Nˈokˈijtëm wijy extëmë Jesus nyayaˈijtë
“Juuky ijtkëx y mmëbëjktsoogëx jaˈa Dios.” (MAT. 26:41, Nuevo Testamento de Mazatlán [NTM])
¿WIˈIX MˈATSOWËT?
¿Wiˈix mbäät nyajnigëxëˈkëm mä nuˈkxtakëm pën nnayaˈijtëm wijy o pën kyaj?
¿Wixaty nyaˈijxëm ko nnayaˈijtëm wijy mä ngäjpxwäˈkxëm?
¿Tiko jyëjpˈamëty ets nnayaˈijtëm wijy ko nwinguwäˈkëmë amay jotmay, ets wiˈix mbäät nduˈunëm?
1, 2. 1) ¿Ti mbäät nnayajtëˈëwëm mä Jesusë yˈijxpajtën ko nyayaˈijtë wijy? 2) ¿Mbäät tuˈugë pokyjyaˈay tpanëjkxë Jesusë yˈijxpajtën diˈib wäˈäts jäˈäy? Nimaytyäˈäk mët tuˈugë ijxpajtën.
WAˈAN nnayajtëˈëwëm: “¿Mbäät nnayaˈijtëm wijy extëmë Jesus?”. Waˈan nwinmäˈäyëm ko kyaj mbäät mët ko Jesus wäˈäts jäˈäy ets näˈäty nyijäˈäjë ti miin këdakp, axtë diˈib tëgoyˈäjtp kanäk mil jëmëjt. Per ¿jëjpˈamë netyë Jesus nyayaˈitëdët wijy? (Mat. 24:37-39; Ebre. 4:15.) Min jawyiin nˈokˈatsoˈojëmbijtëmë tyäˈädë majtskpë yajtëˈëwën parë njaygyujkëm tiko jyëjpˈamëty nnayaˈijtëm wijy.
2 ¿Mbäät tuˈugë wäˈäts jäˈäyë yˈijxpajtën pyudëkëtyë pokyjyaˈay? Mbäät. Pes tuˈugë oybyë maˈestrë mbäät xytyukniˈˈijxëm tijaty ets nbanëjkxëmë yˈijxpajtën. Nˈokpëjtakëm tuˈugë ijxpajtën: Tuˈugë jäˈäy tˈëxpëjktsondaˈaky wiˈix ttukkowëdë gitarrë. Tim jawyiin ninuˈun tkajaty, ta tˈëxpëjkˈadëˈëtsy ets kyoodaˈaky. Ets parë niˈigyë tjatët, ta yajxon tˈixy wiˈix ja myaˈestrë kyoy pes tyukjäjtypy yajxon. Yˈijxypy yajxon wiˈix ja myaˈestrë yˈuˈunyë, wiˈixë kyëˈë tpëjtaˈaky ets wiˈix dyajˈyuˈkxy. Ta wanaty wanaty tjaty wiˈix dyajˈyuˈkxëdë kyëˈë parë ttukkowët ja gitarrë. Ko tniˈˈijxtuˈuty wiˈix ttuny ja myaˈestrë, ta mas niˈigyë tjaty kyowët. Nanduˈunë Dios mëduumbë, tyuumpy xëmë mëjää parë niˈigyë tmëmëdoyë Jesus ets tpanëjkxë yˈijxpajtën.
3. 1) ¿Wiˈixë Jesus jyënany diˈib xytyukˈijxëm ko tsojkëbë nety yˈitët wijy? 2) ¿Ti nnijawëyäˈänëm mä tyäˈädë artikulo?
