Nˈokmëduˈunëmë Jyobaa mët amuumë korasoon
Nˈokmëduˈunëmë Jyobaa mët amuumë korasoon
“Uˈunk jaˈa, ixyˈat ja diˈibë mdeety Diosˈäjtypy ets mmëdun mët amuumë mgorasoon.” (1 CRÓ. 28:9)
WIˈIX YAˈˈATSOOJËMBITÄˈÄNY
¿Ti yˈandijpy korasoon?
¿Ti xypyudëkëyäˈänëm parë nnijäˈäjëm wiˈix yajpäätyë ngorasoonˈäjtëm?
¿Wiˈix mbäädë Jyobaa xëmë nmëduˈunëm amumduˈukjot?
1, 2. 1) ¿Ti diˈib mas janäämëty myaytyakypyë Biiblyë diˈib nmëdäjtëm mä niniˈkx këbäjk? 2) ¿Tiko jyëjpˈamëty njaygyujkëm ti meerë yˈandijpy korasoon?
BIIBLYË yajnikejpy ko tmaytyaˈaky tijaty nmëdäjtëm mä niniˈkx këbäjk. Extëm nˈokpëjtakëm, Job jyënany: “Kyaj yajpäätyë tëytyuˈunën mäjëtsë ngëˈë”. Salomón tkujäˈäyë: “Ko yajmëdoyë oybyë ayuk, yajniˈkxëbë päjk”. Jesus jyënany: “Es pënë mˈagäˈänygyëˈë myajpekytyuunëp, niboot es ëxjëwip jagam”. Etsë Santiago jyënany: “Yëˈë yaˈan yëˈë dëˈën extëmë tadë jënyaˈanguˈunk” (Job 16:17; Pro. 15:30; Mat. 5:30; Sant. 3:6).
2 Perë korasoon yëˈë diˈib mas janäämëty yajmaytyakp mä Biiblyë. Extëmë Ana, diˈib Dios mëduun, jyënany ko nyuˈkxtaky: “Ngorasoonëts jyantsy tyukxondakypyë Jyobaa” (1 Sam. 2:1). Tyäˈädë ayuk korasoon ja yajkujäˈäyë mä Biiblyë naa tuk milˈokën, per xëmë ko tyäˈädë ayuk tyuny niwij nikajp. Pääty jëjpˈam ets njaygyujkëm wiˈix nyikejˈyë korasoon, pesë Diosë yˈAyuk jyënaˈany ko tsojkëp nguentˈäjtëm (käjpxë Proverbios 4:23). *
¿WIˈIX NYIKEJˈYË KORASOON?
3. ¿Ti mbäät nduˈunëm parë njaygyujkëm extëmë Biiblyë tmaytyaˈagyë korasoon, ets ti mëët yaˈijxkijpxyë?
3 Biiblyë kyaj tnimaytyaˈaky wixaty nyikejˈyë korasoon, per mbäät xytyuknijäˈäjëm tijaty myaytyäˈägaampy. ¿Wiˈix? Nˈokpëjtakëm tuˈugë ijxpajtën: Nˈokwinmäˈäyëm tuˈugë pisë diˈib të yaˈootsy mëdë mosaikë. Parë yajxon nˈijxëm ti dibujë myëdäjtypy, jëjpˈam ets ndënäˈäyëm jagam parë yajxon ndukˈijxëm. Nanduˈun jyaty mëdë tadë ayuk korasoon, parë njaygyujkëm wixaty nyikejy, tsojkëp ngäjpxëmë bersikulo mäjaty yajpäätyë tyäˈädë ayuk. ¿Wiˈixë Biiblyë tmaytyaˈaky?
4. 1) ¿Ti yˈandijpy korasoon? 2) ¿Ti Jesus myaytyäˈägan mä Mateo 22:37?
