Diˈib nääk të nyayajtëwëdë
¿Tiko Biiblyë jyënaˈany ko “jantsy tsujë Jyobaa tˈixy ko yˈooky pënaty mëduunëp”?
▪ Jyobaa mëj tˈixyë jyukyˈäjtën niˈamukë pënaty mëduunëp. Perë Salmo 116:15 kyaj yëˈë tˈandijy ko yˈooky tuˈugë jäˈäy.
Ko nyaxyë diskursë mä jäˈäy të yˈooky, kyaj mbäädë tyäˈädë bersikulo tyuny, oyxyëp yëˈë të jyaˈoˈkpë tuˈugë Dios mëduumbë. ¿Tiko? Yëˈko tyäˈädë tekstë mas mëjwiin kajaa nyikejy. Diˈib myaytyäˈägaampy, yëˈë ko Jyobaa kyaj tnasˈixëyaˈany ets yˈoˈktäˈäyët niˈamukë pënaty mëduunëp mët ko jantsy tsuj tˈixy (ixë Salmo 72:14 etsë 116:8).
Tyäˈädë tekstë yëˈë xytyuknijäˈäjëm ko Dios kyaj tnasˈixëyaˈany parë kyutëgoyët tukëˈëyë nyax kyäjpn. Duˈun nyajnigëxëˈkëm mä tyäˈädë tiempë. Yajxon yaˈixy ko oyë jäˈäy xypyajëdijtëm o xyˈaxëktuˈunëm, Dios xykyuwäˈänëm parë kyaj jäˈäy xyajkutëgoˈoytyaˈayëm.
Jyobaa myëdäjtypy tukëˈëyë mëjää, ets kyuytyunaampy tijaty yëˈë tsyejpy. Pääty, ninäˈä tkanasˈixëyaˈany etsë kyäjpn kyutëgooytyaˈayët. Pes ko duˈun jyatët, ta kyëxëˈëgët ko myëtsip niˈigyë tmëdatyë mëjää ets kyaj dyuˈunëty yëˈë, ets ninäˈä mbäät duˈun kyajaty. Pes ko duˈun jyatët, ta kyaj yˈadëwët ko Dios të ttuknibëjtäägë etsë tyäˈädë naxwinyëdë tyuktukët mëdë jäˈäy diˈib xëmë mëduunëp (Isa. 45:18; 55:10, 11). Nan kyaj pën wyëˈëmët mä ja templë tyëjäˈä diˈib yˈawdatëbë Jyobaa ets tmëdunët yä Naxwiiny. Nan kyaj jyaˈˈatëdë “jembyë naxwinyëdë” o oyjyaˈayëty diˈib pyatjukyˈatëp ja “jembyë tsäjp” (Diˈibʉ Jat. 21:1). Ets nan kyaj mbäädë Kristë yˈAneˈemy Mil Jëmëjt pën kyaj pënë jäˈäy yä naxwiiny diˈib yˈanaˈamëp (Diˈibʉ Jat. 20:4, 5).
Ko nanduˈunë Jyobaa tnasˈixët etsë myëtsip dyajkutëgooytyaˈayëdë nyax kyäjpn diˈib yajpatp yä Naxwiiny, ta kyaj yajmëbëkët ko yëˈë myëdäjtypyë kutujkënë etsë mëjää. Ets nan axëëk wyëˈëmët ja madakënë diˈib myëdäjtypy parë yˈanaˈamët abëtsemy nyaxwinyëdë. Jyobaa ninäˈä tkanasˈixëyaˈany ets yˈoˈktäˈäyët niˈamukë pënaty mëduunëp, mët ko kyaj axëëk wyëˈëmäˈäny ets ni xyëë tkayajwëˈëmäˈäny axëëk. Nˈokwinmäˈäyëmë tyäˈädë: Dios ak tëyˈäjtën mëët tijaty ttuny, pääty nˈijtëm seguurë ko Dios kyuwäˈänaampy niˈamukë pënaty xëmë mëduunëp (Deu. 32:4; Gén. 18:25). Ets tyunaampy duˈun mët ko Biiblyë jyënaˈany: “Jyobaa kyaj tmastuˈudäˈänyë kyäjpn mët yëˈëgyëjxmë xyëë” (1 Sam. 12:22). Duˈunë duˈun, “Jyobaa kyaj tmastuˈudäˈänyë kyäjpn” (Sal. 94:14).
¡Xyjotkujkmoˈoyëm ko Dios ninäˈä tkanasˈixëyaˈany ets kyutëgoyëdë kyäjpn yä Naxwiiny! Pääty nˈokmëmëdoˈojëm xëmë Jyobaa ets nˈokmëbëjkëmë tyäˈädë wyandakën: “Oy diˈibë tujn pujxn myajtuknibëdëˈëgët kyaj myadäˈägäˈäny, ets oy diˈibë ää yaˈan mnibëdëˈëgëdët mä myajpayoˈoy, nëjkxëp xyaˈˈanëgugäˈäjë. Tyäˈädë yëˈë ja kyumäˈäyën pënaty myëduundëbë Jyobaa, ets ja tëyˈäjtën myiny mä ëjtsën” (Isa. 54:17).
[Letrë diˈib miimp mä pajina 12]
Dios ninäˈä tkanasˈixëyaˈany etsë kyäjpn kyutëgooytyaˈayët