“¿Pënëts mbäät nˈoktsëˈëgë?”
“Oyë tsip pyëdëˈëgët mët ëjts, axtë jaa kyajts ntsëˈëgëyaˈany.” (SAL. 27:3)
EXTËM JYËNAˈANYË TYÄˈÄDË TËGËËKPË BERSIKULO, ¿TI MJOTMËKMOˈOYANËP?
1. ¿Tijaty yaˈˈatsoojëmbijtp mä Salmo 27?
¿TIKO myëjwindëkë mä ngäjpxwäˈkxëm oy niˈigyë tsyiptaˈagyë tyäˈädë tiempë? ¿Tiko xondaˈakyˈää xondaˈakyjyot nyajtuˈunëmë tiempë etsë jot mëjää mä tyam niˈigyë yˈamääytyaˈagyë meeny sentääbë? ¿Wiˈix mbäät amëk jotmëk nwinguwäˈkëmë tyäˈädë jukyˈäjtën oy mayë jäˈäy ttsëˈëgët ti miimp këdakp? Tyäˈädë yaˈˈatsoojëmbity mä Salmo 27, ja ëy diˈib kyujäˈäyë David.
2. ¿Wiˈix mayë jäˈäy tyunëdë mëk tsëˈëgë, per wiˈix ëtsäjtëm nnayjäˈäwëm?
2 David duˈun dyajtsondakyë tyäˈädë ëy: “Jyobaa yëˈëtsë ngudëˈkx ngujäjën etsëtsë nitsokën. ¿Pënëts mbäät nˈoktsëˈëgë? Jyobaa yëˈë duˈun ja potsyë täˈtspekypyë mätsë njukyˈäjtën. ¿Pënëts mbäät mëk ntsëˈëgë?” (Sal. 27:1). Ko jäˈäy mëk jyantsy tsyëˈëgë, xujxtaapy ets kyaj mbäät ti ttuny. Per diˈib tsyëˈkëbë Jyobaa kyaj tiko mëk tsyëˈëgët (1 Peed. 3:14). Niˈamukë diˈib myëdäjtypyë Jyobaa extëm tuˈugë potsyë täˈtspekypyë, “nëjkxëp yajpääty seguurë ets kyaj ti tmëmay tmëdäjët ko ttsëˈëgët ja ayoˈon” (Pro. 1:33; 3:25). Min nˈokˈijxëm tiko.
“JYOBAA YËˈËTSË NGUDËˈKX NGUJÄJËN ETSËTSË NITSOKËN”
3. ¿Wiˈixtsoo Jyobaa xykyudëˈkx xykyujäjëm, per ti tsojkëp nduˈunëm?
3 Ko jyënaˈany “Jyobaa yëˈëtsë ngudëˈkx ngujäjën”, yëˈë yˈandijpy ko xytyuknijäˈäwëm ja tëyˈäjtën mä nyajpatëm kubiˈits kuˈook (Sal. 27:1). Tëˈkx jäjën mbäät xytyukˈijxëm ti jaˈäjtp nëˈääy tuˈääy ets ti mbäät xyaˈˈayoˈonbatëm, per kyaj dyajjëgeˈeky, ëtsäjtëm diˈib mbäät nnayoˈoyëm. Nanduˈunë Jyobaa, yëˈë xytyuknijäˈäwëm tiko tijaty tyuny jyatyëty mä tyäˈädë tiempë, nan xytyukˈawäˈänëm tijaty mbäät xyaˈˈayoˈonbatëm ets xymyoˈoyëmë oybyë ëwij käjpxwijën, per tsojkëp nbaduˈunëm tijaty njäjtëm. Duˈuntsoo nˈijtëm mas wijy ets kyaj dyuˈunëty pënaty nmëtsipˈäjtëm ets ni nmaˈestrëˈäjtëm (Sal. 119:98, 99, 130).
