tkamëwinmäˈänybyatäˈäy wiˈix tijaty oy yajtunët, ni ja wintsën”.

Pën ntsojkëm etsë Jyobaa xytyukjotkëdakëm extëmë Abrahán, tsojkëp ngupëjkëm wiˈix pën xyˈanmäˈäyëm ets ndukmëduˈunëmë nmëguˈukˈäjtëm tijaty kyaj mëj nyaxy. Nˈokjamyajtsëm ko “Dios myëtsipˈäjtypy ja diˈibë mëj patëp, per pyudëjkëp pënaty yuunk naxypy jäˈäyˈäjttëp” (1 Peedrʉ 5:5).

[Notë diˈib noky ëxˈääy]