Nˈokjukyˈäjtëm ëxtëmë kunax kugäjpn mä Diosë Kyutujkën
“Nayaˈitëdë dëˈënyëm extëm ja oybyë ayuk.” (FILIP. 1:27)
¿WIˈIX MˈATSOOJËMBITËT?
¿Pënaty mbäät kyunaxˈat kyugäjpnˈattë mä Diosë Kyutujkën?
¿Ti yˈandijpy tjatët ja ayuk, tnijawët wiˈix yajnimaytyaˈaky ets tnijawëdët ja ley?
¿Wiˈix dyaˈixëdë ko tsyojktëbë Diosë lyey pënaty kunaxˈatan kugäjpnˈatandëp mä Diosë Kyutujkën?
1, 2. ¿Tiko ja naymyujkën diˈib Filipos ojts mëjwiin kajaa dyajnikajtë extëmë Pablo yˈanmääyë?
APOSTËLË Pablo duˈun ojts tnijayë ja Dios mëduumbëty diˈib Filipos: “Nayaˈitëdë dëˈënyëm extëm ja oybyë ayuk” (käjpxë Filipʉs 1:27). Diˈib të yajkäjpxnaxy “nayaˈitëdë”, mä ayuk grieegë nan yëˈë myaytyäˈägaampy ko “nyayaˈitëdët extëm kyunaxˈat kyugäjpnˈattë”. Tyäˈädë ayuk mëjwiin kajaa nety dyajnikajtë ja naymyujkën diˈib Filipos. ¿Tiko? Yëˈko ja Filipos jäˈäy mbäädë nety tjuuttë nyeky parë nyaxtët extëmë Romanë jäˈäy ets kyuwäˈänëdët ja ley diˈib Roma. Pääty ja Filipos jäˈäy jantsy mëj nyayjäˈäwëdë ko mbäät nyaxtë extëmë romanë jäˈäy mët ko tyukˈoyˈäjttëp, ets niwaanë nety ja jäˈäy diˈib mbäät duˈun nyaxtë.
2 Per ja Dios mëduumbëty diˈib Filipos mbäädë nety mas mëj nyayjawëdë. ¿Tiko? Apostëlë Pablo yˈanmääyëdë: “Ëtsäjtëm, tsäjpotmëdë jäˈäyˈäjtëm” (Filip. 3:20). Yëˈëjëty, jamë nety kyunaxˈatäˈän kyugäjpnˈatäˈändë mä Diosë Kyutujkën, diˈib mas mëj ets kyaj dyuˈunëty nituˈugë naxwinyëdë jäˈäyë gyobiernë. Niˈigyë nety mëjwiin kajaa kyuwäˈänëdë ets ttukˈoyˈattë ja Diosë Kyutujkën (Éfes. 2:19-22).
3. 1) ¿Pënaty mbäät kyunaxˈat kyugäjpnˈattë mä Diosë Kyutujkën? 2) ¿Ti nˈëxpëkäˈänëm mä tyäˈädë artikulo?
3 Pablo yˈanmääy ja Dios mëduumbëty diˈib anaˈamandëp mëdë Kristë jam tsäjpotm ets nyayaˈitëdët extëmë kunax kugäjpn (Filip. 3:20). Per nan mbäät duˈun nyayaˈitëdë pënaty jukyˈatandëp yä Naxwiiny ets yˈanaˈamäˈänëdë ja Diosë Kyutujkën. ¿Tiko? Yëˈko niˈamukë yëˈëyë nmëduˈunëmë Jyobaa diˈib Reyˈäjtp ets nan niˈamukë nbaduˈunëmë yˈanaˈamën (Éfes. 4:4-6). Mä tyäˈädë tiempë, mayë jäˈäy mëk jyantsy tyundë parë dyaˈoyëdë nyeky ets kyunaxˈat kyugäjpnˈattët mä tuˈugë paˈis diˈib mëkjäˈäy. ¡Per ëtsäjtëm mas niˈigyë mbäät nmëjjäˈäwëm ko mbäät ngunaxˈäjt ngugäjpnˈäjtëm mä Diosë Kyutujkën! Per parë niˈigyë nmëjjäˈäwëm, min nˈokˈijxëm tijaty yaˈˈamdoop tuˈugë jäˈäy parë kyunaxˈat kyugäjpnˈatët mä tuˈugë paˈis ets tijaty ëtsäjtëm yaˈˈamdoˈojëm parë ngunaxˈäjt ngugäjpnˈäjtëm mä Diosë Kyutujkën. Ta net nˈijxëm ti mbäät nduˈunëm tëgëk pëky parë xëmë ngugäjpnˈäjtëm mä Diosë Kyutujkën.
