Tyäˈädë artikulo yëˈë mbudëkëyanëp ets mä mBiiblyë xypyäädët wiˈix yaˈˈatsoojëmbity tijaty mnayajtëëjëp. Ets pën mtsojkënyëˈajtypy mbäät mëdë Jyobaa tyestiigë xyˈëxpëktë.

1. ¿Tiko Dios ojts twinˈixy ja israelitëty parë tkäjpnˈatäˈäny?

Dios yëˈë kyäjpnˈäjt ja Abrahángë tyëëm yˈääts ets tmooy mayë anaˈamën. Tyäˈädë käjpn, diˈib xyëëmooy Israel ojts ttuknipeky parë tkuentˈatët ja yˈAyuk diˈibë nety të yajjääybyety ets parë yaˈˈawdatët tëyˈäjtën mëët (Salmo 147:19, 20). ¿Wiˈix wyimbëtsemy? Tyukˈoyˈäjttëbë jäˈäy oy mä tsyoonët. (Käjpxë Génesis 22:18.)

Dios wyinˈijx ja israelitëty parë ttestiigëˈattët. Jëjpˈamë nety tmëmëdowdët ja Ley diˈib yajmooytyë, ko ijty duˈun ttundë, ta ttukˈoyˈattë (Deuteronomio 4:6). Ko nˈëxpëjkëm wiˈix jyukyˈäjttë ja israelitëty, mbäät mas niˈigyë nˈixyˈäjtëm ja Dios diˈib tëyˈäjtën. (Käjpxë Isaías 43:10, 12.)

2. ¿Tiko yˈittë extëm tuˈugë käjpn pënaty jantsy Dios mëduundëp?

Ko Jyobaa kyaj tnekykyupejky ja israelitëty, ja käjpn diˈibë nety të twinˈixy, ta ttukwingudëgatsˈäjty pënaty pyanëjkxtë Kristë (Matewʉ 21:43; 23:37, 38). Diˈib ijty yajtijtëp Diosë tyestiigë, yëˈë ja israelitëty, per tyam yëˈë duˈun yajtijtëp pënaty jyantsy pyanëjkxtëbë Kristë. (Käjpxë Apostʉlʉty 15:14, 17.)

Jesus ojts dyajtuˈukmuky ja yˈëxpëjkpëty parë tnimaytyäˈäktëdë Jyobaa ets yaˈëxpëktët oy tyim määjëty (Matewʉ 10:7, 11; 24:14; 28:19, 20). Tyäˈädë tuunk niˈigyë tyam myëjwindëkë. Jyobaa miyonkˈamë jäˈäy dyajtuˈukmuky mä relijyongë tëyˈäjtënbë (Diˈibʉ Jatanʉp [Apocalipsis] 7:9, 10). Ko tyëkëdë mä Diosë kyäjpn, ta nyaymyëjämoˈoyëdë ets nyaybyudëkëdë. Mäjatyë naymyujkën tuˈugyë tˈaxäjëdë ja ëxpëjkënë diˈib mä Biiblyë. (Käjpxë Ebreeʉsʉty 10:24, 25.)

  3. ¿Wiˈix tsyondakyë Jyobaa tyestiigëty mä tyäˈädë tiempë?

Ja tsyondaky mä jëmëjt 1870, ko niwaanë jäˈäy diˈib yˈëxpëjktëbë Biiblyë, tˈëxpëjkpëtsëëmdë jatëgok ja tëyˈäjtën. Nyijäˈädëbë nety ko Jesus ojts dyajtuˈukmuky ja yˈëxpëjkpëty parë kyäjpxwäˈkxtët. Ta dyajtsondaktë ja tuunk parë wyäˈkxët abëtsemy nyaxwinyëdë ja oybyë ayuk. Ets mä jëmëjt 1931, ja xyëë tpëjktë, Jyobaa tyestiigëty. (Käjpxë Apostʉlʉty 1:8; 2:1, 4, etsë 5:42.)

4. ¿Wiˈix yˈity tukniwits tukniwääbë Jyobaa tyestiigëty?

Mä primer siiglë, ja naymyujkën diˈib yajpattë oymyääjëty, tyukˈoyˈäjttë ko tyuˈumooyëdë pënaty wyooyoˈoytyë ja Diosë kyäjpn, diˈib yˈëxkäjptë ko Jesus yëˈë nyigëbäjkˈäjtypyë naymyujkën (Apostʉlʉty 16:4, 5). Tyam nanduˈunë Jyobaa tyestiigëty, yëˈë yaˈijttëbë Jesus extëmë Wintsën (Matewʉ 23:9, 10). Nan yëˈë tuˈumooyëdëp Diˈib wyooyoˈoytyëbë Jyobaa tyestiigëty, mëjjäˈäytyëjkëty diˈib yajtuundëbë Biiblyë parë tmëjämoˈoytyë ets ttuˈumoˈoytyë 100,000 naxyë naymyujkën. Mä tuˈuk tuˈugë naymyujkën, tapˈäjtpë mëjjäˈäytyëjk diˈib kyuentˈäjttëp mëdë tsojkën ja Diosë jyaˈayëty. (Käjpxë 1 Peedrʉ 5:2, 3.)

Jyobaa tyestiigëty tukniwits tuknimäˈkxë tyuunk yˈity parë yˈëwäˈkx kyäjpxwäˈkxtët ets dyaˈëxpëktëdë jäˈäy abëtsemy nyaxwinyëdë. Pääty tkäjpxnaxtë ëxpëjkpajn diˈib mä Biiblyë, dyajpëtsëmdë ets dyajwäˈkxtë naxy 500 ayuk. Ets duˈun extëm ja apostëlëty, tëjkm dëjkm nyëjkxtë ëwäˈkx käjpxwäˈkxpë (Apostʉlʉty 20:20). Jyobaa tyestiigëty, yaˈëxpëjktëp pënaty jyantsy nyijawëyandëbë tëyˈäjtën. Ets kom jam tpëjtäˈäktë jyot myëjää parë tpudëkëdë jäˈäy ets ttundë tijatyë Dios tyukjotkëdakypy, ta yˈittë agujk jotkujk. (Käjpxë Salmo 33:12 etsë Apostʉlʉty 20:35.)

Pën mˈaknijawëyaampy, ixë kapitulo 19 mä tyäˈädë liibrë, ¿Ti tëyˈäjtën jantsy tukniˈijxëbë Biiblyë?, diˈib yajpëtsëëmdëbë Jyobaa tyestiigëty.