3 ¿Jëjpˈamë nety etsë Jesus nyayaˈitëdët wijy? Jëjpˈam. Ja koots mä nety yajmatsanë, ta tˈanmääy ja yˈapostëlëty: “Wijy mˈittët mët ëj”. Ets ta net jyënany: “Wijtë es käjxtäˈäktë [o nuˈkxtäˈäktë] këdiibë ja kaˈoybyë mmëmadäˈägëdët” (Mat. 26:38, 41). Jesus xëmë wijy nyayaˈijtë, per mä nety yajmatsanë, jaa mä nety tsyekyëty ets mas niˈigyë yˈitët wijy ets tmëwingonëdë Tyeety. Nyijäˈäbë nety ko ja yˈëxpëjkpëty nan tsojkëp nyayaˈitëdët wijy, kyaj jyaayëty mä yëˈë yajmatsäˈäny, nanduˈun mä ja tiempë myiny kyëdaˈaky. Min jawyiin nˈokˈijxëm tiko Jesus ttseky ets nnayaˈijtëm wijy, ta net nˈijxëm tëgëk peky wiˈix mbäät nbanëjkxëmë yˈijxpajtën.
¿TIKO JESUS TTSEKY ETS NNAYAˈIJTËM WIJY?
4. ¿Tiko jyëjpˈamëty ets xëmë nnayaˈijtëm wijy?
4 Jesus tsyejpy ets nnayaˈijtëm wijy duˈun mä diˈib nnijäˈäjëm ets mä diˈib kyaj nnijäˈäjëm. Ko yˈijty yä Naxwiiny, ¿nyijäˈäbë nety tukëˈëyë tijaty miin këdakp? Kyaj, pes ojts jyënaˈany: “Per ja xëë es ja oorë ni pën tkanijawë, ni yëˈë Diosë yˈanklësëty es ni ëj, ja Diosë yˈUˈunk, yëˈëyë dëˈën jeˈeyë nyijäˈäp ja Dios Teety” (Mat. 24:36). Mä tadë tiempë, Jesus, “ja Diosë yˈUˈunk”, kyaj nety yajxon tnijawë näˈä myinäˈäny ja kutëgoˈoyën. Ets ëtsäjtëm, ¿këdii nan kyaj nëgoo nnijäˈäjëm tijaty miin këdakp? Extëm nˈokpëjtakëm, kyaj nnijäˈäjëm näˈä Jyobaa tkaxäˈänyë yˈUˈunk parë dyajkutëgoyëdë axëkˈäjtën. Koxyëp nˈoknijäˈäjëm, kyajxyëp tiko nnayaˈijtëm wijy. Per extëmë Jesus jyënany, ja ayoˈon myinäˈäny mä kyaj pën tˈawixy; pääty tsojkëp xëmë nnayaˈijtëm wijy (käjpxë Matewʉ 24:43).
5, 6. 1) ¿Wiˈix xypyudëjkëm parë nnayaˈijtëm wijy ko nnijäˈäjëm tijatyë Dios tyuknibëjtakëp? 2) ¿Tiko mas niˈigyë tsyekyëty ets nˈijtëm wijy ko nnijäˈäjëm ti Satanás tyukniwinmäˈäyëp?
5 Ja tuk peky, Jesus nyijäˈäbë nety tijaty oyˈäjtënë miin këdakp, diˈib may ja jäˈäy ninuˈun tkanijawëdë. Ëtsäjtëm kyaj nnijäˈäjëm tijaty extëmë Jesus, per mët ko yëˈë tnimaytyaky, ta nnijäˈäjëm tyam wiˈix yˈixˈatäˈänyë Diosë yˈAnaˈamën ets tijaty tim tsojk tyunaampy. Ko nˈijxëmë jäˈäy mä eskuelë, mä nduˈunëm o mä ngäjpxwäˈkxëm, ¿këdii agootstuuy may yajpäättë ets ninuˈun tkanijawëdë tyäˈädë tëyˈäjtën? Pääty jyëjpˈamëty ets nnayaˈijtëm xëmë wijy extëmë Jesus, mbäät nˈëxtäˈäyëmë winmäˈäny parë nimaytyakëmë Diosë yˈAnaˈamën. Oy ko nmëtmaytyakëmë jäˈäy oytyim määjëty, pes oˈkën jëjpˈam yˈittë (1 Tim. 4:16).