¿TIJATY YAˈˈAMDOˈOJËM PARË NˈIJTËM KUNAX KUGÄJPN?
4. ¿Ti yˈandijpy ja “ayuk diˈib wäˈäts”, ets wiˈix “ngäjpxëm”?
4 Yajjatët ja ayuk. Näägë gobiernë yˈamdoodëbë jäˈäy diˈib kunaxˈatäämp kugäjpnˈatäämp parë yajxon tkäjpxët ja ayuk diˈib mayë jäˈäy kyäjpxtëp mä ja paˈis. Per nääk oy jyakunaxˈäjt jyakugäjpnˈäjnë, kanäk jëmëjt nyaxy parë yajxon tkajpxy ja ayuk. Mbäät tjattë pojënë wiˈix ja ayuk yajmaˈkxy, per tsiptakxëdëp yajxon tkäjpxtët. Nanduˈun pënaty kunaxˈatan kugäjpnˈatandëp mä Diosë Kyutujkën, tsojkëp tjattët diˈibë Biiblyë tyijpy ja “ayuk diˈib wäˈäts” (käjpxë Sofonías 3:9). * ¿Ti duˈun yˈandijpy ayuk diˈib wäˈäts? Yëˈë ja Diosë tyëyˈäjtën ets tijaty tyuknibëjtakëp diˈib yajpatp mä Biiblyë. “Ngäjpxëm” ja ayuk diˈib wäˈäts, yëˈë yˈandijpy ko njukyˈäjtëm extëmë Diosë lyey jyënaˈany etsë tyëyˈäjtën. Pënaty kunaxˈäjt kugäjpnˈäjttëp mä Diosë Kyutujkën, mbäät pojënë tjattë tijatyë Biiblyë tukniˈˈijxëp ets nyëbattë. Per ko nyëbajtäˈäytyët ja mä tsyekyëty ets ttundëdë mëjää parë mas oy “tkäjpxtëdë” tadë ayuk diˈib wäˈäts. ¿Wiˈix? Ko ttunëdë mëjää ets tkuytyunët tijaty jyajtypy mä Biiblyë.
5. ¿Tiko mbäät nnijäˈäwëm wiˈix të tsyondaˈagyë Diosë kyäjpn?
5 Nˈëxpëjkëm wiˈix yajnimaytyaˈaky. Pënaty kunaxˈatäämp kugäjpnˈatäämp mä tuˈugë paˈis, mbäät yaˈˈanëëmë ets tnijawët wiˈix tsyonëˈky tsyondaky. Nanduˈun jyaty pënaty kunaxˈatäämp kugäjpnˈatäämp mä Diosë Kyutujkën, oy ko tnijawët wiˈix yˈixëtyë tyäˈädë gobiernë. Nˈokwinmäˈäyëm ja ijxpajtën diˈib yajwëˈëmdë ja Coré yˈuˈunk yˈënäˈk diˈib tuundë mä ja templë ko ja israelitë jyukyˈäjttë. Yëˈëjëty, tsyojktë ja nyax kyäjpn ets ja lugäär mä Jyobaa yaˈˈawdaty ets nyimaytyäˈägandë wiˈix ja kyäjpn yajnimaytyaˈaky. Per kyaj mët ko yˈoyëty o tsyujëty ja Jerusalén käjpn, yëˈë duˈun mët ko yëˈë kyäjpnˈäjtë Jyobaa, ja “mëj Rey”, pes jamë nety mä yaˈˈawdaty ets mä yajnijawë Lyey. Jerusalén, jamë netyë Jyobaa yˈaneˈemy extëmë Rey, ja käjpn diˈibë nety tsyejpy (käjpxë Salmo 48:1, 2). * Duˈun extëm ja Coré yˈuˈunk yˈënäˈk, ¿ntsojkënyëˈäjtëm nanduˈun nˈëxpëkäˈänëm ets nimaytyäˈägäˈänëm wiˈix të tsyondaˈagyë Diosë kyäjpn? Ko niˈigyë nnijäˈäwëm wiˈix yˈityë Jyobaa nyax kyäjpn ets wiˈix tpudëkë, ta mas niˈigyë nmëbëjkëm ja Diosë Kyutujkën ets mas niˈigyë ja tsojkën dyajkëktëkë parë ngäjpxwäˈkxëmë tyäˈädë Kutujkën (Jer. 9:24; Luk. 4:43).
