¿Ti net mdunaampy ko të xyˈixyˈatyë Dios?
“Jaˈa ko xyˈixyˈattë Dios.” (GAL. 4:9)
1. ¿Tiko jyëjpˈamëty dyajtuktukët tuˈugë listë ja jäˈäy diˈibë abionk yajˈyeˈepy?
MÄ TUˈUGË abionk kyakageˈekynyëm, ja jäˈäy diˈib yajˈyeˈepy, tsojkëp jawyiin dyajtuktukët tuˈugë listë mä tnigajpxy tijaty mbäät tˈijxtäˈäy mä ja abionk. Ko duˈun tkatunët, mbäät yˈayoˈonbääty mëjwiin kajaa. Nan jëjpˈam dyajtuktukët ja listë diˈib kanäk jëmëjt kujk dyajˈyoˈoy ja abionk.
2. ¿Ti mbäät xëmë tˈixtë Dios mëduumbë?
2 Duˈun extëm dyajtuktuky tuˈugë listë ja jäˈäy diˈib yajˈyeˈebyë abionk, nanduˈun mbäädë Dios mëduumbë dyajtuktuky tuˈugë listë parë tˈixët pën mëk ja myëbëjkën dyaˈity ko tpäädëdë amay jotmay. Pääty, oy näämnëm të nnëbajtëm o tëëyëp, jëjpˈam ets nˈijxëm jabom jabom nuˈunën ja mëbëjkën nmëdäjtëm ets pën oy nˈijtëm mëdë Dios. Pën kyaj duˈun nduˈunëm, mbäät nmëjagamgakëmë Jyobaa. Päätyë Biiblyë xyˈanmäˈäyëm: “Diˈibë nayjyäˈäp yajxon yˈity mëdë Dios, naygyuentˈatëdëp këdiibë pyekykyäˈät” (1 Kor. 10:12).
3. ¿Ti nety tsojkëp ttundët ja Dios mëduumbëty diˈib Galacia?
3 Ko Jesus ojts xyjuˈuybyëtsëˈëmëm, ta mbäät nˈixyˈäjtëmë Dios ets xyˈuˈunkˈäjtëm. Ja Dios mëduumbëty diˈib Galacia, tsojkëbë nety tˈixtët wiˈix ja myëbëjkën yajpäättë (Gal. 4:9). Pes tamë nety näägë Dios mëduumbë diˈib jënandëp ko mbäät oy yajpäättë mëdë Dios pën pyanëjkxtëp ja Moisésë Lyey. Perë Dios kyaj jeky dyajtuuny ja Ley, ets ja Dios mëduumbë diˈib kyaj jyudiyëty kyaj nety të ttimpanëjkxtë. Pääty, tsojkëbë nety wyimbattët mä Diosë tyëyˈäjtën, duˈun ja judiyë ets diˈib kyaj jyudiyëty. Ets nan tsojkëbë nety tjaygyukëdët ko Dios kyaj nety tnekyˈamdoy ets tpanëjkxtët ja Ley diˈibë Moisés yajmooy.
TIJATY YAJTUUMP PARË NˈIXYˈÄJTËMË DIOS
4, 5. ¿Ti käjpxwijënë Pablo myooy ja Dios mëduumbëty diˈib Galacia?
4 Mä Biiblyë ojts yajkujayë wiˈixë apostëlë Pablo ojts tkäjpxwijy ja Dios mëduumbëty diˈib Galacia. ¿Tiko? Parë kyaj tmastuˈuttët ja tëyˈäjtën ets jatëgok ttundët diˈibë nety të tˈokmastupëdë. Jyobaa yëˈë wyinmäˈänymyooyë Pablo parë tmëjämoˈoyët niˈamukë Dios mëduumbë, kyaj yëˈëyëty ja Galacia jäˈäy.
5 Tsojkëp niˈamukë njamyajtsëm ko ojts nnaywyandakëm mä Jyobaa parë nmëdunäˈänëm. Okwinmayë tyäˈädë yajtëˈëwën: ¿Mjamyejtsypy tijaty mduun parë mnëbejty? ¿Mjamyejtsypy wiˈix xyˈixyˈajtyë Dios ets wiˈix nanduˈun mˈixyˈäjtë?
6. ¿Diˈibë listë tsojkëp nˈijxëm?
