Nˈokpudëjkëm pënaty “määdëp” parë jyotwijtët
Nˈokpudëjkëm pënaty “määdëp” parë jyotwijtët
“Nijawëdë wiˈixë dëˈën ja tiempë yˈixyëty mä njikyˈäjtëm. Kyaj nˈokˈijtëm extëm pënëty määdëp, wijy nˈijtëm.” (ROM. 13:11)
¿MBÄÄT XYNYIMAYTYAˈAKY?
¿Tiko jyëjpˈamëty etsë Dios mëduumbë kyaj tkumanaxtëdë Diosë tyuunk?
¿Tiko jyëjpˈamëty etsë Dios mëduumbë tmëdooˈitët yajxon ko jäˈäy tmëtmaytyäˈäktë ets tˈix ttunët wiˈix yajpääty?
¿Nuˈunën jyëjpˈamëty nˈoyjyaˈayˈäjtëm mä nˈëwäˈkx ngäjpxwäˈkxëm?
1, 2. ¿Tidën ko mayë jäˈäy yajˈyuxäˈändë?
JËMËJT jëmëjt, milˈamë jäˈäy yˈooktë ko tsuu mäˈäy pyäädëdë o ko myanaxtë mä kyarrëwiittë. Etsë wiinkpë dyajtëgoytyë tyuunk mët ko kyaj pyëdëˈëktë tsojk o mët ko myanaxtë mä jam tyundë. Per mbäät mas oˈktëy njäjtëm ko ngumanäjxëmë Diosë jyaˈa. Päätyë Biiblyë xyˈanmäˈäyëm: “Jotkujk diˈibë [ijtp] wijy” (Diˈibʉ Jat. 16:14-16).
2 Tyam, mä niˈigyë wyingonyë kutëgoˈoyën, yëˈë naxwinyëdë jäˈäy yajpäättë extëm myäˈädë. Axtë pënaty nyiwintsënˈäjttëbë relijyonk jyënäˈändë ko të jyaˈay myanäjxtäˈäytyë. ¿Ti yˈandijpy ngumanäjxëmë Diosë jyaˈa? ¿Tiko jyëjpˈamëty ets pënaty jantsy Dios mëduundëp nyayaˈitëdët wijy? ¿Wiˈix mbäät nbudëjkëmë jäˈäy parë jyotwijtët?
¿TI YˈANDIJPY NGUMANÄJXËMË DIOS?
3. ¿Wiˈix yajpäättë pënaty të tkumanaxtë Dios?
3 Ko tuˈugë jäˈäy myanaxy, kyaj mbäät ti ttuny. Per pënaty të tkumanaxtë Diosë jyaˈa, jantsy tuundëp, jeˈeyë ko kyaj ttuunëdë Diosë tyuunk. Ninuˈun kyawäˈkpoˈkxtë, yëˈë myëmääy myëdäjtëp tijaty tyukjukyˈattëp, tˈëxtäˈäytyë xondakën, myëjpëtsëmäˈändë o myëkjäˈäyˈatäˈändë. Mayë tyuunk tjantsy myëdattë, ets waanë tiempë tjuuttë parë Dios. Per pënaty nayaˈijtëdëp wijy, jyaygyujkëdëp ko jëjpkëxanëbë tyäˈädë jukyˈäjtën, pääty jam dyajtundë xyëë tiempë mä Diosë tyuunk (2 Peed. 3:3, 4; Luk. 21:34-36).
4. ¿Nuˈunën jyëjpˈamëtyë tyäˈädë käjpxwijën: “Kyaj nˈijtëm extëm pënëty määdëgooytyëp”?
4 (Käjpxë 1 Tesalónikʉ 5:4-8.) Apostëlë Pablo ojts tkäjpxwijy ja Dios mëduumbëty: “Kyaj nˈijtëm extëm pënëty määdëgooytyëp”. Tuk peky wiˈix mbäät nmäˈädëgoˈoyëm ja ko kyaj nmëmëdoˈojëmë Diosë yˈanaˈamën. Ets ja tuk peky, ko kyaj nmëjpëjtakëm ko wingoomp ja tiempë mä Dios dyajkutëgoyaˈany pënaty kyaj myëmëdoyëty. Pääty oy ko nnaygyuentˈäjtëm mëdë duˈumbë jäˈäy parë kyaj xytyukninäjxëmë jyot wyinmäˈäny etsë jyaˈayˈäjtën.