6. ¿Tiko Jyobaa mas niˈigyë tˈawixy ets nnijäˈäwëmë lyey ets nmëmëdoˈojëmë tyëyˈäjtën?
6 Nnijäˈäwëm ja ley. Tuˈuk tuˈugë gobiernë tsyejpy etsë jyaˈayëty tnijawëdët ja ley ets tmëmëdowdët. Pes mas niˈigyë Jyobaa tˈawixy ets pënaty kunaxˈäjt kugäjpnˈäjttëp mä yˈAnaˈam Kyutujkën tnijawëdët ja lyey ets tmëmëdowdët ja tyëyˈäjtën (Is. 2:3; Fwank 15:10; 1 Fwank 5:3). Naxwinyëdë jäˈäyë lyey mbäät kyaj oy tyuny ets näˈäty axtë kyaj tyëyˈäjtënëty. Perë “Jyobaa lyey wäˈäts yëˈë” (Sal. 19:7). ¿Mdukxondakypyë Diosë lyey ets mgajpxypyë Biiblyë jabom jabom? (Sal. 1:1, 2.) Net njäjtëmë Diosë lyey ko këˈëm nˈëxpëjkëm. Kyaj mbäädë wiink jäˈäy yˈëxpëky ets ëtsäjtëm ndukˈoyˈäjtëm.
PËNATY KUGÄJPNˈÄJTP MÄ DIOSË KYUTUJKËN TSYOJKTËBË DIOSË LYEY
7. Pënaty kunaxˈäjt kugäjpnˈäjttëp mä Diosë Kyutujkën, ¿diˈibë leyë mas këjxmbë pyaduundëp?
7 Parë ngunaxˈäjt ngugäjpnˈäjtëm mä Diosë Kyutujkën, kyaj jeˈeyë tsyekyëty nˈixyˈäjtëmë lyey, nan jëjpˈam ets ntsojkëm. Mayë jäˈäy jyënäˈändë ko kyupëjktëp ja ley diˈib jamˈäjtp mä ja paˈis mä tsyëënëdë. Per kyutëjtëp ko ti tkaˈoyjawëdë ets ko wyinmaytyë ko kyaj pën yˈixëdë. Xëmë tijaty ttundë parë “oy wyëˈëmäˈändë mëdë naxwinyëdë jäˈäy” (Col. 3:22, Traducción del Nuevo Mundo). Per ëtsäjtëm diˈib kunaxˈäjt kugäjpnˈäjtëm mä Diosë Kyutujkën, yëˈë nbaduˈunëm ja ley diˈib mas këjxm. Jantsy jotkujk nnayjäˈäwëm ko nmëmëdoˈojëm, oy pën xykyaˈijxëm. ¿Tiko? Mët ko ntsojkëmë Jyobaa diˈib pyëjtakë tyäˈädë ley (Is. 33:22; käjpxë Lukʉs 10:27).
8, 9. ¿Wiˈix mbäät xynyijawë pën mjantsy tsyejpyë Diosë lyey?
