“Naytsyokëdë nixim niyam”
“Tyäädëts miits nmooytyëp yëˈë jembyë anaˈamën: Naytsyokëdë nixim niyam. Dëˈën extëmëts miits ntsoktë, nandëˈën mnaytsyokëdët nixim niyam. Pën mnaytsyojkëdëp miitsëty nixim niyam, net nidëgekyë ja jäˈäy tnijawëdët kots ëj miits nˈëxpëjkpëˈattë.” (FWANK 13:34, 35)
¿Ti Jesus myaytyäˈägan? Kristë ojts tˈanëëmë ja yˈëxpëjkpëty ets nyaytsyokëdët extëmë nety yëˈë të ttsoktë. Per ¿wiˈixtsoo Jesus tsyojkëdë? Ko ninäˈä tkaˈˈaxëkˈijxyë jäˈäy diˈib wiink lugäär tsoˈomp o ja toxytyëjkëty, extëmë nety ja jäˈäy jyaˈayˈattë (Fwank 4:7-10). Nan ojts kajaa xyëë tiempë dyajtuny etsë jyot myëjää parë tpudëjkë jäˈäy oyë nety jyaˈˈanuˈkxë o jyayuˈoogyëty (Markʉs 6:30-34). Per mä mëjwiin kajaa dyaˈijxë tsyojkën, ja ko dyajkyë jyukyˈäjtën. Extëm yëˈë jyënany: “Ëjtsë dëˈën ja oybyë borreegë kuentˈäjtpë [...] [diˈib] kyuˈoogëp ja byorreegëty” (Fwank 10:11).
Yˈijxpajtën ja tim jawyiimbë kristianëty. Tyäˈädë Dios mëduumbëty ja ijty nyayˈanëˈëmxëdë mëguˈuk (Filemón 1, 2). Mä ja naymyujkën jantsy oy ijty nyayˈagëˈë nyayˈaxäjëdë oy mä tsyoondët. Myëbëjktëbë nety ko kyaj tyëgatsyëty ja judiyë mëdë grieegë, ets ko tuˈuk jeˈeyë ja Wyintsën (Romanʉs 10:11, 12). Mä ja jëmëjt 33, ko ja Pentekostes xëë ojts jyëjpkëjxnë net ja ëxpëjkpëty diˈib Jerusalén ttoˈktë tijaty myëdäjttëp ets tmooytyë pënaty tëgoyˈäjtxëdëp. ¿Tiko? Parë jam wyëˈëmdët diˈibë nety të nyëbattë ets tˈakmëdooˈittët wiˈix yaˈëxpëktë ja apostëlëty (Apostʉlʉty 2:41-45). Ets kyajnëmë nety nyaxy 200 jëmëjt mä ja apostëlëtëjk yˈoˈktäˈäytyë, ko Tertuliano tkujäˈäyë wiˈix ja jäˈäy tmaytyaktë ja kristianëty: “Okˈix [...] wiˈix nyaytsyokëdë nixim niyam [...] ets naygyuˈoogëyanëdëp nixim niyam”.
¿Pën tyam nanduˈun tyuundëp? Mä liibrë Historia de la decadencia y ruina del Imperio romano, jyënaˈany ko pënaty naytyijëdë kristianë kanäk siiglë nety mas “axëëk të nyaytyunëdë ak yëˈëjëty ets kyaj duˈun tyuunëdë ja diˈib kyaj myëbeky”. Jap Estados Unidos të näämnëm yajwijtspëtsemy ko pënaty tyukˈijtëdëbë relijyonk yˈaxëkˈijxtëbë myëguˈuk diˈib wiink lugäär tsoˈomp o diˈib wiink koloor yˈixëty, ets diˈib may duˈun jäˈäyˈäjttëp yëˈë diˈib naytyijëdëp kristianë. Ko nyaybyäädëdë jäˈäy diˈib wiink paˈis tsoˈondëp kyaj nyayˈëxkapëdë oy tuˈugyë ryelijyonk tjamëdattë. Pääty kyaj mbäät nyaybyudëkëdë ko dyajtëgoyˈattë o kyaj ja jyot kyorasoon jyënaˈany tpudëkëdë myëguˈuk.
Mä jëmëjt 2004, ojts taxkë urakan yˈayoˈonbëjtaˈaky Florida (EE.UU.). Ta ko nyajxy waanë tiempë, ta ja diˈib tuump presidentë mä Comité de Operaciones de Emergencia de Florida, ojts nyijkxy parë tˈixäˈäny wiˈixë nety ja jäˈäy dyajtundë diˈib të yajˈyaky. Ko tˈijxy ko nituˈugë relijyonk duˈun të tkatukniwijtsëtyaˈay extëmë Jyobaa tyestiigëty, ta tˈanmääytyë ko yˈakmoˈoyandëp tijaty yajtëgoyˈäjttëp. Mä jëmëjt 1997, ojts tuk grupë Jyobaa tyestiigë nyëjkxtë mä República Democrática del Congo parë ojts tmënëjkxtë tsooy, wit etsë käˈäy ukën, duˈun tpudëjkëdë myëguˈuktëjk etsë wiink jäˈäy. Tijaty nyayäjktë ja Testiigëty diˈib Europa, ja tsyodëjkë naa tuk miyonk dolar.