Tyäˈädë artikulo yëˈë mbudëkëyanëp ets mä mBiiblyë xypyäädët wiˈix yaˈˈatsoojëmbity tijaty mnayajtëëjëp. Ets pën mtsojkënyëˈajtypy mbäät mëdë Jyobaa tyestiigë xyˈëxpëktë.

1. ¿Tiko Dios nyaymyooyë tuˈugë xyëë?

Niˈamukë ntsojkëm ets nyajtukmëgäjpxëmë nxëëˈäjtëm. ¿Tiko? Yëˈko extëm nxëˈäjtëm yëˈë yajtukˈëxkäjpëm mä wiink jäˈäy, kyaj dyuˈunëty extëm ko nyajtijëm “windäj” o “wintsën”. Dios nan kanäk peky yajtijy extëm “Wintsën diˈib Yajkutujkp”, “Diˈib tukëˈëyë mëkˈäjtënë myëdäjtypy” ets “Diˈib tijaty të dyajkojtäˈäy” (Génesis 15:2; 17:1; Eclesiastés 12:1). Per yëˈë ojts nyaymyoˈoyëty tuˈugë xyëë parë niˈigyë nˈixyˈäjtëm ets mëët nnaymyaˈayëm. Mä nˈayukˈäjtëm, Dios ja txëˈaty Jyobaa. (Käjpxë Isaías 42:8.)

Mayë jäˈäy diˈib të tkäjpxnaxtë Biiblyë kyaj të tkujayëdë Diosë xyëë, jeˈeyë të tpëjtäˈäktë “Dios” o “Wintsën”, perë Diosë xyëë ja myiny naa jëxtujk mil okën mä ja Diosë jyaaybyajtën diˈib tëëyëp yajjääy mä ayuk ebreo. Tyäˈädë yëˈë xytyukˈijxëm ko Dios tsyejpy ets nnijäˈäwëm ti txëˈaty. (Käjpxë Isaías 12:4.)

2. ¿Tiko jyëjpˈamëty ets nˈixyˈäjtëmë Diosë xyëë?

Nˈixyˈäjtëmë Dios xyëë kyaj jeˈeyë tˈandijy nnijäˈäwëm ti txëˈaty, nan yëˈë yˈandijpy ko mëët nnaymyaˈayëm. Tadë xëë Jyobaa, ja nyikejy “Yëˈë Tyuumpy ets duˈun Tyun Jyatëdët”, tyäˈädë yëˈë yˈandijpy ko yëˈë mbäät ttuny parë dyaˈˈadëwët diˈib tyuknibëjtakëp. Pääty ko nˈixyˈäjtëmë xyëë, yëˈë yˈandijpy nmëbëjkëm ko yaˈˈadëwaampy tijaty wyandakypy (Salmo 9:10). Pënaty yˈixyˈajtypyë Diosë xyëë ets yajtuumpy, myëbëjktëbë Dios ets pyëjtaktëp jëjpˈam mä jyukyˈäjtën. Etsë Jyobaa yëˈë diˈib kuentˈäjtëdëp. (Käjpxë Salmo 91:14.)

  3. ¿Tiko Dios ttseky ets nˈixyˈäjtëmë xyëë?

Dios tsyejpy etsë naxwinyëdë jäˈäy tˈixyˈatëdë xyëë, pes ko duˈun ttundët mbäät yˈoyë jyukyˈäjtën. ¿Wiˈixtsoo? Mbäät mëët nyaymyayëdë ets tˈawix tjëjpˈixtët ja jukyˈäjtënë winë xëëbë. Päätyë Dios ttseky etsë jäˈäy tˈixyˈatëdë xyëë. (Käjpxë Fwank 17:3 etsë Romanos 10:13, 14, Traducción del Nuevo Mundo [NM].)

Jesus ojtsë jäˈäy ttukˈixyˈatyë Diosë xyëë ko ttukmëtmaytyaky wiˈixë Dios wyinmay, wiˈix tijaty ttuny, wiˈixë yˈanaˈamën ets tijaty wyandakypy. Tyam, nanduˈun ttundë abëtsemy nyaxwinyëdë pënaty panëjkxëdëp, tyukˈixyˈäjttëbë jäˈäy ja Diosë xyëë. Niˈamukë duˈun yajpäättë extëm tuˈugë käjpn diˈib myënëjkxypyë Diosë “xyëë”. (Käjpxë Hechos 15:14, NM etsë Juan 17:26, NM.)

4. ¿Wiˈixë Dios dyajwäˈätsäˈänyë xyëë?

Dios yajwäˈätsaambyë xyëë, pes mayë jäˈäy të dyaˈˈaxëëgë. Extëm nˈokpëjtakëm, may jyënäˈändë ko kyaj yëˈë ojts xyajkojëm, pääty kyaj tiko nmëmëdoˈojëm. Wiinkpë jyënäˈändë ko Dios kyaj xymyëjpëjtakëm ets ko yëˈë pyoky ko nmëdäjtëmë amay jotmay. Per niˈamukë tyäˈädë jäˈäy diˈib axëëk yajwëˈëmdëbë Dios, waanë tiempë tˈakmëdattë, pes kyumëdowandëp ko dyaˈˈaxëëgëdë Diosë xyëë. (Käjpxë Salmo 83:17, 18.)

Dios ja dyajwäˈätsäˈänyë xyëë ko ja yˈAnaˈam Kyutujkën dyajkutëgoyëdë gobiernëtëjk ets dyajnaxkëdäˈägëdë jotkujkˈäjtën yä Naxwiiny (Daniel 2:44). Tim tsojk niˈamukë jäˈäy tnijawëyaˈany ko Jyobaa yëˈë tukpäjkë Dios diˈib tëyˈäjtën. (Käjpxë Ezequiel 36:23 etsë Mateo 6:9, NM.)

¿Ti mijts mbäät xytyuny? Xyˈëxpëkëdë Diosë yˈAyuk parë xymyëwingonët ets mduˈukmukët mëdë jäˈäy diˈib tsojkëdëp. Pes ko Jyobaa dyajwäˈätsëdë xyëë, jyamyatsaampy pënaty ninäˈä të kyamastuˈudëdë (Malaquías 3:16).

Pën mˈaknijawëyaampy, ix mä kapitulo 1 mä tyäˈädë liibrë, ¿Ti tëyˈäjtën jantsy tukniˈijxëbë Biiblyë?, diˈib yajpëtsëëmdëbë Jyobaa tyestiigëty.

[Letrë diˈib miimp mä dibujë mä pajina 10]

Diosë xyëë diˈib tëëyëp yajjääy mä ayuk ebreo