8 ¿Wiˈix mbäät xynyijawë pën mjantsy tsyejpyë Diosë lyey? Okwinmay wiˈix xyˈaxäjët ja käjpxwijën ko pën mˈanëˈëmxëdët wiˈix mnayˈoytyunyëty o mnaywyit mnayxyoxyëty. Mä mgakunaxˈaty mgakugäjpnˈatynyëm mä Diosë Kyutujkën, waˈanë nety axëëk mnaywyit mnayxyoxyëty o mnayˈoytyunyëty extëm mbäädë jäˈäy tyuktëkëtyë axëëkpë tsojkën. Per ko myëjwindëjkë mtsojkënë mä Dios, ta ojts xyajtëgatsy ja mwit mxox extëm mbäädë Dios myëjpëtsëmy (1 Tim. 2:9, 10; 1 Peed. 3:3, 4). Ets waˈan tyam mwinmay ko tsuj yajxonë mwit xypyëjtaˈaky. Per ko tuˈugë mëjjäˈäy mˈanëˈëmxëdët ko extëm mnayxyoxyëty axëëk dyajnayjawëty kanäägë nmëguˈukˈäjtëm mä naymyujkën, ¿ti mdunëp? ¿Mnaynyikäjpxtuˈudëdëp? ¿Mjotˈambëkëp o mjënäˈänëp ko kyaj mnayajtëgatsäˈänyëty? Pënaty kunaxˈäjt kugäjpnˈäjtp mä Diosë Kyutujkën, jëjpˈam tmëmëdowët tuˈugë ley, tpanëjkxëdë Kristë yˈijxpajtën (1 Peed. 2:21). Pablo jyënany ko “niduˈuk niduˈuk xypyatëm es nyajjotkëdakëm ja nmëmëbëjkpëˈäjtëm es dëˈën nyajmëjwiin nyajkajaajëm ja myëbëjkën. Mët ko kyaj ja Kristë këˈëm nyaytyukjotkëdakë” (Rom. 15:2, 3). Pääty, tuˈugë Dios mëduumbë diˈib të myëjay, yajjapˈäjtypyë tuˈugyëˈäjtën mä naymyujkën ko kyaj ttuny tijaty mbäädë myëguˈuktëjk axëëk yajnayjawëty (Rom. 14:19-21).
9 Okwinmayë net mä wiˈix xyˈixyë pëjk ukën etsë ijt tsënaaky. Pënaty kyaj kyunaxˈat kyugäjpnˈattë mä Diosë Kyutujkën, mbäät wyinmaytyë ko kyaj yˈaxëëgëty ko jäˈäy tsyëënëdë ak yetyëjk, ko tˈixtë pornografía, ko tsyëënëdë mëdë wiinkpë o ko yaˈˈajääywyäˈkxtë. Per pënaty kunaxˈäjt kugäjpnˈäjttëp mä Diosë Kyutujkën, të tnijawëdë wiˈix wyimbëtsëmäˈäny tijaty tyuundëp o wiˈix tˈaxëktunëdë wiinkpë. Mayë nmëguˈukˈäjtëm axëëgë nety jyukyˈäjtënë dyajnëjkxtë mä tkanijawëdë tëyˈäjtën. Per tyam nyijäˈäwëdëp ko pëjk ukën etsë ijt tsënaaky yëˈë Dios xytyukmayˈäjtëm. Yëˈëjëty, myëjpëjtaktëbë Diosë lyey, ets wäˈäts tnijawëdë ko pënaty axëëk ijt tsënääytyëp kyaj nyitëkëdë ets kyunaxˈat kyugäjpnˈattët mä Diosë Kyutujkën (1 Kor. 6:9-11). Per nan nyijäˈäwëdëp ko jyot kyorasoon mbäät tyuktunëdë diˈib axëëk (Jer. 17:9). Pääty myëjjäˈäwëdëp ko yajmoˈoytyë käjpxwijën diˈib pudëjkëdëp ets xëmë tmëmëdowdë Diosë lyey.
