Estelle, * xëmë nety nyëjkxtë tsäjptëgoty mëdë yˈuˈunk yˈënäˈk, ta tˈanmääy ja pastoor ko niˈigyë nety tjajaygyukëyaˈanyë Biiblyë, per kom ja pastoor ninäˈä kyapudëjkë, ta yoˈoybyojty. Estelle jyënaˈany: “Tajëts xynyijäˈäyëdë diˈib tsäjptëgoty ets xyˈanmääytyëts ko pën kyajts nmadaˈaky nëjkxët, oyëts jeˈeyë ngaxëdë meeny sentääbë. Tajëts nbëjkyë kuentë ko diˈibë nety jeˈeyë tsyojktëp, yëˈëyëtsë nmeeny nsentääbë”.

Angelina, diˈib mëk yˈookˈäjtypyë relijyonk, jyënany: “Mäjëtsë ntsäjptëjk tëgëkˈok dyajnaxtë yˈabëjkën, ets tëgok tëgok dyajnaxtë, tˈawixtë parëts nbëjtäˈäktëdë meeny. Tajëts nwinmääy ko kyaj Dios pyudëkëdë”.

Etsë relijyonk diˈibaty mˈixyˈajtypy, ¿yˈanmääytyëbë jäˈäy o yˈëxtääytyëbë winmäˈäny wiˈix ttukˈyaktëdë meeny sentääbë? ¿Tukniˈˈijxëp duˈunë Biiblyë?

Jesus jyënany: “Mˈaxäjëdë tyäˈädë mëkˈäjtën nadëˈënyë, nan [këdii] myajmëjuytyë ko dëˈën xytyundët” (Matewʉ 10:8). Kyaj mbäät yajtooky ja oybyë ää ayuk diˈib yajpatp mä Biiblyë ets niˈamukëxyëp mbäädë jäˈäy tnijäˈäwë.

Pënaty tëëyëp ojts tpanëjkxtë Kristë, ¿mä tpëjktë meeny sentääbë diˈib yajtuundë mä naymyujkën?

Niduˈuk niduˈuk dyäjktë extëmë nety të ttukniwinmayëdë, “kyaj majtsk ää majtsk jot es kyaj aguanëbë, mët ko Dios tsyejpy ko ti yajˈyaky xondaˈakyˈää xondaˈakyjyot” (2 Korintʉ 9:7). Apostëlë Pablo yëˈë ijty yaˈoˈoyëbë witëjk parë tpäätyë myeeny syentääbë diˈib yajtuumpy mä kyäjpxwaˈkxy (Apostʉlʉty 18:2, 3). Yëˈë jyënany: “Miits mjamyajtstëp wiˈixëts të ndundë xëëny koots es këdiibë miits nˈatsiptët mä naty jam nduknijawëdë ja oybyë ayuk” (1 Tesalónikʉ 2:9).

Ja lugäär mä nyaymyukëdë txëˈaty, Tëjk mä yˈëxpëktë Jyobaa tyestiigëty, naa adëyë kyojˈyëty. ¿Mä tpëktë meeny sentääbë diˈib yajtuundëp? Jyobaa tyestiigëty ninäˈä tkayajnaxtë abëjkën ets ni tkakaxtë soobrë mä tˈamdowdë meeny sentääbë. Pënaty myëjjäˈäwëbë Diosë yˈëxpëjkën, jap tˈagonëdë meeny sentääbë tsojkëngyëjxm mä tuˈugë käjë diˈib yajpatp mä ja tëjk.

Tuumbë meeny sentääbë parë pyëtsëmy ets wyaˈkxyë tyäˈädë rebistë. Per ninäˈä xykyaˈixët myiny mä tyäˈädë rebistë mä tijaty yaˈˈawan yaˈˈayääxë o mä yaˈˈamdoyë meeny sentääbë. Diˈib jeˈeyë nyimaytyakypy, yëˈë ja tëyˈäjtën diˈib yajpatp mä Biiblyë.

Wiˈix mˈokwinmay, ¿duˈunën ttundë extëmë Jesus ojts tnigajpxy ets extëm ttuundë pënaty tim jawyiin ojts pyanëjkxëdë?