Jyobaa xykyuwäˈänëm parë nbatëm ja nitsokën
Jyobaa xykyuwäˈänëm parë nbatëm ja nitsokën
“Ko xymyëbëktë Dios, yëˈë mguwäˈänëdëp mët ja myëkˈäjtën määnëm xyˈawixtë ja tiempë mä yëˈë dyaˈixäˈänyëty ja nyitsokën, diˈibë myëdäjtypy pëjkeˈeky.” (1 PEED. 1:4, 5)
¿WIˈIX NˈATSOˈOJËMBIJTËM?
¿Wiˈixë Jyobaa të xymyëjwoˈojëm mä relijyongë tëyˈäjtënbë?
¿Wiˈix nasˈijxëm etsë Jyobaa xytyuˈumoˈoyëm mëdë kyäjpxwijën?
¿Wiˈixë Jyobaa xyjotkujkmoˈoyëm?
1, 2. 1) ¿Tiko mbäät nˈijtëm seguurë ko Jyobaa xypyudëkëyäˈänëm parë ninäˈä ngamastutëm? 2) ¿Nuˈunë Jyobaa xyˈixyˈäjtëm?
“PËNË nety të myadaˈaky axtë ko myinët ja jëjptëgoˈoyën, yëˈë diˈib nitsoˈogäämp.” (Mat. 24:13, Traducción del Nuevo Mundo.) Jesus jyënany ko parë nnitsokëm mä kyutëgoyaˈanyë Satanásë jyaˈay, jëjpˈam ets ninäˈä ngamastutëmë Jyobaa axtë ko myinët ja jëjptëgoˈoyën. Ets mbäät duˈun nduˈunëm mëdë nyaybyudëkë, pes kyaj mbäät nmadakëm mëdë këˈëm mëjää o mëdë këˈëm wijyˈäjtën. Biiblyë xytyukwandakëm: “Dios yëˈë mbudëkëdëp miitsëty, pes yëˈë kyaj mnaˈixëdët es mbekytyundët pën kyaj mbäät xymyëmadäˈäktë; nik niˈigyë ko [ti] myajpekytyunäˈänëdë, net ja Dios myaˈˈawatsxëdët es myajnaxëdët wiink tsow” (1 Kor. 10:13). ¿Ti tyäˈädë yˈandijpy?
2 Jyobaa wäˈäts tnijawë wiˈix nyaˈijx nyajpatëm, tijaty jotmay nmëdäjtëm, wiˈix njäˈäyˈäjtëm ets nuˈun tijaty nmëmadakëm, pääty mbäät tˈixy pën ja jotmay diˈib nyajnäjxëm mbäät nmëmadakëm o kyaj. Per ¿waˈan yajxon xyjantsy yˈixyˈäjtëm? Tiko këdii. Biiblyë jyënaˈany ko Jyobaa nyijäˈäjëtyaapy wiˈix niduˈuk niduˈuk nyaˈijx nyajpatëm. Yëˈë nyijäˈäp tijaty nduˈunëm tuˈuk tuˈugë xëë ets wiˈix njukyˈäjtëm. Axtë nyijäˈäp ti japˈäjtp mä jot winmäˈäny ets mä jot korasoon (käjpxë Salmo 139:1-3). *
3, 4. 1) Extëmë Jyobaa ojts tmëmay tmëdäjˈyë David, ¿wiˈix xytyukˈijxëm ko tyam nan xymyëmäˈäy xymyëdäjëm niduˈuk niduˈuk? 2) ¿Ti tyamë Jyobaa mëjwiin kajaa tyuumpy?
