1, 2. ¿Ti nyijawëyandë ja Jesusë yˈëxpëjkpëty diˈibë nety të yajnaskäjpxë, ets tiko?

JESUS të nety tmaytyaˈaky ko ja templë kyutëgoyaˈany, pääty jyotmaytyuunëdë Pedro, Santiago, Juan mëdë Andrés (Mar. 13:1-4). Ets ko yajpattë ak yëˈëjëty mëdë Jesus, ta dyajtëëwdë: “Njanijawëyandëpts näˈä dëˈënë tyäˈädë diˈibë tunan jatanëp es ti ijxwëˈëmënë jäˈäy myëdattëp ko tyäˈädë tëgekyë dëˈën tyunäˈäny jyatäˈänyëty” (Mat. 24:1-3). Jesus kyaj yëˈëyë ttukmëtmaytyaky tijatyë nety tunan jatanëp ko ja Jerusalén käjpn kyutëgoyët, nanduˈun ttukmëtmaytyaky tijatyë nety tunan jatanëp mä ja tiempë jyëjpkëxanë mä Satanás yˈaneˈemy. Ko tmaytyaktääy ja ayoˈon jotmay extëmë tsip, yuu ets ko myëjwindëkëyaˈanyë axëkˈäjtën, ta Jesus ojts tnaskäjpxë ko mä nety ja tiempë jyëjpkëxanë tyunäˈäny jyatäˈänyëty diˈib oy, jyënany: “Tyäˈädë oybyë ayuk diˈibë nyimaytyakypy ja tsäjpotmëdë kutujkën yajkäjxwäˈxäämp es yajknijawët mä tëgekyë naxwinyëdë” (Mat. 24:7-14).

² Jesus mëdë yˈëxpëjkpëty, të nety tkäjpxwäˈkxtë “ja oybyë ayuk diˈibë nyigajxypy ja Diosë kyutujkën” (Luk. 8:1; 9:1, 2). Pääty, waˈan tjamyajtstë ko jyënany: “May ja jäˈäy [...] extëm ja triigë tëëm diˈibë yajpëjkmujkp, per waanë ja tuumbë. Pääty amdowdë ja Kugam es tkaxët ja tuumbë” (Luk. 10:2). Per ¿wiˈixën mbäät kyäjpxwäˈkxtë mä “tëgekyë naxwinyëdë” ets yajtuknijawët niˈamukë jäˈäy? ¿Mä tsyoonët ja tuumbë? Waˈanxyëp tjaygyujkëdë koxyëp tˈijxtë wiˈix yˈadëyë Matewʉ 24:14.

3. ¿Wiˈix tyam yˈadëyë Lukʉs 21:34, ets tijaty mbäät nnayajtëˈëwëm?

³ Tyam ta yˈadëy diˈibë Jesus ojts tnaskäjpxë. Pes miyonkˈamë yetyëjk toxytyëjk tkäjpxwäˈkxtë oybyë ayuk abëtsemy nyaxwinyëdë (Is. 60:22). Jesus nan ojts jyënaˈany ko mä ja tiempë  jyëjpkëxanë, näägë Dios mëduumbë tsiptäˈäganëp tpëjtäˈägët aduˈugë jyot wyinmäˈäny mä yajkäjpxwaˈkxy ja oybyë ayuk, o ja tuk pëky njënäˈänëm, yëˈëyë myëmayan myëdäjandëp diˈib yä naxwiiny (käjpxë Lukʉs 21:34). Tyam ta yˈadëy, näägë nmëguˈukˈäjtëm kyaj tnekypyëjtäˈäktë jëjpˈamë Diosë tyuunk, ets ja dyajnigëxëˈëktë ko niˈigyë jëjpˈam tpëjtäˈäktë tyuunk yˈayoˈon, ko niˈigyë yˈaktimˈëxpëktë kanäk jëmëjt, ko tmëdatäˈändë tijaty mëjwiin kajaa ets ko niˈigyë tiempë dyajnaxtë mä ëyëˈk kuyäjtk o mä tijaty ttukxondäˈäktë. Ets nääk, yëˈëyë myëˈanuˈkxëdëp ko tmëmay tmëdäjtë tijaty nyijukyˈattëp tuˈuk tuˈugë xëë. Pääty oy ko nnayajtëˈëwëm: “¿Tijëts tyam nduumpy? ¿Nbëjtakypyëts jëjpˈamë Diosë tyuunk mäjëtsë njukyˈäjtën?”.