6 Niˈamukë të nbanëjkxëmë tyäˈädë taxtujk pëkypyë diˈib miimp mä rekuäädrë mä jyënaˈany: “¿Tijaty yajtuump parë nnëbajtëm ets nwimbajtˈadëtsëm?”, tyäˈädë duˈun extëm tuˈugë listë diˈib jëjpˈam mbäät nmëdäjtëm mä nDiosmëduˈunëm. Ko xëmë njamyajtsëm, yëˈë xypyudëkëyäˈänëm parë kyaj nduˈunëm jatëgok tijatyë naxwinyëdë jäˈäy tyuundëp. Duˈun extëm tuˈugë jäˈäy diˈib jeky kujkë abionk dyajˈyoˈoy, jawyiin dyajtuktuky ja listë parë ja abionk dyajkaagëˈëgët, ëtsäjtëm, nan tsojkëp nyajtuktujkëm ja listë parë xëmë Jyobaa nmëduˈunëm.
PËNATYË DIOS IXYˈÄJTËDËP NIˈIGYË WYIMBAJTˈADËˈËTSTË
7. ¿Ti ijxpajtën mbäät nbanëjkxëm, ets tiko?
7 Ja listë diˈib myëdäjtypy ja jäˈäy diˈib yajˈyeˈebyë abionk, yëˈë tukjamyajtsëp tijaty tsojkëp ttunët mä tkayajkagëˈëkynyëm. Ëtsäjtëm, nan tsojkëp nˈijxëm wiˈix nyajpatëm mëdë Dios ets tijaty kujk nduˈunëm desde ko ojts nnëbajtëm. Pablo tnijäˈäyë Timoteo: “Padun ja ëxpëjkënë oybyë extëm të xymyëdoy mä ëjtsën, es jikyˈat mä ja mëbëjkën es ja tsojkën diˈibë nmëdäjtëm tiˈigyë mëdë Jesukristë” (2 Tim. 1:13). Tyäˈädë “ëxpëjkënë oybyë” yajpääty mä Biiblyë (1 Tim. 6:3). Duˈun extëm tuˈugë jäˈäy tˈajäˈäyë dibujë wiˈix dyajkäˈäjäˈäny, nanduˈun ja tëyˈäjtën diˈibë Biiblyë myaytyakypy, yëˈë xytyukˈijxëm tijatyë Dios tsyejpy ets nduˈunëm. Pääty, min nˈokˈijxëm tijaty ojts nduˈunëm ko ojts nnëbajtëm ets nuˈun nguytyuˈunëm ja tëyˈäjtën.
8, 9. 1) ¿Tiko jyëjpˈamëty nyajmëjwindëjkëm ja ëxpëjkën etsë mëbëjkën? 2) ¿Tiko jyëjpˈamëty nwimbajtˈadëtsëm? ¿Ets tiko yaˈijxkijpxyë mët tuˈugë mëj kepy?
8 Diˈib tim jawyiin miimp mä ja listë, yëˈë ëxpëjkën, ta net ja mëbëjkën. Tsojkëp niˈigyë nyajmëjwindëjkëm (2 Tes. 1:3). Ko tuˈugë jäˈäy wyimbety, ja dyaˈixyëty ko dyajtëgatsy ja jyukyˈäjtën. Pääty, ko nëbajtäˈäyëm, tsojkëp xëmë nwimbajtëm ets kyaj duˈunyëm nˈijtëm.
[Dibujë diˈib mä pajina 17]
9 Ko nwimbajtëm mä Diosë tyuunk mbäät nˈijxkijpxyëm mët tuˈugë mëj kepy. Tuˈugë kepy mbäät jantsy mëj yony ets mas pën jantsy këk ja tyikts yˈääts tpëjtaˈaky. Extëm nˈokpëjtakëm, yëˈë äjë kepy diˈib ijtp Líbano, mbäät yony extëm tuˈugë tëjk diˈib 12 nikëˈëy, tmëdatët jantsy këk ja tyikts yˈääts ets ja tyeky pyikˈatët 12 metrë naxy (Cant. de Cant. 5:15). Tuˈugë kepy jantsy pojënë yony ets ta net myëjwiinë ja tyeky ets kyëktëkë tyikts yˈääts diˈib yajtäˈtspëjkëp parë mëk tyanët. Ëtsäjtëm, nanduˈun nwimbajtëm mä nDiosmëduˈunëm. Mbäät jantsy pojënë nwimbajtëm ko nˈëxpëjktsondakëmë Biiblyë ets nnëbajtëm, axtë nduundëjkëm prekursoor o nyajtuknipëjkëmë wiinkpë tuunk. Ja nmëguˈukˈäjtëm diˈib mä naymyujkën yˈijxtëp ko nwimbajtëm. Ets ko ja tiempë nyaxy, mbäät kyaj nëgoo nyekyˈyaˈixy wiˈix nwimbajtëm. Per tsojkëp xëmë nyajmëjwindëjkëm ja mëbëjkën ets ja ëxpëjkën axtë “najtspadëëyëmëty jaˈa joot winmäˈäny ajkëxy duˈun neby jaˈa Cristo joot winmäˈäny mëdäjtyëny” (Efes. 4:13, Nuevo Testamento de Mazatlán). Pääty ko nwimbajtëm mä nDiosmëduˈunëm, duˈunxyëp extëm nˈakˈyoˈonëm ets nyajkëktëjkëm ja tikts ääts extëm ja kepy.
