TUˈUGË nmëguˈukˈäjtëm ojts tkexy tuˈugë neky mä kyopkë Jyobaa tyestiigëty ets jyënany: “Mëguˈuktëjkëty, kyajts nekyjyamyetsy näkˈokëts kujk nˈaxäjë artikulo mäjëts meerë nyajtëgoyˈaty”. ¿Të duˈun mjaty extëmë tyäˈädë nmëguˈukˈäjtëm? Nimay të duˈun njäjtëm ets kyaj mëjˈixy mëjmëdoy njäˈäwëm.

² Ko nˈaxäjëmë tëyˈäjtën diˈib mä Biiblyë, yëˈë xytyukˈijxëm ko Jesus diˈib nyigëbäjkˈäjtypyë naymyujkën, kyuytyuumbyë yˈayuk ko jyënany xymyoˈoyäˈänëm ja käˈäy ukën. ¿Pën diˈib yajtuumpy? Ko dyajky ja ijxwëˈëmën ko nety yëˈë jam yajpääty, ta jyënany ko yëˈë yajtunaampy “tuˈugë tyuumbë diˈibë kuwijy es tyiimpy ti wyintsën tsyejpy” parë “bom bom dyajkayët” ja poˈoduumbëty (käjpxë Matewʉ 24:45-47). Tyäˈädë tuumbë diˈib kuwijy, yëˈë diˈibë Jesus yajtuumpy parë dyajkay dyaˈuuky pënaty jyantsy yˈëxpëjkpëˈäjtypy mä tyäˈädë tiempë jyëjpkëxanë. Pääty, jëjpˈam ets nˈëxkäjpëm pënë tyäˈädë tuumbë. Pes net oy nˈijtëm mëdë Dios, pën nˈaxäjëm ja käˈäy ukën diˈib yajkypyë tyäˈädë tuumbë (Mat. 4:4; Fwank 17:3).

3. ¿Wiˈix të tnimaytyaˈagyë ëxpëjkpajn mä ja ijxpajtën diˈibë Jesus pyëjtak mä ja tuumbë diˈib kuwijy?

³ Per ¿wiˈix mbäät njaygyujkëm ja ijxpajtën mä ja tuumbë diˈib kuwijy ets tyuumpy ti wyintsën tsyejpy? Mä ëxpëjkpajn diˈib tëëyëp pëtsëëm ojts tnimaytyaˈaky ko ja tuumbë diˈib kuwijy, ja Jesus ttuknipëjky ets tkuentˈatët ja poˈoduumbëty mä Pentekostes, mä jëmëjt 33. Ets ko ja tuumbë diˈib kuwijy, yëˈë yˈandijpy niˈamukë pënaty nëjkxtëp tsäjpotm diˈib jukyˈäjttëp yä Naxwiiny, nuˈunë tadë tiempë tyuˈuyoˈoy diˈib tsondak mä jëmëjt 33. Nanduˈun yajjaygyujkë ko ja poˈoduumbëty, yëˈë yˈandijpy pënaty nëjkxtëp tsäjpotm, per net ko naytyuˈugaty, ets ko mä jëmëjt 1919 jaa Jesus ttuknipëjky “tëgekyë diˈibë myëdäjtypy”,  o ja tuk pëky njënäˈänëm, tukëˈëyë tijaty tuump yä Naxwiiny parë yajkäjpxwaˈkxyë Diosë yˈAnaˈamën. Per ko jatëgok yajpayoˈoy mëdë nuˈkxtakën ets të yajpawinmay, ta të yaˈixy ko tsojkëp yajkäjpxˈoyët extëmë nety yajjaygyukë mä pënën ja tuumbë diˈib kuwijy ets tyuumpy ti wyintsën tsyejpy diˈibë Jesus myaytyak (Prov. 4:18). Min nˈokˈijxëmë tyäˈädë ijxpajtën, ets nˈoknijäˈäwëm wiˈix xypyudëjkëm, oy njukyˈatäˈänëm jam tsäjpotm o yä Naxwiiny.

4-6. ¿Tiko mbäät njënäˈänëm ko ja ijxpajtën diˈibë Jesus pyëjtak mä ja tuumbë diˈib kuwijy ja yˈadëëtsondaky ko tsyondakyë jëmëjt 1914?

