¿Të näˈä pën axëëk mdunyëty mët ko tëgatsy mˈixëty? ¿Të myaˈˈanëëmë ko kyaj myajmoˈoyaˈany diˈib mjaˈˈamdoopy o kyaj ti myajtukmëdunäˈäny mët ko wiink koloor mˈixëty, wiink lugäär mtsoony o mët ko kyaj nëgoo ti xymyëdaty xyjaygyepy? Pën të duˈun mjaty, mbäät mjotkujkmoˈoyëty ko Dios kyaj duˈun xytyuˈunëm, yëˈë duˈun adëtspë naxwinyëdë jäˈäy. Apostëlë Pedro jyënany: “Dios nidëgekyë jäˈäy ttsojktäˈäy”. (Käjpxë Apostʉlʉty 10:34, 35.)

Ko duˈunë Pedro jyënany jamë nety yajpääty mä Cornelio tyëjk, diˈib kyaj jyudiyëty. Perë Pedro judiyë nety. Mä tadë tiempë, ja judiyëty, kyaj ijty tkupëktë ja diˈib kyaj jyudiyëty ets kyaj tˈixtë wäˈäts. Per ¿tiko nety japë Pedro yajpääty? Yëˈko duˈunë netyë Jyobaa të tyukˈaneˈemyëty, të nety yajtukˈixy ets yaˈˈanëëmë: “Diˈibë Dios të dyajwäˈätsy, katë mij xyˈandijy diˈibë yaˈˈaxëˈkëp o yajpekykyäˈäp”. Pedro kyaj nety tnijawë ko ëxëˈëyëbë netyë Cornelio yˈanëˈëmxëty tuˈugë anklës parë yajnigaxët (Apostʉlʉty 10:1-15). Apostëlë Pedro jyaygyujkë ko Diosë nety të yˈawoomukëdë.

Pedro jyënany: “Tyamëts njaygyukë ko tëyˈäjtën ja Dios nidëgekyë jäˈäy ttsojktäˈäy” (Apostʉlʉty 10:34). Diˈib të yajkäjpxnaxy mä ayuk grieegë, “nidëgekyë jäˈäy ttsojktäˈäy”, tuˈugë jäˈäy diˈib yˈëxpëjkpëtsëëmbyë Biiblyë duˈun tnimaytyaˈaky: “Yëˈë myaytyaˈagaampy tuˈugë fes diˈib jeˈeyë jäˈäy twinˈijxpety ets extëm tˈixy, ta net ttuknikäjpxpety nuˈun tkumëdowäˈäny ti të ttuny. Diˈib jeˈeyë yˈijxypy, yëˈë pën tyukjotkëdakypy ja jäˈäy, ets kyaj jawyiin tpayoˈoy ti të ttuny”. Perë Dios kyaj dyuˈunëty, yëˈë kyaj pënë ryasë dyajnäjxë mëj, o pyaˈis, kyaj jeˈeyë tˈixyë jäˈäy nikëjxy këbajky o pën mëkjäˈäy o ayoobë jäˈäy.

Jyobaa yëˈë yˈijxypyë jot korasoon (1 Samuel 16:7; Proverbios 21:2). Apostëlë Pedro jyënany: “Es tkupëjktäˈäy oytyim pën jäˈäyëty diˈibë wintsëˈkëdëp es [myëdunyëty]” (Apostʉlʉty 10:35). Ko nwintsëˈkëmë Dios, yëˈë yˈandijpy ko ntsëˈkëm ets ndukˈijxpajtëm, duˈun njëjpkudijëm tijaty yˈaxëkˈijxypy. Ets ko nmëduˈunëmë Dios, yëˈë yˈandijpy ko nduˈunëm amumduˈukjot diˈib yˈoyˈijxypy. Dios kyupëjkypyë jäˈäy diˈib tyuumbyë oyˈäjtën mët ko myëjˈixyëty ets wyintsëˈëgëty (Deuteronomio 10:12, 13).

Pën të näˈä axëëgë jäˈäy myajnayjawëty o axëëk të mdunyëty, mjotkujkmoˈoyëdëbë yˈää yˈayukë apostëlë Pedro ko Jyobaa myëjwoobyë jäˈäy oy mä tsyoonët (Fwank 6:44; Apostʉlʉty 17:26, 27). Jyobaa myëdooˈijtypy ets yˈatsoojëmbijtypyë nyuˈkxtakën pënaty awdäjtëp, oy mä tsyoonët, oy wiˈix yˈixˈatët, oy myëkjäˈäyˈatët ets oy yˈayowët (1 Reyes 8:41-43). Mbäät nˈijtëm seguurë ko Dios jeˈeyë tuˈugë rasë tˈixy desde tsäjpotm: yëˈë ryasë naxwinyëdë jäˈäy. ¿Kyaj mijts xynyijawëyaˈany mas niˈigyë mä tyäˈädë Dios diˈib kyupëjktaapy oytyim pënëty?