¿Ti duˈun meerë yˈandijpy Armajedon?
¿Ti duˈun meerë yˈandijpy Armajedon?
“Yëˈë dëˈënë mëjkuˈujëty diˈibë [...] nëjx twowäˈändë ja reyëty mäjatyë naxwinyëdë es nyaymyujktäˈäyëdët [...] mä ja lugäär diˈibë ebreeë jäˈäyëty tyukxëˈäjttëp Armajedón.” (DIˈIBɄ JATANɄP 16:14, 16)
ARMAJEDON diˈib näˈäty yajjaapy Har–Magedón, yëˈë duˈun yajtijp tuˈugë lugäär. ¿Per ti yˈandijpyë tyäˈädë ayuk? ¿Ets tiko myiny mä winmäˈäny extëm tuˈugë mëj tsip diˈib tunan jatanëp?
Tyuˈukmuktë mä ja lugäär diˈib xyëˈäjtypy Armajedon
Mä ayuk ebreo Har–Magedón, ja nyikejy “Kopk diˈib Meguidó”. Kyaj jyamˈäjty tuˈugë kopk diˈib duˈun xyëˈäjt, per mä ja yˈit lyugäärë israelitëty diˈib anikëjxytsyoo wëˈëmp, jamˈäjt tuˈugë lugäär diˈib xyëˈäjt Meguidó. Jam ijty yˈayoˈoymyuky majtskë tuˈu. Naa jamyë mä tyäˈädë lugäär, kanäkˈok jamë jäˈäy tsyiptuundë, pääty ko ijtyë jäˈäy tmëdowdë tyäˈädë ayuk Meguidó, yëˈë miimp mä wyinmäˈäny tuˈugë tsip. *
Diˈib mas jëjpˈam mbäät nnijäˈäjëm mä Meguidó, yëˈë tiko jamë jäˈäy tsyiptuundë. Tyäˈädë lugäär jamë nety yajpääty mä ja naxwinyëdë diˈibë Jyobaa tyukumääy ja israelitëty (Éxodo 33:1; Josué 12:7, 21). Ojtsë Jyobaa tyukwandäˈägëdë ko nyitsiptunäˈänyëty mä myëtsipëty, ets ojts duˈun ttuny (Deuteronomio 6:18, 19). Extëm ko nyimiinë Sísara mët ja soldäädëtëjk diˈib ja rey Jabín kyajx, ojtsë Jyobaa yajmadäˈägëdë mëjˈäjtëngyëjxm jam Meguidó (Jueces 4:14-16).
Har–Magedón o Armajedon, kyaj yëˈë tˈandijy tuˈugë lugäär, per nikajp, yëˈë yˈandijpy ko majtsk pekyë tsiptuumbë mëkatypyë nyaywyinguwäˈägëdë.
Mä Biiblyë ojts yajnaskäjpxë ko tim tsojkë Satanás mëdë kyaˈoybyëty dyajtuˈukmukäˈänyë gobiernëtëjk diˈib yä naxwiiny parë tnibëdëˈëgäˈändë Diosë kyäjpn. Ko duˈun tyun jyatëdët, ta Dios dyajkutëgoyaˈanyë myëtsipëty ets miyonkˈamë jäˈäy yˈoogäˈäny (Diˈibʉ Jatanʉp 19:11-18).
¿Tiko Dios dyaˈoogäˈänyë mayjyaˈay pën yëˈë “paˈˈayoop, maˈkxtujkp ets mëjwiin kajaa yˈoyjyaˈayëty”? (Nehemías 9:17.) Parë njaygyujkëm tiko duˈunë Dios ttunäˈäny, jëjpˈam ets nˈatsoˈojëmbijtëmë tyäˈädë yajtëˈëwën: 1) ¿Pën yajtsondäˈägaambyë tyäˈädë tsip? 2) ¿Tiko Jyobaa ttuktëkëyaˈany? 3) ¿Wiˈix wyimbëtsëmäˈänyë tyäˈädë tsip?
1. ¿PËN YAJTSONDÄˈÄGAAMBYË TYÄˈÄDË TSIP?
Dios kyaj dyajminäˈänyë Armajedon mët ko ttukjotˈambekyë naxwinyëdë jäˈäy, yëˈë duˈun mët ko tnitsiptunäˈänyë oyjyaˈay ko nety yajnibëdëˈëktë. Mä tyäˈädë tsip, yëˈë nibëdëˈëganëbë “reyëty mäjatyë naxwinyëdë”, o ja wintsëndëjk diˈib yä naxwiiny. ¿Tiko jyotˈambëkäˈändë? Yëˈko Satanás, yëˈë yajtunaambyë gobiernëtëjk etsë soldäädëtëjk parë tnibëdëˈëgäˈäny ets tˈaxëktunäˈäny pënaty yˈawdäjttëbë Jyobaa Dios (Diˈibʉ Jatanʉp 16:13, 14; 19:17, 18).