⁴ Mä Matewʉ kapitulo 24 tap kanäägë bersikulo mä tnigajpxy ko tyäˈädë ijxpajtën diˈib yajpëjtak mä ja tuumbë diˈib kuwijy ets tyuumpy ti wintsën tsyejpy, kyaj yˈadëëtsondaky Pentekostes mä jëmëjt 33, tyamën yˈadëy mä ja tiempë jyëjpkëxanë. Min nˈokˈijxëm wiˈixë Biiblyë xypyudëjkëm parë duˈun njaygyujkëm.

⁵ Tyäˈädë ijxpajtën yëˈë ja ijxwëˈëmën diˈibë Jesus ojts tnaskäjpxë ko nety jam yajpääty ets ko “jyëjptëgoyanë tyäˈädë jukyˈäjtën” (Mat. 24:3, Traducción del Nuevo Mundo [TNM]). Diˈib tuk pëky ojts yajnaskäjpxë mä Matewʉ 24:4-22, majtsk pëky yˈadëy, tuk ja mä jëmëjt 33 axtë 70, ets ja tuk pëky, tyam mä ndiempëˈäjtëm ets mas jekyë tiempë nyaxy. ¿Yëˈë netë tyäˈädë yˈandijpy ko nan majtsk pëky yˈadëy ja ijxpajtën diˈibë Jesus pyëjtak mä ja tuumbë diˈib kuwijy? Kyaj.

⁶ Extëm tmaytyaktsoonyë Matewʉ 24:29, yëˈë mä Jesus ojts tnigajpxy tijaty tunan jatanëp mä ndiempëˈäjtëm (käjpxë Matewʉ 24:30, 42, 44). Ko Jesus tmaytyaky tijaty tunan jatanëp mä ja mëk ayoˈon, ta jyënany: “Es xyˈixtëdëts nminy ëj, ja Naxwinyëdë Jäˈäyëtyë Kyudënaabyë, yootsoty”. Ta net tˈanmääy pënaty jukyˈäjttëp mä tiempë jyëjpkëxanë: “Wijy mˈittët miitsëty, mët ko kyaj xynyijawëdë ti oorë dëˈën myinäˈäny ja mWintsënëty [...] mët ko mä naty xykyaˈˈawix xykyajëjpˈixtë, jaats nminäˈäny ëj, ja Naxwinyëdë Jäˈäyëtyë Kyudënaabyë”. * Ko netyë Jesus të tmaytyaˈaky tijaty tunan jatanëp mä ja tiempë jyëjpkëxanë, ta net ojts tmaytyaˈaky ja ijxpajtën mä ja tuumbë diˈib kuwijy. Päätyë net njaygyujkëm ko ja yˈadëëtsondakyë Jesusë yˈää yˈayuk ko tmaytyaky ja tuumbë diˈib kuwijy, ko nety të tsyondaˈagyë jëmëjt 1914, ko tyëjkë ja tiempë diˈib jëjpkëxanëp. ¿Tiko duˈun njaygyujkëm?

7. ¿Ti jotmay jamˈäjt ko tsyondaky ja tiempë mä ja pëjtaˈaky myuky, ets tiko?

⁷ Ko Jesus tmaytyaky “tuˈugë kudëjk tmëdaty tuˈugë tyuumbë diˈibë kuwijy es tyiimpy ti wyintsën tsyejpy”. ¿Pënë duˈun myaytyak? Mä primer siiglë kyaj nety jyëjpˈamëty ets duˈun nyayajtëwëdët, pes extëm të nˈijxëm mä ja tuˈukpë artikulo tamë nety ja apostëlëty diˈib tyuundëbë mëjˈäjtën ets yäjktë mëjää parë wiinkpë duˈun ttundët. Yajxonë nety nyigëxëˈëky ko yëˈë diˈibë Dios yajtuunëdëp (Apos. 5:12). Pääty, kyaj nety pën nyayajtëyëty pënën diˈibë Jesus wyinˈijx parë yajnëˈëmoˈoy yajtuˈumoˈoyëdë jyaˈay. Per kyaj dyuˈunˈäjty mä ja jëmëjt 1914. Pes të nety tsyondaˈaky ja tiempë parë ja pëjtaˈaky myukët, ets tsojkëbë nety nyaywyäˈkxëdët ja triigë mët ja axëk ujts (Mat. 13:36-43). Per ko ja pëjtaˈaky myujktsondaky, taaˈäjtpë nety may diˈib nayajnäjxëdëp ko tpanëjkxtë Kristë. Pääty, jëjpˈamë nety yaˈëxkapët pënaty nëjkxtëp tsäjpotm diˈib duˈun extëmë triigë. Ets yëˈë xytyuknijäˈäwëm ja ijxpajtën diˈibë Jesus pyëjtak. Pes pënaty nëjkxtëp tsäjpotm, yëˈë nety diˈib kyaj tyëgoyˈäjtxëdë ja käˈäy ukën.