4. 1) ¿Ti Pablo yˈamdoo ko tninuˈkxtakë myëguˈuktëjk diˈib Filipos, ets tiko? 2) ¿Ti nnijawëyäˈänëm mä tyäˈädë artikulo ets mä ja tuˈukpë, ets wiˈix xypyudëkëyäˈänëm?

⁴ Mä primer siiglë, tamë nety mayë Dios mëduumbë diˈib ojts “xyondäˈäktë es tkäjxwäˈxtë ja Diosë yˈayuk” amëk jotmëk, duˈun extëmë Pablo (Filip. 1:12-14). Per tsojkëbë nety tˈaktundëdë mëjää parë tpëjtäˈäktët jëjpˈamë Diosë jyaˈa. Päätyë Pablo ojts tninuˈkxtäägë ja myëguˈuktëjk diˈib Filipos parë tˈixtët diˈibë duˈun “oy [o jëjpˈam]” (käjpxë Filipʉs 1:9-11). Nanduˈun tyam, mayë nmëguˈukˈäjtëm amëk jotmëk tˈëwäˈkx tkäjpxwäˈkxtë Diosë yˈAyuk. Tijaty tyamë Jyobaa kyäjpn tyuumpy, mbäät xypyudëjkëm parë mas niˈigyë nˈëwäˈkx ngäjpxwäˈkxëm. Tyäˈädë artikulo yëˈë xypyudëkëyäˈänëm ets nnijäˈäwëm tijatyë Jyobaa tyuumpy parë yˈadëwët diˈib ojts yajnaskäjpxë mä Matewʉ 24:14. ¿Tiko Jyobaa dyajjaˈˈatyë kyäjpn, ets wiˈix xymyëjämoˈoyëm mëdë familyë? Mä ja tuˈukpë artikulo nˈixäˈänëm ti mbäät xypyudëjkëm parë nmadakëm mä nDiosmëduˈunëm ets nbanëjkxëm extëm nyijkxyë Jyobaa kyäjpn.

5, 6. 1) ¿Tiko Jyobaa tnasˈijxë parë yaˈixyˈatët yajxonë kyäjpn diˈib myëdäjtypy tsäjpotm? 2) ¿Ti diˈibë Ezequiel yˈijx?

⁵ Ta kanäk pëky diˈibë Jyobaa kyaj dyajkujäˈäyë mä Biiblyë. Extëm nˈokpëjtakëm, oyxyëp ko yajkujäˈäyë wiˈixë kukoˈoxy tyuny o wiˈix tukëˈëyë yˈixëty tijaty ojts dyajkojy. Per kyaj duˈun ttuuny, yëˈë yajkujäˈäyë ti mbäät xypyudëjkëm parë njaygyujkëm tijaty tyuknibëjtakëp ets njukyˈäjtëm extëm yëˈë ttseky (2 Tim. 3:16, 17). ¡Jantsy oy ko Biiblyë xytyuknijäˈäwëm wiˈix yˈixëtyë Jyobaa kyäjpn diˈib tsäjpotm! Njantsy kyäjpxäˈänëmë Ezequiel, Daniel etsë Juan mä yajkujäˈäyë wiˈix yˈityë Diosë kyäjpn jam tsäjpotm (Is. 6:1-4; Ezeq. 1:4-14, 22-24; Dan. 7:9-14; Diˈibʉ Jat. 4:1-11). Duˈunxyëp extëmë Jyobaa tˈawijtstuˈutyë kortinë parë nˈijxëm tijaty jam tsäjpotm. ¿Tiko Jyobaa dyajkujäˈäyë mä Biiblyë?

⁶ Jyobaa tsyejpy ets xëmë njamyajtsëm ko yëˈë ndukˈijtëmë kyäjpn. Mëk tyunyë tyäˈädë käjpn parë yajkuytyuny ti Jyobaa tsyejpy. Extëm nˈokpëjtakëm, ja kugajpxy Ezequiel ojts tˈixyë Jyobaa kyäjpn diˈib duˈun extëm tuˈugë mëj karrë diˈib myëdäjtypyë ryueedë jam tsäjpotm. Tyäˈädë karrë mbäädë nety jantsy jotëgoy yoˈoy ets pojënë dyajtëgatsy mätsoo nyëjkxäˈäny (Ezeq. 1:15-21). Ko tuˈuk yˈawdityë ryueedë, kajaa ttukˈyoˈoy. Ezequiel nan yˈijx ja diˈib yajˈyeˈebyë tyäˈädë karrë, tkujäˈäyë: “Tajëts nˈijxy extëm ti jyantsy tyëˈkxy,  extëmë jëën tmëdaty naˈˈawdity [...]. Yëˈë nety këxëˈkpë Jyobaa myëjˈäjtën” (Ezeq. 1:25-28). Ja kugajpxy duˈunyë ojts tyim wëˈëmë, monyˈijx monyjäˈäwë. Yajxon tˈijxy wiˈixë Jyobaa dyajtuˈuyoˈoyë kyäjpn mët yëˈëgyëjxmë yˈespiritë santë. Extëm yaˈijxyë tyäˈädë karrë, yëˈë xytyukˈijxëm wiˈix tyamë Jyobaa kyäjpn tyuny.