6 Ja tuk peky diˈibë Jesus pudëjkë parë nyayaˈijtë wijy, yëˈë ko nyijäˈäbë nety ko Satanás yajtëgoyanëp mët ko tijaty tyukˈatsokëdët o ko jäˈäy yˈaxëkˈixëdët. Satanás xëmë nety yˈixy tyunëty parë yajkäˈäjäˈänyëty (Luk. 4:13). Perë Jesus ninäˈä kyanaygyumanäjxë. Listë yˈijty parë twinguwäˈägëyaˈany oytyim diˈibë jotmayëty, oy ti yajtukˈatsokët, yaˈˈaxëktunët o yajpajëditët. ¿Këdii nan duˈumbë jotmay tyam nbatëm? Duˈun, pesë Satanás “dëˈën jyëdity extëm ja kää myuˈuy mët ja yuu es tˈëxtäˈäy ti yˈokjëˈxëp”. Päätyë Diosë yˈAyuk xyˈanmäˈäyëm: “Jikyˈattë miits [...] wijy” (1 Peed. 5:8). ¿Wiˈix mbäät nnayaˈijtëm wijy?
WIˈIX NˈIJTËM WIJY MÄ NUˈKXTAKËN
7, 8. ¿Ti käjpxwijënë Jesus yäjk mä nuˈkxtakën, ets ti xytyukniˈˈijxëm extëm yëˈë nyuˈkxtaky?
7 Ko Biiblyë tmaytyaˈaky ets nnayaˈijtëm wijy, nan jënäämp ets nuˈkxtakëm (Kol. 4:2; 1 Peed. 4:7). Ko netyë Jesus të tˈanëëmë ja yˈapostëlëty ets wijy yˈittët mët yëˈë, ta tˈanmääy: “Wijtë es käjxtäˈäktë [o nuˈkxtäˈäktë] këdiibë ja kaˈoybyë mmëmadäˈägëdët” (Mat. 26:41). ¿Jaayë tyäˈädë käjpxwijënë tmëmëdoodë ko nety ja jotmay tpäättë mëjwiin kajaa? Kyaj. Ëtsäjtëm nan tsojkëp nmëmëdoˈojëmë tyäˈädë käjpxwijën tuˈuk tuˈugë xëë.
8 Jesus pyëjtak tuˈugë oybyë ijxpajtën mä nuˈkxtakën. Waˈan njamyajtsëm ko tëgok tuk tsuˈum ojts tmënuˈkxtaˈagyë Tyeety. Nˈokpawinmäˈäyëm wiˈix nyuˈkxtaky (käjpxë Lukʉs 6:12, 13). Xëgopkë nety ets waˈan ja Jesus yajpääty Capernaum mä tsyoony jyaˈty. Ko ojts tsyuˈujë, ta pyatëjkë kopkëjxy diˈib wëˈëmp mä ja mejny diˈib Galilea. Ets myentrës kyootsë, waˈan tˈijxy wiˈix ja jäˈäy dyajtëˈkxtë ja lyamprë mä ja käjpn diˈib Capernaum ets mä wiinkpë nax käjpn. Ta tyëjkë nuˈkxtakpë amumduˈukjot. Ko nyajxy ja oorë, ta ja jëën pyiˈtstääynyë mäjaty ja käjpn. Ets ja poˈo ttukjäjëtyaˈay ja it naxwinyëdë. Ja jëyujk animal pyëtsëmdë koots jëˈxpë. Perë Jesus kyaj tnekypyekyë kuentë. Waˈan tjantsy nyinuˈkxtakë mä twinˈixäˈäny ja nimäjmajtskpë yˈapostëlë. Ttukmëtmaytyaˈaky ja Tyeety tijaty wyinmaapy, ti jotmaytyuunëp mä niduˈuk niduˈuk ja yˈëxpëjkpëty ets tˈamdoy ja wijyˈäjtën parë tyuˈumoˈoyëdët.
