¿Näˈä tsyondäˈägäˈäny ja Armajedon?

“Oknëmts nˈijxy tëgoy myay ja jäˈäy diˈibaty jikyˈäjttë mä maygyäjpn, mä wiinkpë may ayuk käjxpëty, es mä maynyaxwinyëdë. [...] Tyäˈädë dëˈën diˈibë të dyajnaxtë ja mëk mäˈäy täjën.” (DIˈIBɄ JATANɄP 7:9, 14)

EXTËM tyam nˈijxëmë jukyˈäjtën, yëˈë xytyukˈijxëm ko wingoombë Armajedon. ¿Wiˈix nnijäˈäjëm?

Tyam, ta miyonkˈamë jäˈäy diˈib myëduundëbë Jyobaa ets jyukyˈattë extëmë Biiblyë tyukniˈˈixë. Tsyoondë mä may nyax maygyäjpn ets wiˈixëm ja ayuk tkäjpxtë, etsë Dios yëˈë diˈib pudëjkëdëp parë tuˈugyë yˈittët mët ko tmëdattë tsojkën. Yëˈënë Jyobaa tyestiigëty diˈib tuˈugyë nayaˈijtëdëp (Fwank 13:35).

Tim tsojkë Satanás dyajtuˈukmukäˈänyë jyaˈayëty ets tnibëdëˈëgäˈändë Diosë kyäjpn diˈib kyaj jyawë pënë nyitsiptuumbë (Ezequiel 38:8-12; Diˈibʉ Jatanʉp 16:13, 14, 16). ¿Tiko nˈijtëm seguurë ko duˈun tyunäˈäny jyatäˈänyëty? Biiblyë nyigajpxypy yajxon tijaty tunan jatanëp, diˈib xypyudëjkëm parë nnijäˈäjëm näˈä tsyondäˈägäˈänyë tyäˈädë tsip Armajedon, ets tyam ta kanääk yˈadëy.

Ta tyam yˈadëy diˈib ojts yajnaskäjpxë

Jesus ojts yajtëyëty ja yˈëxpëjkpëty wiˈix yajnijawët ko “pyatnëp ja tiempë mä jyëjptëgoyanë tyäˈädë jukyˈäjtën” (Mateo 24:3, Traducción del Nuevo Mundo [NM]). Jesus ta ojts tnigajpxy tijaty tunan jatanëp, jyënany: “Tsyiptunäˈändë tuˈugë naxwinyëdë mëdë wiinkpë esë anaˈambëty nandëˈën, es myinäˈäny ja mëk yuu esë mëk ujxëty oymyääty”. Ta yˈakjënany: “Tëgekyë tyäˈädë yëˈë dëˈën määnëm jeˈeyë tsyondaˈaky ja ayoˈon” (Matewʉ 24:7, 8). Apostëlë Pablo ojts tnigajpxy ko “naty ttimpatnë” ja tiempë, “byeen ayoˈon mëët yˈaknaxäˈäny ja xëë tiempë” (2 Timotee 3:1). ¿Këdii ta tyam duˈun tyuny jyatyëty extëm ojts yajnaskäjpxë?

Per ¿tiko tsyiptäˈägäˈäny ja tiempë diˈib jëjpkëxanëp? Apostëlë Juan ojts jyënaˈany ko Satanás nyijäˈäp ko jeˈeyë jawaanë tiempë  tˈakmëdaty parë tyundët mëdë kyaˈoybyëty yä Naxwiiny. Ets nan ojts tnimaytyaˈaky ko Satanás mëk “awäˈän” yajpäädäˈäny (Diˈibʉ Jatanʉp 12:7-12). ¿Ets këdii duˈun tyamë jäˈäy jyantsy yˈawäˈänˈattë ets axëëk nyaytyunëdë abëtsemy nyaxwinyëdë?

Jesus nan ojts tnigajpxy ko mä tyäˈädë tiempë diˈib tsip nimëjää aknäjxp, yajtunäˈäny tuˈugë tuunk diˈib mëjwiin kajaa: “Tyäˈädë oybyë ayuk diˈib nyimaytyakypy ja anaˈamën yajkäjpxwäˈkxäˈäny abëtsemy nyaxwinyëdë parë yajtuknijawët tukëˈëyë nasionk; ets taanëm myinäˈäny ja jëjptëgoˈoyën” (Mateo 24:14, NM). Jyobaa tyestiigëty yëˈë tyam kyäjpxwäˈkxtëp ja oybyë ayuk diˈib nyimaytyakypy ja Diosë yˈAnaˈamën, naxy 235 paˈis, ets dyajpëtsëmdë ëxpëjkpajn naxy 500 ayuk. Majtskë rebistë dyajpëtsëmdë, Diˈib Xytyukˈawäˈänëm etsë ¡Despertad!, ets tijaty myaytyakypy jap të dyajpëtsëmdë mä Biiblyë, tyäˈädë rebistë yëˈë diˈib mas wäˈkxp abëtsemy naxwinyëdë. Nan të yajkäjpxnaxyë Biiblyë naa 100 ayukën. Kyaj yajmëjuy pënaty tyuundëbë tyäˈädë tuunk ets yëˈë yajtuundëbë meeny sentääbë diˈib yajnayäjkp tsojkëngyëjxm. Ko tyam nˈëwäˈkx ngäjpxwäˈkxëm kajabäät, ¿yëˈëdaa yaˈˈadëëpy diˈibë Jesus ojts tnaskäjpxë?

