Silvia tyuny mä jäˈäy tsyoybyattë, yëˈë jyënaˈany: “Nˈëxpëjkyëts mä unibersidad mët mayë jäˈäy diˈib myëdäjttëbë ryelijyonk, per tyuundëbë trampë ko ttundë yˈeksamen ets yajtuundëbë droogë. Kyaj pyudëkëdë ryelijyonk”.

Lionel, jyënaˈany: “Pënatyëts mëët ndundë kyaj nyëjkxtë tuumbë mët ko nyaynyigäjpxëdë ko pëjkëdëp. Yëˈëjëty, duˈun tˈixtë relijyonk extëm tuˈugë mueeblë diˈib kyaj tyuny, jeˈeyë dyakyë ijxën”.

Relijyonk kyaj nëgoo tpudëkëdë jäˈäy parë wäˈäts jyukyˈatët. May “nyayˈandijëdë extëmxyëp myëbëktë, per kyaj tkupëktë ja mëkˈäjtën ko jyikyˈattët extëmë Dios ttseky” (2 Timotee 3:5). Pënaty nyiwintsënˈäjttëbë relijyonk, kyaj dyaktë oybyë ijxpajtën ets nan kyaj tnëˈëmoˈoy ttuˈumoˈoytyë jäˈäy extëmë Biiblyë jyënaˈany parë wäˈäts jyukyˈattët. Päätyë net mayë jäˈäy wyinmaytyë ko Dios kyaj tkuentëty oy wiˈix jyukyˈattët.

Biiblyë jyënaˈany ko Dios mbäät yajjotkujkˈatyëty o axëëk yajnayjawëty extëm njäˈäyˈäjtëm. Ko ja israelitëty kyamëdoodë, “myooytyë jäj jëmuˈumën” (Salmo 78:40). Per niˈigyë jyamˈatyë “xondakën tsäjpotm” ko tuˈugë pokyjyaˈay jyodëmbity ets dyajtëgatsyë jyukyˈäjtën (Lukʉs 15:7). Ko tuˈugë jäˈäy tnijawë wiˈix jyaˈayˈatyë nDeetyˈäjtëmë tsäjpotmëdë, ta niˈigyë ttseky. Ets yëˈë pudëjkëp parë ttseky ti Dios tsyejpy ets tˈaxëkˈixy ti yëˈë yˈaxëkˈijxypy (Amós 5:15).

Jyobaa tyestiigëty “naybyudëjkëdëp parë oy yˈittët mëdë jyiiky myëguˈuk ets pyudëjkëdëbë jäˈäy parë oy kyunaxˈat kyugäjpnˈattët ets ttundët tijaty tëyˈäjtën myëët” duˈun jyënanyë perioodikë The Deseret News, de Salt Lake City (Utah, Estados Unidos). Ta yˈakjënany: “Jyaˈayëty yëˈë pyanëjkxtëbë käjpxwijën mä tnigajpxy wiˈix jyukyˈattët. Myëbëjktëp ko mbäät tyukmastuˈudëdë Dios pën juˈktëp, muktëgooyëdëp, pën yajtuundëbë droogë, pën nyiguyäjttëbë meeny, pën ijt tsënääytyëp axëëk ets pën ijt tsënääytyëp ak yetyëjk”.

¿Wiˈixë Testiigëty pyudëkëdë ko tnijawëdë wiˈixë Dios jyaˈayˈaty? Silvia jyënaˈany: “Mäjëts nduny, mä jäˈäy tsyoybyattë, winˈëˈëndëbë jäˈäy ets kyaj oy tijaty ttundë. Ets mbäät xytyukninäjxëmë jyaˈayˈäjtën. Per kots nnijawë wiˈixë Jyobaa * tˈixyë duˈumbë tuˈunën, yëˈëjëts xypyudëjkëp parëts kyaj duˈun nˈadëˈëtsët. Mbäädëts njënäˈäny ko jantsy jotkujkëts nnayjawëty ets jantsy oy”. Silvia ijtp seguurë ko ryelijyonk yëˈë pudëjkëp parë oy jyukyˈaty.