4 Ko Biiblyë tmaytyaˈagyë korasoon, yëˈë yˈandijpy wiˈix nyajpatëm jodoty, wiˈix njäˈäyˈäjtëm, ti ntsojkënyëˈäjtëm, ti nwinmäˈäyëm, ja wijyˈäjtënë diˈib nmëdäjtëm, tiko tijaty ndunäˈänëm ets ti nduknibëjtakëm (käjpxë Deuteronomio 15:7; Proverbios 16:9 etsë Hechos 2:26, Traducción del Nuevo Mundo [NM]). * Perë tadë ayuk korasoon, kyaj yëˈë xëmë tˈandijy diˈib yä yajnigäjpxp. Extëm nˈokpëjtakëm, Jesus jyënaˈany: “Mtsokëbë mDios Jyobaa mët tukëˈëyë mgorasoon, mët tukëˈëyë mniniˈkx mgëbäjk ets mët tukëˈëyë mwinmäˈäny” (Mat. 22:37, NM). Ko mä tyäˈädë tekstë jyënaˈany “korasoon”, yëˈëyë myaytyäˈägaampy tijaty njäˈäwëm këkpäät, tijaty njäˈäwëm tuktsojk ets tijaty ntsojkënyëˈäjtëm. Ko Jesus tmaytyakyë “korasoon”, “niniˈkx këbäjk” etsë “winmäˈäny”, yëˈë myaytyäˈägan ko ja tsojkën diˈib nmëdäjtëm mä Dios kyaj jeˈeyë yajjawëyaˈany, nanduˈunën nyigëxëˈëgäˈäny wiˈix nyajtuˈunëm ja jukyˈäjtën ets ja jot winmäˈäny (Fwank 17:3; Éfe. 6:6). Per ko tadë ayuk korasoon myiny aduˈuk, yëˈë yˈandijpy wiˈix nyajpatëm jodoty.
¿TIKO MBÄÄT NGUWÄˈÄNËMË KORASOON?
5. ¿Tiko jyëjpˈamëty nmëduˈunëmë Jyobaa mët tukëˈëyë korasoon?
5 Rey David ojts tkäjpxwijˈyë Salomón: “Uˈunk jaˈa, ixyˈat ja diˈibë mdeety Diosˈäjtypy ets mmëdun mët amuumë mgorasoon; yëˈko Jyobaa tyukˈijxnäjxtaapy tukëˈëyë korasoon, ets nyijäˈäjëtyaapy tukëˈëyë ja jot winmäˈäny” (1 Cró. 28:9). Jyobaa tyukˈijxëtyaapy tukëˈëyë korasoon, ets nanduˈunë njaˈäjtëm (Pro. 17:3; 21:2). Mbäät nnaymyaˈayëm mëdë Jyobaa ets nˈijtëm jotkujk mä tiempë myiny kyëdaˈaky pën yˈoyˈijxypy ti pyatypy mä ngorasoonˈäjtëm. Pääty tam tiko mbäät nbanëjkxëmë kyäjpxwijënë David ets nmëduˈunëmë Jyobaa mët tukëˈëyë korasoon.
6. ¿Ti mbäät nˈijxëm mä ja tsojkën diˈib nmëdäjtëm mä Dios?
6 Ko njotmoˈoyëmë Diosë tyuunk, ja nyajnigëxëˈkëm ko njantsy myëduˈunëmë Jyobaa amumduˈukjot. Per nˈokjamyajtsëm ko tyäˈädë jukyˈäjtënë axëëkpë mä Satanás yˈaneˈemy ets ko nbokyjyaˈayˈäjtëm, mbäät dyajxeemyë tyäˈädë tsojkën (Jer. 17:9; Éfe. 2:2). Pääty, parë kyaj xyaamëdë tyäˈädë tsojkën mä nmëduˈunëmë Dios, tsojkëp xëmë nˈijxëm wiˈix yajpääty ja ngorasoonˈäjtëm. ¿Wiˈix?
7. ¿Wiˈix mbäät nnijäˈäjëm wiˈix yajpäätyë ngorasoonˈäjtëm?