4. 1) ¿Tiko David jyënany: “Jyobaa yëˈëtsë [...] nitsokën”? 2) ¿Näˈä Jyobaa xyajnitsoˈogäˈänëm?
4 Extëmë David jyënany mä Salmo 27:1, yëˈë xytyukˈijxëm ko kyaj tjäˈäytyëgooy wiˈixë Jyobaa yaˈˈawäˈätspëtsëëmë kanäkˈok. Extëm nˈokpëjtakëm, Jyobaa të nety yaˈˈawäˈätspëtsemyëty mä tuˈugë kää ets mä tuˈugë osë. Nan ojtsë Jyobaa pyudëkëty ko dyaˈoˈkyë Goliat. Ets ok, ojts yaˈˈawäˈätspëtsemyëty ko kanäkˈokë Saúl tyukjëduujë lansë (1 Sam. 17:37, 49, 50; 18:11, 12; 19:10). Päätyë David jyënany ko Jyobaa yëˈë yaˈˈawäˈätspëtsëëmëp. Jyobaa nan yaˈˈawäˈätspëtsëmaampy pënaty mëduunëp extëm dyaˈˈawäˈätspëtseemyë David. ¿Näˈä duˈun ttunäˈäny? Ko myinët ja mëk ayoˈon o “ja mëk mäˈäy täjën” (Diˈibʉ Jat. 7:14; 2 Peed. 2:9).
JAMYATS WIˈIXË JYOBAA TË MBUDËKËTY
5, 6. 1) ¿Wiˈix xyjotmëkmoˈoyëm ko njamyajtsëm wiˈixë Jyobaa të xypyudëjkëm? 2) ¿Tiko xyjotmëkmoˈoyëm ko nnijäˈäwëm tijatyë Jyobaa të ttukmëduny pënaty mëduunëp?
5 Mä Salmo 27:2, 3, jap ngäjpxëm tuk peky diˈib mbäät xypyudëjkëm parë niˈigyë nmëdäjtëmë jotmëkˈäjtën. (Käjpx.) * David yëˈë yˈajamyajtsë ko Jyobaa kanäkˈok yaˈˈawäˈätspëtsëëmë (1 Sam. 17:34-37). Ets yëˈë mëjämooyë parë twinguwäˈkë axtë mëjwiimbë amay jotmay. Ets mijts, ¿mjamyejtsypy wiˈixë Jyobaa ojts mbudëkëty? ¿Mmëjämooyëp ko xyjamyetsy? Extëm nˈokpëjtakëm, ¿ojts mnuˈkxtaˈaky amumduˈukjot ko xypyaty tuˈugë jotmayë mëjwiimbë ets xyˈijxy wiˈixë Jyobaa mmooyë wijyˈäjtën parë xyaˈoyët o mëjämooyë parë xymyëmadäˈägët? ¿O mjamyejtsypy wiˈixë mjotmay jyegeky diˈibë nety myajtuˈudujkëp parë kyaj xymyëdunëdë Jyobaa agujk jotkujk, o wiˈix yˈawatsy ja tuˈu parë xyajmëjwindëjkë Diosë tyuunk? (1 Kor. 16:9.) ¿Wiˈix mnayjawëty ko xyjamyajtstäˈäy? Ko duˈun xyjamyatsët, ta mˈitët seguurë ko Jyobaa mbäät mbudëkëty parë xyaˈoyët o xywyinguwäˈägëdë amay jotmay diˈib mëjwiin kajaa (Rom. 5:3-5).
6 ¿Ets ko tuˈugë gobiernë kumëjääbë ttukniwinmayët parë Jyobaa nyax kyäjpn kyutëgooytyaˈayët? Të näägë jäˈäy duˈun tjatukniwinmayëdë, per kyaj të ttukpëtsëmdë wyinmäˈäny. Pääty, pën nbawinmäˈäyëm wiˈixë Jyobaa tpudëjkë nyax kyäjpn, yëˈë xyjotmëkmoˈoyëm parë amëk jotmëk nwinguwäˈkëm ti miin këdakp (Dan. 3:28).