3 ¿Myëmääy myëdajpyë Diosë naxwinyëdë jäˈäy diˈib nitii tkatsoojëty? David wyinmääyë tyäˈädë. Yëˈë tˈanmääyë Jyobaa: “Kojëts nbäˈtˈixyë mtsäjp, tijatyë mgëˈë të ttuny, yëˈë poˈo etsë mëtsäˈä diˈib mijts të xyaˈoyë, ¿ti tsyooˈäjtypyë naxwinyëdë jäˈäyë parë xyjamyatsët[?]” (Sal. 8:3, 4). Ko duˈunë David nyayajtëëwë, waˈan yëˈë twinmääy wiˈixë nety yajpääty. Yëˈë nety tim mutsk mä ja myëgaˈaxëty, perë Jyobaa ijxë extëm “tuˈugë yetyëjk diˈib yajxondakëbë kyorasoon” ets ttukjëjwooduty mä nety byorreegë kuentˈaty parë tyunët “wintsën mä ja [kyäjpn] Israel” (1 Sam. 13:14; 2 Sam. 7:8). Dios diˈib tukëˈëyë të dyajkojtäˈäy nyijäˈäbë nety ti wyinmaapy ets ti jyäˈäwëbë David, tuˈugë mixyuˈunk diˈib borreegë kuentˈäjtp. ¡Okwinmay wiˈixë David nyayjäˈäwë ko duˈun tnijäˈäjë!
4 Tyam nan mëjwiin kajaa Jyobaa xymyëmäˈäy xymyëdäjëm ets yëˈë yajtuumbyë relijyongë tëyˈäjtënbë parë dyajtuˈukmuky “tijaty yˈoyˈijxypy mäjatyë nasionk” ets tpudëkë jäˈäy parë xëmë myëdunëdët (Ageo 2:7). ¿Wiˈix Jyobaa ttuny? Ko xypyudëjkëm parë ninäˈä ngamastutëm. Per min jawyiin nˈokˈijxëm wiˈix tmëjwoyë jäˈäy mä kyäjpn.
DIOS XYMYËJWOˈOJËM
5. ¿Wiˈixë Jyobaa tmëjwoyë jäˈäy mä yˈUˈunk? Nimaytyäˈäk mët tuˈugë ijxpajtën.
5 Jesus jyënany: “Ni pën mbäät kyaminy mä ëjën pën kyaj dyajminy yëˈë Dios Teety” (Fwank 6:44). Tyäˈädë yëˈë yˈandijpy ko Jyobaa, yëˈë diˈib ojts xypyudëjkëm parë tyam nbanëjkxëmë Kristë. Per ¿wiˈixë Jyobaa tmëjwoyë jäˈäy mä yˈUˈunk, diˈib yujy tudaˈaky extëmë borreegë? Ko ngäjpxwäˈkxëm ets ko dyajtunyë myëjää. Extëm nˈokpëjtakëm, ko Pablo mëdë wiinkpë misioneerë ojts nyëjkxtë Filipos, ta tpattë tuˈugë toxytyëjk diˈib xyëˈäjtypy Lidia ets ttukmëtmaytyaktë ja oybyë ayuk. Biiblyë jyënaˈany: “Ko tmëdooˈity diˈibë Pääblë kyajxypy, Dios [tuk]mëbëjkë”. Yä nˈijxëm ko Dios yëˈë tuknigajxë myëjää parë tjaygyujkë ti nety yajtukmëtmaytyakp. ¿Wiˈix wyimbëtseemy? Lidia ojts nyëbety “mët nidëgekyë diˈibaty tsënääytyëp mä jyëën tyëjk” (Apos. 16:13-15).
6. ¿Wiˈixë Jyobaa ojts xymyëjwoˈojëm parë nˈawdäjtëm tëyˈäjtën mëët?
6 ¿Yëˈëyë duˈunë Lidia mëjwoojë Dios? Kyaj. Pes pën të nnaywyandakëm mä Jyobaa, yëˈë duˈun mët ko të xymyëjwoˈojëm parë nˈawdäjtëm tëyˈäjtën mëët. Ets duˈun extëmë Jyobaa tˈijxy ja oybyë jäˈäyˈäjtën mä Lidia jyot kyorasoon, nanduˈun tˈijxy mä ngorasoonˈäjtëm. Ko ojts nmëdoˈojëm ja oybyë ayuk, Jyobaa yëˈë ojts xypyudëjkëm mët yëˈëgyëjxmë myëjää parë ojts njaygyujkëm (1 Kor. 2:11, 12). Nan ojts nˈijxëm wiˈixë Dios xypyudëjkëm ko ogäˈän ojts nyajtuˈunëm ja ëxpëjkën. Jyobaa jantsy jotkujk nyayjäˈäwë ko ojts nnaywyandakëm mä yëˈë. Desde ko ojts nbatsondakëmë tyäˈädë nëˈë tuˈu, Jyobaa kyaj xymyastutëm, xëmë xypyudëjkëm.