Tyam, mä näägë paˈis kyaj kyuboky etsë jäˈäy tmëdatëdë ryelijyonk diˈib tyim mëdataampy ets tmaytyäˈägët ti tyim maytyäˈägaampy. Pääty, mbäät kyaj yajmëbëkäˈänët ko gobiernëtëjk tnibëdëˈëgët tuˈugë relijyonk o dyajkutëgoyäˈänët. Per ojts duˈun tnibëdëˈëktë mä siiglë 20 ets tyam nan nyibëdëˈktëp. * Jaˈäjtp majtsk pekyë tëgatsyˈäjtën extëm tyam tnibëdëˈëktë ets extëm tnibëdëˈëgäˈändë ko nety ja Armajedon myiny. Myëduˈuk, yëˈë ko abëtsemy nyaxwinyëdë Diosë kyäjpn yajnibëdëˈëgäˈäny. Ets myëmajtsk, yëˈë ko Jyobaa tnitsiptunäˈäny extëm ninäˈänëm duˈun tkatuny (Jeremías 25:32, 33). Biiblyë jyënaˈany ko ja mä “tsyiptunäˈändë mët ja Nintsënˈäjtëm Dios diˈibë tëgekyë mëkˈäjtën myëdäjtypy”.
2. ¿TIKO JYOBAA TTUKTËKËYAˈANYË TYÄˈÄDË TSIP?
Jyobaa tsyejpy ets pënaty mëduunëdëp jyaˈayˈattët yujy tudaˈaky ets ttsoktëdë myëtsip (Miqueas 4:1-3; Matewʉ 5:43,44; 26:52). Pääty ko nety mëktaˈaky yajnibëdëˈëktë, kyaj tyujn pyujxn tkäjpëˈëgäˈändë parë nyaynyitsiptunëdët. Ets ko Dios tkanitsiptunëdë kyäjpn, ta nëjkx nyaxy extëm tuˈugë Dios diˈib kyaj tmëdatyë tsojkën, kyaj ttunyë tëyˈäjtën o kyaj tmëdatyë mëjää, ets axëëk nëjkxë xyëë wyeˈemy. Päätyë Dios ninäˈä tkamastuˈudäˈänyë kyäjpn (Salmo 37:28, 29).
Dios të tnigajpxy ti tyunaampy mët ko kyaj ttseky ets nituˈugë jäˈäy kyutëgoyët (2 Pedro 3:9). Kanäkˈokë Biiblyë xytyukjamyajtsëm ko tëëyëp ojtsë kyäjpn tnitsiptuny ko yajnibëdëˈktë (2 Reyes 19:35). Biiblyë nan nyigajpxypy ko Jyobaa nyitsiptunaambyë kyäjpn ko netyë Satanás mëdë jyaˈay nyibëdëˈëgëdë. Tëëyëp, ojts yajnaskäjpxë mä Diosë jyaaybyajtën ko yajkutëgoyaambyë axëkjäˈäytyëjk (Proverbios 2:21, 22; 2 Tesalónikʉ 1:6-9). Ko jyäˈtëdë tyäˈädë tiempë, pënaty nyibëdëˈktëbë Diosë kyäjpn nëjkxëp tpëkäˈändë kuentë ko pën mëët tsyiptundë yëˈë Dios diˈib myëdäjtypy tukëˈëyë mëjää (Ezequiel 38:21-23).
3. ¿WIˈIX WYIMBËTSËMÄˈÄNYË TYÄˈÄDË TSIP?
Mä Armajedon, miyonkˈamë jäˈäy tsyoˈogäˈäny. Ets ko nety të nyaxy, ta myinäˈänyë jotkujkˈäjtën yä Naxwiiny (Diˈibʉ Jatanʉp 21:3, 4).
Mä Biiblyë jyëjpkëjxnë jap tnimaytyaˈaky ko “tëgoy myay ja jäˈäy” diˈib nitsoˈogandëp mä tyäˈädë tsip (Diˈibʉ Jatanʉp 7:9, 14). Mëdë Diosë nyaybyudëkë, dyajjëmbitäˈändë tyäˈädë Naxwinyëdë extëm tuˈugë it lugäärë tsujpë extëmë Jyobaa ojts ttuknibëjtäägë.
Per ¿näˈä yajnibëdëˈëgäˈänyë Diosë kyäjpn?
[Notë diˈib noky ëxˈääy]
^ parr. 5 Ko yajmaytyaˈaky tuˈugë lugäär mbäät myiny mä winmäˈäny tuˈugë tsip. Extëm nˈokpëjtakëm, Hiroshima, tuˈugë siudad diˈib Japón, ojts kyutëgoy mëdë bombë, ets ko tyamë jäˈäy tmëdowdë Hiroshima, yëˈë miimp mä winmäˈäny tuˈugë tsip mëdë bombë.
^ parr. 12 Ko mayë jäˈäy jyäämˈoˈk nyääxˈoˈktë, ja diˈib yajtijp Holocausto, yëˈë tuˈugë ijxpajtën mä wiˈixë gobiernëtëjk ojts tjayajkutëgoyaˈany näägë relijyonk etsë jäˈäy diˈib kyaj mëët tyuˈugyë ja ryasë. Tëëyëp nan ojts tuk tiempë yaˈˈaxëktundë relijyonk mä paˈis diˈib ijty yajtijp URSS. Ixë artikulo diˈib mä La Atalaya 1 de mayo 2011, diˈib yajpëtsëëmdëbë Jyobaa tyestiigëty.
[Letrë diˈib miimp mä dibujë mä pajina 6]
Tëëyëp, ojtsë Jyobaa tnitsiptunyë kyäjpn
[Letrë diˈib miimp mä dibujë mä pajina 7]
Mä Armajedon, Jyobaa nyitsiptunaampy jatëgokë kyäjpn