NˈOKTUKXONDAKËM MÄ NˈAWDÄJTËMË DIOS
7, 8. 1) Extëmë Salmo jyënaˈany, ¿ti David yˈamdoojë Jyobaa? 2) ¿Ti yˈandijpy ja templë diˈibë naxwinyëdë jäˈäy kyaj të tkojy, ets wiˈix jap nDiosˈawdäjtëm?
7 Ja tuk peky diˈib tsojkëp parë nˈijtëm jotmëk, yëˈë ndukxondakëm mä nˈawdäjtëmë Dios (käjpxë Salmo 27:4). * Ja tiempë mä David jyukyˈajty, ja tabernakulo yëˈë netyë “Jyobaa tyëjk”. Perë David ta tniwinmäˈäyë parë Salomón tkojët tuˈugë templë. Ok, ta Jesus jyënany ko jäˈtäämbë tiempë mä jäˈäy kyaj yˈoknëjkxanëdë mä ja templë parë tˈawdattëdë Dios (Fwank 4:21-23). Mä Ebreeʉsʉty kapitulo 8-10, japë Apostëlë Pablo ojts tnigajpxy ko tamˈäjtpë nety jatuˈugë templë diˈibë naxwinyëdë jäˈäy kyaj të tkojy, diˈib naxkëdak ko Jesus nyëbejty mä jëmëjt 29 ets nyaygyëyäjkë parë ttunäˈäny diˈibë Dios tsyejpy (Ebre. 10:10). Tyäˈädë templë diˈibë naxwinyëdë jäˈäy kyaj të tkojy, yëˈë yˈandijpy diˈibë Dios të ttukniwitsë parë mbäät nmëwingoˈonëm mët yëˈëgyëjxm ko nmëbëjkëm ja wintsëˈkën diˈibë Jesus yäjk. ¿Wiˈix nˈawdäjtëm mä tyäˈädë templë? Ko nmënuˈkxtakëmë “Dios amumduˈukjot” ets ko nimaytyakëm mëdë jotmëkˈäjtën. Nan nˈawdäjtëm mä tadë templë ko nëjkxëm mä naymyujkën ets ko nDiosˈawdäjtëm mëdë Familyë (Ebre. 10:22-25). Ko ndukxondakëm extëmë Dios nˈawdäjtëm, yëˈë diˈib xymyëjämoˈoyëm mä tyäˈädë tiempë diˈib jëjpkëxanëp.
8 Abëtsemy nyaxwinyëdë mayë Dios mëduumbë dyajmëjwindëkëdë Diosë tyuunk. Extëm nˈokpëjtakëm, tjattë wiink ayuk o nyëjkxtë wiink lugäär mä tyëgoyˈatyë käjpxwäˈkxpë. Ko duˈun tyundë, ta dyaˈixëdë ko duˈun extëmë David, nan jeˈeyë tuˈuk diˈib yˈamdoodëbë Jyobaa: tyukjotkëdäˈägëdët ets tmëdundët oy ti tyun jyatëdët (käjpxë Salmo 27:6). *
NˈOKMËBËJKËM KO JYOBAA MBÄÄT XYPYUDËJKËM
9, 10. ¿Ti xytyukwandakëmë Salmo 27:10?
9 Extëmë David jyënany, yëˈë xytyukˈijxëm ko ijt seguurë ko Jyobaa pyudëkëyaˈanyëty, jyënany: “Pën jatsë ndääk etsëts ndeety xymyastuˈuty, Jyobaa yëˈëjëts këˈëm xyˈaxäjëyäämp” (Sal. 27:10). Ko ngäjpxëmë 1 Samuel kapitulo 22, ta nnijäˈäwëm ko David kyaj tyääk tyeety myastutë. Per mä tyäˈädë tiempë, mayë Dios mëduumbë të myastuˈudëdë jyiiky myëguˈuk, per të tpäättë naybyudëkë mä Diosë kyäjpn mä yaˈijxˈit yajkuentˈattë.