9. ¿Ti xytyukniˈˈijxëm ko Jesus ojts nyuˈkxtaˈaky tuk tsuˈum?
9 Extëm nyuˈkxtakyë Jesus, ¿yëˈë yˈandijpy ko nan jeky mbäät nuˈkxtakëm? Kyaj. Yëˈë ojts tˈanëëmë ja yˈëxpëjkpëty: “Jaˈa mënaangëxp jaˈa mjoot duˈun ko jaˈa oybyë mdunaangëxy, perë amääy jaˈa mniniˈkx y kaˈp myadaˈagy” (Mat. 26:41, NTM). Per oy amääy ja niniˈkx yajpääty, mbäät nbanëjkxëmë Jesusë yˈijxpajtën. Extëm nˈokpëjtakëm, ¿ndukmëtmaytyakëm jawyiinë Jyobaa ko ti nduˈunäˈänëm? Jëjpˈam ets duˈun nduˈunëm, pes tijaty ndunäˈänëm mbäät xyˈaxëktuˈunëm, tˈaxëktunyë familyë o ja nmëguˈukˈäjtëm diˈib mëët nˈëxpëjkëm. Ko nmënuˈkxtakëmë Jyobaa, ¿nˈanmäˈäyëm tijaty nmëmäˈäy nmëdäjëm mä nmëguˈukˈäjtëm diˈib mëët nˈëxpëjkëm? ¿Nmëgäjpxëm desde mä jot korasoon ets kyaj jeˈeyë nikäjpxmiˈin nikäjpxëjpëm ja ää ayuk? Nbëjkëmë kuentë ko Jesus yajtsobat ko tmëtmaytyakyë Tyeety naytyuˈuk. Kom tyamë naxwinyëdë jäˈäy ninuˈun kyawäˈkpoˈkxy, mbäät nanduˈun nbanëjkxäˈänëm ets njäˈäytyëgoˈoyëm tijaty jëjpˈam yajtunäämp. Per pën nyajtuˈunëm kajaa tiempë mä nuˈkxtakëm naytyuˈuk ets desde mä jot korasoon, ta nëjkx nˈijtëm wijy (Mat. 6:6, 7). Nëjkxëp mas niˈigyë nmëwingoˈonëmë Jyobaa, nyajkëktëjkëm ja naymyayë mët yëˈë ets njëjpkudijëm tijaty mbäät xytyukmëjagamgakëm (Sal. 25:14).
WIˈIX NˈIJTËM WIJY MÄ NGÄJPXWÄˈKXËM
10. ¿Ti xytyukˈijxëm ko Jesus xëmë tˈijxy ttuuny pën mbäät ttukmëtmaytyaˈagyë oybyë ayuk?
10 Jesus nayaˈijtë wijy mä ja tuunk diˈibë netyë Jyobaa të tyuknipekyëty. Ta tuunk ayoˈon mä kyaj tyimjëjpˈamëty nbëjtakëm aduˈuk ja jot winmäˈäny, per ta mä jyëjpˈamëty, extëm mä nduˈunëmë Diosë tyuunk. Jesus xëmë nyayaˈijtë wijy, yˈijx tyuun pën mbäät ttukmëtmaytyaˈagyë oybyë ayuk. Extëm nˈokpëjtakëm, tëgok të nety jyantsy tyuˈuyoˈoytyë mëdë yˈëxpëjkpëty parë jyäˈttë Sicar. Ta ja yˈëxpëjkpëty ojts nyëjkxtë kaaky juubyë ets yëˈë ojts wyeˈemy poˈkxpë nëdäjnybyëˈääy. Ta tuˈugë samaritanë myiiny nëgoombë, Jesus kyaj dyajtëgooyë tiempë ojts ttukmëtmaytyaˈagyë Diosë yˈayuk. Mbäätxyëp ojts jyënaˈany ko xyëmäˈäjäˈäny tuk ratë o ttukäjpxët tijaty parë kyaj tmëtmaytyäˈägët ja toxytyëjk, per kyaj duˈun yˈadëtsy. Myëtmaytyak ja toxytyëjk ets may ja jäˈäy tnijäˈäjëdë tëyˈäjtën (Fwank 4:4-26, 39-42). ¿Mbäät nbanëjkxëmë yˈijxpajtën ets ndukmëtmaytyakëmë Diosë yˈayuk pënaty mëët nnaybyatëm tuˈuk tuˈugë xëë?