7 Duˈun extëm tuˈugë kepy kyaj nˈijxëm wiˈix yajpääty jodoty, nanduˈun tuˈugë jäˈäy. Mä ja diskursë diˈib yajtijp Sermón del Monte, Jesus jyënany ko tuˈugë ujts kepy, duˈun dyakyë tyëëm extëm yajpääty jodoty, nanduˈun ëtsäjtëm, tijaty nduˈunëm, yëˈë yajnigëxeˈkypy wiˈix yajpäätyë ngorasoonˈäjtëm (Mat. 7:17-20). Nˈokˈijxëm tuˈuk majtsk tijaty nduˈunëm.
NˈOKˈIJXËM WIˈIX YAJPÄÄTYË NGORASOONˈÄJTËM
8. Extëm jyënaˈanyë Mateo 6:33, ¿wiˈix nyajnigëxëˈkëm ti japˈäjtp mä korasoon?
8 Mä ja diskursë diˈib yajtijp Sermón del Monte, Jesus tˈanmääy ja jäˈäyëty wiˈix mbäät dyajnigëxëˈëktë ko jyantsy myëdunandëbë Jyobaa mët tukëˈëyë kyorasoon, jyënany: “Ëxtääyˈadëˈëtstë jawyiin ja Diosë yˈanaˈamën ets ja tyëyˈäjtën, ets tukëˈëyë tyäˈädë tijaty mˈakˈyajmoˈoytyëp” (Mat. 6:33, NM). Tijaty nduˈunëm jawyiin, ja nyajnigëxëˈkëm ti mas ntsojkënyëˈäjtëm, ti nwinmäˈänyˈäjtëm ets ndunäˈänëm. Tuk peky wiˈix mbäät nnijäˈäjëm pën amumduˈukjot nmëduˈunëmë Jyobaa, ja ko nˈijxëm ti mas jëjpˈam nbëjtakëm mä jukyˈäjtën.
9. ¿Wiˈixë Jesus tˈanmääy näägë yetyëjk, ets ti yajnigëxëˈktë extëm yˈatsoodë?
9 Ko Jesus tˈanmääy ja yˈëxpëjkpëty: “Ëxtääyˈadëˈëtstë jawyiin ja Diosë yˈanaˈamën”, yëˈë xytyukˈijxëm wiˈix nyigëxeˈeky ti diˈib jëjpˈam nbëjtakëm. Lucas jyënaˈany ko Jesus pyëjtak “ja wyinmäˈäny mëk es nyëjxäˈäny Jerusalén”. Oyë nety tjanijawë ko axëëk jyatäˈäny ojts ttuknibëjtäägë ko jam nyëjkxäˈäny. Ets mientrësë netyë Jesus “nyëjxtë tuˈam” mët ja yˈapostëlëty, ta tuˈugë yetyëjk tpaty ets tˈanmääy: “Pamiingëts”. Tyäˈädë yetyëjk japanëjkxanë, per ta yˈanmääyë ko jawyiin nëjkxë tyeety dyajnaxtëkëyaˈany ets ok, ta pyanëjkxëdët. Ta jatuˈuk twooy, per ta yˈanmääyë: “Wintsën, nbanëjxëpts mij, per nnejxyëts jawyiin nˈoknayjyëgaxyëty mätsë ndëjk” (Luk. 9:51, 57-61). Yä nˈijxëm ko extëmë Jesus tpëjtakyë jyot wyinmäˈäny ets nyaygyëyäjkë, tëgatsy mëdë tyäˈädë yetyëjkëty diˈib nëgoobë tijaty ojts ttukkäjpxtë. Ko ojts tpëjtäˈäktë jawyiin tijaty tyunandëp ets ok, ja Diosë tyuunk, ta dyajnigëxëˈktë ko kyaj nety tmëdunäˈändë Dios amumduˈukjot.
10. 1) ¿Ti të nduˈunëm ko Jesus të xywyoˈojëm? 2) ¿Wiˈixë Jesus jyënany mä Lukʉs 9:62?