5. ¿Wiˈix mayë jäˈäy wyinmaytyë diˈib määdëp?
5 Näägë jäˈäy wyinmaytyë ko kyaj jyaˈˈaty tuˈugë Dios mä kyuentëkëyakët (Sal. 53:1). Wiinkpë jyënäˈändë ko Dios kyaj ttunyë kuentë naxwinyëdë jäˈäy, pääty kyaj tiko nˈëxtäˈäyëm. Etsë wiinkpë jyënäˈändë ko yëˈëyë tsojkëp nmëbëjkëmë Dios. Niˈamukë tyäˈädë jäˈäy yajpäättë extëmxyëp myäˈädë. ¿Wiˈix mbäät nbudëjkëmë parë jyotwijtët?
JËJPˈAM ETS NNAYAˈIJTËM WIJY
6. ¿Tiko jyëjpˈamëty ets tuˈugë Dios mëduumbë ttunëdë mëjää parë kyaj tkumanaxëdë Diosë tyuunk?
6 Parë mbäät nˈyujxëmë wiink jäˈäy, jëjpˈam ets ëtsäjtëm nˈijtëm wijy. ¿Ti yˈandijpy? Biiblyë jyënaˈany ko pënaty määdëp, yëˈë tyuundëp tijaty ijtp “kubiˈits kuˈook”, extëm ko axëëk yˈadëtstë mä xyëdundë, yˈit tsyëënëdë oypyënëty mëët, yˈuuk myuˈugëdë, ttundë diˈib tsoytyuˈun mëët, tsyiptun tsyipkäjpxtë ets nyayˈaxëkˈixëdë (käjpxë Romanʉs 13:11-14). Mbäät tsyiptaˈaky njëjpkudijëm tijaty tyuundëp mayë jäˈäy. Pääty jëjpˈam ets kyaj nnaygyumanäjxëm. Tuˈugë tsyofeer tsojkëp tjamyatsët ko mbäät yˈooky pën manäjxp mä kyarrëwiity. Pes mas niˈigyë tuˈugë Dios mëduumbë, tsojkëp tjamyatsët ko pën kyumanäjxypyë Diosë tyuunk, mbäädë jyukyˈäjtën dyajtëgoy.
7. ¿Wiˈix nëjkx njäjt ngëbajtëm ko nwinmäˈäyëm ko kyaj pën tnekymyëdowäˈänyë Diosë yˈayuk?
7 Extëm nˈokpëjtakëm, tuˈugë Dios mëduumbë mbäät wyinmay ko kyaj pën tnekymyëdowäˈänyë Diosë yˈayuk (Pro. 6:10, 11). Ets mbäät jyënaˈany: “Pën kyaj pën tmëdowäˈäny, ¿tikots nëgoobë nyajtunëdë njot nmëjää?”. Jantsy tëyˈäjtën ko may tyamë jäˈäy kyaj tmëdowäˈändë, per mbäät ok tyëgatsyë jyot wyinmäˈäny o ja jyukyˈäjtën. Pes ta jäˈäy diˈib jotwijp ets tˈaxäjë Diosë yˈayuk. Ets mbäät nbudëjkëm pën ëtsäjtëm nnayaˈijtëm wijy, extëm ko nˈëxtäˈäyëmë winmäˈäny parë ndukmëtmaytyakëmë Diosë yˈayuk extëm mbäät tˈoymyëdoy. Nˈijtëm wijy nan yëˈë yˈandijpy, ko njamyajtsëm tiko jyëjpˈamëty nduˈunëmë Diosë tyuunk.
¿TIKO JYËJPˈAMËTY NDUˈUNËMË DIOSË TYUUNK?
