¿Mbäät nmëwingoˈonëm “diˈib myëdooˈijtypyë nuˈkxtakën”?
MAYË jäˈäy diˈib jënandëp ko myëbëjktëbë Dios kyaj mbäät tnimaytyäˈäktë tiko tmëbëktë. Nan kyaj mbäät tnimaytyäˈäktë tiko relijyonk axëëk tijaty ttundë o tiko Dios tnasˈixë ayoˈon. Ets tmënuˈkxtäˈäktë diˈib kyaj tˈixyˈattë.
Per mbäät nmëwingoˈonëm ja “diˈib myëdooˈijtypyë nuˈkxtakën”. Mëbëjkënë ja nyaxkëdaˈaky ko nˈixyˈäjtëmë Dios, net mbäät ntsojkëm ets nmëjˈijxëm. Pes taaˈäjtp tiko mbäät nmëbëjkëm (Hebreos 11:1, NM). Pën mˈëxpëjkypy ja tëyˈäjtën mä pënën yëˈë, mbäät xyˈixyˈaty ets xymyëtmaytyaˈaky extëm tuˈugë mëtnaymyaayëbë. Tyää yajnimaytyäˈägäˈäny tuˈuk majtskë jäˈäy diˈib ijty nuˈkxtaktëp oy seguurë kyaˈittë pën jamë Dios.
▪ Patricia, diˈib të yajnigajpxy mä tim jawyiimbë artikulo, jyënaˈany: “Tëgok, yëˈëtsë nety mëët nyajpääty nimäjkë nmëtnaymyaayëbë ko ojts tmaytyaktëkëdë relijyonk. Tëjëtsë nety ndukmëtmaytyäˈäktë ko tëgok xynyimiinyëts tuˈugë Jyobaa tyestiigë mätsë ndëjk, per tajëts ntsoˈony mët ko kyajtsë nety nmëdooˈitäˈäny wiˈix myaytyaˈaky mëdëtsë ndeety diˈib kyaj tmëbëkyë Dios. Tajëts niduˈuk ja nmëtnaymyaayëbë jyënany: Waˈan jyantsy tyëyˈäjtënëty extëm myaytyäˈäktë Jyobaa tyestiigëty.
”Ta tuˈugë kiixy jyënany, ¿tiko nganëjkxëm mä tyuˈukmuktë parë nnijäˈäwëm? Tajëts ojts nëjkxtë. Oyëts ngamëbëkandë tijatyëts nmëdoodë, ojts niganääk nˈyoˈoyˈadëˈëtstë mä yˈëxpëktë Jyobaa tyestiigëty mët ko jantsy oyjyaˈayëty.
”Per tuˈugë domingë xëë, tajëts nmëdooy mä ja naymyujkën diˈibëts ojts xyajwinmääytyëgatsy. Mä ja diskursë yëˈë yajnimaytyak tiko jäˈäy yˈayoy. Tajëts nnijäˈäwë ko ja tim jawyiimbë yetyëjk wäˈätsjäˈäy ojts kyojy, per ko kyamëdooy, ta ttukninäjxyë poky etsë oˈkën ja tyëëm yˈääts. Nan ojts yajnimaytyaˈaky ko jëjpˈam etsë Jesus yˈoogët parë jatëgokë naxwinyëdë jäˈäy tmëdatët diˈib yajtëgooy ja tim jawyiimbë yetyëjk (Romanʉs 5:12, 18, 19). * Taanëmëts njaygyujkë ko tam tuˈugë Dios diˈib xymyëmäˈäy xymyëdäjëm. Ojts nˈëxpëjkˈadëˈëtsyë Biiblyë, etsëts njaygyujkë ko mbäädëts nmënuˈkxtaˈaky tuˈugë Dios diˈib jantsy tam”.
▪ Alan, diˈib të yajnigajpxy mä tim jawyiimbë artikulo, jyënaˈany: “Tëgok nyäjxtë Jyobaa tyestiigë mäjëtsë ndëjk, tajëtsë nëdoˈoxy ojts dyajnaxtë tëgoty mët ko tˈoymyëdooy jyaˈˈatäˈänyë jukyˈäjtënë winë xëë yä Naxwiiny. Tajëts njantsy jyotˈambëjky, etsëts ojts nmëgajpxyë nnëdoˈoxy parë myinët mä kosinë, tajëts nˈanmääy: Këdii mnaytyukwinˈëënyëty. ¡Jeˈeyë jyantsy yˈandäˈäktë!
”Tajëts ja nnëdoˈoxy xyˈatsooy: Pes pën duˈun, nëjkx jap tukˈix ko kyaj tyëyˈäjtënëty extëm jyënäˈändë.