10 Ëtsäjtëm kyaj duˈun të nˈadëtsëm extëmë tyäˈädë yetyëjkëty. Të ngupëjkëm ko Jesus të xywyoˈojëm parë nbanëjkxëm ets tyam nmëduˈunëmë Jyobaa tuˈuk tuˈugë xëë. Duˈun nyajnigëxëˈkëm ti njäˈäwëm mä korasoon parë mëdë Jyobaa. Oy njatuˈundäˈäyëm tijaty nikëjxmˈäjtëm mä naymyujkën, tsojkëp nguentˈäjtëmë korasoon mä diˈib yajtëgoyanëp. ¿Ti yajtëgoyanëp? Mä Lukʉs nan japë Jesus jyënany: “Pën yajtsäjkäyuup, tëyë tpëjtäˈägët ja yˈijxën. Kyaj mbäät yˈijxëmbity pën tsyejpy ja syurkë tëyë nyëjxët. Es nandëˈën pënëts xypyanëjxäämp, yëˈë myastutäˈäyëp tëgekyë oytyim tiity. Es pën kyaj tmastuˈudäˈäny tëgekyë yëˈë jyikyˈäjtën es xypyanëjxëdëts, kyaj tyuny mä ja Diosë kyutujkën” (Luk. 9:62). ¿Ti xytyukniˈˈijxëmë tyäˈädë ijxpajtën?
“PADUNDË JA OYBYË”
11. ¿Wiˈix jyajty ja yajtsäjkäyuubë tyuunk diˈibë Jesus myaytyak, ets tiko?
11 Parë njaygyujkëm ti Jesus myaytyäˈägan mä tyäˈädë ijxpajtën, min nˈaknimaytyakëm. Nˈokpawinmäˈäyëm ja yajtsäjkäyuubë, mientrës jam tyuny, jam ja wyinmäˈäny yˈity mä jyëën tyëjk, ets twinmay wiˈix muum aniktuuy jyantsy kyay jyantsy uuktë ja fyamilyë ets ja myëtnaymyaayëbëty, jyantsy xyiˈik jyantsy xyondë ets yaˈëw yajˈyäˈäxtë. ¡Yëˈë jam jyantsy yajpäädäˈäny! Ets ko waanë yˈakˈyuˈuy, kyaj tnekymyëmadäˈägäˈäny ja tsojkën ets tyukxondäˈägaampy tijaty të dyajweˈemy, ta tniˈˈijxëmbity. Oy kajaanëm ja tuunk yˈakweˈemy, ja yajtsäjkäyuubë, ta yˈijxëmbity ets dyajmäˈtäˈäy ja tyuunk. Ets diˈib mas oˈktëy, yëˈë ko kyaj oy wyeˈemy mët ja kugam diˈib yajtuunëp.
12. ¿Wiˈix yaˈijxkijpxyë ja yajtsäjkäyuubë diˈib myaytyakypyë Lukʉs 9:62 mët näägë Dios mëduumbë?
12 Min nˈokˈijxkijpxyëmë tyäˈädë jotmay mët diˈib tyam tuun jäjtëp. Ja yajtsäjkäyuubë mbäät mëët yaˈijxkijpxyë tuˈugë Dios mëduumbë diˈib këxëˈkp ko jantsy tuump mä naymyujkën, per jotmay jëjpˈamë kyorasoon yajpääty. Oy jyanëjkxy xëmë käjpxwäˈkxpë o mä naymyujkën, jam ja wyinmäˈäny yˈity mä tijaty tsyojkënyëˈajtypy diˈib ijtp yä naxwiiny, ets yˈatsejpy jyodoty kyorasoonoty. Ets ko nety të Dios mëduny kanäk jëmëjt, ta kyaj tnekymyëmadäˈägäˈäny ja tsojkën ets tyukxondäˈägaampy tijaty ijtp yä naxwiiny, ta tniˈˈijxëmbity tijaty të dyajweˈemy. Oy mëjwiin kajaa Diosë tyuunk yˈakweˈemy, “kyaj tnekymyäjtsˈity mëk ja ayuk diˈib yajkypyë jukyˈäjtën”, ets kyaj tnekymyëdunyë Dios extëmë nety tmëduny (Fili. 2:16, NM). Jyobaa, “ja Kugam”, mon tuk nyayjawëty ko tuˈugë tyuumbë kyaj oy nyekymyëdunyëty (Luk. 10:2).