10 Pënë Jyobaa ijtp listë parë tkuentˈatäˈäny pënatyë jyiiky myëguˈuk mastutëdëp, pes nan mbäät xykyuentˈäjtëm ko ti amay jotmay nyajnäjxëm. Extëm nˈokpëjtakëm, pën nmëmäˈäy nmëdäjëm mä tsyoonët tijaty ja familyë yajtëgoyˈajtypy, mbäät nˈijtëm seguurë ko Jyobaa xypyudëkëyäˈänëm (Ebre. 13:5, 6). Jyobaa nyijäˈäwëp wiˈix yajpäättë niduˈuk niduˈugë yˈuˈunk yˈënäˈk ets tijaty yajtëgoyˈäjttëp.
11. ¿Wiˈix mbäädë jäˈäy wyinmay mä Jyobaa tyestiigëty ko nyaˈijxëmë mëbëjkën mä Jyobaa? Pëjtäˈäk tuˈugë ijxpajtën.
11 Min nˈokˈijxëmë Victoria yˈijxpajtën, diˈib tsënaapy Liberia ets apenënëm tˈëxpekyë Biiblyë. Mientrësë nety wyimbety parë nyëbatäˈäny, ta ja yetyëjk diˈibë nety mëët tsyëënë nyikakë ets ojts tyukmëwëˈëmëty tëgëëgë yˈuˈunk. Per kyaj yˈëxtëkëwaˈky, ojts nyëbety oyë nety tkamëdatyë jyëën tyëjk etsë tyuunk. Tëgok, ta nyëëx diˈib mäjk tëgëëgë jyëmëjt tpaty tuˈugë biyeteerë mët mayë meeny. Per kyaj tmaytsyoowdë nuˈun ja meeny tpaty, pojënë o pakyë ojts tˈëxtäˈäytyë ja soldäädë diˈibë nety jyaˈäjtypy. Ja soldäädë, ta yˈanmääyë ko mas oyxyëbë naxwinyëdë jäˈäy yˈittë ets mas jotkujk koxyëp niˈamukë duˈun jyaˈayˈattë extëmë Jyobaa tyestiigëty. Victoria, ta ttukmëtmaytyaky ko Jyobaa wyandakypy tuˈugë jembyë jukyˈäjtën. Ko tyäˈädë soldäädë tˈijxy wiˈixë Victoria tmëdatyë mëbëjkën ets wiˈix jyaˈayˈaty, ta tmooy kajaa meeny sentääbë diˈibë nety të dyajjëmbity. Mbäät nˈijxëm ko ëtsäjtëm, Jyobaa tyestiigëty, mëjkugäjpxë nˈijtëm ko duˈun njäˈäyˈäjtëm, pes nmëbëjkëm ko Jyobaa xymyoˈoyäˈänëm tukëˈëyë diˈib nyajtëgoyˈäjtëm.
12. ¿Ti nyaˈijxëm ko nmëduˈunˈadëtsëmë Jyobaa oy nyajtëgoˈoyëmë tuunk o meeny sentääbë? Pëjtäˈäk tuˈugë ijxpajtën.
