Armajedon: ¿ti mayë jäˈäy wyinmääytyëp ko tmëdowdë?

“Ta nyaymyujkëdë ja naxwinyëdë ryeyëty mä ja lugäär diˈibë ebreeë jäˈäyëty tyukxëˈäjttëp Armajedón.” (DIˈIBɄ JATANɄP [APOCALIPSIS] 16:16.)

KO MIJTS xymyëdoyë tyäˈädë ayuk Armajedon, ¿ti miimp mä mwinmäˈäny? Waˈan myiny mä winmäˈäny tuˈugë mëj kutëgoˈoyën diˈib atsëˈëk ajawë. Biiblyë jeˈeyë tëgok dyajtunyë tyäˈädë ayuk, per kanäkˈok yajmëdoy mä telebisionk, mä raadyë ets nan myaytyaktëbë jäˈäy diˈib nyiwintsënˈäjttëbë relijyonk.

¿Waˈandaa tyuˈugyë extëmë jäˈäy twinmaytyë Armajedon ets extëmë Biiblyë tyukniˈˈixë? Oy ko nnijäˈäjëm wiˈix yaˈˈatsoojëmbity. ¿Tiko? Parë nnijäˈäjëm ja tëyˈäjtën, net kyaj ntsëˈkëm, kyaj tëgatsy nwinmäˈäyëm mä Dios ets kyaj axëëk nwinmäˈäyëm mä ja tiempë diˈib miin këdakp.

Nˈokˈijxëm tëgëk peky extëmë jäˈäy twinmaytyë Armajedon ets extëmë Biiblyë tyukniˈˈixë.

  1. ARMAJEDON YËˈË AYOˈON DIˈIB YAJJAˈÄJTYPYË NAXWINYËDË JÄˈÄY.

Näägë jäˈäy diˈib yajpëtsëëmdëbë perioodikë ets diˈib pyayoˈoytyëp tijaty, yajtuundëbë tyäˈädë ayuk Armajedon, ko tmaytyäˈäktë mëk ayoˈon diˈib yajjaˈäjtypyë naxwinyëdë jäˈäy, extëm ko näˈäty tmaytyäˈäktë ja majtskpë mëj tsip diˈib tuunë abëtsemy nyaxwinyëdë. Ko nyajxyë tyäˈädë tsip, ta jäˈäy tsyëˈkëdë ko Estados Unidos etsë Unión Soviética nyaynyibëdëˈëgëdët mëdë bombë, ta mä raadyë ets mä telebisionk ojts yajnigajpxy ko pën tsiptuundëp, yëˈë netyë armajedon mä tsyiptundë mëdë bombë. Ets tyam, ta näägë ëxpekyjyaˈay diˈib myëjotmaybyattëp ko niˈigyë wyindëgoyë tyäˈädë Naxwinyëdë ets ko niˈigyë tyëgatsyë tiempë, extëm ko jyantsy tyuˈuy o jyantsy myëk any ets jyënäˈändë ko yëˈë yajmiimbyë armajedon.

¿Ti tyäˈädë yˈandijpy? Pes ko tijatyë naxwinyëdë jäˈäy tyuundëp mbäät dyajwindëgoyë Naxwinyëdë ets tukëˈëyë diˈib yä jukyˈäjtp. Pënë gobiernë kyaj ti ttuny extëm tijaty yˈoybyëtsëmët, ta tyäˈädë Naxwinyëdë nëjkx wyindëgoy winë xëë.

¿Wiˈixë Biiblyë tyukniˈˈixë? Dios kyaj tnasˈixëyaˈany etsë jäˈäy dyajwindëgoyëdë Naxwinyëdë. Biiblyë yajxon tnigajpxy ko Jyobaa * “kyaj nanëgoobë të dyajkojy”, yëˈë duˈun “parë yajtuktsëënët” (Isaías 45:18). Dios kyaj tnasˈixëyaˈany etsë jäˈäy dyajkutëgoyëdë Naxwinyëdë. ¿Ti tyunaampy? Yajkutëgoyaampy pënaty “yajmäˈttëp ja naxwinyëdë” (Diˈibʉ Jatanʉp 11:18).