13. ¿Ti yˈandijpy nmëduˈunëmë Jyobaa amumduˈukjot?
13 Yajxon nbëjkëmë kuentë ti tyäˈädë xytyukniˈˈijxëm. Jantsy oy ko nëjkxëm mä naymyujkën ets ko xëmë nëjkxëm käjpxwäˈkxpë. Per nmëduˈunëmë Dios amumduˈukjot, kyaj yëˈë jeˈeyë tmaytyäˈägäˈäny (2 Cró. 25:1, 2, 27). Pes pën tuˈugë Dios mëduumbë duˈunyëm dyaˈity mä jyot kyorasoon tijaty të tmastuˈuty, jaˈa njënäˈänëm, extëmë naxwinyëdë jäˈäyë jyukyˈäjtën dyajnëjkxtë, mbäädë Jyobaa kyaj nyekykyupekyëty (Luk. 17:32). Pääty, parë ndëjkëm mä “Diosë kyutujkën”, jëjpˈam nmëmëdoˈojëmë tyäˈädë käjpxwijën: “Ëxtijtë ja axëëkpë es padundë ja oybyë” (Luk. 9:62; Rom. 12:9). Pääty, niˈamukë yˈoyëty nnaygyuentˈäjtëm parë nitii xykyayajtuˈudujkëm diˈibë Satanás yajjaˈäjtypy ets nmëduˈunëmë Jyobaa amumduˈukjot, oy nuˈun jantsy oy jyakëxeˈeky o njaˈijxëm ko mbäät ndukˈoyˈäjtëm (2 Kor. 11:14; käjpxë Filipʉs 3:13, 14).
NˈOKNAYAˈIJTËM WIJY
14, 15. 1) ¿Ti yajtuumbyë Mëjkuˈu parë dyajxaamäˈänyë tsojkën? 2) Pëjtäˈäk tuˈugë ijxpajtën diˈib xytyukˈijxëm wiˈix kyujotmayëty diˈibë Satanás yajtuumpy.
14 Ojts nnaytyukëdëjkëmë Jyobaa mët ko ntsojkëm, ets nuˈun kujkë xëë jëmëjt nyaxy, nyaˈijxëm ko duˈunyëm nmëdunäˈänëm amumduˈukjot. Perë Satanás xymyëmadäˈägäˈänëm, gyanarataambyë ngorasoonˈäjtëm (Éfe. 6:12). Waˈan të tpekyë kuentë ko kyaj ajotkumonë nmastuˈudäˈänëmë Jyobaa. Per mbäät dyajxeemyë tsojkën wanaty wanaty ko dyajtunët “diˈibë yä ijtp naxwiiny” (käjpxë Markʉs 4:18, 19). ¿Tiko ttukˈoyë ko dyajtuny diˈibë ijtp yä naxwiiny?
15 Nˈokpëjtakëm tuˈugë ijxpajtën: Okwinmay ko mijts mnekykyajpxy koots ets yëˈë mnaytyukudëˈkxëbë fokë diˈib 100 wats, per ta ajotkumonë tyuktoyë ets mweˈemy kubiˈits kuˈook. Ta jatuˈugë fokë xykyëxwiity diˈib mgudëˈkxëp. Per jakumbom, ta yajkëxwiity jatuˈugë fokë diˈib 95 wats, ¿mbëkëbë kuentë ko të yajkëxwiityë wiinkpë? Mbäät kyaj. Ets ko jakumbom yajkëxwiidëdë wiinkpë diˈib 90 wats nan waˈan kyaj xypyëkëdë kuentë. ¿Tiko? Yëˈko wanaty wanaty të myony ja jyäjën. Nan mbäät duˈun xytyuˈunëm tijatyë Satanás yajjaˈäjtypyë yä naxwiiny, mbäät dyajxeemyë tsojkën wanaty wanaty mä nmëduˈunëmë Jyobaa. Ko nnaygyumanäjxëm, mbäät kyaj nbëjkëmë kuentë ko Satanás wanaty wanaty dyajxeemy ja tsojkën (Mat. 24:42; 1 Peed. 5:8).