7. ¿Wiˈix nnijäˈäjëm ko Jyobaa yëˈë xypyudëkëyäˈänëm parë ninäˈä ngamastutëm?
7 Jyobaa yëˈë ojts xypyudëjkëm parë nmëduˈuntsondakëm, ets mbäät nˈijtëm seguurë ko yëˈë ninäˈä xykyamastuˈudäˈänëm. Jyobaa nyijäˈäp ko kyaj këˈëm winmäˈäny ojts ndëjkëm ëxpëjkpë ets ko ntsojkëmë nyaybyudëkë parë xëmë ndukˈijtëm ja tëyˈäjtën. Pedro duˈun tˈanmääy ja Dios mëduumbëty diˈib nëjkxandëp tsäjpotm: “Ko xymyëbëktë Dios, yëˈë mguwäˈänëdëp mët ja myëkˈäjtën määnëm xyˈawixtë ja tiempë mä yëˈë dyaˈixäˈänyëty ja nyitsokën, diˈibë myëdäjtypy pëjkeˈeky” (1 Peed. 1:4, 5). Tyäˈädë ää ayuk yëˈë parë niˈamukë Dios mëduumbë. ¿Wiˈix tyamë Jyobaa xykyuwäˈänëm? Oy ko nnijäˈäjëm wiˈix yaˈˈatsoojëmbity, pes niˈamukë ntsojkëmë Diosë nyaybyudëkë parë ninäˈä ngamastutëm.
DIOS XYKYUENTˈÄJTËM PARË KYAJ NDËGOˈOYËM
8. ¿Tiko tsyekyëty nduˈunëmë mëjää parë kyaj ndëgoˈoyëm?
8 Mët ko kanäk peky nbatëmë jotmay mä jukyˈäjtën ets mët ko nbokyjyaˈayˈäjtëm, mbäät kyaj nekywyinmäˈäyëm extëmë Jyobaa. Ets mbäädë net kyaj nbëjkëmë kuentë ko ndëgoˈoyëm (käjpxë Galasyʉ 6:1). Min nˈokˈijxëm ko David duˈun tëgok jyajty.
9, 10. ¿Wiˈixë Jyobaa tjëjpkuwäˈkë parë David kyaj tyuundëgoyët, ets wiˈix tyam xypyudëjkëm?
9 David mëjwiin kajaa tmëmaˈkxtujky ja rey Saúl ko kyaj wiˈix ttuuny mä pyajëdijtë (1 Sam. 24:2-7). Per tëgok, ojts myëmadaˈagyëty ja pyokyjyaˈayˈäjtën. Kom yajtëgoyˈäjttëbë nety ja käˈäy ukën, ta tkejxyë jyaˈay parë nëjkx tˈamdowdë Nabal mëdë mayˈäjt wintsëˈkën. Perë Nabal jantsy axëëk yˈatsooy, David ta jyantsy jyotˈambejky, axtë nyitsoˈon mët ja jyaˈay parë nëjkx dyaˈoogäˈändë ja Nabal mëdë jyaˈay. Kyaj tyim winmääy pën yajjäˈäyˈoˈkpë Dios yajnaxëdët ko ttam dyokëdë nyëë nyeˈpynyë jäˈäy diˈib kyaj ti pyoky. Per kyaj tyuundëgooy, mët ko Abigail, ja Nabalë nyëdoˈoxy ttuktëjkë tyäˈädë jotmay. David ojts tˈëxkapy ko yëˈë netyë Jyobaa të dyajtunyë Abigail, pääty tˈanmääy: “Mëjkumay yˈitëdë Jyobaa diˈib Diosˈäjtypyë Israel, diˈib të mgexyëty mä tyäˈädë xëë parëts mijts xyjëjpäädeˈeky! Ets mëjkumay yˈitëdë mwijyˈäjtën, ets mëjkumay mˈitët mijts ko të xyjëjpkuwäˈägë parëts mä tyäˈädë xëë kyaj nikëjxmˈatëdë nëë neˈpyny ets parëts kyaj mëdë ngëˈë nnayaˈˈawäˈätspëtsëmëdët” (1 Sam. 25:9-13, 21, 22, 32, 33).