8. ¿Tiko yˈoyëty ko ja tuumbë diˈib kuwijy të pyëtsëmy mä pënaty nëjkxtëp tsäjpotm?

⁸ Ja tuumbë diˈib kuwijy ets tyuumpy ti wyintsën tsyejpy, jap të pyëtsëmy mä diˈib nëjkxtëp tsäjpotm. Ja yajtijtë “reyëty diˈib tuundëp saserdotëty”, ets yëˈëjëty të yajtuknipëktë parë tkäjpxwäˈkxtëdë oyˈäjtën diˈibë Dios të ttuny (1 Ped. 2:9, TNM). Pääty  yˈoyëty etsë tyäˈädë “reyëty diˈib tuundëp saserdotëty”, ttukniˈˈixëdët ja tëyˈäjtën ja myëguˈuktëjk diˈib tuˈugyë mëët myëbëktë (Mal. 2:7; Diˈibʉ Jat. 12:17).

9. ¿Niˈamukën të yajwinˈixtë extëmë tuumbë diˈib kuwijy pënaty nëjkxtëp tsäjpotm? Nimaytyäˈäk.

⁹ ¿Niˈamukën të yajwinˈixtë extëmë tuumbë diˈib kuwijy pënaty nëjkxtëp tsäjpotm? Kyaj. Pes kyaj niˈamukë pënaty nëjkxtëp tsäjpotm tmoˈoytyë käˈäy ukënë myëguˈuktëjk abëtsemy nyaxwinyëdë. Ta diˈib tuundëp mëjjäˈäy mäjatyë naymyujkën ets diˈib pyudëjkëbë mëjjäˈäy. Yëˈëjëty, yaˈëxpëjktëbë jäˈäy tëjkmdëjkm ets mä naymyujkën ets pyanëjkxtëp extëm xytyuˈumoˈoyëm diˈib tuundëp mä kyopkë Jyobaa tyestiigëty, per yëˈëjëty kyaj tmoˈoytyë ja käˈäy ukënë myëguˈuktëjk. Ets mä pënaty nëjkxtëp tsäjpotm, nan yajpattëbë toxytyëjk diˈib yujy tudaˈaky, yëˈëjëty ninäˈä kyawinmaytyët parë yaˈëxpëktët mä naymyujkën (1 Kor. 11:3; 14:34).

10. ¿Pën yajtijp ja tuumbë diˈib kuwijy ets tyuumpy ti wintsën tsyejpy?

¹⁰ ¿Pënën ja tuumbë diˈib kuwijy ets tyuumpy ti wyintsën tsyejpy? Duˈun extëmë Jesus ojts ttuknibëjtäägë dyajkayëdë mayjyaˈay mët jantsy niwaanë jäˈäy, tyäˈädë tuumbë diˈib kuwijy yëˈë niwaanëbë nmëguˈukˈäjtëm diˈib të yajwinˈixtë mä pënaty nëjkxtëp tsäjpotm parë dyaˈoyëdë ets dyaktë käˈäy ukën desde 1919. Nuˈun kujkë tiempë tyuˈuyoˈoy diˈib jëjpkëxanëp, pënaty nëjkxtëp tsäjpotm diˈib yajtijtëp tuumbë diˈib kuwijy, tuˈugyë tyundë mä yajpäätyë kyopkë Jyobaa tyestiigëty. Tyäˈädë tuumbë diˈib kuwijy, yëˈë Diˈib wyooyoˈoytyëbë Jyobaa tyestiigëty. Per ko Jesus ojts tmaytyaˈagyë tyäˈädë ijxpajtën jeˈeyë ojts tnigajpxy tuˈugë tuumbë. Pääty Diˈib wyooyoˈoytyëbë Jyobaa tyestiigëty tuk grupën tijaty ttundë o ttukniwinmayëdë.

11, 12. 1) ¿Ti majtsk pëky diˈib yajtuknipëjk ja tuumbë diˈib kuwijy ets tyuumpy ti wintsën tsyejpy? 2) ¿Näˈä Jesus ttuknipëjky ja tuumbë diˈib kuwijy parë tˈixtët ja poˈoduumbëty, ets pënaty wyinˈijx?