JËJPˈAM ETS NNUˈKXTAKËM
16. ¿Ti mbäät xypyudëjkëm parë kyaj xygyanaräjtëm tijatyë Satanás yajtuumpy?
16 Parë xëmë nmëduˈunëmë Jyobaa mët tukëˈëyë korasoon, ¿ti mbäät xypyudëjkëm parë kyaj xygyanaräjtëm tijatyë Satanás yajtuumpy? Ko nnuˈkxtakëm (2 Kor. 2:11). Apostëlë Pablo tˈanmääy ja myëguˈuktëjk parë nyayaˈitëdët mëk ets tmëmadäˈäktët diˈib mët ja Mëjkuˈu wyinˈëënäˈänëdë. Ets ok, ta tˈanmääy: “[Këdii] xymyastuˈuttë ja käjxtakën [o nuˈkxtakën], dëˈënyëm amdow pëjktsowdë ja Dios” (Éfe. 6:11, 18; 1 Peed. 4:7).
17. ¿Ti xytyukniˈˈijxëm extëmë Jesus nyuˈkxtaky?
17 Oy ko nbanëjkxëmë Jesusë yˈijxpajtën parë kyaj xygyanaräjtëmë Satanás. Yëˈë xëmë tmënuˈkxtakyë Tyeety, ets duˈun dyaˈijxë ko myëdunaambyë nety amumduˈukjot. Min nˈokˈijxëm wiˈix ojts nyuˈkxtaˈaky ja koots mä nety yajmatsanë. Lucas tkujäˈäyë: “Ko jam jyantsyˈayooy mëk, net kyäjxtaky [o nyuˈkxtaky] mët tëgekyë myëjää” (Luk. 22:44). Jesus të nety mëktaˈaky yˈoknuˈkxtakpë. Per ko tpaty ja jotmayë mas mëjwiimbë, ta nyuˈkxtaky “mët tëgekyë myëjää”, ets ojtsë Tyeety pyudëkëty. Extëmë Jesus nyuˈkxtaky, yëˈë xytyukˈijxëm ko mbäät näˈäty mëktaˈaky nuˈkxtakëm. Ko nwinguwäˈkëmë amay jotmayë mëjwiimbë o xyajpokytyunäˈänëmë Satanás, ja mä tsyekyëty ets mëktaˈaky nˈamdoˈojëmë Jyobaa nyaybyudëkë parë xykyuwäˈänëm.
18. 1) ¿Ti mbäät nnayajtëˈëwëm mä nuˈkxtakën, ets tiko? 2) ¿Tijaty mbäät tˈaxëktunyë korasoon ets wiˈix? (Ixë rekuäädrë mä pajina 22.)
18 ¿Wiˈix xypyudëkëyäˈänëm ko nuˈkxtakëm? Apostëlë Pablo jyënany: “Amdow pëjktsowdë Dios, es xyjaˈaygyëdäˈäktët nandëˈën. Netë Dios mmoˈoyëdët yëˈë yˈagujkˈäjt jyotkujkˈäjtën, diˈibë waanë niˈigyë myëjëty këdiinëm diˈibë jäˈäy mbäät tjaygyukë. Esë tyäˈädë agujkˈäjt jotkujkˈäjtën kyuwäˈänëp ja mjot mwinmäˈäny” (Fili. 4:6, 7). Xëmë ets amumduˈukjot mbäät nmënuˈkxtakëmë Jyobaa parë nmëduˈunëm mët tukëˈëyë korasoon (Luk. 6:12). Pääty niduˈuk niduˈuk mbäät nnayajtëˈëwëm: “¿Nnuˈkxtakpëts ijtp ets amumduˈukjot?” (Mat. 7:7; Rom. 12:12). Wiˈix nˈatsoˈojëmbijtëm, ja nyigëxëˈëgäˈäny nuˈunën ntsojkënyëˈäjtëm nmëdunäˈänëmë Dios.