12 Ja tuˈugë ijxpajtën, yëˈë Thomas diˈib tsënaapy Sierra Leona, tuˈugë käjpxwäˈkxpë diˈib kyajnëm nyëbety. Yëˈë ojts tyuuntsondaˈaky extëmë maˈestrë mä sekundaaryë, per jaanëmë nety yajmëjuyaˈany ko tyunët tuk jëmëjt. Per parë ja myëjuˈuny tˈaxäjët, tsojkëbë nety myaytyäˈägët mët tuˈugë yetyëjk diˈib nyikëjxmˈäjtypy ja eskuelë, ets diˈib nanduˈun tuump teety. Tyäˈädë yetyëjk, ta tˈanmääyë Thomas ko extëm wyinmaytyë Jyobaa tyestiigëty kyaj yajkupeky mä ja eskuelë, ets mëktaˈaky tˈanmääy parë twinˈixët ti tsyejpy: ja tyuunk o tijaty myëbejkypy mä Biiblyë. Thomas, ta tmastuty ja tyuunk ets kyaj yajmëjuuy nuˈunë nety të tyuny naa tuk jëmëjtën. Ta tpaty jatuˈugë tyuunk mä dyaˈoyë raadyë etsë telefënë. Duˈun extëmë Thomas, may jyaˈˈatyë nmëguˈukˈäjtëm diˈib xytyukˈijxëm ko pën nmëbëjkëmë Jyobaa, ninäˈä nëjkx ngatsëˈkëm ko tijaty xytyëgoyˈäjtxëm. Nnijäˈäwëm ko Jyobaa xykyuentˈatäˈänëm, pes yëˈë tijaty të dyajkojtäˈäy ets xëmë tkuwäˈänyë kyäjpn.
13. ¿Wiˈix myëjwindëkë Diosë tyuunk mä jäˈäy yˈayowdë?
13 Mä it lugäär mä jäˈäy yˈayoy, mayë nmëguˈukˈäjtëm jyotmooytyëbë Diosë tyuunk. ¿Tiko? Tuˈugë neky diˈib yajjääy mä tuˈugë sukursal, jyënaˈany: “Mayë jäˈäy diˈib yˈaxäjëdëbë ëxpëjkën mä Biiblyë, yëˈë diˈib kyaj tyuunk tpäättë, pes myëdäjttëbë tiempë parë yˈëxpëktët. Etsë nmëguˈukˈäjtëm nan myëdäjttëbë tiempë parë kyäjpxwäˈkxtët. Mä jäˈäy yˈayowdë të tnijawëdë ko tyäˈädë tiempë diˈib ndukjukyˈäjtëm jëjpkëxanëp, pes yˈijxtëp ti tuun jäjtëp”. Mä tuˈugë paˈis, tuˈukpë käjpxwäˈkxpë ja dyaˈëxpekyë jäˈäy naa nidëgëëgën. Ets tuˈugë misioneerë diˈib 12 jëmëjt kujk yˈity mä tyäˈädë paˈis, tkujäˈäyë: “Kom mayë käjpxwäˈkxpë adëyë jyukyˈattë ets kyaj nëgoo tijaty wyoonëdë, ta mas niˈigyë dyajtundë tiempë parë kyäjpxwäˈkxtë ets dyaˈëxpëktë jäˈäy”.
14. ¿Wiˈixtsoo Dios tkuwäˈäny ja tëgoy myayjyaˈay?
14 Jyobaa të twandaˈaky ko nyax kyäjpn tpudëkëyaˈany, tkuwäˈänäˈäny ets dyaˈˈawäˈätspëtsëmäˈäny, ets nmëbëjkëm ko tyunaampy extëm të twandaˈaky (Sal. 37:28; 91:1-3). Jantsy mayë jäˈäy diˈib tsokwëˈëmandëp mä ja mëk ayoˈon (Diˈibʉ Jat. 7:9, 14). Dios kyaj tnasˈixëyaˈany ets pën dyajkutëgoyëdë kyäjpn mä tyäˈädë tiempë diˈib jëjpkëxanëp, yëˈë kyuentˈataampy parë tmëmadäˈäktëdë amay jotmay ets parë oy mëët yˈittët. Ets mä Armajedon, jaa Jyobaa tkuwäˈänäˈäny pënaty mëduunëp ets dyajtsoˈogäˈäny.