PËNATY KUGÄJPNˈÄJTP MÄ DIOSË KYUTUJKËN MYËJPËJTAKTËP KO TI YAJTUKˈAWANËDË
10, 11. ¿Ti xytyukˈawäˈänëmë Diosë Kyutujkën, ets wiˈix mijts xyˈixy?
10 Tyamë gobiernëtëjk tyukˈawäˈänëbë jyaˈay ti tsooy o jeˈxy pëky mbäät pyäˈämdunëdë, per kyaj tukëˈëyë pyäˈämduny. Per pën jaa nääk diˈib päˈämduump, ta gobiernë ttukˈawanë ja nyax kyäjpn parë tkuwäˈäny, pes patëp ets duˈun ttunët. Nanduˈunë Diosë Kyutujkën, xytyukˈawäˈänëm tijaty mbäät dyaˈˈaxëëgë jukyˈäjtën ets diˈib mbäät xytyukmëjagamgakëmë Dios. Extëm nˈokpëjtakëm, yëˈë tuumbë diˈib kuwijy kanäk jëmëjt kujk xytyukˈawäˈänëm ko axëktuump ko nˈijxëm mä Internet mä jäˈäy niwäˈäts ëxwäˈäts pyëtsëmdë ets yˈit tsyëënëdë axëëk, pes mëjwiin kajaa tˈaxëktuny pënaty kunaxˈäjt kugäjpnˈäjttëp mä Diosë Kyutujkën. ¡Mëjwiin kajaa nmëjjäˈäwëm ko duˈun nyajtukˈawäˈänëm!
11 May tyamë jäˈäy dyajtundë redes sociales extëmë Facebook, ets kyaj wyiˈixëty ko nyajtuˈunëm, per tsojkëp mëk nnaygyuentˈäjtëm. Mbäät mëjwiin kajaa xyˈaxëktuˈunëm, pes mbäät tyëkë jäˈäy diˈib ninuˈun kyaˈoyëty mëët ngäjpx nmaytyakëm (1 Kor. 15:33). Päätyë Diosë kyäjpn xytyukˈawäˈänëm wiˈix mbäät nyajtuˈunëmë duˈumbë sitios. ¿Të xykyajpxyë ëxpëjkpajn diˈib näämnëm yajpëtsëëmbyë tuumbë diˈib kuwijy mä tnimaytyaˈagyë redes sociales? Ko ndëjkëm mä redes sociales ets kyaj të ngäjpxëmë tyäˈädë ëxpëjkpajn, duˈun tnapääty extëm ko njëˈxëmë mëk tsooy ets kyaj jawyiin ngäjpxëm wiˈix mbäät xyˈaxëktuˈunëm. *
12. ¿Tiko kyaj nety jyapëtyë jot winmäˈäny ko ngamëjpëjtakëm tijaty yajtukˈawäˈänëm?
12 Pënaty kyaj tmëjpëjtaˈaky tijaty xytyukˈawäˈänëmë tuumbë diˈib kuwijy, këˈëm nyayˈaxëktunyëty ets nanduˈun tˈaxëktuny pënaty tsojkëp. Nääk xëmë tˈixtë pornografía o yˈit tsyëënëdë axëëk ets wyinmaytyë ko Jyobaa kyaj tˈixy ti tyuundëp. ¡Kyaj nety jyapëtyë jot winmäˈäny ko nwinmäˈäyëm ko mbäät ti Jyobaa ndukwinguyuˈtsëm! (Prov. 15:3; käjpxë Ebreeʉsʉty 4:13.) Jyobaa kyaj tnasˈixëyaˈany ets kyunaxˈat kyugäjpnˈatët mä yˈAnaˈamën pënaty kutëjëdëbë lyey ets kyaj jyodëmbittë, duˈun extëmë gobiernëtëjk diˈib yä naxwiiny kyaj tnasˈixëdë etsë jäˈäy kyunaxˈat kyugäjpnˈatët diˈib tuundëgooytyëp mëjwiin kajaa (1 Kor. 5:11-13). * Perë Jyobaa paˈˈayoop ets yëˈë yajtuumbyë mëjjäˈäytyëjk parë tpudëkë pënaty të pyokytyundë (Gal. 6:1). Pënaty jodëmbijttëp ets tmastuˈuttë axëkˈäjtën, mbäät jatëgok nyaymyaaybyëkyëty mëdë Jyobaa ets duˈunyëm kyunaxˈat kyugäjpnˈattët mä yˈAnaˈamën (2 Kor. 2:5-8). ¡Jantsy mëj nnayjäˈäwëm ko mbäät nmëduˈunëmë tyäˈädë Rey diˈib mëjwiin kajaa xytsyojkëm!