10 ¿Ti tyäˈädë xytyukniˈˈijxëm? Ko Jyobaa yëˈë yajtuunë Abigail parë kyaj tyëgoyëdë David. Axtë tyambäät yëˈë yajtuumbyë jäˈäy parë xypyudëjkëm. Per kyaj mbäät nˈawijxëm ko tëgok tëgok ndëgoyäˈänëm tkaxëdë jäˈäy parë kyaj ndëgoˈoyëm. Nan kyaj mbäät nwinmäˈäyëm ko nnijäˈäjëm yajxon ti yëˈë tyunaampy mä tuˈuk tuˈugë jotmay o ti nyasˈixëyaampy tyun jyatëdët parë yˈadëwët ti tyuknibëjtakëp (Ecl. 11:5). Per mbäät nˈijtëm seguurë ko Jyobaa nyijäˈäp wiˈix nyaˈijx nyajpatëm ets xypyudëkëyäˈänëm parë ninäˈä ngamastutëm. Yëˈë xyˈanmäˈäyëm: “Ëjts mijts nmoˈoyëp ja wijyˈäjtën, ets nduˈumoˈoyëp mä ja nëˈë tuˈu diˈib mnëjkxëp. Nmoˈoyaampy ja käjpxwijën mëdëtsë nwiin [tëyë yˈitäˈäny] mä mijts” (Sal. 32:8). Per ¿wiˈixë Jyobaa xykyäjpxwijëm? ¿Wiˈix mbäät ndukˈoyˈäjtëm? Ets ¿tiko mbäät nˈijtëm seguurë ko Jyobaa nyëˈëmoopy tyuˈumoopy tyamë kyäjpn? Min nˈokˈijxëm wiˈix tˈatsoojëmbityë Diˈibʉ Jatanʉp.
DIOS XYKYUWÄˈÄNËM MËT KO XYKYÄJPXWIJËM
11. ¿Axtë nuˈunë Jyobaa tnijawë tijaty tuun jäjtëp mäjatyë naymyujkën?
11 Mä Diˈibʉ Jatanʉp kapitulo 2 etsë 3 jap yajnigajpxy ko Jesukristë yˈijx tijaty tuun jäjtë mä ja jëxtujkpë naymyujkën diˈib Asia Menor. Jap nˈijxëm ko Jesus yˈijx tuˈuk tuˈugë jotmay diˈib jamˈäjt mäjaty ja naymyujkën ets tmooy ja käjpxwijën. Axtë nyigäjpx xëë xëë ja jäˈäy ets tmaytyaky wiˈixë nety yajpäättë, tjotmëkmooy ets tmooy ja käjpxwijënë diˈibë nety yajtëgoyˈäjttëp. ¿Ti tyäˈädë yˈandijpy? Ja jëxtujkpë naymyujkën, yëˈë yˈandijpyë Dios mëduumbë diˈib nëjkxtëp tsäjpotm, diˈib jukyˈäjttëp desde 1914, ja käjpxwijën diˈib yajmoopy nan pudëjkëdëp tukëˈëyë naymyujkën diˈib yajpatp abëtsemy nyaxwinyëdë. Mbäädë net njënäˈänëm ko Jyobaa tyuˈumoobyë kyäjpn mët yëˈëgyëjxmë yˈUˈunk. Pääty, ¿ti mbäät nduˈunëm parë nˈaxäjëmë nyaybyudëkë?
