1, 2. ¿Wiˈix mbäät njäˈäyˈäjtëm parë Dios xykyupëjkëm?

MAYË jäˈäy myëmääy myëdäjtëp wiˈixë wiink jäˈäy wyinmaytyët mä yëˈë. Per diˈib ëtsäjtëm mbäät mas niˈigyë nmëmäˈäy nmëdäjëm, yëˈë wiˈixë Jyobaa xyˈijxëm. Pes yëˈë diˈib myëdäjtypyë kutujkën abëtsemy nyaxwinyëdë ets mä yëˈë “myuxyë jukyˈäjtën” (Sal. 36:9).

² Apostëlë Pedro yajxon tnimaytyaky ti tsojkëp nduˈunëm parë Jyobaa xykyupëjkëm, yëˈë jyënany: “Yajxon xyˈixtët wiˈix mjikyˈattët wäˈäts es extëmë Dios ttseky” (käjpxë 2 Peedrʉ 3:11). Tsojkëp njukyˈäjtëm wäˈäts parë Dios xykyupëjkëm, tyäˈädë yëˈë yˈandijpy nmëdäjtëm wäˈätsë jot winmäˈäny, nduˈunëm tijaty wäˈäts ets nDiosˈawdäjtëm wäˈäts. Nan tsojkëp njukyˈäjtëm extëmë Dios ttseky, mët ko ntsojkëm ets nwintsëˈkëm. Pääty parë Dios xykyupëjkëm, kyaj yëˈëyë tˈixäˈäny tijaty nduˈunëm, nan yˈixaampy wiˈix njäˈäyˈäjtëm. Pes yëˈë diˈib “tyukˈijxnäjxypyë korasoon”, yëˈë diˈib nyijäˈäwëp pën wäˈäts njukyˈäjtëm ets pën të naytyukëdëjkëm amumduˈukjot o kyaj (1 Crón. 29:17).

3. ¿Tijaty mbäät nnayajtëˈëwëm?

³ Satanás kyaj ttseky etsë Jyobaa xykyupëjkëm. Yˈëxtaabyë winmäˈäny parë xytyukmastuˈudäˈänëm ets kyaj mëët nnaymyaˈayëm. Ta yˈandaˈaky ets xywyinˈëˈënëm parë xytyukmastuˈudäˈänëmë Dios (Fwank 8:44; 2 Kor. 11:13-15). Pääty, jëjpˈam ets nnayajtëˈëwëm: “¿Wiˈixëtsë Satanás xywyinˈëënäˈäny? ¿Tijëts mbäät nduny parëts xëmë mëdë Jyobaa naymyayëdët?”.

4. ¿Wiˈixë Satanás xytyukmastuˈudäˈänëmë Dios, ets tiko?

⁴ Santiago, ja Jesusë yˈëxpëjkpë tkujäˈäyë: “Jaˈagyëjxmë jäˈäy pyekytyunäˈändë ko ja yˈatsojkën nyaytyukwinˈëënëdë, es mët ja kyëˈëmtsojkën nyayajtëgoyëty”. Ta yˈakjënany: “Ko jäˈäy ttsoktë diˈibë kyaj yˈoyëty, jaa myiny ja pojpë; es ko tyäˈädë pojpë  myëjwindaknë, jaa myiinnë ja oˈkën” (Sant. 1:14, 15). Satanás yëˈë jyaˈabëkaambyë ngorasoonˈäjtëm mä yˈityë tsojkën parë xytyukmastuˈudäˈänëmë Dios.

5, 6. 1) ¿Wiˈixë Mëjkuˈu dyajmäˈädäˈänyë ngorasoonˈäjtëm? 2) ¿Tijatyë Satanás yajtuumpy parë dyajmäˈädäˈänyë ngorasoonˈäjtëm, ets nuˈun kujk dyajtuny?

⁵ ¿Wiˈixë Mëjkuˈu dyajmäˈädäˈänyë ngorasoonˈäjtëm? Biiblyë jyënaˈany: “Niˈamukë naxwinyëdë jäˈäy yˈity mä ja axëkjäˈäy dyajtunyë myëkˈäjtën” (1 Juan 5:19, Traducción del Nuevo Mundo). Pääty dyajtuny, “tëgekyë diˈibë jaˈäjtp naxwiiny” (käjpxë 1 Fwank 2:15, 16). Satanás, kanäk mil jëmëjt kujk ttukniwinmayë wiˈixë jäˈäy dyajtëgoyaˈany ets yëˈë yajtuumpy tijaty jaˈäjtp yä naxwiiny. Pääty, tsojkëp nnaygyuentˈäjtëm tijaty mëët xyajtëgoyäˈänëm (Fwank 17:15).