8. ¿Tiko jyëjpˈamëty ngäjpxwäˈkxëm?
8 Nˈokˈyaˈijtëm winmäˈänyoty ko yajmëjpëtseembyë Jyobaa ko ngäjpxwäˈkxëm oyë jäˈäy tkamëdowäˈänët. Ko nduˈunëmë tyäˈädë tuunk, nan yaˈˈadëëpy tijatyë Jyobaa të ttuknibëjtäägë. Tim tsojkë Dios tpayoˈoyaˈany pënaty kyaj tmëmëdowdë ja oybyë ayuk. Ets duˈun ttukumëdowäˈäny extëmë nety të tˈatsowdë (2 Tes. 1:8, 9). Tëgoˈoyëmë nety ko nwinmäˈäyëm ko kyaj tyimjëjpˈamëty nimaytyakëm ja oybyë ayuk mët ko Dios dyajjukypyëkäˈänyë “oˈkpë diˈibë ijt oyjyaˈay es nandëˈën diˈibë ijt kaˈoyjyaˈay” (Apos. 24:15). Diosë yˈAyuk jyënaˈany ko pënaty yajpatp extëmë “tsyiip”, nyëjkxtët “mä ja tëytyuˈunën”, diˈib yˈandijpy ja kutëgoˈoyën. Ko ngäjpxwäˈkxëmë Diosë yˈayuk, yëˈë yaˈijxëbë Diosë pyaˈˈayoˈon, pes yajkypyë tiempë parë jäˈäy tyëgatsët ets tpäädët ja “jikyˈäjtënë winë xëë winë tiempë” (Mat. 25:32, 41, 46; Rom. 10:13-15). Per pën kyaj ngäjpxwäˈkxëm, ¿wiˈix mbäädë jäˈäy tmëdowdë ja ayuk diˈib yajnitsoˈogëdëp?
9. ¿Wiˈix ndukˈoyˈäjtëm ko ngäjpxwäˈkxëmë oybyë ayuk ets wiˈix ttukˈoyˈattë jäˈäy?
9 Ndukˈoyˈäjtëm nanduˈun ko ngäjpxwäˈkxëmë oybyë ayuk (käjpxë 1 Timotee 4:16). ¿Të xyˈixy wiˈix dyajkëktëkë mëbëjkën etsë tsojkën mä Dios ko nimaytyakëmë Jyobaa etsë yˈAnaˈamën? ¿Këdii nan xypyudëjkëm parë nmëdäjtëmë oybyë jäˈäyˈäjtën? ¿Ets këdii nan jotkujk xyajnayjäˈäwëm ko nduˈunëmë Diosë tyuunk mët ko ntsojkëm? Mayë Dios mëduumbë diˈib yaˈëxpëjktëbë jäˈäy jantsy jotkujk nyayjawëdë ko tˈixtë wiˈixë Diosë myëjää pyudëkëdë jäˈäy parë dyaˈoyëdë jyukyˈäjtën.
NˈOKPËJKËMË KUENTË WIˈIX JA JÄˈÄY YAJPÄÄTY
10, 11. 1) ¿Wiˈix nnijäˈäjëm ko Jesus mëdë Pablo ojts tpëktë kuentë wiˈixë jäˈäy yajpäättë? 2) ¿Tijaty mbäät nbëjkëmë kuentë parë mas oyë jäˈäy nmëtmaytyakëm?
10 Taaˈäjtp kanäk peky wiˈix mbäädë jäˈäy nmëtmaytyakëm parë tˈoymyëdowëdë oybyë yˈayuk. Dios mëduumbë tsojkëp tˈix ttunët wiˈix ja jäˈäy yajpääty. Jesus pyëjtakë ijxpajtën. Kom wäˈäts jäˈäy, ojts tpekyë kuentë ko jyotˈambejky tuˈugë farisee, ko jyantsy jodëmbijty tuˈugë toxytyëjk diˈib pokytyuump ets ko yˈoyjyaˈaytyaky tuˈugë kuˈookytyoxytyëjk (Luk. 7:37-50; 21:1-4). Ko Jesus tˈijxy wiˈixë tyäˈädë jäˈäyëty yajpäättë, ta tpudëjkë niduˈuk niduˈuk. Tyamë Dios mëduumbë kyaj wyäˈäts jäˈäyëty, per mbäät tpëktë kuentë wiˈix mbäädë jäˈäy tpudëkëdë. Extëmë apostëlë Pablo, yëˈë wiˈixëm ojts tmëtmaytyaˈagyë jäˈäy parë tpudëjkë oytyim pënëty (Apos. 17:22, 23, 34; 1 Kor. 9:19-23).