10. ¿Tiko jyëjpˈamëty ets niˈigyë wyimbajtˈadëˈëtsët axtë diˈib jeky kujk Dios mëdundë?
10 Per tsojkëp nwimbajtˈadëtsëm, pääty, oy ko niˈigyë nˈëxpëjkëm ets nyajkëktëjkëm ja mëbëjkën, duˈunxyëp extëm niˈigyë nyajkëktëjkëm ja tikts ääts mä Diosë yˈAyuk (Prov. 12:3). Duˈun mayë Dios mëduumbë ttundë. Extëm nˈokpëjtakëm, tuˈugë nmëguˈukˈäjtëm diˈib kujk tyuny mëjjäˈäy 30 jëmëjt naxy, tpëjkyë kuentë ko duˈunyëm wyimbajtˈadëˈëtsy. Yëˈë jyënaˈany: “Niˈigyëts tyam nmëjjawë Biiblyë. Xëmëts nbääty mä Biiblyë wiˈixëts mbäät nyajtuny kanäk pëky ja käjpxwijënë etsë anaˈamën. Ets tuˈuk tuˈugë xëë nyaxy, niˈigyëts nyajtsobäätyë Diosë tyuunk”.
YAJKËKTËKË MNAYMYAYË MËDË DIOS
11. ¿Wiˈix mbäät yajxon nˈixyˈäjtëmë Jyobaa?
11 Ko nwimbajtˈadëtsëm, nan yëˈë yˈandijpy nmëwingoˈonëmë Jyobaa extëmë nDeetyˈäjtëm etsë nMëtnaymyaayëbëˈäjtëm. Dios tsyejpy ets njäˈäwëm ko yëˈë xykyupëjkëm, xytsyojkëm ets xykyuwäˈänëm, duˈun extëm tuˈugë mixyuˈunk nyayjawëty ko tyeety tsyeenyëty o duˈun extëm nnayjäˈäwëm ko nyajpatëm mët tuˈugë mëtnaymyaayëbë diˈib kyaj xymyastutëm. Per kyaj mbäät pojënë mëdë Dios nnaymyaaybyëjkëm. Tsojkëbë tiempë nyaxët parë yajxon nˈixyˈäjtëm ets ntsojkëm. Pääty, pëjtäˈägë mwinmäˈäny ets jabom jabom xykyäjpxëdë Biiblyë. Nan käjpxtäˈäyë rebistë Diˈib Xytyukˈawäˈänëm etsë ¡Despertad!, etsë wiinkpë ëxpëjkpajn.
12. ¿Ti mbäät nduˈunëm parë mëk yˈitëdë naymyayë mëdë Jyobaa?
12 Ko nuˈkxtakëm ets nduˈukmujkëm mëdë oybyë mëtnaymyaayëbë, mbäät xypyudëjkëm parë nyajkëktëjkëmë naymyayë mëdë Dios (käjpxë Malaquías 3:16). * Jyobaa tyukˈagoombyë tyatsk pënaty mënuˈkxtakëp (1 Peed. 3:12). Duˈun tmëdooˈityë nuˈkxtakën extëm tuˈugë uˈunkteety diˈib jantsy oyjyaˈay. Päätyë Biiblyë xyˈanmäˈäyëm: “Kyaj xymyastuˈuttët ja mgäjxtakën [o mnuˈkxtakën]” (Rom. 12:12). Kyaj mbäät nnaymyaˈayˈadëtsëm mëdë Dios pën kyaj xypyudëjkëm, ets nan kyaj mbäät njëjpkudijëm tijatyë naxwinyëdë jäˈäy tyuundëp. Perë Jyobaa xypyudëkëyäˈänëm pën nmënuˈkxtakëm. ¿Mdukjotkëdakypy extëmë Jyobaa xymyënuˈkxtaˈaky o mˈijxypy ko tsojkëp mas oy xymyënuˈkxtäˈägët? (Jer. 16:19.)