7. ¿Wiˈix dyajkëktëkë mëbëjkën ko nnijäˈäwëm diˈibë Daniel yˈijx?

⁷ Daniel, nan yˈijx kanäk pëky diˈib yajkëktëjkëbë mëbëjkën. Yˈijxë Jyobaa, ja “Mëjjäˈäy diˈib kanäk Xëë”, yˈuˈunyë mä yajkutuky ets ja yˈunyaaybyajn ak jënˈyaˈank ets tmëdatyë ryueedë (Dan. 7:9). Jyobaa yëˈë tyukˈixanë Daniel ko kyäjpn yuˈkxtëëp parë tkuytyuny ti yëˈë të ttuknibëjtäägë. Daniel nan yˈijxë Jesus “extëm tuˈugë naxwinyëdë jäˈäyë yˈuˈunk”, diˈib yajtuknipëjkp parë tˈixëdë Jyobaa kyäjpn diˈib myëdäjtypy yä Naxwiiny. Jesusë yˈanaˈamën kyaj jeˈeyë jyeky tuk jëmëjt majtsk jëmëjt, pes “yëˈë tuˈugë anaˈamën diˈib itäämp winë xëë winë tiempë diˈib kyaj nyaxäˈäny, etsë yˈanaˈamën kyaj kyutëgoyaˈany” (Dan. 7:13, 14). ¿Këdii xypyudëjkëm parë niˈigyë Jyobaa ndukˈijxpajtëm ets nyajtsobatëm tijaty tyuumpy? Jyobaa myooyë “anaˈamdakn, mëjˈäjtën etsë kutujkën” ja yˈUˈunk diˈib ninäˈä kyamëdëgooyë ko yaˈijxmäjtsy. Tyäˈädë yëˈë yajnigëxëˈkypy ko Jyobaa tyukjotkujkˈäjtypyë yˈUˈunk, ëtsäjtëm nan tsojkëp ndukˈijxpajtëmë Jesus diˈib nWintsënˈäjtëm.

8. ¿Wiˈix nyayjäˈäwë Ezequiel etsë Isaías ko tijatyë yajtukˈijxtë, ets wiˈix mbäät nnayjäˈäwëm?

⁸ Ko nnijäˈäwëm wiˈix yˈixëtyë Jyobaa  kyäjpn diˈib tsäjpotm, ¿wiˈix xyajnayjäˈäwëm? Duˈun extëmë Ezequiel, xyajmonyˈijx xyajmonyjäˈäwëm ko njaygyujkëm ti Jyobaa tyuumpy (Ezeq. 1:28). Ko nwinmäˈäyëm wiˈixë Jyobaa kyäjpn yˈixëty, yëˈë xypyudëjkëm parë niˈigyë nmëduˈunëm, duˈun extëmë Isaías. Ko tmëdooy yajtukmëtmaytyäˈägäˈänyë jäˈäy tijatyë Jyobaa tyuumpy, ta yëˈë nyayˈawäˈänë (käjpxë Isaías 6:5, 8). * Ijt seguurë ko mbäädë netyë Jyobaa pyudëkëty oy ti jotmay tpäädët. ¡Xyjotkujkmoˈoyëm nanduˈun ko ninäˈä kyawäˈkˈawë Jyobaa kyäjpn diˈib tsäjpotm ets ko kyuytyunaampy tijaty tyuknibëjtakëp!

9, 10. ¿Tiko jyëjpˈamëty tmëdatëdë Jyobaa kyäjpn yä Naxwiiny?

⁹ Mët yëˈëgyëjxmë Jesus, Jyobaa të dyajnaxkëdaˈagyë kyäjpn yä Naxwiiny diˈib tuunmujkp mët diˈib tsäjpotm. ¿Tiko nety tsyekyëty ets jyaˈˈatëdë Jyobaa kyäjpn parë yˈadëwëdë Matewʉ 24:14? Min nˈokˈijxëm tëgëk pëky.