12. ¿Wiˈix mbäät nasˈijxëm etsë Jyobaa xytyuˈumoˈoyëm?
12 Ja tuk peky wiˈix mbäädë Jyobaa xytyuˈumoˈoyëm ja ko nˈëxpëjkëm anaytyuˈugë Biiblyë. Yëˈë xymyoˈoyëmë käjpxwijën mët yëˈëgyëjxmë ëxpëjkpajn diˈib yajpëtseembyë tuumbë diˈib kuwijy (Mat. 24:45). Parë xypyudëjkëmë tyäˈädë käjpxwijën, tsojkëp njuˈtëmë tiempë parë nˈëxpëjkëm ets nyajtuˈunëm mä jukyˈäjtën. Ko nˈëxpëjkëm anaytyuˈuk, yëˈë nasˈijxëm parë Jyobaa xykyuwäˈänëm ets kyaj ti nduˈundëgoˈoyëm (Juud. 24). ¿Të näˈä xykyajpxy tuˈugë ëxpëjkpajn ets mwinmay ko mijts të myajtuknijayë? Pën duˈun, axäjë extëm tuˈugë käjpxwijën diˈibë Jyobaa mmooyëp. Duˈun extëm tuˈugë mëtnaymyaayëbë xykyejkymyëbojtsëm parë ti xytyukˈijxëm, nanduˈunë Jyobaa, mbäät dyajtunyë myëjää parë xypyudëjkëm o parë xytyukˈijxëm mä mbäät nyaˈoˈoyëmë jot winmäˈäny o jäˈäyˈäjtën. Pën ngupëjkëm, yëˈë nety nasˈijxëm etsë Jyobaa xytyuˈumoˈoyëm (käjpxë Salmo 139:23, 24). Pääty, min nˈokˈijxëm nuˈun ja tiempë etsë jot mëjää nyajtuˈunëm mä nˈëxpëjkëm.
13. ¿Tiko yˈoyëty ets nˈijxëm pën yajxon nˈëxpëjkëm?
13 Ko nyajtuˈunëm jeky ja tiempë mä tijaty ndukxondakëm, ta kyaj nëjkx nekymyëdäjtëmë tiempë parë anaytyuˈuk nˈëxpëjkëm. Tuˈugë nmëguˈukˈäjtëm jyënaˈany ko mbäät pojënë duˈun njäjtëm. ¿Tiko? Yëˈë jyënaˈany: “Tijaty tyam yajtukxondakp jantsy kujënaky pyëtsemy ets oymyääjëty jyaˈˈaty, extëm mä telebisionk, mä komputadoorë ets mä telefënë ets xitsoo yatsoo yajpääty”. Pën kyaj nnaygyuentˈäjtëm, mbäät wanaty wanaty mas kajaa tiempë nyajtuˈunëm mä tijaty ndukxondakëm ets axtë kyaj nekyyajnibatëm parë këkpäät nˈëxpëjkëm (Éfe. 5:15-17). Pääty, oy ko niˈamukë nnayajtëˈëwëm: “¿Njuˈtypyëtsë tiempë janäämëty parëts këkpäät nˈëxpekyë Diosë yˈAyuk? ¿O jaayëts jeˈeyë njuutyë tiempë kojëts nyajnaxäˈäny diˈibëts xypyatp mä naymyujkën?”. Pën duˈun nˈadëtsëm, oy ko nyajtuˈunëm yajxon ja tiempë ko nDiosˈawdäjtëm mëdë Familyë o ko nˈëxpëjkëm naytyuˈuk, parë nbayoˈoyëm këkpäädë Jyobaa wyijyˈäjtën, duˈunxyëp extëm nbayoˈoyëmë oorë o platë, ets yëˈë nëjkx xypyudëjkëm parë ninäˈä ngamastutëmë Jyobaa axtë ko myinët ja kutëgoˈoyën (Pro. 2:1-5).
DIOS XYJOTMËKMOˈOYËM
14. ¿Wiˈixë Biiblyë xytyukˈijxëm ko Jyobaa pyejkypyë kuentë wiˈix nnayjäˈäwëm?
