DIˈIB MIIMP MÄ NYIˈAK: ¿MËK AXËKJÄˈÄYË DIOS?
¿Tiko jäˈäy jyënäˈändë ko Dios mëk axëkjäˈäy?
TA JÄˈÄY diˈib winmääytyëp ko Dios kyaj yˈaxëkjäˈäyëty, per ta diˈib jënandëp ko axëkjäˈäy.
Näägë jäˈäy diˈib të tsyokwëˈëmdë ko tijaty yˈayoˈonbëjtaˈaky, nyayajtëwëdë: “¿Tiko Dios tnasˈixë ets duˈun tyun jyatëdët? ¿Yëˈëdaa ko kyaj xytyuˈunëmë kuentë? ¿Waˈandaa yˈaxëkjäˈäyëty?”.
Ets nääk kyaj tˈoymyëdowdë ko tkäjpxtë mä Biiblyë tijatyë Dios tyuun extëm ko tmaytyaˈaky ja Ayoˈonduu mä Noé jyukyˈajty. Ta nyayajtëwëdë: “Pënë Dios jantsy tsojkp, ¿tiko mayë jäˈäy ojts dyaˈooky? ¿Waˈandaa ko yˈaxëkjäˈäyëty?”.
¿Të mijts duˈun mˈoknayajtëëwëbë? ¿Mbäät xyˈatsoojëmbity pënaty nayajtëëwëdëp pënë Dios axëkjäˈäy? Min nˈokˈijxëm diˈib mbäät xypyudëjkëm.
¿TIKO AXËËK XYAJNAYJÄˈÄWËMË AXËKJÄˈÄY?
Yëˈko ëtsäjtëm nnijäˈäwëm ti oy ets ti axëëk, kyaj nduˈunˈäjtëm extëmë jëyujk animal, pesë Dios ojts xyajkojëm “extëm yëˈë yˈixëty” (Génesis 1:27). ¿Ti tyäˈädë yˈandijpy? Ko mbäät njäˈäyˈäjtëm extëmë Dios, nyajnigëxëˈkëmë yˈanaˈamën ets nnijäˈäwëm ti oy ets ti axëëk. Pën ëtsäjtëm, axëëk xyajnayjäˈäwëmë axëkjäˈäyëty, pes mas niˈigyë Dios.
Etsë tyäˈädë tëyˈäjtëndëjkëp ko nˈijxëm extëmë Dios nyaynyigajpxyëty mä Biiblyë: “Nëˈë nduˈujëts mas niˈigyë kyëjxmëty ets kyaj dyuˈunëty miitsëtyë mnëˈë mduˈu, etsë njot nwinmäˈänyëts kyaj dyuˈunëty extëmë mjot mwinmäˈänyëty” (Isaías 55:9). Pën jënäˈänëm ko Dios axëkjäˈäy, yëˈë nety njëjpkugäjpxëmë tyäˈädë ää ayuk, duˈunxyëp extëm njënäˈänëm ko nëˈëˈäjt nduˈunˈäjtëm mas niˈigyë kyëjxmëty ets kyaj dyuˈunëtyë Diosë nyëˈë tyuˈu. Per oy ko niˈigyë nˈaknijäˈäwëm mä duˈun ngawinmäˈäyëm. Ets kyaj jeˈeyë nnayajtëˈëwëm pënë Dios axëkjäˈäy, nik oy ko nnayajtëˈëwëm tiko näˈäty kyëxëˈëky ko axëëk tijaty tyuumpy. Min jawyiin nˈokˈijxëm pënën yajtijp axëkjäˈäy.
Ko näˈäty njënäˈänëm ko tuˈugë jäˈäy axëkjäˈäy, yëˈë duˈun ko këˈëm duˈun nwinmäˈäygyojëm. Tuˈugë axëkjäˈäy, yëˈë diˈib kyaj tpaˈˈayoy ja diˈib axëëk jäjt këbajtp ets tyukxondakypy ko pën yˈayoy. Extëm nˈokpëjtakëm, ko tuˈugë uˈunkteety tjëjwijtsëmbityë yˈuˈunk parë axëëk dyajnayjawëyaˈanyëty, axëkjäˈäyë nety. Per oyjyaˈayë nety pën jyëjwijtsëmbijtypy parë tkuentˈatäˈäny o ttukjaygyukëyaˈany. Näˈäty mbäät tëgatsy nwinmäˈäygyojëm tiko duˈunë jäˈäy tijaty ttuny ets mbäädë tyäˈädë njaygyujkëm pën të duˈun njäjtëm.
Min nˈokˈijxëm diˈib majtsk pëky të yajnigajpxy tiko näägë jäˈäy wyinmaytyë ko Dios axëkjäˈäy: ko tijaty yˈayoˈonbëjtaˈaky ets ko Dios ttukumëdooyë jäˈäy diˈibë Biiblyë myaytyakypy. Per ¿jadaa ti diˈibë Dios yajnigëxëˈkëp ko axëkjäˈäy?