“JYOBAA, TUKNIˈˈIJXËGËTS JA MNËˈË MDUˈU”
15, 16. ¿Wiˈix ndukˈoyˈäjtëm ko nduˈunëm extëmë Jyobaa xytyukniˈˈijxëm? Pëjtäˈäk tuˈugë ijxpajtën.
15 Parë kyaj ntsëˈkëm, tsojkëp xëmë nˈaxäjëmë käjpxwijën diˈibë Dios yajkypy, extëmë David nyuˈkxtaky: “Jyobaa, tukniˈˈijxëgëts ja mnëˈë mduˈu ets tuˈumoogyëts mä ja tuˈu diˈib tëyë mët ko taajëtsë nmëtsip” (Sal. 27:11). Parë nduˈunëm extëmë tyäˈädë tekstë jyënaˈany, tsojkëp yajxon nmëdoˈogujkëm wiˈixë Jyobaa kyäjpn xynyëˈëmoˈoy xytyuˈumoˈoyëm ets tsojkˈam nmëmëdoˈojëm. Extëm nˈokpëjtakëm, mayë nmëguˈukˈäjtëm tyukˈoyˈäjttëp käjpxwijën parë adëyë jyukyˈäjtën dyajnaxtë, pes kyaj nyekyˈittë nuˈkxyoty o yojoty ko yˈamääytyaˈagyë meeny sentääbë. Nan kyaj net yëˈëyë tniduunë parë tkujuytyë tijaty kyaj tyimjëjpˈamëty, duˈuntsoo tmëdattë tiempë parë ttundë mas niˈigyë Diosë tyuunk. Pääty, niduˈuk niduˈuk mbäät nnayajtëˈëwëm: “¿Nbaduumbyëts tsojkˈam tijatyëts ngajpxypy mä Biiblyë ets mä ëxpëjkpajn diˈib yajpëtseembyë tuumbë diˈib kuwijy oyëts ntsipjawët?” (Mat. 24:45).
16 Pën nasˈijxëm parë Jyobaa xytyukniˈˈijxëm ets xytyuˈumoˈoyëm, kyaj tiko ntsëˈk njäˈäwëm. Tuˈugë prekusoor regulaar diˈib Estados Unidos ojts tˈamdoy tuˈugë tyuunk parë mbäät ja fyamilyë tyundë prekusoor, per ja wyintsën ta yˈanmääyë ko ninäˈä tyäˈädë tuunk kyayajmoˈoyët pën kyaj të yˈëxpeky mä unibersidad. Koxyëp mijts duˈun myaˈˈanmääy, ¿ojxyëp mwinmay ko mas oyxyëp ko mˈëxpejky mä unibersidad ets kyaj ko mduundëjkë prekusoor? Ko majtsk sëmään nyajxy, ta ja wyintsën yaˈëxkejxy ets tyëjkë wiinkpë diˈib yajtëëwë ti tuunk jyatsojkënyëˈajtypy. Tyäˈädë nmëguˈukˈäjtëm, ta ttukmëtmaytyaky ko yëˈë mëdë nyëdoˈoxy kajaa tiempë dyajnaxtë mä Diosë tyuunk ets ko duˈunyëm tyunäˈändë. Tamë nety tkanimaytyaktäˈäy ko ja wyintsën yˈanmääyë: “¡Tëjëtsë nety nbekyë kuentë ko mijts naa tëgatsy! Kojëtsë netyë ndeety yˈooganë, ta ijty nimajtskë Testiigë nyiminëdë ets tyukwingugäjpxëdë Biiblyë jabom jabom. Päätyëts njënany, ko pën jäjtpë tiempë parëts nbudëkët tuˈugë Testiigë, nbudëkëbëts”. Jakumbom, ta tyäˈädë nmëguˈukˈäjtëm yajmooy ja tuunk diˈibë nety të tˈokˈamdoobë. Extëm nˈijxëm, ko jëjpˈam nbëjtakëmë Diosë jyaˈa, Jyobaa xëmë tkuytyuny extëm xytyukwandakëm: xymyoˈoyäˈänëm tijaty nyajtëgoyˈäjtëm (Mat. 6:33).