Biiblyë nyigajpxypy tijaty jawyiin tunan jatanëp parë Jyobaa tsyiptunäˈäny mëdë myëtsipëty. Min nˈokˈijxëm tëgëk peky diˈib ojts yajnaskäjpxë ets kyajnëm yˈadëy.

Diˈib tim tsojk adëwäämp

Myëduˈukpë diˈib ojts yajnaskäjpxë. Mä Biiblyë jyënaˈany ko abëtsemy nyaxwinyëdë ja wintsëndëjk jyënäˈänäˈändë “tyam sitëy agujk jotkujk ntsënäˈäyëm, kyaj ti amay jotmay” ets wyinmayäˈändë ko mbäädë net dyaˈoyëdë naxwinyëdë jäˈäyë yˈamay jyotmay. Per ko nety duˈun jyënäˈändë, kyaj yëˈë myinäˈänyë agujkˈäjt jotkujkˈäjtën (1 Tesalónikʉ 5:1-3).

Myëmajtskpë diˈib ojts yajnaskäjpxë. Ta net näägë anaˈambëtëjk tnibëdëˈëgäˈändë ja relijyonk. Mä Biiblyë jyënaˈany ko tyäˈädë anaˈambëtëjk yëˈë mëët yaˈijxkijpxyë tuˈugë axëëk jëyujk, ets ja relijyonk diˈib kyaj tyëyˈäjtënëty yëˈë mët tuˈugë toxytyëjk diˈib tyukˈunyaabyë tyäˈädë axëëk jëyujk (Diˈibʉ Jatanʉp 17:3, 15-18). Ko tyäˈädë axëëk jëyujk dyajkutëgoyëdë relijyonk diˈib nëgoobë jënandëp ko tkudanëdë Dios, të nety yˈadëy diˈibë Dios të ttuknibëjtäägë.

Apostëlë Juan ojts tnigajpxy wiˈixën tyunäˈäny jyatäˈänyëty: “Ja mäjkpë wäj es ja axëk jëyujk tyukˈakˈatëp ja kujenytyoˈoxy, es dyajwëˈëmët niwäˈäts ëxwäˈäts. Es axtë tsyuˈtstäˈäytyëp ja nyiniˈx, es nyinoˈktäˈäytyëp diˈibë wëˈëmp. Diosë dëˈën të pyëjtäˈägëdë es dyajtuunëdë Diosë wyinmäˈäny” (Diˈibʉ Jatanʉp 17:16, 17).

Myëdëgëëkpë diˈib ojts yajnaskäjpxë. Ko netyë Satanás të dyajkutëgoy ja relijyonk diˈib kyaj tyëyˈäjtënëty, ta dyajtunäˈänyë anaˈambëtëjk parë tnibëdëˈëgët pënaty myëduundëbë Dios (Diˈibʉ Jatanʉp 7:14; Matewʉ 24:21).

¿Ti net mijts mbäät xytyuny?

Pën mijts kyaj yajxon xyˈëxpekynyëmë Biiblyë, mbäät kyaj xymyëbeky pën duˈun tyunäˈäny jyatäˈänyëty. Per tam tiko mbäät nˈijtëm seguurë ko tim tsojk duˈun jyatäˈäny. Nuˈun kujk yˈadëy tijaty të yajnaskäjpxë mä Biiblyë, yëˈë xytyukˈijxëm ko adëwäämp. *

Juut waanë tiempë parë xynyijawët tiko Jyobaa tyestiigë yˈittë seguurë ko wingon yˈity ja xëë mä tsyiptunäˈäny “ja Nintsënˈäjtëm Dios diˈibë tëgekyë mëkˈäjtën myëdäjtypy”, ets tiko kyaj tsyëˈëgëdë. Anëëmë waˈan mdukˈixyëty mä Biiblyë ti mbäät xytyuny parë nanduˈunë Jyobaa mguwäˈänëdët (Diˈibʉ Jatanʉp 16:14). Ko xynyijawët, mbäät dyajtëgatsyë mwinmäˈäny mä diˈib miin këdakp.

[Notë diˈib noky ëxˈääy]

[Letrë diˈib miimp mä dibujë mä pajina 8]

Ko kyäjpxwäˈkxtë Jyobaa tyestiigë, ¿waˈan yëˈë dyaˈˈadëy diˈib tuk peky ojts yajnaskäjpxë mä Biiblyë?