19. ¿Ti net mdunaampy parë ijtpë Jyobaa xymyëdunët amumduˈukjot?
19 Extëm të nˈijxëm, tijaty jëjpˈam nbëjtakëm, yëˈë xytyukˈijxëm wiˈix ja ngorasoonˈäjtëm yajpääty. Jëjpˈam ets nnayaˈijtëm wijy kejy parë kyaj nijëmbijtëm tijaty të nmastutëm o dyajxaamëdë tsojkën tijatyë Mëjkuˈu yajtuumpy parë kyaj nmëduˈunëmë Jyobaa mët tukëˈëyë korasoon (käjpxë Lukʉs 21:19, 34-36). Duˈun extëmë David, tsojkëp mëktaˈaky nˈanmäˈäyëmë Jyobaa: “Yajtuˈugyëtsë ngorasoon” (Sal. 86:11).
[Notë diˈib noky ëxˈääy]
^ parr. 2 Proverbios 4:23: “Nitii duˈun mbäät ngakuentˈäjtëm extëmë korasoon, yëˈko diˈib jap ijtp mbäät xymyoˈoyëmë jukyˈäjtën o mbäät kyaj”.
^ parr. 4 Hechos 2:26, NM: “Ets mët yëˈëgyëjxmë tyäˈädë, xondakëtsë ngorasoon ets jantsy xondakëtsë nˈyaˈan, ets axtë niniˈkxëts xëmë tˈawixäˈäny tjëjpˈixäˈäny”.
[Yajtëˈëwën]
[Rekuäädrë diˈib miimp mä pajina 22]
TËGËK PEKY WIˈIX MBÄÄT NGUENTˈÄJTËMË KORASOON
Parë oy mëk yajpäädëdë korasoon diˈib nmëdäjtëm jodoty, tsojkëp nguentˈäjtëm, nanduˈun jyaty mëdë korasoon diˈib nikajp. Min nˈokˈijxëm tëgëk peky.
1 Käˈäy ukën. Parë oy yˈitëdë korasoon diˈib nmëdäjtëm, tsojkëp njëˈxëm diˈib mbäät xyˈoytyuˈunëm. Nanduˈun jyaty mët tuˈugë Dios mëduumbë, tsojkëp tˈaxäjëdë käˈäy ukën diˈibë Dios yajkypy, ko yˈëxpëkët naytyuˈuk, ko tpawinmayët ets nyëjkxët mä naymyujkën (Sal. 1:1, 2; Pro. 15:28; Ebre. 10:24, 25).
2 Ejersisyë. Parë oy mëk yˈitëdë korasoon, näˈäty tsojkëp ets yuˈkxët mëk. Nanduˈun jyaty ko tuˈugë Dios mëduumbë janäämëty jyantsy nyijkxy käjpxwäˈkxpë, ets näˈäty axtë dyaky mas niˈigyë, yëˈë pudëjkëp parë oy mëk yajpääty ja kyorasoon diˈib nikajp (Luk. 13:24; Fili. 3:12).
3 Pënaty mëët nyajpatëm. Mä ntsënäˈäyëm ets mä nduˈunëm, axëëgë jäˈäy jyukyˈattë ets yˈaxëktuumbyë korasoon diˈib nmëdäjtëm jodoty ets diˈib nikajp. Pääty jyëjpˈamëty ets ijtp nduˈukmujkëm mëdë nmëguˈukˈäjtëm diˈib xymyëmäˈäy xymyëdäjëm ets diˈib myëduundëbë Jyobaa amumduˈukjot (Sal. 119:63; Pro. 13:20).