¹¹ Nˈokpëjkëmë kuentë ko ja ijxpajtën diˈibë Jesus pyëjtak mä ja tuumbë diˈib kuwijy ets tyuumpy ti wintsën tsyejpy, majtsk pëky diˈib yajtuknipëjktëp. Tuk pëky, yëˈë ja poˈoduumbëty, ets ja tuk pëky, yëˈë tukëˈëyë diˈib myëdäjtypy ja wintsën. Komë tyäˈädë ijxpajtënë ja yˈadëy mä tiempë jyëjpkëxanë, pääty ja nety yajtuknipëkäˈändë tyäˈädë majtsk pëkypyë tuunk ko nety të nyaxyë jëmëjt 1914, ko Kristë tyëjkë Rey.

¹² ¿Näˈä yajtuknipëjky ja tuumbë diˈib kuwijy ja poˈoduumbëty? Parë nnijäˈäwëm, min nˈokˈijxëm ti tuun jäjtë 1914, ko myujktsondaky ja pëjktaˈaky. Extëm të nˈijxëm,  mä tadë jëmëjt mayë netyë grupë diˈib naynyigäjpxëdëp ko tpanëjkxtë Kristë. ¿Diˈibë netyë Jesus wyinˈixaampy ets tnikäjpxpatäˈäny extëm ja tuumbë diˈib kuwijy? Tyäˈädë, ja yaˈˈatsoojëmbijty ko Kristë mëdë Tyeety ojts dyajwäˈätsy ja templë diˈib kyaj jäˈäy të tkojy, ets ja duˈun ttuundë mä jëmëjt 1914 axtë mä tsyondaˈagyë jëmëjt 1919 (Mal. 3:1). * ¡Ets yëˈëjëty jantsy jotkujk nyayjäˈäwëdë ko tˈijxtë tuk grupë jäˈäy Diˈib yˈëxpëjktëbë Biiblyë dyajnigëxëˈëktë ko ja jyot kyorasoon yajpäättë mä Jyobaa etsë yˈAyuk! Per nan tsojkëbë nety yˈakwäˈätstët, ets mëdë yujyˈat tudaˈakyˈat ojts tnasˈixëdë parë wyäˈätstët ko ja jotmay tyukjäjtëdë (Mal. 3:2-4). Ja Diˈib yˈëxpëjktëbë Biiblyë nigëxëˈktë yajxon ko yëˈë nety diˈib näjxtëp extëm ja triigë. Mä jëmëjt 1919, ja mä Jesus ojts twinˈixy näägë nmëguˈukˈäjtëm diˈib nëjkxtëp tsäjpotm parë tyundët extëm ja tuumbë diˈib kuwijy ets tyuumpy ti wintsën tsyejpy, ets ttuknipëjky ja poˈoduumbëty.

13. ¿Pënaty nanduˈun näjxtëp extëm ja poˈoduumbëty, ets tiko?

¹³ ¿Pënatyën yajtijtëp ja poˈoduumbëty? Yëˈë diˈib yˈaxäjëdëbë käˈäy ukën. Ko tsyondaky ja tiempë diˈib jëjpkëxanëp, yëˈëyë nety duˈun yajtijtëp pënaty nëjkxtëp tsäjpotm. Per ok, ta nanduˈun ojts yajtijtë niˈamukë ja tëgoy myayjyaˈay diˈib wëˈëmandëp yä Naxwiiny. Diˈib nimay yajtijtëp poˈoduumbëty, yëˈë ja tëgoy myayjyaˈay diˈib pyanëjkxtëbë Kristë (Fwank 10:16). Duˈun diˈib nëjkxtëp tsäjpotm ets diˈib wëˈëmandëp yä Naxwiiny ttukˈoyˈattë ko ja tuumbë diˈib kuwijy dyaktë “bom bom” ja käˈäy ukën. Ets Diˈib wyooyoˈoytyëbë Jyobaa tyestiigëty, diˈib nanduˈun yajtijtëp tuumbë diˈib kuwijy ets tyuumpy ti wintsën tsyejpy, nan tsojkëp tˈaxäjëdët ja käˈäy ukën. Pääty mëdë yujyˈat tudaˈakyˈat tˈëxkaptë ko niduˈugaty, yëˈë ja poˈoduumbëty, extëm niˈamukë Dios mëduumbë.

