Ángela, * tuˈugë nmëguˈukˈäjtëm diˈib naytyuˈuk ets 30 naxyë jyëmëjt, naa tsëˈkëp wanaty, yëˈko tˈawixyë mëjjäˈäytyëjk diˈib mä naymyujkën ets nyayajtëyëty tidaa tukmëtmaytyäˈäganëp. Të tyëgoyˈaty tëgok majtskˈok mä naymyujkën, yëˈko jantsy anuˈkxë jyaˈty mä tyëjk ko tuk xëë ojts të tkuentˈatyë jäˈäy diˈib të myëjjäˈäyënë. Kanäk pëky diˈib myëmääy myëdajpy ets nan myëjotmaybyatypyë tyääk ko yuumëët päˈämmëët yajpääty.

Koxyëp mijts yëˈëjëty niduˈuk ja mëjjäˈäy diˈib nyinëjkxaambyë Ángela, ¿wiˈix xymyëjämoˈoyët? (Jer. 31:25.) ¿Ti mdunëp parë xyjantsy jotkujkmoˈoyët ko nëjkx xykyuˈixë “ja diˈib këjx anuˈkxëp” extëmë Ángela?

Niˈamukë näˈäty nˈanuˈkxëm, waˈan mët ko nduˈunëm o mët ko nikëjxmˈäjtëmë Diosë tyuunk. Ko ja kugajpxy Daniel yajtukˈijxy diˈib kyaj tjaygyujkë, ta jyënany: “Jantsy anuˈkxëts nnayjäˈäwë” (Dan. 8:27). Ok, ta anklës Gabriel ojts nyinëjkxyëty parë tyukjaygyujkë Diosë jyaˈa ets yˈanmääyë ko Jyobaa duˈunyëmë nety “mëk tsyekyëty”, ets ko të nety yajmëdoyë nyuˈkxtakën (Dan. 9:21-23). Ets jatëgok, ojts myëjämoˈoyëty tuˈugë anklës mëdë ää ayuk diˈibë nety yajtëgoyˈajtypy (Dan. 10:19).

Pääty, mä mëjjäˈäytyëjk tkaninëjkxynyëm parë tmëjämoˈoyaˈany ja diˈib këjx anuˈkxëp o diˈib të yˈëxtëkëwaˈaky. Oy ko  nyayajtëwëdët: ¿Ti jotmay wyinguwäˈkëp? ¿Wiˈix yaˈˈanuˈkxëty? ¿Ti oybyë jäˈäyˈäjtën yajnigëxëˈkypy? Richard, diˈib 20 jëmëjt naxy kujk tyuny mëjjäˈäy, jyënaˈany: “Yëˈëjëts nˈijxypy tijaty oy tyuundëp ja nmëguˈukˈäjtëm. Tëjëts nˈixy ko kyaj tsyiptaˈaky nmëjämoˈoyëdëtsë nmëguˈuk, kots jawyiin nwinmay tijaty jotmay wyinguwäˈkëp”. Pën mnëjkxäämp mëdë wiinkpë mëjjäˈäy, ¿tiko nimajtsk xykyanimaytyäˈäktë ti jotmay wyinguwäˈkëp ja mëguˈuk?

Waˈan të xypyekyë kuentë ko tsiptakp parë nmaytyakëm wiˈix nnayjäˈäwëm. Pääty, mbäät tuˈugë nmëguˈukˈäjtëm tsyiptakxëty ttukmëtmaytyäˈägëdë mëjjäˈäytyëjk wiˈix nyayjawëty. ¿Ti tsojkëp ttundëdë mëjjäˈäytyëjk parë kyaj ja myëguˈuktëjk tsyiptakxëdët? Mbäät tpudëkë ko tmëtxiˈik tmëtxonët ets ko tjotmëkwingäjpxët. Michael, diˈib 40 jëmëjt naxy kujk tyuny mëjjäˈäy, duˈun dyajtsondaˈagyë myaytyaˈaky ko tninëjkxtë myëguˈuktëjk: “Tuk pëkyë tuunk diˈib jantsy oy nyikëjxmˈäjtypy tuˈugë mëjjäˈäy, yëˈko tninëjkxëdë myëguˈuktëjk mä jyëën tyëjk parë niˈigyë tˈixyˈatët. Päätyëts tyam të njantsy myinäˈäny mä mjëën mdëjk”.

Mä jamë mëguˈuk xymyëtmaytyäˈägäˈäny, oyxyëp ko amumduˈukjot mnuˈkxtaˈaky. Ko ijtyë apostëlë Pablo nyuˈkxtaˈaky, yëˈë ijty nyigajpxypy ja myëguˈuktëjkë myëbëjkën, tsyojkën ets ja myadakën (1 Tes. 1:2, 3). Ko xynyigäjpxët mä mnuˈkxtaˈaky ko myajtsobatypy ja mëguˈuktëjkë jyaˈayˈäjtën, ta ja mjot mgorasoon yˈawäˈätsët ets nanduˈun ja mëguˈuktëjkë kyorasoon parë tsuj yajxon mgäjpx mmaytyäˈäktët. Nan mbäät ja mˈää mˈayuk jyotkujkmoˈoyëty. Ray diˈib jeky kujk tyuny mëjjäˈäy, jyënaˈany: “Näˈäty, njäˈäytyëgoˈoytyaˈayëm ko jantsy oy nmëduˈunëmë Jyobaa, pääty ko pën xytyukjamyajtsëm, ta jatëgok xyjotkujkmoˈoyëm”.