⁶ Satanás yajnaxkëdäˈägaambyë axëëkpë tsojkën mä jot korasoon. Apostëlë Juan tëgëk pëky tmaytyaky: 1) “diˈibë niniˈx këbäjk tsyejpy”, 2) ko jäˈäy “tˈatsoktë ko tii tˈixtë” ets 3) “ko myëj pyäädëdë ko tii tmëdat tjaygyaptë”. Tyäˈädë tëgëk pëkypyë, yëˈë diˈibë Mëjkuˈu yajtuun ko mëdë Jesus nyaybyatë mä ja lugäärë äänëˈëk tëtsëˈëkpë. Ets kom kanäk jëmëjt kujk dyajtuny, të tjantsy nyijäˈäwënë diˈibë mbäät dyajtuny mët niduˈuk niduˈugë jäˈäy, pes nyijäˈäwëp ti yajtëgoyanëp. Pääty, min nˈokˈijxëm wiˈix dyajtuuny mä Eva ets mä Jesus, ets ti tyuundë, ta net nˈijxëm ti mbäät nduˈunëm parë kyaj xyajtëgoˈoyëm.

7. ¿Wiˈixë Satanás dyajtuuny “diˈibë niniˈx këbäjk tsyejpy” parë dyajtëgooyë Eva?

⁷ Niˈamukë naxwinyëdë jäˈäy tsojkëp kyay yˈuugët parë jyukyˈatët. Päätyë Jyobaa ojts dyajkojˈyë naxwinyëdë parë yˈit wyindëwëdë jeˈxy pëky. Perë Satanás mbäät dyajtunyë tyäˈädë tsojkën diˈib nmëdäjtëm ko ngayäˈän nˈuugäˈänëm parë xytyukmastutëmë Diosë tyuunk. Min nˈokˈijxëm wiˈixë Eva dyajtëgooy. Tˈanmääy ko mbäädë nety tjeˈxy ja ujtstëëmp “mëdiˈibë myëëtˈäjtypën ja jot winmäˈäny ja oybyë ets ja ëxëëkpë” ets ko kyaj yˈoogäˈäny. Niˈigyë tˈanmääy ko pën jyëˈxtëp duˈun yˈitäˈändë extëmë Dios (Gén. 2:9; 3:1-6, Mʉgoxpʉ ja̱ noky mʉdiˈibʉ jyaayʉn Moisés [MNM]). Duˈunë Satanás ttukjaygyujkë Eva ko kyaj nety jyëjpˈamëty tmëmëdowëdë Jyobaa parë jyukyˈatët. ¡Mëjwiin kajaa yˈandaky! ¿Ti nety mbäädë Eva ttuny? Tuk pëky, tjëjpkudijët ets ninuˈun tkawinmayët, ets ja tuk pëky, twinmääyˈadëˈëtsët ets tnasˈixët parë ja tsojkënë tyuktëkëdët ets tjëˈxët ja ujtstëëmp. Jotmaymyëët njënäˈänëm ko Eva niˈigyë twinmääy ja ujtstëëmp diˈib ja Mëjkuˈu tukˈijxë, oyë nety jyamëtyë wiinkpë ääytsyäˈäm ujtstsäˈäm. Ta “tuˈuk tnëdujky, ets ojts tjëˈkxy”. Të netyë Satanás dyajnaxkëdaˈaky mä ja Eva jyot kyorasoon diˈibë netyë Jyobaa të dyajkuboky.

8. ¿Wiˈixë Satanás dyajtuuny “diˈibë niniˈx këbäjk tsyejpy” parë tjayajtëgoyanyë Jesus, ets tiko kyaj tmëmadaky?

 ⁸ Satanás, nan yëˈë tyäˈädë trampë yajtuun ko tjayajtëgoyanyë Jesus mä ja lugäärë äänëˈëk tëëtsëˈëkpë. Kom ja nety të yˈayuˈäjnë 40 xyëë 40 ux, ta Mëjkuˈu tjayajtëgoyanyë Jesus ko ttukˈatsojky ja käˈäy ukën, duˈun tˈanmääy: “Pën mijtsë dëˈën ja Dios mˈUˈunkˈäjtëp, yajjëmbitë tyäˈädë tsää tsäjkaaky” (Luk. 4:1-3). Jesus, mbäädë nety ttuny ja miläägrë parë ja yuu nyaxët o mbäät kyaj ttuny. Yëˈë nyijäˈäwëbë nety ko kyaj mbäät dyajtuny ja mëjää parë këˈëm nyayajjotkujkˈatëdët. Oyë nety jyayuˈoogyëty, yëˈë niˈigyë yajtsobat oy yˈitët mëdë Tyeety ets kyaj dyuˈunëty ja käˈäy ukën. Pääty tˈatsoojëmbijtyë Satanás: “Ja Diosë jyaaybyajtën jyënaˈany: Kyaj jyatyimˈyëˈëyëtyë tsäjkaaky mëët jyikyˈaty ja jäˈäy, tyukjikyˈatëp mët tëgekyë Diosë yˈayuk” (Mat. 4:4; Luk. 4:4).