11 Pën nbëjkëmë kuentë wiˈixë jäˈäy yajpäättë, extëm ttuundë Jesus mëdë Pablo, ta nnijäˈäjëm wiˈix mbäät ndukmëtmaytyakëmë oybyë ayuk parë tˈoymyëdowdët. Extëm nˈokpëjtakëm, ko tuˈugë jäˈäy nmëtmaytyakëm, oy ko nˈijxëm mä tsyoony, ti tsyojkënyëˈajtypy, pën naytyuˈuk, të pyëjknë o pën jamë yˈuˈunk yˈënäˈk. Nan mbäät nˈijxëm ti jam tyuunkˈäjtypy parë yëˈë mëdë maytyaˈaky nyajtsondakëm.
12. ¿Tiko yˈoyëty nguentˈäjtëm tijaty ngäjpx nmaytyakëm mientrës ngäjpxwäˈkxëm?
12 Tuˈugë Dios mëduumbë diˈib pyejkypyë kuentë wiˈix ja jäˈäy yajpääty, kyaj wiinktsoo jyot wyinmäˈäny tpëjtaˈaky. Kyaj wyiˈixëty ko ngäjpx nmaytyakëm mët ja nmëguˈukˈäjtëm diˈib mëët nëjkxëm käjpxwäˈkxpë, per nˈokjamyajtsëm ko yëˈë ja jäˈäy diˈib nmëtmaytyäˈägäˈänëm (Ecl. 3:1, 7). Pääty ko nëjkxëm tëjkm dëjkm, tsojkëp nnaygyuentˈäjtëm parë ja käjpx maytyakën kyaj axëëk dyajwëˈëmëdë Diosë tyuunk. Mbäät yëˈë nimaytyakëm tijaty ndukmëtmaytyäˈägäˈänëm ja jäˈäy ko tˈoymyëdowëdë Diosë yˈayuk, duˈuntsoo ja jot winmäˈäny kyaj wiinktsoo nyëjkxët. Nan oy ko nnaygyuentˈäjtëm parë kyaj ti xyajjëˈijx xyajnasˈijxëm mä jamë jäˈäy nmëtmaytyakëm. Extëm nˈokpëjtakëmë telefënë, mbäät tyuny mä ngäjpxwäˈkxëm, per tsojkëp nnaygyuentˈäjtëm parë kyaj xynyaˈamëm.
NˈOKˈYAˈIJXËM KO NNAYTYUKJOTMAYTYUˈUNËMË JÄˈÄY
13, 14. 1) ¿Wiˈix mbäät nnijäˈäjëm ti ja jäˈäy nyijawëyaampy? 2) ¿Wiˈix mbäädë jäˈäy tˈoymyëdoyë Diosë yˈayuk?
13 Dios mëduumbë diˈib kyaj nyaygyumanaxëdë, yajxon tmëdooˈittë wiˈix ja jäˈäy jyënaˈany. ¿Tijaty mbäädë jäˈäy nyajtëˈëwëm parë xytyukmëtmaytyakëm ti myëmääy myëdajpy? ¿Myëjotmaybyatypy ko jyaˈˈaty mayë relijyonk, myëjwindëkë axëkˈäjtën mä tsyëënë o ko gobiernë kyaj ti dyaˈoybyëtsemy? ¿Mbäät tˈoymyëdoyë Diosë yˈayuk ko ndukmëtmaytyakëm wiˈix yˈixëty tijatyë Dios të dyajkojy, o ko ndukniˈˈijxëm wiˈix xypyudëjkëm Biiblyë kyäjpxwijën? Diˈib nanduˈun mayë jäˈäy yˈoymyëdoodëp, yëˈë ko nmaytyakëmë nuˈkxtakën, axtë diˈib kyaj tmëbëktë Dios. May nyayajtëwëdë pën jam pën diˈib myëdoopy ko nyuˈkxtäˈäktë. Etsë wiinkpë nyijawëyandëp pënë Dios myëdoopy ko niˈamukë jäˈäy myëgäjpxëdë, o pën kyaj, ti mbäät ttundë parë yajmëdowëdë nyuˈkxtakën.