Duˈun extëmë apostëlë Pablo, mijts nan mbäädë mëguˈuktëjk xymyëjämoˈoy pën mgajpxypy, oy natuˈugënë tekstë (Rom. 1:11). Extëm nˈokpëjtakëm, mbäät tuˈugë nmëguˈukˈäjtëm jyantsy myay jyantsy tyajy  ets tjawë ko kyaj ti ttsoojëty. Mijts, mbäät xytyukmëtmaytyaˈaky ko oy ja salmistë jyanayjäˈäwë extëm “tuˈugë poˈo bolsë diˈib ijtp jokoty”, yëˈë jyënany: “Kyajts të njäˈäytyëgoyë mˈanaˈamën” (Sal. 119:83, 176). Ko nety të xynyimaytyaˈagyë tyäˈädë tekstë, mijts mbäät xytyukˈixy ko yëˈë nan kyaj të tjäˈäytyëgoyë Diosë yˈanaˈamën.

Parë mbäät xypyudëkë ja toxytyëjk diˈib kyaj tnekytyukxondaˈagyë Diosë tyuunk o axtë kyaj yˈoknëjkxnë mä naymyujkën, mbäät xyajtuny ja ijxpajtën diˈib mä ja toxytyëjk dyajtëgooy tuˈugë meeny (Luk. 15:8-10). Tyäˈädë meeny diˈib platë, waˈanë nety myiny mä tuˈugë nantsëm diˈib ak platë meeny myëmiimpy ets jantsy tsooxë. Ko duˈun xytyukmëtmaytyäˈägët, pudëkë ja nmëguˈukˈäjtëm parë tjaygyukët ko yëˈë tuˈugë jäˈäy diˈib tsobatp mä naymyujkën. Ta net xytyukmëtmaytyäˈägët ko Jyobaa naytyukjotmaytyuunëp mët yëˈë, pes yëˈë niduˈugë byorreegë.

Mayë nmëguˈukˈäjtëm nyimaytyäˈägandëbë tekstë, pääty nasˈixë parë tnimaytyäˈäktët. Ko nety xykyäjpxtäˈäy tuˈugë tekstë diˈib mbäät pyudëkëty, ta net xytyukwijtstuˈudët tuˈugë ayuk ets xyajtëwët wiˈix wyinmay. Extëm nˈokpëjtakëm, mbäät xykyajpxyë 2 Korintʉ 4:16 etsë net xyajtëwët: “¿Të näˈä xyjawë ko Jyobaa yëˈë diˈib mëjämooyëp parë mduunˈadëˈëtsët?”. Ko duˈun xyajtëwët, mbäät myëjämoˈoyëty (Rom. 1:12).

Nan mbäät xymyëjämoˈoy tuˈugë mmëguˈuk pën mgäjpxtëp mä Biiblyë mä yajnimaytyaˈagyë Dios mëduumbë diˈib nanduˈun jäjt këbajttë. Extëm nˈokpëjtakëm, ja diˈib mon tuk nayjäˈäwëp, mbäät nyayˈijxkijpxyëty mëdë Ana o Epafrodito, diˈib nanduˈun ojts nnayjawëdë mon tuk, per duˈunyëmë Jyobaa ojts yajtsobäädëdë (1 Sam. 1:9-11, 20; Filip. 2:25-30). Pääty, ¿tiko xykyatukmëtmaytyaˈaky tuˈugë ijxpajtën diˈib yajpatp mä Biiblyë ja mëguˈuk diˈib pyatypyë jotmay?

Ko duˈunyëm xymyëmay xymyëdäjët ja mëguˈuktëjk diˈib ojts të xykyuˈixë, yëˈë nety myajnigëxëˈkypy ko mjantsy nyaytyukjotmaytyuunëp (Apos. 15:36). ¿Tiko xykyatukniwitsë parë mëët mnëjkxët käjpxwäˈkxpë mä mgatsoonyëm ko nety të xykyuˈixë? Okpawinmay nanduˈun ti tyuumbyë Bernard, diˈib jeky kujk tyuny mëjjäˈäy. Ko jatëgok nyaybyaatyëty mët ja nmëguˈukˈäjtëm diˈib ojts të tkuˈixë, ta dyajtëy: “¿Të mbudëkëty diˈib ojts nmaytyakëm?”. Waˈan yëˈë tmaytyäˈägäˈäny ja käjpxwijën diˈib ojts tmoˈoy. Ko duˈun mnaytyukjotmaytyunëdët ja mëguˈuktëjk, mbäät xyˈixy mä tˈakˈyajtëgoyˈatyë naybyudëkë.

Tyam, niˈigyë nmëguˈukˈäjtëm yajkuentˈatäˈändë, yajtsokäˈändë ets dyajtëgoyˈattë pën jyaygyukëp ja amay jotmay diˈib myëdäjttëp (1 Tes. 5:11). Pääty, mä xykyaninëjkxynyëm, winmay tijaty amay jotmay yajnäjxtëp. Amdowë naybyudëkë Jyobaa ets winˈix yajxonë tekstë diˈib ngäjpxaampy. Duˈun xypyäädëdë ää ayuk parë xyjotkujkmoˈoyët “ja diˈib këjx anuˈkxëp”.