¹⁰ Tuk pëky, yëˈë ko Jesus ojts tnigajpxy ko ja yˈëxpëjkpëty kyäjpxwäˈkxäˈändë mä “tëgekyë naxwinyëdë” (Apos. 1:8). Myëmajtsk pëky, tsojkëbë nety yˈitët tukniwits tukniwääbë parë dyajwäˈkxtët ja ëxpëjkën diˈib mä Biiblyë ets yajmëjämoˈoytyët pënaty ëwäˈkx käjpxwäˈkxtëp (Fwank 21:15-17). Ets myëdëgëëk, tsojkëbë nety tyuˈukmuktët parë tˈawdattëdë Jyobaa ets yajtukniˈˈixëdët wiˈix yˈëwäˈkx kyäjpxwäˈkxtët (Eb. 10:24, 25). Parë duˈun yajtunët, tsojkëbë nety ja tuunk yˈittët tukniwits tukniwääbë.

11. ¿Wiˈix mbäädë Jyobaa kyäjpn nbudëjkëm?

¹¹ ¿Wiˈix mbäät nbudëjkëmë Jyobaa kyäjpn? Ko ndukˈijxpajtëmë nmëguˈukˈäjtëm diˈibë Jyobaa mëdë Jesus të ttuknipëktë parë xynyëˈëmoˈoy xytyuˈumoˈoyëm mä nˈëwäˈkx ngäjpxwäˈkxëm. Tyäˈädë nmëguˈukˈäjtëm, mbäätxyëp tijaty tjatundë yä naxwiiny. ¿Per mä dyajtundë jyot wyinmäˈäny?

12, 13. ¿Wiˈix tkuytyundë tijaty nyikëjxmˈäjttëbë mëjjäˈäytyëjk diˈib yˈijxtëp wiˈix tyuˈuyoˈoyë tuunk mä ngäjpxwäˈkxëm, ets wiˈix mmëjämoˈoyëty?

¹² Mä tuˈuk tuˈugë paˈis, të yajwinˈixtë mëjjäˈäytyëjk diˈib jeky kujk tyuunëdë ets të yajtuknipëktë parë tˈixtët wiˈix tyuˈuyoˈoyë tuunk mä ngäjpxwäˈkxëm. Ets ko ti ttunäˈändë, ta tˈëxtäˈäytyë naybyudëkë mä Biiblyë, pes duˈun tˈixtë extëm “tuˈugë lamprë” parë tyeky ets tuˈugë tëˈkx jäjjën parë nyëˈë tyuˈu (Sal. 119:105). Nanduˈun tmënuˈkxtäˈäktë amumduˈukjotë Jyobaa parë nyëˈëmoˈoy tyuˈumoˈoyëdët (Mat. 7:7, 8).

¹³ Duˈun extëm ja mëjjäˈäytyëjk diˈib mä primer siiglë, nanduˈun tyamë mëjjäˈäytyëjk diˈib yˈijxtëp wiˈix tyuˈuyoˈoyë tuunk mä ngäjpxwäˈkxëm, jëjpˈam tpëjtäˈäktë “ja Diosë yˈëxpëjkën” (Apos. 6:4). Ets agujk jotkujk nyayjawëdë ko tˈixtë wiˈix myëjwindëkë Diosë tyuunk, duˈun mä pyaˈis ets duˈun abëtsemy nyaxwinyëdë (Apos. 21:19, 20). Ko tijaty ttundë parë niˈigyë Diosë yˈayuk yajkäjpxwäˈkxët, jawyiin tˈixtë wiˈix jyënaˈanyë Biiblyë ets wiˈixë Diosë  myëjää tyuˈumoˈoyëdë, kyaj jeˈeyë dyajnaxkëdäˈäktë kanäägë anaˈamën (käjpxë Apostʉlʉty 15:28). Duˈun dyaktë oybyë ijxpajtën mäjatyë naymyujkën (Éfes. 4:11, 12).

14, 15. 1) ¿Tijaty tyam yajtuump parë yajkäjpxwaˈkxyë oybyë ayuk abëtsemy nyaxwinyëdë? 2) ¿Wiˈix mnayjawëty ko mduny mä yajkäjpxwaˈkxyë oybyë ayuk?