11, 12. 1) ¿Wiˈixë Jesus tˈanmääy ja jäˈäyëty diˈib jatukmastuˈudanë ja tyuunk? 2) ¿Wiˈixë Jesus nyaymyooyë tiempë parë tijaty ttunët?
11 Ojts näägë jäˈäy mëdë oyjyot tjatukmastuˈudäˈändë Jesus ti nety tyuumpy. Extëm nˈokpëjtakëm, ko ja jäˈäyëty diˈib Capernaum tˈijxtë wiˈixë Jesus yaˈˈagëdaˈaky mëjˈäjtëngyëjxm, ta jyantsy xyondaktë ets kyaj tnekytsyojktë ets ja Jesus jam tsyoonët. Kyaj nety yˈaxëëgëty ko duˈun wyinmaytyë, per ja tuunk diˈibë nety nyikëjxmˈäjtypy, yëˈë tmëtmaytyäˈägët ja “borreegëty [diˈib të tyëgoytyë] mä yëˈë naxwinyëdë Israel” ets kyaj jyeˈeyëty tuk käjpn (Mat. 15:24). Pääty tˈanmääytyë: “Tsojkëp[ts] nandëˈën ëj nnëjxët mä wiinkpë käjpn es nˈawanëdëts ja oybyë ayuk diˈibë nyigajxypy ja Diosë kyutujkën, jaˈa ko päätyëts ja Dios të xykyexy” (Luk. 4:40-44). Yä nbëjkëmë kuentë ko Jesus aduˈuk ja wyinmäˈäny tpëjtaky mä Diosë tyuunk, nitii ets ni pën kyayajtuˈudujkë.
12 Per ¿waˈandaa Jesus nitii tkatukxondaky mët ko yëˈëyë myëjpëjtak ja Diosë tyuunk? ¿Waˈandaa kyaj tnijäˈäjë tijaty tëgoyˈäjtxëdëbë familyë mët ko yëˈëyë nety wyinmäˈänyˈajtypyë Diosë tyuunk? Kyaj, Jesus naymyooyë tiempë parë tijaty ttunët. Yëˈë tyukxondak tijaty ets ijt xoon mët ja myëtnaymyaayëbëty. Nan jyaygyujkë yajxon tijaty jotmay pyattëbë familyë, tijaty yajtëgoyˈäjttëp ets nan yaˈijxë ko tsyejpyë ënäˈkuˈunk (käjpxë Markʉs 10:13-16).
13. ¿Wiˈix mbäät nbanëjkxëmë Jesusë yˈijxpajtën ko jëjpˈam tpëjtakyë Diosë tyuunk ets nanduˈun nyayaˈijtë wijy?