14. 1) ¿Ti tuungë mëjwiin kajaabë të yajtuknipëky ja tuumbë diˈib kuwijy, ets tijaty tyuumpy? 2) ¿Ti käjpxtëˈëwënë ojts tmoˈoyë Jesus ja tuumbë diˈib kuwijy ets tyuumpy ti wintsën tsyejpy? (Ixë rekuäädrë “Pën ja mëduumbë kyaj yˈoyjyaˈayëty...”.)

¹⁴ Jesus mëjwiin kajaa ttuunkmooy ja tuumbë diˈib kuwijy ets tyuumpy ti ja wyintsën tsyejpy. Tëëyëp, tuˈugë mëduumbë diˈib yajtukjotkujkˈäjtp, yëˈë diˈib yajtuknipëjkp niˈamukë ja tuumbëtëjk diˈib ja wintsën myëdäjtypy mä jyëën tyëjk (Luk. 12:42). Nanduˈun ja tuumbë diˈib kuwijy ets tyuumpy ti wyintsën tsyejpy, yëˈë diˈib nyikëjxmˈäjtypy niˈamukë Dios mëduumbë. Nan nyikëjxmˈäjtypy parë tˈixtët wiˈix tyunyë meeny sentääbë, wiˈix yaˈëwaˈkxy yajkäjpxwaˈkxyë Diosë yˈayuk, tijaty naxäämp mä asamblee ets nan yëˈë yajpëtsëëmdëbë ëxpëjkpajn diˈib nyajtuˈunëm mä ngäjpxwäˈkxëm, mä naytyuˈuk  nˈëxpëjkëm ets mä naymyujkën. Ja poˈoduumbëty, yëˈë tyukˈijxpajttëp ja tuumbë diˈib kuwijy parë myoˈoyëdët ja kyaˈay yˈukën.

15, 16. ¿Näˈä Jesus ttuknipëky ja tuumbë diˈib kuwijy tukëˈëyë diˈib myëdäjtypy?

¹⁵ ¿Näˈä Jesus ttuknipëjky ja myëmajtsk pëkypyë tuunk, ja tuumbë diˈib kuwijy parë tnikëjxmˈatët tukëˈëyë tijaty myëdäjtypy? Yëˈë jyënany: “Jotkujk ja tuumbë ko ja wyintsën jyäˈtët es pyäädëdët tkuytyuny diˈibë të yajtuknipeky. Tëyˈäjtën nˈanëëmëdë ko ja wintsën tuknipëkëdëp tëgekyë diˈibë myëdäjtypy” (Mat. 24:46, 47). Extëm yä nˈijxëm, Jesus ja ttuknipëkyë tyäˈädë myëmajtsk pëkypyë tuunk ko nety yëˈë të jyaˈty ets të tˈixy ja tuumbë “tkuytyuny diˈibë të yajtuknipeky”, o ja tuk pëky njënäˈänëm, ko dyaktë ja käˈäy ukën. Pääty, tuk tiempë nyaxy parë yajtuknipëky ja myëmajtsk pëkypyë tuunk. Parë njaygyujkëm näˈä ets wiˈixë Jesus ttuknipëky tukëˈëyë diˈib myëdäjtypy, tsojkëp jawyiin nnijäˈäwëm näˈä yëˈë jyaˈty ets tijatyën myëdäjtypy.

¹⁶ ¿Näˈä Jesus jyaˈty? Tyäˈädë yaˈˈatsoojëmbity mä tkatukjäˈtynyëmë Matewʉ 24:46, 47. Nˈokjamyajtsëm ko mä kanäägë bersikulo jyënaˈany ko Jesus myiny, tyäˈädë yëˈë yˈandijpy ko Jesus myinäˈäny parë dyajnidukëyaˈanyë jäˈäy ets dyajkutëgoyaˈany mä ja tiempë jyëjpkëxanë (Mat. 24:30, 42, 44). * Pääty ko Jesus myiny o jyaˈty diˈib ojts tnigajpxy ko tpëjtaky ja ijxpajtën mä ja tuumbë diˈib kuwijy, ja tyunäˈäny jyatäˈänyëty mä ja mëk ayoˈon.

17. ¿Tijatyënë Jesus myëdäjtypy?