¹⁴ Mayë nmëguˈukˈäjtëm jyantsy tyundë jabom jabom parë dyajpëtsëmdë ëxpëjkpajn, ets dyaˈoyëdë tijaty naxäämp mä naymyujkën ets mä asamblee. Extëm nˈokpëjtakëm, milˈamë nmëguˈukˈäjtëm mëk tyundë parë tkäjpxnäjxtë ëxpëjkpajtën. Ja yajkäjpxnaxy, 600 ayuk naxy parë jäˈäy tnijawëdët mä kyëˈëm ayuk “ja mëjˈäjtën diˈibë Dios tyiimpy” (Apos. 2:7-11). Mayë ënäˈktëjk tyundë, yetyëjk, toxytyëjk mä ja makinë diˈib jantsy peˈtypy tuump ets mä diˈib pyëjtakypyë liibrë niˈak parë dyajpëtsëmdë ëxpëjkpajn. Ok, ta yajkexy axtë jagambäät.

¹⁵ Mientrës ëtsäjtëm aduˈuk ngäjpxwäˈkxëmë oybyë ayuk mä ja nlugäärˈäjtëm, ta milˈamë nmëguˈukˈäjtëm diˈib tuundëp mä yajkojˈyë Tëjk mä nˈëxpëjkëm ets mä tyunyëtyë asamblee, nan taa diˈib tuundëp ko tijaty yˈayoˈonbëjtaˈaky o ko pën ttsekyë naybyudëkë mä doktoor. Nan ta diˈib tyukniwijtsëdëbë asamblee ets parë jyaˈˈatët kanäägë eskuelë mä Diosë kyäjpn. Mbäät kyaj nbëjkëmë kuentë tijaty tyuundëbë nmëguˈukˈäjtëm. Per ¿tiko duˈun tyundë? Yëˈë parë myëjwindëkët mä yajkäjpxwaˈkxy ja oybyë ayuk, parë wyimbattët ja nmëguˈukˈäjtëm mä ja tëyˈäjtën ets parë niˈigyë jäˈäy yajpudëkët ets tˈawdattëdë Jyobaa. Duˈunë duˈun, ¡Jyobaa kyäjpn diˈib yä naxwiiny yëˈë pyëjtakypy jawyiin diˈib mas jëjpˈam!

16. ¿Ti mbäät nduˈunëm ko nDiosˈawdäjtëm mëdë familyë o ko naytyuˈuk nˈëxpëjkëm?

¹⁶ ¿Njuˈtëmë tiempë näˈä ganäˈäty parë nbawinmäˈäyëm tijaty tyuumbyë Jyobaa kyäjpn? Näägë nmëguˈukˈäjtëm ja tpawinmaytyë ets tpayoˈoytyë ko Diosˈawdattë mëdë fyamilyë o ko naytyuˈuk yˈëxpëktë. Jantsy oy ko nˈëxpëjkëm tijaty yˈijxë Isaías, Ezequiel, Daniel etsë Juan. Diˈib mbäät xypyudëjkëm parë niˈigyë nˈixyˈäjtëmë Jyobaa kyäjpn, yëˈë extëmë liibrë Los testigos de Jehová, proclamadores del Reino de Dios, bideo o wiinkpë ëxpëjkpajn diˈib jaˈäjtp mä nˈayukˈäjtëm.

17, 18. 1) ¿Wiˈix të mbudëkëtyë tyäˈädë artikulo? 2) ¿Tijaty mbäät nnayajtëˈëwëm?

¹⁷ Ndukˈoyˈäjtëm ko nbawinmäˈäyëm tijaty tyamë Jyobaa tyuumpy mët yëˈëgyëjxmë kyäjpn. Nˈokpëjtakëmë jot winmäˈäny mä diˈib mas jëjpˈam, duˈun extëmë Jyobaa kyäjpn ttuny. Duˈuntsoo nbanëjkxëmë Pablo yˈijxpajtën diˈib kyujäˈäyë: “Pääty ni näˈäts ngatsipkeˈexy, mët ko Diosëts të xytyuknipeky mët ja pyaˈˈayoˈonë tyäˈädë tuunk” (2 Kor. 4:1). Pablo jyotmëkmooyë myëguˈuktëjk mëdë tyäˈädë ää ayuk: “Kyaj nmëˈanuˈxëm es nduˈunëm ja oybyë; mët ko pyäädëp ja tiempë mä Dios xymyayˈäjtëm” (Gal. 6:9).

¹⁸ ¿Mbäät mijts mëdë mfamilyë xytyukniwitsë tijaty parë xytyunët diˈib mas jëjpˈam? ¿Mbäät mas adëyë mjukyˈaty parë niˈigyë mˈëwäˈkx mgäjpxwäˈkxët? Mä ja tuˈukpë artikulo, mëgoxk pëky nˈixäˈänëm tijaty mbäät xypyudëjkëm parë nbanëjkxëm extëm nyijkxyë Jyobaa kyäjpn.