PËNATY KUGÄJPNˈÄJTP MÄ DIOSË KYUTUJKËN YAJTSOBATTËP JA ËXPËJKËN
13. Pënaty kunaxˈäjt kugäjpnˈäjttëp mä Diosë Kyutujkën, ¿wiˈix dyaˈixëdë ko yajtsobattëbë ëxpëjkën?
13 Mayë gobiernë tyuundëbë mëjää parë jyaˈay yˈëxpëktët, kyojtëbë eskuelëtëjk parë jäˈäy tjattët nyekykyäjpxtët, jyaˈaytyët ets parë nyayˈix nyaymyëˈayowëdët. Dios mëduumbë myëjjäˈäwëdëbë tyäˈädë ëxpëjkën, per mas dyajtsobäättë diˈib yˈaxäjëdëp ko kyunaxˈat kyugäjpnˈattë mä Diosë Kyutujkën. Extëm nˈokpëjtakëm, Jyobaa xytyukniˈˈijxëm nekykyäjpxëm mët yëˈëgyëjxmë kyäjpn. Nan yaˈˈanmaabyë tääk teety etsë yˈuˈunk diˈib mutskatynyëm ttukwingugäjpxëdë ëxpëjkpajn extëmë liibrë Maytyaˈaky diˈib miimp mä Biiblyë. Etsë tuumbë diˈib kuwijy poˈoboˈo dyajpëtsëmyë La Atalaya etsë ¡Despertad!, diˈib myëmiimpy jantsy kanäk pajina. Pën mijts mgajpxypy naa tëgëëk o taxk pajina mä tuˈukpë xëë, ta xykyäjpxtäˈäyët mä tuˈukpë poˈo. Duˈuntsoo mnaytyukpudëkëdët ja ëxpëjkën diˈibë Jyobaa yajkypy.
14. 1) ¿Ti ëxpëjkën nˈaxäjëm? 2) Mä mDiosˈawdaty mëdë mFamilyë, ¿diˈibë käjpxwijën të xyajtuny extëm të myiny mä ëxpëjkpajn?
14 Pënaty kunaxˈäjt kugäjpnˈäjttëp mä Diosë Kyutujkën, sëmään sëmään yˈëxpëktë mä naymyujkën. Extëm nˈokpëjtakëm, mä Yajniˈëxpëkë Diosë Tyuunk ja kujk 60 jëmëjt naxy tpudëkë nmëguˈukˈäjtëm parë yajxon tyukniˈˈixëdë Diosë yˈAyuk. ¿Të mijts myajkujayë mä tyäˈädë eskuelë? Yëˈë tuumbë diˈib kuwijy, nan janäämëty xyˈanmäˈäyëm ko jëjpˈam ets sëmään sëmään nDiosˈawdäjtëm mëdë Familyë. Ko duˈun yˈëxpëktë, yëˈë pudëjkëdëp parë niˈamukë yˈitët tuˈugyë. ¿Të mijts xytyuny extëm të yajnigajpxy mä ëxpëjkpajn mä wiˈix mDiosˈawdatët mëdë mFamilyë? *
15. ¿Ti tuunk nmëdäjtëm diˈib jantsy oy?