¹⁷ ¿Tijatyënë Jesus myëdäjtypy? Kyaj yëˈë jeˈeyë tmaytyäˈägany tukëˈëyë diˈib myëdäjtypy yä Naxwiiny, nanduˈunën ja anaˈam kutujkën diˈib myëdäjtypy jam tsäjpotm. Yëˈë jyënany: “Ëjts të xymyoˈoy ja Dios tëgekyë  kutujkën, dëˈën jam tsäjpotm es dëˈën yä naxwiiny” (Mat. 28:18; Éfes. 1:20-23). Pääty ja Anaˈam Kutujkën, yëˈë diˈibë Jesus myëdäjtypy diˈib naxkëdak desde 1914 ets yëˈë mëët yˈanaˈamäˈändë pënaty nëjkxtëp tsäjpotm (Diˈibʉ Jat. 11:15).

18. ¿Tiko Jesus ttukxondäˈägäˈäny ets ttuknipëkäˈäny tukëˈëyë diˈib myëdäjtypy ja tuumbë diˈib kuwijy?

¹⁸ ¿Ti netë tyäˈädë xytyukjaygyujkëm? Ko Jesus myinët extëmë Fes mä tyunäˈäny jyatäˈänyëty ja mëk ayoˈon, ta tˈixäˈäny ko ja tuumbë diˈib kuwijy të tmoˈoy ja käˈäy ukën bom bom ja poˈoduumbëty. Ta net ttukxondäˈägäˈäny ets ttuknipëkäˈäny tukëˈëyë diˈib myëdäjtypy. Ets diˈib yajtijp tuumbë diˈib kuwijy, yajtuknipëkäˈändë ko nety tˈaxäjëdë kyumäˈäyën jam tsäjpotm ets tyëkëdë anaˈambë mëdë Kristë.

19. ¿Yëˈëyëdaa yajkumayandëp jam tsäjpotm ja tuumbë diˈib kuwijy ets kyaj dyuˈunëtyë wiinkpë myëguˈuktëjk?

 ¹⁹ ¿Yëˈëyëdaa yajkumayandëp jam tsäjpotm ja tuumbë diˈib kuwijy ets kyaj dyuˈunëtyë wiinkpë myëguˈuktëjk? Kyaj. Näˈäty niwaanë jeˈeyë jäˈäy diˈib yajtukwandakp ja kumäˈäyën, per ok, mbäät tˈaxäjë wiinkpë jäˈäy. Extëm nˈokpëjtakëm, okˈix wiˈixë Jesus tˈanmääy ja nimäjktuˈukpë yˈapostëlëty ko nety yˈooganë (käjpxë Lukʉs 22:28-30). Jesus ojts ttukwandaˈaky ko tˈaxäjëyäˈändë tuˈugë kumäˈäyën mët ko kyaj të myastuˈudëdë. Ets ojts tˈanëëmë ko mëët yˈanaˈamäˈändë mä yëˈë tyunäˈäny Rey. Per ko ja tiempë nyajxy, ta jyënany ko niˈamukë ja 144,000 diˈib nëjkxtëp tsäjpotm, yˈuˈunyëyäˈändë mä ja yˈunyaaytyakn ets mëët yˈanaˈamäˈändë (Diˈibʉ Jat. 1:1; 3:21). Nanduˈun tyunäˈäny jyatäˈänyëty extëm jyënaˈanyë Matewʉ 24:47 ko Jesus tˈanmääy ja tuumbë diˈib kuwijy ttuknipëkäˈäny tukëˈëyë diˈib myëdäjtypy, niˈamukën yajmaytyaˈaky ja 144,000 diˈib anaˈamandëp mëdë Kristë jam tsäjpotm (Diˈibʉ Jat. 20:4, 6).

20. ¿Tiko Jesus ttuknipëjkyë tuunk ja tuumbë diˈib kuwijy, ets ti net ndunäˈänëm?

²⁰ Mët yëˈëgyëjxm ja tuumbë diˈib kuwijy ets tyuumpy ti wintsën tsyejpy, Jesus dyajkay dyaˈuugyë mayjyaˈay mët niwaanë diˈib tuundëp, extëm dyajtsondaky mä primer siiglë. Ojts ttuknipëkyë tyäˈädë tuumbë parë tmoˈoytyët ja käˈäy ukën “bom bom”, duˈun diˈib nëjkxtëp tsäjpotm ets diˈib wëˈëmdëp yä Naxwiiny mä ja tiempë jyëjpkëxanë. Pääty, nˈokˈyaˈijxëm ko nmëjjäˈäwëm mët ko nbudëjkëm ja nmëguˈukˈäjtëm diˈib nëjkxtëp tsäjpotm diˈib yajtijtëp tuumbë diˈib kuwijy ets tyuumpy ti wintsën tsyejpy (Eb. 13: 7, 17).