2. ARMAJEDON YËˈË KO TIJATY YˈAYOˈONBËJTAˈAKY.

Mä näägë paˈis, pënaty yajpëtsëëmdëbë perioodikë yajtuundëbë tyäˈädë ayuk Armajedon ko tmaytyäˈäktë tuˈugë ayoˈon diˈib atsëˈëk ajawë. Extëm nˈokpëjtakëm, mä jëmëjt 2010 tuˈugë perioodikë jyënany: “Armajedon jap Haití”. Jap tnimaytyaky ja ayoˈon diˈib tuun jäjtë mä tadë paˈis ko yˈoˈktë mayë jäˈäy ets ko jëën tëjk wyindëgooytyaay mët ko nyajxy ja mëk ujx. Etsë wiinkpëty diˈibë tijaty nyigäjpxtëp mä raadyë etsë telebisionk ets diˈib yajpëtsëëmdëbë pelikula yajtuundëbë tyäˈädë ayuk, kyaj jyaayëty parë tnimaytyäˈäktë diˈib të tyuny jyatyëty, nanduˈun ko tmaytyäˈäktë diˈib miin këdakp. Extëm nˈokpëjtakëm, ko tmaytyäˈäktë kyäˈäjäˈäny tuˈugë mëj tsää o asteroide diˈib myëdäjtypyë jëën ets yˈagojtmukët mëdë Naxwinyëdë, ta dyajtundë tadë ayuk Armajedon.

¿Ti tyäˈädë yˈandijpy? Ko Armajedon ajotkumonë jyäˈtäˈäny ets ko niˈamukë jäˈäy dyajkutëgoyaˈany oy ti tkatuundëgoy. Ets ko kyaj mbäät ti yajtuny parë nnaygyuwäˈänëm.

¿Wiˈixë Biiblyë tyukniˈˈixë? Ko Armajedon kyaj yëˈëjëty tuˈugë ayoˈon mä niˈamukë jäˈäy kyutëgoyaˈany. Yëˈëyë kutëgoyäämbë axëkjäˈäy. Biiblyë jyënaˈany ko tim tsojk ja “axëkjäˈäy kyaj nyekyjaˈˈatäˈäny” (Salmo 37:10).

3. DIOS DYAJKUTËGOYAˈANYË NAXWINYËDË MÄ ARMAJEDON.

Mayë jäˈäy diˈib tyukˈijtëdëbë relijyonk tmëbëktë ko nyaywyinguwäˈägëyaˈanyëtyë oybyë mëdë axëëkpë ets duˈun kyutëgoyaˈanyë  Naxwinyëdë. Tuˈugë empresë diˈib Estados Unidos ojts twijtspëtsemy ko mä 100 mëjjäˈäytyëjk, 40 diˈib myëbëjktëp ko tyäˈädë Naxwinyëdë kyutëgoyaˈany “mä ja tsip Armajedon” (Princeton Survey Research Associates).

¿Ti tyäˈädë yˈandijpy? Ko naxwinyëdë jäˈäy kyaj të kyojy parë jyukyˈattët yä Naxwiiny winë xëë, ets ko Naxwinyëdë nan kyaj të kyojy parë yˈitët winë xëë. Dios të ttuknibëjtäägë parë ja näˈä niˈamukë nˈoˈktäˈäyëm.

¿Wiˈixë Biiblyë tyukniˈˈixë? Ko Dios “të dyajkojˈyë naxwinyëdë mä ja lyugäärë täˈtspekypyë; ni jeˈeyë kyayuˈkxäˈäny mä ja lyugäär axtë winë xëë winë tiempë” (Salmo 104:5). Ets mä naxwinyëdë jäˈäy, Biiblyë jyënaˈany: “Pënaty jukyˈäjttëp tëyˈäjtën myëët tjaˈˈatäˈändë naxwinyëdë, ets ttuktsëënëyäˈändë xëmëkyëjxm” (Salmo 37:29).

Extëm nˈijxëm, tëgatsyë Biiblyë tmaytyaˈaky diˈibë jäˈäy myëbëjktëp ko yëˈë Armajedon. Per ¿ti duˈun meerë yˈandijpy?

[Notë diˈib noky ëxˈääy]