Kyaj tiko ndimmëmäˈäy ndimmëdäjëm mä yˈuˈunyët tuˈugë jäˈäy diˈib të yaˈëxkexy ko jyäˈtët mä ja Tëjk mä nˈëxpëjkëm. Mä ëxpëjkpajn, të yaˈˈanëëmëdë tääk teety parë tpudëkëdët ja yˈuˈunk yˈënäˈk diˈib të yaˈëxkexy pën tuˈugyë mëët tsyëënëdë ets pën yˈijxtëp ko mbäät tpudëkëdë. Mä La Atalaya 15 äämbë nobiembrë 1988, pajina 19 ets 20, jyënany ko tääk teety mbäät axtë tˈëxpëktë Biiblyë mët ja yˈuˈunk diˈib të yaˈëxkexy ets mutsknëm, diˈib tuˈugyë mëët tsyëënë. Ko duˈun ttunët mbäät ja yˈuˈunk pyudëkëty parë tnijëmbitëdë Jyobaa.

Ko ja uˈunk diˈib mutsknëm diˈib të yaˈëxkexy jyäˈtët mä ja Tëjk mä nˈëxpëjkëm, kyaj wyiˈixëty ko nyaxwaˈtskojët mä ja tyääk tyeety yˈuˈunyëdë. Kyaj yajpëjtaˈaky tuˈugë anaˈamënë parë yˈuˈunyëdët ëxˈam pënaty të yaˈëxkexy, pääty kyaj wyiˈixëty ko ja uˈunk tpanëjkxëdë tyääk tyeety mä yˈuˈunyëdë. Tääk teety kyuentˈatandëbë yˈuˈunk yˈënäˈk parë oy yˈitët mëdë Dios, pääty ko mëët yˈuˈunyëdët mbäät tpudëkëdë parë tmëdooˈitët tijaty näjxp mä naymyujkën ets nyaytyukpudëkëdët, per kyaj mbäät duˈun ttundë pën naytyuˈuk ja uˈunk yˈuˈunyë.

¿Ets pën ja uˈunk diˈib të yaˈëxkexy kyaj tsyëënë mëdë tyääk tyeety nanduˈun mbäät yajtuny? Mä tyäˈädë rebistë, të yˈokˈyajnigäjpxpë wiˈix mbäät yˈity tuˈugë Dios mëduumbë mëdë jyiiky myëguˈuk diˈib të yaˈëxkexy pën kyaj tuˈugyë mëët tsyëënë. * Per ko ja familyë tnasˈixët parë yˈuˈunyët mët ja diˈib të yaˈëxkexy, kyaj yëˈë tˈandijy ko yˈëxtaapy parë mëët tyuˈukmukäˈäny. Pën ja familyë diˈib oy ijtp mëdë Jyobaa, yˈijxtëp extëmë Biiblyë jyënaˈany mä wiˈix mbäät nˈijtëm mëdë jäˈäy diˈib të yaˈëxkexy, kyaj tiko yajmëmay yajmëdäjët (1 Kor. 5:11, 13; 2 Fwank 11).

Pën ja diˈib të yaˈëxkexy wyintsëˈkëp extëm të yajtukniwitsë, kyaj wyiˈixëty ko yˈuˈunyët mëdë fyamilyë o mëdë wiinkpë nmëguˈukˈäjtëm. Näˈäty, mbäät jyaˈˈatyë jotmay ko pën yaˈˈanëëmët mä mbäät jeˈeyë yˈuˈunyë o mä kyaj. Pën niˈamukë nduˈunëmë mëjää ets nmëmëdoˈojëm extëmë Biiblyë jyënaˈany parë kyaj nduˈukmujkëm mëdë jäˈäy diˈib të yaˈëxkexy ets pën kyaj yajkäjpxtëgoyëdët ja nmëguˈukˈäjtëm, kyaj tiko nmëmäˈäy nmëdäjëm mä yˈuˈunyët ja diˈib të yaˈëxkexy. *