15 Mayë jäˈäy dyaˈixëdë ko pyuwäˈkëdëp ja gyobiernë, axtë nëjkxtëp tëjkmdëjkm parë jäˈäy byotaratëdët. Pënaty kunaxˈäjt kugäjpnˈäjttëp mä Diosë Kyutujkën, nan tyukˈijxtëp niˈamukë jäˈäy ko yëˈë pyuwäˈkëdëbë Diosë gyobiernë ko kyäjpxwäˈkxtë nëˈääy tuˈääy ets tëjkmdëjkm. Extëm të nˈijxëm mä ja tuˈukpë artikulo, diˈib masë rebistë wäˈkxp abëtsemy nyaxwinyëdë yëˈë Diˈib Xytyukˈawäˈänëm ets yëˈë nyigajpxypyë Jyobaa yˈAnaˈamën. ¡Mëjwiin kajaa yˈoyëty ko mbäädë wiink jäˈäy ndukmëtmaytyakëmë Diosë Kyutujkën! ¿Mjotmoobyë tyäˈädë tuunk parë xynyimaytyaˈagyë tyäˈädë Kutujkën? (Mat. 28:19, 20.)
16. ¿Wiˈix mbäät nyaˈijxëm ko oy ngunaxˈäjt ngugäjpnˈäjtëm mä Diosë Kyutujkën?
16 Tim tsojk yä Naxwiiny yëˈëyë anaˈamäämbë Diosë gyobiernë. Ets yëˈëyë ja lyey diˈib xyˈanaˈamäˈänëm. ¿Nëjkxëbëdaa jam oy mgunaxˈaty mgugäjpnˈaty? Pes tyamën ttiempëty ets xyaˈixëdët. Tijaty mdukniwinmäˈäyëp xytyunäˈäny tuˈuk tuˈugë xëë, tun tukëˈëyë parë Jyobaa myëjpëtsëmët ets yaˈixëdë ko oy mgunaxˈatäˈäny mgugäjpnˈatäˈäny mä Diosë Kyutujkën (1 Kor. 10:31).
[Notë]
^ parr. 4 Sofonías 3:9: “Yëˈko nmoˈoyaambyëtsë nax käjpn tuˈugë ayuk diˈib wäˈäts, parë niˈamukë yëˈëjëty tkäjpxtëdë Jyobaa xyëë, ets tuˈugyë tmëdundët”.
^ parr. 5 Salmo 48:1, 2: “Jyobaa mëj yˈity ets tsojkëp yajmëjkumayët mëjwiin kajaa mä ja kyäjpnë nDiosˈäjtëm, mä ja kyopkë wäˈätspë. Jantsy tsuj mët ko kyëjxmëty, yëˈë xondakënyˈäjtp abëtsemy nyaxwinyëdë, ja Sión kopkë pyäˈäjë jagambäätpë diˈib anëgëjxytsyoo, ja mëj Reyë kyäjpn”.
^ parr. 11 Extëm nˈokpëjtakëm, ixë ¡Despertad! diˈib julio 2011, pajina 24-27, agosto 2011, pajina 10-13, etsë febrero 2012, pajina 3-9.
^ parr. 12 Ixë La Atalaya 15 de marzo 2012, pajina 30 ets 31.
^ parr. 14 Ix mä La Atalaya 15 de agosto 2011, pajina 6 ets 7, ets mä Wiˈix nduˈunëmë Diosë Tyuunk diˈib eneerë 2011, pajina 3-6.
[Yajtëˈëwën]
[Mä tmaytyaˈaky diˈib jëjpˈam pajina 21]
¿Mmëjpëjtakypy ko myajtukˈawanë wiˈix mbäät xyajtunyë Internet?
[Dibujë mä pajina 19]
Duˈun extëm ja Coré yˈuˈunk yˈënäˈk, ¿mtsejpy mijtsë Diosë kyäjpn ets mä wiˈix yajnimaytyaˈaky?
[Dibujë mä pajina 22]
Ko mDiosˈawdatët mëdë mFamilyë, yëˈë mbudëkëyanëdëp parë mjukyˈatët extëmë oybyë kunax kugäjpn mä Diosë Kyutujkën