14 David kanäägë jotmay twinguwäˈkë diˈib tsip nimëjää (1 Sam. 30:3-6). Biiblyë myaytyakypy ko Jyobaa wäˈäts tpejkyë kuentë wiˈixë David nyayjäˈäwë (käjpxë Salmo 34:18 etsë 56:8). Ets ko nan wäˈäts tnijawë wiˈix ëtsäjtëm nnayjäˈäwëm. Jyobaa xymyëwingoˈonëm ko jotmay xytyuktëjkëm, ko tsayutpëmë korasoon njäˈäwëm o ko kyaj nekymyëdäjtëmë jotkujkˈäjtën. Tyäˈädë yëˈë diˈib xyjotkujkmoˈoyëm, extëmë David jyajty ets jyënany mä tuˈugë yˈëy: “Xondäˈägäämbëts ets ndukxondäˈägaambyëtsë mˈoyjyaˈayˈäjtën, mët ko të xyˈixyë nmoˈon ndujkënëts; të xynyijawë wiˈixëts axëëk nnayjawëty” (Sal. 31:7). Perë Dios kyaj jeˈeyë tnijawë ja amay jotmay diˈib nbatëm, yëˈë xypyudëjkëm parë nmëmadakëm mët ko xyjotkujkmoˈoyëm ets xyjotmëkmoˈoyëm. Ets tuk peky diˈib yajtuumpy, yëˈë naymyujkën.
15. ¿Ti xytyukniˈˈijxëm extëmë Asaf jyajty?
15 Extëmë Asaf jyajty, yëˈë xytyukˈijxëm wiˈix yajtukˈoyˈaty ko nëjkxëm mä naymyujkën. Asaf të nety tˈixy wiˈix axëëk yajtunyë oyjyaˈay ets wyinmääy ko waˈan kyaj tsyobääty ko yajmëdunyë Dios ets axëëk nyayjäˈäwë. Asaf ojts tnigajpxy wiˈixë nety nyayjawëty, jyënany: “Tëtsë netyë ngorasoon xyuny ets mäjëtsë nrinyonk mëkëts njantsy jäˈäwë pëjkën”. ¿Wiˈix wyimbëtseemy ko duˈun nyayjäˈäwë? Jawaanë tkamastutyë Diosë tyuunk. Per ¿ti pudëjkë parë jatëgok yˈoˈoyë? Ko ojts nyijkxy mä “Diosë tyëjk”. Jap nyaybyatë mët ja myëguˈuktëjk ets yˈoˈoyë ja jyot wyinmäˈäny. Ojts tjaygyukë ko axëkjäˈäy waanë jeˈeyë tijaty ttukˈoyˈattë ets ko Jyobaa tyuumbyë tëyˈäjtën ko tiempë ttukjäˈty (Sal. 73:2, 13-22). Tyam, nan mbäät duˈun nnayjäˈäwëm extëmë Asaf, ko nˈijxëmë axëkˈäjtën mä Satanás yˈaneˈemy. Per ko nduˈukmujkëm mëdë nmëguˈukˈäjtëm, ta nnayjäˈäwëm oy ets xypyudëjkëm parë nmëduˈunˈadëtsëmë Jyobaa agujk jotkujk.
16. ¿Wiˈix xypyudëjkëmë Ana yˈijxpajtën?
16 Per ¿ti mbäät nduˈunëm pën mä naymyujkën nmëdäjtëm tuˈugë jotmay ets kyaj nëjkxäˈänëm? Waˈan axëëk nnayjäˈäwëm o ntsoytyuˈun jäˈäwëm ko kyaj nˈoknikëjxmˈäjtënë tuunk mä naymyujkën o të ntsiptuˈunëm mët tuˈugë nmëguˈukˈäjtëm. Ko duˈumbë jotmay nbatëm, oy ko nbanëjkxëmë Ana yˈijxpajtën (käjpxë 1 Samuel 1:4-8). Ana jyantsy kyuˈayoˈojë tuˈugë jotmay diˈib pyat mëdë Peniná, diˈibë nety nanduˈun nyëdoˈoxyˈajtypyë Elqaná. Ets mas niˈigyë ijty ja jyotmay myëjwindaˈaky ko nyëjkxtë yojx noˈkpë mä Diosë tyëjk jam Siló. Ana jantsy axëëk ijty nyayjawëty, ta “jyëˈëy yaˈaxy ets kyaj kyay”. Perë tyäˈädë jotmay kyaj ojts yajtuˈuwëˈëmëty parë nyëjkxët Dios awdäjtpë. Jyobaa yˈijx wiˈixë Ana myëdunyëty ets ojts tkunuˈkxy (1 Sam. 1:11, 20).
