¿JYANTSY tyukxondakë Jesusë jyukyˈäjtën? Extëm nnijäˈäwëm, Jesus yeˈky pyejty mä tuˈugë familyë diˈib ayoop ets kyaj nëgoo tijaty tmëdäjty nuˈun jyukyˈajty yä Naxwiiny, pes jyënany: “Kyajts nmëdaty mäts jeˈeyë ngëbäjk nbëjtäˈägët” (Lukʉs 9:57, 58). Nan ojts yˈaxëkˈixyëtyë myëtsip, nyiwäämbetyëty ets ok, ta yaˈoˈkë.

Mbäät pën jyënaˈany: “Kyajts njënäˈänët ko tyukxondakë jukyˈäjtën”. Per oy ko nnijäˈäwëm wiˈixë Jesus jyukyˈajty. Min nˈokˈijxëm taxk pëky.

“Kots ëj nduny diˈibë tsyejpy pënëts të xykyexy, ujts jotkëdakpëts extëm jyawë ngay nˈiigyëts.” (Fwank 4:34.)

Jesus ojts ttuunë Tyeetyë tsyojkën ets dyajnigëxëˈky mä tijaty tyuun ets mä kyäjpx myaytyakën. * Ets extëm jyënaˈanyë tyäˈädë tekstë, duˈun tjäˈäwë extëmë käˈäy ukën, ujts jotkëdak. Min nˈokˈijxëm näˈä duˈun jyënany.

Kujkxyëë nety ko duˈunë Jesus jyënany (Fwank4:6). Të nety yoˈoy tukkujkxyëë mä ja tun kopk diˈib Samaria ets yuˈoˈkëbë nety. Ja yˈëxpëjkpëty të nety mëktaˈaky yˈanëˈëmxëdë: “Yaˈëxpëjkpë, kay” (Fwank 4:31). Ko Jesus ojts tˈijxkijpxyë ja Diosë tyuunk mëdë käˈäy ukën, yëˈë yajnigëxëˈk ko yaˈujts yajjotkëdakë ets mëjämooyë ko ttuuny diˈibë Dios tuknipëjkë. Wiˈix xyˈokˈixy, ¿këdii kyaj nanëgoobë jyukyˈajty?

“Ëj ja nDeetyëts ntsejpyëts.” (Fwank 14:31.)

Jesus jantsy oy yˈijty mëdë Tyeety jam tsäjpotm. Pääty ojts tnimaytyaˈagyë Diosë xyëë, wiˈix jyaˈayˈaty ets tijaty tyuknibëjtakëp. Yajxon dyajnigëxëˈky wiˈixë Tyeety jyaˈayˈaty, mët yëˈëgyëjxmë yˈää yˈayuk, jyaˈayˈäjtën ets tijaty tyuun, pääty ko ngäjpxëm mä yajnimaytyaˈagyë Jesus, ta yajxon nˈixyˈäjtëmë Tyeety. Ko Felipe yˈanmääyë: “Wintsën, tukˈijxtëgëts ja Dios Teety”, ta Jesus yˈatsooy: “Diˈibëts ëj xyˈixyˈäjtp, yˈixyˈajtypy nandëˈën ja Dios Teety” (Fwank 14:8, 9).

Jesus mëk ttsejkyë Tyeety, pääty myëmëdoo axtë ko yˈoˈky (Filipʉs 2:7, 8; 1 Fwank 5:3). Tyukxondakë jyukyˈäjtën mët ko ttsejkyë Dios.

“Diˈibë kyuˈoogëp ja myëtnaymyaayëbëty, yëˈë dëˈën yaˈijxëp ko [mëj] ja tsojkën tmëdaty.” (Fwank 15:13.)

Kyaj oy wyimbëtsëmy tijaty njatuknibëjtakëm mët ko ak pokyjyaˈay nyajpatëm. Biiblyë jyënaˈany: “Tuˈuk jeˈeyë ja jäˈäy kyaj tmëmëdooy ja Dios es mëdë tyäˈädë pojpëkyëjxm tsyondaky ja oˈkën, pääty nidëgekyë ja jäˈäyëty yˈooktë, mët ko nidëgekyë pyojpëtuundë” (Romanʉs 5:12). Tsip nˈawäˈätspëtsëˈëmëm mä oˈkën mët ko nbokyjyaˈayˈäjtëm (Romanʉs 6:23).

Mët ko Jyobaa xytsyojkëm, ta ttukniwinmäˈäyë xyaˈˈawäˈätspëtsëmäˈänëm. Ojts tnasˈixë parë yˈUˈunk, Jesus, diˈib wäˈätsjäˈäy yˈayowët ets yˈoogët. Duˈuntsoo ojts xyaˈˈawäˈätspëtsëˈëmëm mä poky etsë oˈkën. Mët ko Jesus ttsekyë Tyeety etsë naxwinyëdë jäˈäy, ttuuny xondaˈakyˈää xondaˈakyjyot tijaty yajtuknipëjk ets tkëyajkyë jyukyˈäjtënë wäˈätspë ëtsäjtëmgyëjxm (Romanʉs 5:6-8). Pääty nyayjäˈäwë agujk jotkujk mët ko tmëdäjtyë tsojkën. *

“Tyäˈädëtsë dëˈën ja nˈUˈungëts diˈibëts njantsy tsyejpy, diˈibëts mëët njotkujkˈaty.” (Matewʉ 3:17.)

Tyäˈädë ää ayuk yëˈë kyäjpxë Jyobaa jam tsäjpotm ko Jesus nyëbejty. Duˈun dyajnigëxëˈky ko tsyejpyë yˈUˈunk ets kyupëjkypy, päätyë Jesus yˈijty seguurë ko jyënany: “Dios, yëˈë nDeetyëts, xytsyojkpëts” (Fwank 10:17). Kom nyijäˈäwëbë nety ko Tyeety tsojkëp ets kupëjkëp, yëˈë pudëjkë parë amëk jotmëk twinguwäˈkë ko yˈaxëktuunë ja myëtsip ets yˈëbat kyäjpxpatë, ets nan yëˈë pudëjkë parë twinguwäˈkë oˈkën (Fwank 10:18). Tyukxondakë jyukyˈäjtën mët ko nyijäˈäwëbë nety ko tsojkëbë Tyeety ets ko kupëjkëp.

Duˈunë duˈun, Jesus kyaj nanëgoobë jyukyˈajty. Ets ëtsäjtëm, mbäät nbanëjkxëmë yˈijxpajtën. Mä ja tuˈukpë artikulo nnijawëyäˈänëm kanäk pëkyë käjpxwijënë diˈib myooyë yˈëxpëjkpëty parë kyaj tjawëdët ko nanëgoobë jyukyˈattë.