Tuˈugyëbë myaytyaˈaky
“Mët ko kyaj ja Diosë kyugäjxpëty tyukjäjtëdë tii jäˈäy wyinmäˈänygyëjxm, ja Espiritë Santë winmäˈänymyooyëdë.” (2 PEEDRɄ 1:21)
¿TIKO BIIBLYË TYËGATSYËTY? Tijaty tëëyëp yajjääy ets axtë diˈib tuˈugyë tiempë yajjääy, kyaj kyijpxyë myaytyaˈaky. Tsip tyuˈugyëdë myaytyaˈaky tuˈugë liibrë pën diˈib jyaaytyë wiink it wiink lugäär tsyënääytyë ets pën wiink tiempë jyukyˈäjttë. Perë Biiblyë jyënaˈany ko tuˈuk jeˈeyë jäˈäy diˈib yajjääyë, pääty nyaymyënëjkxyëtyë myaytyaˈaky tadë 66 liibrë diˈibë myëmiimpy ets kyaj nyaywyinguwopëty (2 Timotee 3:16).
TUˈUGË IJXPAJTËN: Mä siiglë 16, tuˈugë borreegë kuentˈäjtpë diˈib xyëˈäjt Moisés, ojts tnaskäjpxë mä tim jawyiimbë liibrë diˈib miimp mä Biiblyë ko myinäˈäny tuˈugë “tëëm ääts” diˈib yajnitsoˈogaambyë naxwinyëdë jäˈäy. Ok, ta tkujäˈäyë ko myinäˈäny mä tyëëm yˈäätsë Abrahán, Isaac etsë Jacob (Génesis 3:15; 22:17, 18; 26:24; 28:14). Ets kyum 500 jëmëjt, ta ja kugajpxy Natán jyënany ko myinäˈäny mä tyëëm yˈäätsë David (2 Samuel 7:12). Ets kyum mil jëmëjt, ta apostëlë Pablo ojts tnimaytyaˈaky ko tyäˈädë tëëm ääts yëˈë Jesus ets tuk grupë yˈëxpëjkpë diˈib të twinˈixy (Romanʉs 1:1-4; Galasyʉ 3:16, 29). Ets mä kyëxanë primer siiglë, ta yajjääyë tim okpë liibrë diˈib myëmiimbyë Biiblyë, jap yajkujäˈäyë ko Jesusë yˈëxpëjkpëty nyimaytyäˈägäˈänëdë yä Naxwiiny, ko nyëjkxäˈändë tsäjpotm ets yˈanaˈamäˈändë mëdë Jesus tuk mil jëmëjt, dyajkutëgoyäˈändë Mëjkuˈu ets dyajnitsoˈogäˈändë naxwinyëdë jäˈäy (Diˈibʉ Jatanʉp [Apocalipsis] 12:17; 20:6-10).
¿WIˈIX JYËNÄˈÄNDË ËXPEKYJYAˈAY DIˈIB NYIˈËXPËJKËDËBË BIIBLYË? Tuˈugë eskritoor diˈib xyëˈäjtypy Louis Gaussen, ojts këkpäät tˈëxpeky 66 liibrë diˈibë Biiblyë myëmiimpy, ta jyënany ko duˈunyë yajwëˈëmëty ko tˈixy “wiˈix tyuˈugyë myaytyaˈaky tuˈugë liibrë diˈib jajk 1,500 jëmëjt parë yajjääytyaay ets diˈib niganäägë jäˈäy jyaaytyë, [...] mä niˈamukë dyajtuˈuwitstë tuˈugë maytyaˈaky diˈib nimää kyanaywyinguwopëty, extëmxyëp yëˈëjëty tjaygyujkëdë, ets tuˈugyë diˈib myaytyaktë: ko naxwinyëdë jäˈäy yajjuuybyëtsëmäˈäny mët yëˈëgyëjxmë Dios yˈUˈunk” (Théopneustie ou Inspiration Plénière des Saintes Écritures [Theopneustia: Dios yajjääyë Sagradas Escrituras]).
¿WIˈIX XYˈOKˈIXY? ¿Mbäät tuˈugë liibrë tyuˈugyë myaytyaˈaky diˈib jajk 1,500 jëmëjt parë yajjääytyaay ets diˈib 40 yetyëjk jyaaytyë? ¿O yëˈëyë Biiblyë?
“Ko nyajtuˈukmujkëm tukëˈëyë tyäˈädë jääybyajtën, ta jeˈeyë tuˈugë liibrë nyaymyaˈkxyëty [...]. Mä tukëˈëyë liibrë diˈib jaˈäjtp nituˈuk mëët kyatuˈugyë.”—(THE PROBLEM OF THE OLD TESTAMENT [DIˈIB JOTMAYˈÄJTP MÄ ANTIGUO TESTAMENTO], DIˈIB JYAAYË JAMES ORR)