”Kyajts mbäät ojts ndukˈixy. Per ja Testiigëty jantsy oyëts xymyëˈëëw xymyëgäjpxtë etsëts ojts xymyoˈoytyë tuˈugë liibrë diˈib nyimaytyakypy pënë jukyˈäjtën duˈunyë yajtukˈijxpejty o pën ojts kyojy. Diˈibëts ojts ngajpxy mä ja liibrë, wäˈäts tnimaytyaˈaky ets nyigajpxypy tiko mbäät nwinmäˈäyëm ko Dios yëˈë diˈib ojts xyajkojëm, tajëts nbëjtakyë nwinmäˈäny parëts niˈigyë nˈixyˈatäˈänyë Dios. Tajëts nˈëxpëjktsondakyë Biiblyë mëdë Jyobaa tyestiigëty, ets nbëjkyëtsë kuentë ko diˈibë Biiblyë tukniˈˈijxëp tim tëgatsy mët extëmtsë nety nwinmay mä relijyonk. Kojëts mas niˈigyë nˈixyˈajtyë Jyobaa, tajëts mas niˈigyë tijaty ndukmëtmaytyaky. Nnijäˈäwëbëtsë nety ko tam mäjëts mbäät nyaˈoyë njäˈäyˈäjtën, päätyëts nˈamdooyë naybyudëkë ets yëˈë yˈatsoojëmbijtëtsë nnuˈkxtakën”.
▪ Andrew, diˈib tsënaapy Inglaterra, jyënaˈany: “Mëkëts ijtyë nwinmäˈäny nbëjtaˈaky ets yëˈëjëts njantsy tsyojkënyëˈajtypyë ciencia ets nmëbëkyëtsë evolución mët ko jäˈäy jyënäˈändë ko tëyˈäjtën. Ets kyajts ndimwinmay pën jamë Dios mët ko jyantsy jyaˈˈatyë axëkˈäjtën yä naxwiiny.
”Per oyëtsë nety duˈun nyajpääty, winmaabyëtsë nety näˈä ganäˈäty: Pën jam këjxmë Dios, njayajtëwaambyëts tiko të nmiˈinëm
jukyˈäjtpë, tiko jyaˈˈatyë axëkjäˈäy ets tiko jyaˈˈatyë tsip. Ets kojëts ijty nmëdatyë jotmay, tajëts nnuˈkxtaˈaky etsëts nˈamdoyë naybyudëkë, per kyajts nnijawë pënëts nmëgajpxypy.”Mä tadë tiempë, tajëtsë nnëdoˈoxy myooyë Testiigëtëjk tuˈugë trataadë diˈib xyëˈäjtypy: ¿Podrá sobrevivir este mundo? Tëjëtsë nety duˈun nnayajtëyëty kanäkˈok. Ja trataadë, yëˈë diˈibëts xypyudëjkë parëts nwinmayët pën oy kojëts nbayoˈoyët wiˈixë Biiblyë tˈatsoojëmbity. Ok, mäjëtsë nety nbakasyonkˈaty, nyajmooyëts tuˈugë liibrë diˈib xyëˈäjtypy: La Biblia... ¿la Palabra de Dios, o palabra del hombre? Kojëts nnijäˈäwë ko Biiblyë kyaj nyaywyinguwopëty mëdë ciencia, tajëts mas niˈigyë nˈaknijawëyany. Päätyëts ojts ngupëky etsëts tuˈugë Testiigë xyaˈëxpëkët. Ets kojëts nnijäˈäwë tijatyë Jyobaa tyuknibëjtakëp, yëˈëjëts xypyudëjkë parëts nˈixët extëm tuˈugë jäˈäy diˈib jantsy tam ets diˈibëts mbäät nmëgajpxy amumduˈukjot”.
▪ Janet, diˈib yaˈk pajt extëmë protestante jap Londres, jyënaˈany: “Ojts nmastuˈutyë nrelijyonk mët ko kyaj dyajtundë ets mët kojëts nˈixy wiˈix jyaˈˈatyë ayoˈon yä naxwiiny. Tajëts nanduˈun nmastutyë nˈëxpëjkën mä unibersidad. Ëëbëts ijty etsëts ndukoyë gitarrë parëtsë meeny sentääbë nbääty. Tajëts nˈixyˈajtyë Patrick, yëˈë katolikë nety të yeeky, per nan kyaj nety tnyekymyëbëkyë Dios extëm ëjts.