13 ¿Wiˈix mbäät nbanëjkxëmë Jesusë yˈijxpajtën ko jëjpˈam tpëjtakyë Diosë tyuunk ets nanduˈun nyayaˈijtë wijy? Ko kyaj nasˈijxëm etsë naxwinyëdë jäˈäy xytyukmastutëmë Diosë tyuunk, ets nan kyaj nmëjpëjtakëm ko jiiky mëguˈuk o mëtnaymyaayëbë xyˈanmäˈäyëm ko kyaj tyimjëjpˈamëty ndukjotëgoˈoyëmë Diosë tyuunk. Ëtsäjtëm yëˈë nbanëjkxëmë Jesusë yˈijxpajtën, duˈun nˈijxëmë Diosë tyuunk extëmë käˈäy ukën, pes xypyudëjkëm parë nyajpatëm jotkujk ets oy nˈijtëm mëdë Jyobaa (Fwank 4:34). Per kyaj net nnayajnäjxëm mëj këjxm ets kyaj tijaty ndukxondakëm. Pes nmëdunäˈänëmë “Diosë jotkujkpë” mëdë xondakën, extëmë Jesus (1 Tim. 1:11, Traducción del Nuevo Mundo [NM]).
WIˈIX NNAYAˈIJTËM WIJY KO NBATËMË JOTMAY
14. ¿Ti kyaj yˈoyëty nduˈunëm ko nbatëmë amay jotmay, ets tiko?
14 Extëm të nˈijxëm, Jesus yˈanmääy ja yˈëxpëjkpëty ets nyayaˈitëdët wijy mä nety yëˈë dyajnaxy mëjwiin kajaa jotmay (käjpxë Markʉs 14:37). Ko nbatëmë jotmay ja mä tsyekyëty nbanëjkxëmë Jesusë yˈijxpajtën. May jyaˈaytyëgooytyëbë tyäˈädë tëyˈäjtënë diˈib yajpatp majtskˈok mä Proverbios, ko jyënaˈany: “Taaˈäjtp tuˈugë tuˈu diˈibë jäˈäy yˈijxypy ko oy, perë tyäˈädë tuˈu, wyimbëtsemy oˈkën” (Pro. 14:12; 16:25). Pën yëˈë nbanëjkxëmë këˈëm winmäˈäny ko nbatëmë jotmay, mbäät nëjkx xyˈaxëktuˈunëm ets nan axëktunëdëp ja nmëguˈukˈäjtëm.
15. ¿Ti tyunäˈänëp ja diˈib nyigëbäjkˈäjtypyë fyamilyë ko dyaˈˈamääytyäˈägëdë meeny sentääbë?
15 Extëm nˈokpëjtakëm, diˈib nyigëbäjkˈäjtypyë fyamilyë mbäät tsyiptakxëty tmoˈoyët ja yˈuˈunk yˈënäˈk tijaty tëgoyˈäjtxëdëp (1 Tim. 5:8). Etsë net tˈaxäjëyäˈänët tuˈugë tuunk mä kyaj jëjwitsë nyëjkxët mä naymyujkën, Diosˈawdattët mëdë Fyamilyë o nyëjkxët käjpxwäˈkxpë. Mbäät wyinmay ko oy diˈib tyuumpy, per mbäät tyukmastuˈutyëtyë Dios. Pääty niˈigyë yˈoyëty ko nbaduˈunëmë kyäjpxwijënë Proverbios 3:5, 6, mä jyënaˈany: “Mmëbëkë Jyobaa amumduˈukjot ets këdii mgëˈëm winmäˈäny xyajtuny. Mä tukëˈëyë mnëˈë mduˈu mëjpëjtäˈäk yëˈë, ets yëˈë yajtëyëp ja mnëˈë mduˈu”.
16. 1) ¿Wiˈixë Jesus ojts xymyoˈoyëmë ijxpajtën ko ttukˈijxpejty ja wijyˈäjtën diˈibë Tyeety myëdäjtypy? 2) Pënaty nyigëbäjkˈäjtypy familyë, ¿wiˈix tpanëjkxtë Jesusë yˈijxpajtën ko dyajnaxtë jotmay?