JËJPˈAM NMËBËJKËM ETS NˈAWIJX NJËJPˈIJXËM
17. ¿Ti xypyudëkëyäˈänëm parë nwinguwäˈkëm amëk jotmëk diˈib miimp këdakp?
17 David ojts tnigajpxy ko jëjpˈam nmëbëjkëm ets nˈawijx njëjpˈijxëm tijatyë Dios të twandaˈaky, jyënany: “¡Koxyëbëts të ngamëdatyë mëbëjkën parëts nˈixëdë Jyobaa yˈoyjyaˈayˈäjtën mä nyaxwinyëdë pënaty jukyˈäjttëp...!” (Sal. 27:13). Okwinmay: ¿wiˈixxyëp nyajpatëm koxyëp kyaj nˈawijx njëjpˈijxëm tijatyë Dios të twandaˈaky ets koxyëp nganijäˈäwëm tijaty yajmaytyakp mä Salmo 27? Pääty, tsojkëp xëmë nmënuˈkxtakëmë Jyobaa parë xymyoˈoyëmë jotmëkˈäjtën ets parë xyajtsokëm ko myinëdë Armajedon (käjpxë Salmo 27:14). *
[Notë diˈib noky ëxˈääy]
^ parr. 5 Salmo 27:2, 3: “Kojëtsë axëkjäˈäy xymyëwingoondë parëtsë nniniˈkx ttsuˈutsäˈändë, yëˈëjëty, diˈibëtsë nety xymyëtsipˈäjttëp ets diˈibëts kyaj xyˈixäˈändë, yëˈëjëty këˈëm kyunajpëdë ets kyäˈädääytyë. Oyë wyitëjk tkojtët tuk kampamentë ëjtskyëjxm, kyajtsë ngorasoon tsyëˈëgëyaˈany. Oyë tsip pyëdëˈëgët mët ëjts, axtë jaa kyajts ntsëˈëgëyaˈany”.
^ parr. 7 Salmo 27:4: “Tuˈuk jeˈeyë diˈibëtsë Jyobaa të nˈamdoy... yëˈë diˈibëts nˈëxtäˈäyaampy, nˈitëdëts mä Jyobaa tyëjk nuˈunëts ja nxëë njukyˈäjtën, parëts nˈixëdë Jyobaa yˈoyjyaˈayˈäjtën ets parëts nmëjˈix nmëjjawëdë tyëjk”.
^ parr. 8 Salmo 27:6: “Ets tyamtsë ngëbäjk yˈitäˈäny jantsy këjxm mäjëtsë nmëtsip diˈibëts të xyajnaduky; ets nyakäˈänyëtsë wintsëˈkënë mä wyitëjk, wintsëˈkënë diˈib xondakën myëët yajˈyax yajjojkp; nˈëwäˈänyëts, duˈun, ets nixëdunäˈänyëtsë Jyobaa mëdë ëy yaˈaxy”.
^ parr. 17 Salmo 27:14: “Awix jëjpˈixë Jyobaa; jotmëk it, ets yaˈit mëkë mgorasoon. Duˈun, awix jëjpˈixë Jyobaa”.
[Yajtëˈëwën]
[Letrë diˈib miimp mä dibujë mä pajina 23]
David ojts jyotmëkmoˈoyëty ko tjamyejtsy wiˈixë Jyobaa yaˈˈawäˈätspëtsëëmë
[Letrë diˈib miimp mä dibujë mä pajina 25]
¿Mbäät niˈigyë nyajmëjwindëjkëmë Diosë tyuunk mä tyäˈädë tiempë mä yˈamääytyaˈagyë meeny sentääbë?