14 Mbäät mas niˈigyë njäjtëm wiˈix nyajtsondakëmë maytyaˈaky ko nˈijxëm wiˈixë nmëguˈukˈäjtëm ttuny diˈib jeky kujk Dios mëduunë. Nˈokˈijxëm wiˈix tijatyë jäˈäy dyajtëy, parë ja jäˈäy kyaj wyinmayët ko jeˈeyë tijaty tnijawëyaˈany. Ets wiˈix ja yˈää yoˈkn tpëjtaˈaky etsë wyiin jyëjp parë dyajnigëxeˈeky ko jyaygyujkëp wiˈix ja jäˈäy myaytyaˈaky (Pro. 15:13).
OYJYAˈAYˈÄJTËN ETSË WIJYˈÄJTËN
15. ¿Tiko mbäät xëmë nˈijtëm oyjyaˈay mä ngäjpxwäˈkxëm?
15 Mä meerë të njantsy myäˈädëgoˈoyëm, ¿wiˈix nnayjäˈäwëm ko pën xyˈyujxëm? Mayë jäˈäy kyaj tˈoyjawëdë ko ajotkumonë yajˈyuxtë, yëˈë yˈoyjäˈäwëdëp ko yajˈyuxtë wanaty wanaty. Nanduˈun jyaty ko nˈyuxäˈänëmë jäˈäy diˈib të tkumanaxtë Dios. Pääty, ¿ti mbäät nduˈunëm ko tuˈugë jäˈäy jyotˈambëkët mä ndëjkˈayoˈoyëm? Njaygyujkëm wiˈix nyayjawëty ets nnayjyëgäjpxëm mëdë yuunkˈat naxypyˈat (Pro. 15:1; 17:14; 2 Tim. 2:24). Ko nyaˈijxëmë oyjyaˈayˈäjtën, mbäät ja jäˈäy pyudëkëty parë tmëdooˈitët ko wiinkpë nmëguˈukˈäjtëm nyaxët.
16, 17. ¿Wiˈix mbäät nyaˈijxëmë wijyˈäjtënë mä ngäjpxwäˈkxëm?
16 Näˈäty mbäät nˈakˈyajnëjkxëmë maytyaˈaky oyë jäˈäy tjajëjpkugäjpxë. Extëm ta diˈib jënandëp: “Dyoskujuyëm, per ëjts nmëdäjnëbëtsë nrelijyonk” o “kyajts ntsojkënyëˈaty”. Duˈun mayë jäˈäy yˈatsowdë parë tjëjpkäjpxtuˈuttë ja maytyaˈaky. Per ko nyaˈijxëmë oyjyaˈayˈäjtën ets nnijäˈäjëm ti mbäädë jäˈäy nyajtëˈëwëm, mbäät yëˈë pyudëkëty parë tnijawëyäˈänët wiˈix jyënaˈanyë Diosë yˈayuk (käjpxë Kolosʉ 4:6).
17 Ko tuˈugë jäˈäy xyˈanmäˈäyëm ko kyaj tmëdatyë tiempë, oy ko nnayjyëgäjpxëm, per näˈäty oy ko nˈijxëm pën mbäät ndukmëtmaytyakëm waanë diˈib yˈoymyëdowëp. Ta nmëguˈukˈäjtëm diˈib jeˈeyë tuk minutë tkäjpxtë tuˈugë bersikulo diˈib mä Biiblyë, ta tnikaˈaktë tuˈugë yajtëˈëwën diˈib ok yˈatsoojëmbijttëp. Ko duˈun ttundë, ta näˈätyë jäˈäy tˈoymyëdowdë ets tˈakˈyajnëjkxtë ja maytyaˈaky. ¿Tiko nanduˈun xykyaˈijxmatsy?