17, 18. 1) ¿Wiˈix nyajjotkujkmoˈoyëm mä naymyujkën? 2) ¿Wiˈix mijts mnayjawëty ko tsuj yajxonë Jyobaa mguentˈatyëty?
17 Oy ko nbanëjkxëmë Ana yˈijxpajtën ko kyaj ndëgoyˈäjtëm mä naymyujkën, pes nnijäˈäjëm ko jap nyajjotkujkmoˈoyëm (Ebre. 10:24, 25). Ko nyaˈijx nyajpatëm mëdë nmëguˈukˈäjtëm, ta dyajkujkë ää jot. Ko nmëdoˈojëm tuˈugë diskursë o wiˈix kyomentaraty tuˈugë nmëguˈukˈäjtëm, mbäät jyaˈty mä jot korasoon. Nan mbäät oy xyajnayjäˈäwëm ko tuˈugë nmëguˈukˈäjtëm tmëdooˈitët wiˈix nmëtmaytyakëm o wiˈix yëˈë xymyëtmaytyakëm (Pro. 15:23; 17:17). Ets nan xyjotkujkmoˈoyëm ko nyajtuˈugyëmë ää yoˈkn parë nguyˈëˈëjëmë Jyobaa. Ko mä jot winmäˈäny “myiny jantsy kanäk pekyë mäˈäy täjën”, ja mä mas niˈigyë ntsojkëm ja jotkujkˈäjtën diˈib nˈaxäjëm ko nëjkxëm mä naymyujkën. Ets jap mä Jyobaa xyjotkujkmoˈoyëm ets xymyëjämoˈoyëm parë xëmë nmëmëdoˈojëm (Sal. 94:18, 19).
18 Jyobaa xykyuentˈäjtëm tsuj yajxon, pääty nayjäˈäwëm seguurë extëmë Asaf diˈib kyuyˈëëwë Jyobaa: “Mijts xywyijtsp mäjëtsë nˈaˈoygyëˈë. Mëdë mgäjpxwijën xytyuˈumoˈoyaˈanyëts” (Sal. 73:23, 24). ¡Mëjwiin kajaa nmëjjäˈäwëm ko tyamë Jyobaa xykyuwäˈänëm parë nbatëm ja nitsokën!
[Notë diˈib noky ëxˈääy]
^ parr. 2 Salmo 139:1-3: “Jyobaa, mijts tëjëts xytyukˈijxëtyaˈay yajxon, ets xyˈixyˈäjtpëts. Mijts këˈëm të xynyijawë näˈäjëts nˈuˈunyë ets näˈäjëts nbëdeˈeky. Jagambäät të xynyijawë tijëts nwinmäˈänyˈajtypy. Të xykyijpxy mäjëts nduˈuyoˈoy ets mäjëts naywyijtstëyëty, ets të xynyijäˈäjëtyaˈayëts nnëˈë nduˈu”.
[Yajtëˈëwën]
[Letrë diˈib miimp mä dibujë mä pajina 29]
Jyobaa yëˈë nanduˈun të mmëjwoyëty
[Letrë diˈib miimp mä dibujë mä pajina 30]
Ko nbanëjkxëmë Diosë kyäjpxwijën, yëˈë xykyuwäˈänëm
[Letrë diˈib miimp mä dibujë mä pajina 31]
Ko nyajjotkujkmoˈoyëm, yëˈë xywyijtsˈijtëm