”Japëtsë nety nˈittë mä tuˈugë kubaktëjk mä nanduˈun yˈittë kanäägë ënäˈktëjk diˈibë nety të tmastuˈuttë yˈëxpëjkën ets tˈoymyëdowdë relijyonk diˈib Oriente. Axtë kootspäädëts ijty nyajtsiptäˈäktë tiko të nmiˈinëm jukyˈäjtpë. Patrick mët ëjts kyajtsë nety nmëbëktë Dios, per winmääytyëbëtsë nety ko tam tuˈugë “mëjää” diˈib ojts dyajkojtäˈäy tukëˈëyë.
”Ok, tajëts ojts nëjkxtë wiinktsoo tsënaabyë Inglaterra parëts nˈëxtäˈäyäˈändë nduunk mäjëts nˈëw nˈyäˈäxtët, ets jap myaxuˈunkˈäjtyëtsë nˈuˈunk. Tuˈugë ux, ta pyäˈämbejty, tajëts nmënuˈkxtaky tuˈugë Dios diˈibëtsë nety nwinmaapy ko kyaj jyaˈˈaty. Ok, ta myaˈtyëtsë ntsënäˈäy njukyˈäjtën mëdë Patrick, tajëts ntsoˈony mëdëtsë nˈuˈunk etsëts nikeky. Tajëts jatëgok nnuˈkxtaky ets nˈamdooyëtsë naybyudëkë koxyëp pën tmëdowët. Kyajtsë nety nnijawë pënë Patrick nanduˈundëmë nety të nyuˈkxtaˈaky.
”Mä tadë xëë, ta majtskë Jyobaa tyestiigëty ojts tninëjkxtë Patrick ets ttukˈijxtë mä Biiblyë mä myiny tuˈuk majtskë käjpxwijën. Tajëts ojts xymyëgajpxyë etsëts xyˈanmääy pën ngupëjkypyëts etsëts nˈëxpëktëdë Biiblyë mëdë Testiigëty. Kojëts ndëjkëdë ëxpëjkpë, tajëts nnijäˈäwëdë ko pën ntsojktëbëts etsëtsë Dios xykyupëktët, jëjpˈam etsëts nsibilpëktët. Kom kyajtsë nety oy ntsëënëdë, ojtsëts ntsëˈëgëdë parëts nbëktët.
”Nnijawëyandëbëtsë nety tijatyë Biiblyë nyaskäjpxë ets wiˈix yˈadëy ets nan nnijawëyandëbëtsë netyë Diosë yˈAnaˈamën ets tiko nëgoo tyim jaˈäjnë ayoˈon. Tajëts wanaty wanaty njaygyujkëdë ko Dios xymyëmäˈäy xymyëdäjëm. Ets kom ndunandëbëtsë nety ti Dios tsyejpy, tajëts nsibilpëjktë. Ja wijyˈäjtën diˈib yajkypyë Diosë yˈAyuk, yëˈëjëts të xypyudëkëdë parëts nyajˈyaaktë tëgëëgëtsë nˈuˈunk. Seguurëts nˈittë ko Jyobaa myëdoow kojëts nmënuˈkxtaktë”.
Ix këˈëm tiko mbäät xymyëbëky
Miyonkˈamë jäˈäy extëmë Patricia, Alan, Andrew etsë Janet, kyaj ojts nyaytyukwinˈëënëdë relijyonk diˈib kyaj tyëyˈäjtënëty, ojts këˈëm tpayoˈoytyë tiko Dios tnasˈixë ayoˈon. Mët ko tˈijxtë wiˈixë Biiblyë jyënaˈany, ta tyam yˈittë seguurë ko Dios myëdoobyë nuˈkxtakën.
¿Mnijawëyaampy tiko mbäät xymyëbëky ko tamë Dios? Jyobaa tyestiigëty mbudëkëyanëdëp parë xynyijawëdë tëyˈäjtën mä pënën “diˈib myëdooˈijtypyë nuˈkxtakën” ets wiˈix mbäät xymyëwingony (Salmo 65:2).
[Notë]
^ parr. 6 Jap niˈigyë xynyijawët nuˈunën tsyobääty ko Jesus ojts xykyuˈoˈkëm mä liibrë ¿Ti tëyˈäjtën jantsy tukniˈijxëbë Biiblyë?, kapitulo 5.
[Mä tmaytyaˈaky diˈib jëjpˈam pajina 10]
“Kojëts nnijäˈäwë tijatyë Jyobaa tyuknibëjtakëp, yëˈëjëts xypyudëjkë parëts nˈixët extëm tuˈugë jäˈäy diˈib jantsy tam ets diˈibëts mbäät nmëgajpxy amumduˈukjot”
[Dibujë diˈib mä pajina 9]
Taaˈäjtp tiko mbäät nmëdäjtëmë mëbëjkën, pääty jëjpˈam ets nnijäˈäwëm ja tëyˈäjtën mä Dios