13. ¿Tiko jyëjpˈamëty nduˈukmujkëm mëdë nmëguˈukˈäjtëm parë nwimbajtˈadëtsëm mä Diosë tyuunk?
13 Jyobaa tsyejpy “pënaty aˈoˈkëdëp”. Pääty, oy të njaˈixyˈäjtëmë Dios, tsojkëp xëmë nëjkxëm mä naymyujkën, pes jap yajpäättë jäˈäy diˈib nanduˈun yˈixyˈäjttëbë Dios (Nah. 1:7). Tyam, të tyuktukyë Naxwinyëdë mëdë axëkˈäjtën, pääty oy ko nduˈukmujkëm mëdë nmëguˈukˈäjtëm. ¿Wiˈix ndukˈoyˈatäˈänëm? Mä naymyujkën nbäädäˈänëmë nmëguˈukˈäjtëm diˈib mbäät xypyudëjkëm parë nyaˈijxëmë tsojkën ets nduˈunëm diˈib oy (Eb. 10:24, 25). Per pën kyaj nyajpatëm mä naymyujkën, kyaj mbäät nbanëjkxëmë apostëlë Pablo kyäjpxwijën. Pääty, oy ko xëmë nëjkxëm mä naymyujkën ets ngomentaräjtëm.
14. ¿Tidën yˈandijpy njodëmbijtëm ets nyajtëgäjtsëmë jukyˈäjtën?
14 Të njodëmbijtëm ets të nyajtëgäjtsëmë jukyˈäjtën parë të ndëjkëm Dios mëduumbë. Per xëmë mbäät njodëmbijtëm ets nyajtëgäjtsëm ja jukyˈäjtën. Ets kom pokyjyaˈay nyajpatëm, mbäät pojënë nduˈundëgoˈoyëm. Duˈun extëm tuˈugë tsäˈäny diˈib ijtp listë parë tsyuˈutsäˈäny, nanduˈunë poky pojënë xyajtëgoyäˈänëm (Rom. 3:9, 10; 6:12-14). Pääty, nˈokˈijxwäˈkxëm yajxon ets nˈokˈijxëm mäjaty ndëgoˈoyëm. Jyobaa xymyëmaˈkxtujkëm mientrës nnayajtëgäjtsëm ets nduˈunëmë mëjää parë njëjpkuwäˈkëm tijaty xyajtëgoyäˈänëm (Filip. 2:12; 2 Peed. 3:9). Oy ko nyajtuˈunëm ja xëë tiempë ets ja meeny sentääbë mä Jyobaa tyuunk, ets kyaj nyajtuˈunëm mä diˈib ëtsäjtëm jeˈeyë ntsojkëm. Tuˈugë toxytyëjk diˈib yaˈk pajt mä tëyˈäjtën wyinmääy ko tsojkëbë nety mëk ttsëˈëgëdë Jyobaa ets ko ninäˈä kyatukjotkëdäˈägëdët. Yëˈë kyaj nyayjäˈäwë wingon mä Jyobaa, ta tyuundëgooy. Yëˈë jyënaˈany: “Kyajts duˈun njäjty mët ko kyajts ntsekyë Jyobaa, yëˈë duˈun mët ko kyajtsë nety yajxon nˈixyˈaty. Per kojëts kanäkˈok njantsy nyuˈkxtaky, ta tukëˈëyë tyëgäjtstääy. Duˈunëts njäˈäwë Jyobaa xywyijtsy extëm tuˈugë mixyuˈunk yajpawitsy, xypyudëjkëts parëts nwinguwäˈkë jotmay, xyjantsy tsyojkëts ets xytyukˈijxëts tits ndunëp”.
15. ¿Ti yˈijxtëbë Jesus mëdë Tyeety?
15 “Awanëdë jäˈäy” ja oybyë ayuk, duˈun ja anklës tˈanmääyë Pedro etsë wiinkpë apostëlë ko yˈawäˈätspëtsëëmdë pujxndëgoty (Apos. 5:19-21). Ko nëjkxëm sëmään sëmään käjpxwäˈkxpë, duˈun ja tuk pëky mbäät nˈijxëm ja listë pën mëk ja mëbëjkën nmëdäjtëm. Jesus mëdë Tyeety yˈijxtëp nuˈunën ja mëbëjkën nmëdäjtëm ets ja tuunk diˈib nduˈunëm (Diˈibʉ Jat. 2:19). Ja nmëguˈukˈäjtëm diˈibë të yˈokˈyajmaytyakpë diˈib tuump mëjjäˈäy, jyënaˈany: “Duˈunën nyajnäjxëm ja jukyˈäjtën, nˈëwäˈkx ngäjpxwäˈkxëm”.