16 Jesus kyaj dyajtuunyë kyëˈëm winmäˈäny ko twinguwäˈkë amay jotmay. ¡Okpawinmay! Ja yetyëjk diˈib mas kuwijy ijt yä Naxwiiny kyaj ttukˈijxpejty ja wijyˈäjtën diˈib myëdäjt. Extëm nˈokpëjtakëm, ko Satanás jyayajtëgoyanë, kanäkˈok tˈatsooy: “Diosë jyaaybyajtën jyënaˈany” (Mat. 4:4, 7, 10). Yëˈë tyukˈijxpajt ja Tyeetyë wyijyˈäjtën parë tjëjpkuwäˈkë Satanás ko jyayajtëgoyanë ets duˈun dyaˈijxë tudaˈakyˈäjtën, diˈibë Satanás kyaj tmëdaty ets diˈib yˈaxëkˈijxypy. ¿Nanduˈun ëtsäjtëm nduˈunëm extëmë Jesus? Diˈib nyigëbäjkˈäjtypyë fyamilyë ets tpanëjkxyë Jesusë yˈijxpajtën, yëˈë naytyuktuˈumooyëbë Diosë yˈAyuk ko dyajnaxyë amay jotmay. Ets duˈun milˈamë Dios mëduumbë ttundë abëtsemy nyaxwinyëdë. Yëˈë yˈëxtääytyëp jawyiinë Diosë yˈAnaˈamën etsë tyuunk ets ok tijaty tëgoyˈäjtxëdëp. Duˈuntsoo, tkuentˈattë yajxon ja fyamilyë. Ets ko ttundë mëjää parë tmoˈoytyë tijaty tëgoyˈäjtxëdëp, kunuˈkxëdëbë Jyobaa, extëm twandaˈaky mä yˈAyuk (Mat. 6:33).
17. ¿Ti mijts mbudëjkëp parë xypyanëjkxyë Jesusë yˈijxpajtën mä nyayaˈijtë wijy?
17 Jesus yëˈë diˈib ojts xymyoˈoyëmë oybyë ijxpajtën parë nnayaˈijtëm wijy. Tuˈugë ijxpajtën diˈib mbäät ndukˈoyˈäjtëm ets axtë mbäät xyajnitsokëm. Nˈokjamyajtsëm ko Satanás xyajmanaxäˈänëm, ets ko duˈun njäjtëm, mbäädë net nyajtëgoˈoyëm ja mëbëjkën, xyaamët ja tsojkën mä nmëduˈunëmë Jyobaa ets axtë xytyukmastutëm (1 Tes. 5:6). Pääty kyaj yˈoyëty nyajxondakëm, nˈoknayaˈijtëm wijy extëmë Jesus. Nˈokjuˈtëmë tiempë parë nuˈkxtakëm amumduˈukjot, nˈoknayaˈijtëm wijy parë ngäjpxwäˈkxëm ets nˈoktukˈijxpajtëmë Jyobaa ko ti jotmay nwinguwäˈkëm. Duˈuntsoo njukyˈäjtëm tyam agujk jotkujk mä kyugëxëyanë tyäˈädë jukyˈäjtën. Ets ko Jesus dyajminët ja kutëgoˈoyën, nëjkxëp xypyatëm wijy ets yëˈë nety nduˈunëmë Diosë tyuunk. ¡Jantsy jotkujkë Jyobaa nyayjawëyaˈanyëty ko nëjkx xymyoˈoyëm ja kumäˈäyën mët ko kyaj të nmastutëm! (Diˈibʉ Jat. 16:15.)
[Yajtëˈëwën]
[Letrë diˈib miimp mä dibujë mä pajina 16]
Jesus myëtmaytyak ja toxytyëjk mä ja nëdäjny. Ets ëtsäjtëm, ¿mäjaty mbäät ngäjpxwäˈkxëm tuˈuk tuˈugë xëë?
[Letrë diˈib miimp mä dibujë mä pajina 17]
Ko nbudëjkëmë nfamilyëˈäjtëm parë oy yˈitët mëdë Jyobaa, yëˈë nety nyajnigëxëˈkëm ko wijy nnayaˈijtëm