18. ¿Ti mbäät nduˈunëm parë mas oy ngäjpxwäˈkxëm oytyim määjëty?
18 Tuˈuk tuˈugë xëë nnaybyatëm mëdë jäˈäy, ets mbäät tˈoymyëdoyë Diosë yˈayuk pën niˈëxpëjkëm jawyiin wiˈix nmëtmaytyäˈägäˈänëm. Ta mayë nmëguˈukˈäjtëm diˈib myëjëdijttëbë ëxpëjkpajn ets ta diˈib wyinmääytyëp diˈibë tekstë mbäät tkäjpxtë ko tpäättëdë jäˈäy diˈib myëdowaampy. Mbäät nyajtëˈëwëm wiˈix mbäät nduˈunëm diˈib yˈijxypy wiˈix ngäjpxwäˈkxëm etsë prekusoorëty diˈib mä naymyujkën.
NˈOKˈYUJXËM TSUJ YAJXONË NJIIKYˈÄJT NMËGUˈUKˈÄJTËM
19. ¿Tiko yˈoyëty ets xëmë nbudëjkëmë njiikyˈäjt nmëguˈukˈäjtëm?
19 Njatsojkëm etsë njiikyˈäjt nmëguˈukˈäjtëm tˈaxäjëdë oybyë ayuk (Jos. 2:13; Apos. 10:24, 48; 16:31, 32). Per pën kyaj tmëjpëjtaˈaky, mbäät nwinmäˈäyëm ko kyaj tyëgatsäˈäny oy wiˈix njaˈˈanmäˈäyëm ets oy ti njatuˈunëm, ets mbäädë net kyaj nekytyukmëtmaytyakëm ja oybyë ayuk. Per mbäät ti tyuny jyatyëty diˈibë jyot winmäˈäny yajtëgatsëdëp. O mbäät tyam, niˈigyë njäjtëm nimaytyakëmë tëyˈäjtën ets tˈoymyëdowdët.
20. ¿Wiˈix mbäädë njiikyˈäjt nmëguˈukˈäjtëm nmëtmaytyakëm tsuj yajxon?
20 Nan oy ko nwintsëˈkëm wiˈix ja njiikyˈäjt nmëguˈukˈäjtëm nyayjawëdë (Rom. 2:4). Mëdë oyjyaˈayˈäjtën nmëtmaytyakëm duˈun extëm nmëtmaytyakëmë jäˈäy mä ngäjpxwäˈkxëm. Nˈokˈyaˈijxëmë yuunkˈat naxypyˈat etsë wintsëˈkën. Kyaj nëgoo ndëjkëm maytyakpë etsë net wiink nyajnayjäˈäwëm, mas oy ko ndukmëtmaytyakëm wiˈix ndukˈoyˈäjtëm ko nnijäˈäjëmë tëyˈäjtën (Éfe. 4:23, 24). Nˈoktukˈijxëm wiˈixë Jyobaa xyajjukyˈäjtëm agujk jotkujk ets xytyukniˈˈijxëm parë këˈëm ndukˈoyˈäjtëm (Isa. 48:17). Waˈan xyˈijxëm extëm tuˈugë ijxpajtën mä wiˈix jyukyˈatyë Dios mëduumbë.
21, 22. Nimaytyäˈäk tuˈugë eksperiensyë diˈib xytyukˈijxëm ko oy ets xëmë nbudëjkëmë njiikyˈäjt nmëguˈukˈäjtëm.