16. ¿Tiko mbäät nbawinmäˈäyëm ko të nnaywyandakëm mä Jyobaa?
16 Pawinmay ko të mnaywyandaˈagyëty mä Jyobaa. Pes diˈib mas niˈigyë nyajtsobatëm, yëˈë ko mëët nnaymyaˈayëm (käjpxë Isaías 44:5). * Ix tun wiˈix myajpääty mëdë Jyobaa, ets mënuˈkxtäˈäk parë mbudëkëdët ets oy mˈitët mët yëˈë. Jamyats näˈä, ti xëë mnëbejty, net kyaj xyjyaˈaytyëgoyët ko yëˈë diˈib mas jëjpˈam të xytyuny mä mjukyˈäjtën.
KO NMADAKËM YËˈË XYAˈIJTËM WINGON MÄ JYOBAA
17. ¿Tiko tsyekyëty nmadakëm parë nˈijtëm wingon mëdë Jyobaa?
17 Ko Pablo tnijäˈäyë ja Dios mëduumbëty diˈib Galacia, ta tˈanmääy ko tsojkëp myadäˈäktët (Gal. 6:9). Tyam, nan tsojkëp nmadakëm. Nbäädäˈänëmë amay jotmay, perë Jyobaa yëˈë xypyudëkëyäˈänëm. Pääty, nˈokˈamdoˈojëmë myëjää parë nnayjäˈäwëm agujk jotkujk oy nyajnäjxëmë amay jotmay (Mat. 7:7-11). Okpawinmayë tyäˈädë: Jyobaa kyuentˈäjtypyë joon jëyujk. Per mijts niˈigyë mtsekyëty, pääty mguentˈatanëp mët ko të xytyukëdëkë mjukyˈäjtën ets mët ko xytsyeky (Mat. 10:29-31). Ets oy ti amay jotmay xypyäädët, ninäˈä mgaˈëxtëkëwäˈägët. ¡Mëjwiin kajaa ndukˈoyˈäjtëm ko Jyobaa xyajnäjxëm extëmë myëtnaymyaayëbë!
18. Ko të xyˈixyˈatyë Dios, ¿ti net mbäät xytyuny?
18 Pääty, pën näämnëm të xyˈixyˈatyë Dios ets të mnëbety, ¿ti net mbäät xytyuny? Ixyˈäjtˈadëˈëtsë Jyobaa, ets wimbajtˈadëˈëts mä ja tëyˈäjtën. ¿Ets pën të nyäjxnë kanäk jëmëjt mä mnëbejty? Nan tsojkëp niˈigyë xyajkëktëkët ets xyajmëjwindëkët ja Jyobaa yˈëxpëjkën. Ix tun yajxon wiˈix mnaymyayëty mëdë Jyobaa. Ix näˈäganäˈäty tijaty të yaˈëxpëky mä tyäˈädë artikulo parë xyˈixët pën oy myajpääty mëdë nDeetyˈäjtëm, Jyobaa Dios, diˈib mëk xytsyojkëm (käjpxë 2 Korintʉ 13:5, 6).
^ parr. 12 Malaquías 3:16: “Mä tadë tiempë, pënatyë nety tsyëˈkëdëbë Jyobaa maytyaktë nixim niyam, niduˈuk niduˈuk mëdë jyamyëët, etsë Jyobaa jyagyujkëˈadëts ets myëdooˈadëts. Ets ta tuˈugë liibrë mä yajkujayë tijaty yajjääytsyondaky wyindum, parë pënatyë nety tsyëˈkëdëbë Jyobaa ets parë pënaty winmäˈäyxyëdëp ja xyëë”.
^ parr. 16 Isaías 44:5: “Tyäˈädë jäˈäy jyënäˈänäˈäny: Yëˈëts xyjaˈäjtpë Jyobaa. Ets [yëˈë këˈëm] naytyukmëgäjpxanëp ja xyëëjë Jacob, ets jatuˈuk tkëxjäˈäyaˈany mä kyëˈë: Yëˈë jyaˈäjtypyë Jyobaa. Ets mët yëˈëgyëjxmë Israelë xyëë jatuˈuk nyayxyëëmooyaˈanyëty”.