21 Näämnëm, tuˈugë nmëguˈukˈäjtëm tkujäˈäyë: “Nimäjktëgëëgëtsë nmëgaˈax ets xëmëts ndunyë mëjää parëts njatuknijawëyaˈanyë oybyë ayuk, duˈun mëdëtsë ngäjpx nmaytyakën ets mä tijatyëts nduumpy. Jëmëjt jëmëjtëts nnijayë niˈamukë. Per naytyuˈugëts të nDestiigëˈaty 30 jëmëjt naxy”.
22 Tyäˈädë nmëguˈukˈäjtëm yˈakjënäˈäny: “Tëgok, tajëts ojts nmëgajpxy tuˈugëtsë nmëgaˈaxë toxytyëjkpë diˈib jagam tsënaapy. Tajëts xyˈanmääy ko të nety tjaˈˈanëëmë ja diˈib yaˈëxpëjkp tsäjptëgoty parë Biiblyë tyukniˈˈixëdët, per ninäˈä kyatukniˈˈijxë. Kojëts nˈanmääy ko nbudëkëyaambyëts, tajëts xyˈatsooy: Oy, per ntsejpyëts xynyijawët ko ninäˈäts ngaTestiigëˈatäˈäny. Tajëts ojts nduknigexyë liibrë ¿Ti tëyˈäjtën jantsy tukniˈijxëbë Biiblyë? etsëts ojts nmëgajpxy janäämëty mä telefënë. Per nijeˈeyë ojts tkayaˈpwaˈkxy ja liibrë. Ok, tajëts nˈanmääy ets tkonëˈëgët parëts mëët nimaytyäˈägët naa mäjmokx minutë ja tekstë diˈib myëmiimpy. Kojëts mëët nmaytyaky kanäkˈok, ta jyënany ko kyaj jeˈeyë nyekyˈëxpëkäˈäny mäjmokx minutë. Ets yëˈë net diˈibëts ojts xymyëgäjpxnë parëts mëët nˈëxpëkët, näˈäty jantsy tsojkëts xymyëgajpxy mä kyajnëmëts nbëdeˈeky, axtë majtskˈok tuˈukpë xëë. Kyum jëmëjt ta nyëbejty, ets ko nyajxy tuk jëmëjt, ta tyëjkë tuumbë prekusoor”.
23. ¿Tiko yˈoyëty ets nˈyujxëmë jäˈäy diˈib të tkumanaxtë Dios?
23 Tsojkëp nduˈunëmë mëjää parë nˈyujxëmë jäˈäy diˈib të tkumanaxtë Dios. Taanëm mayë jäˈäy diˈib yujy tudaˈaky diˈib yˈaxäjëdëbë oybyë ayuk. Ko yaˈˈawijtsmujktäˈäy, ja nyëbattë jäˈäy poˈoboˈo 20,000 naxy. Pääty, nˈokpanëjkxëmë käjpxwijënë diˈibë Pablo myooyë ja Dios mëduumbë diˈib xyëˈäjt Arquipo: “Kuytyun yajxon ja tuunk diˈibë ja Nintsënˈäjtëm të mmoˈoyëty es xymyëdunët” (Kol. 4:17). Ja tuˈukpë artikulo xypyudëkëyäˈänëm niˈamukë parë njaygyujkëm tidën yˈandijpy ndukjotëgoˈoyëm mä ngäjpxwäˈkxëm.
[Yajtëˈëwën]
[Rekuäädrë diˈib miimp mä pajina 13]
¿WIˈIX MBÄÄT NNAYAˈIJTËM WIJY?
▪ Ko nduˈunëm xëmë Diosë tyuunk
▪ Ko kyaj nduˈunëm tijaty ijtp kubiˈits kuˈook
▪ Ko kyaj njäˈäytyëgoˈoyëm ko kujotmay ngumanäjxëmë Diosë tyuunk
▪ Ko nwinmäˈäyëm ko taaˈäjtpë jäˈäy diˈib yˈoymyëdowaambyë Diosë yˈayuk
▪ Ko nˈëxtäˈäyëmë winmäˈäny wiˈixaty mbäädë jäˈäy nmëtmaytyakëm
▪ Ko nyaˈijtëm winmäˈänyoty ko jëjpˈamë tyäˈädë tuunk