9. ¿Ti yˈandijpy ko jäˈäy “tˈatsoktë ko tii tˈixtë”, ets wiˈixë Satanás dyajtuuny parë twinˈëˈënyë Eva?

⁹ Apostëlë Juan nan ojts tnigajpxy jatuˈugë trampë, ko jäˈäy “tˈatsoktë ko tii tˈixtë”. Tuˈugë jäˈäy mbäät ti tˈatsoky ko jeˈeyë tˈixy. Satanás yëˈë yajtuunë tyäˈädë trampë ko tˈanmääyë Eva ko ijxwäˈkxandëp ko tjëˈxtët ja ujts tëëm. Ko Eva niˈigyë tˈijxy, ta niˈigyë tˈatsojky. Ets tˈijxy ko “jantsy oyjyëˈkxnë”.

10. ¿Wiˈixë Satanás tjayajtëgoyanyë Jesus ko tijaty ttukˈijxy, per ti tyuunë Jesus?

¹⁰ ¿Wiˈixë Satanás tjayajtëgoyanyë Jesus ko tijaty ttukˈijxy? Ko yajtukˈijxy “tuk pojën tëgekyë it naxwinyëdë. Es ja mëjkuˈugopk jyënany: Ëjts mij nmoˈoyëp ja kutujkën esë mëjˈäjtën mä tëgekyë naxwinyëdë diˈibë ndukˈijxypy” (Luk. 4:5, 6). Jesus kyaj ttimˈijxy mëdë wyiin tukëˈëyë ja anaˈamën, duˈunë Satanás tyukˈijxë extëmxyëp tsuujoty kumäˈäyoty, mët ko wyinmääy ko mbäät tyëgoy ko tˈixët ja mëjˈäjtën. Pääty tˈanmääy: “Pën mnaygyoxtënääytyakëp nwinduuyëts es xyˈawdatëdëts, nmoˈoyëp tëgekyë” (Luk. 4:7). Jesus kyaj duˈun jyaˈayˈatany extëmë Satanás tjatsejky. Pääty netyë tˈatsooy: “Yëˈë Diosë jyaaybyajtën dëˈën jyënaˈany: Awdat ja mWintsën Dios, es mëdun yëˈë naytyuˈuk” (Luk. 4:8).

11. ¿Wiˈixë Satanás twinˈëˈënyë Eva?

¹¹ Ok, ta apostëlë Juan jyënany “myëj pyäädëdë ko ti tmëdat tjaygyaptë”. Adán mëdë Eva yajnigëxëˈktë mëjˈat këjxmˈat, oyë nety kyaj pënë jäˈäy diˈib tyukˈixtëp tijaty myëdäjttëp. ¿Wiˈix? Ko Satanás dyajtëgoyanyë Eva, ta ttukjaygyujkë ko tamë netyë oyˈäjtën diˈibë Jyobaa kyaj myoˈoyaˈanyëty. Ojts tˈanëëmë ko pën jyeˈxypy ja ujtstëëmp “mëdiˈibë myëëtˈäjtypyën ja jot winmäˈäny oybyë etsë axëëkpë”, ta  “nëjkx winë tnijäˈäwëtyaˈay ets nëjkx jyaˈty extëmë Dios” (Gén. 2:17; 3:5, MNM). Ko Duˈunë Satanás jyënany, ta ttukjaygyujkë Eva ko mbäät këˈëm nyayajukyˈatyëty. Ets waˈan tmëbëjky ko duˈun yaˈˈanmääy mët ko tyuktëjkë mëjˈat këjxmˈat. Eva wyinmääy ko kyaj nety yˈoogäˈäny, ta ojts tjeˈxy ja ujtstëëmp. ¡Per naywyinˈëˈënëbë nety!

12. ¿Ti ja tuk pëkyë Satanás yajtuun parë tjayajtëgoyanyë Jesus, per wiˈix yˈatsooy?

¹² Jesus kyaj duˈun yˈadëtsy extëmë Eva, yëˈë ojts xymyoˈoyëmë ijxpajtën ko yˈijty yujy tudaˈaky. Satanás, ta jatëgok tjayajtëgoyanyë Jesus parë ttunët diˈibë jäˈäy mëjˈixy mëjmëdoy jyawëp ets tˈijxmatsëdë Jyobaa, per yëˈë nyijäˈäwëbë nety ko duˈun yˈadëˈëtsët, yëˈë nety yajnigëxëˈkypyë mëjˈat këjxmˈat. Pääty tˈatsooy: “Nandëˈën jyënaˈany ja Diosë jyaaybyajtën: [Këdii] xyˈamdoy es ttunët ja mWintsën Dios diˈibë kyaj yˈoyëty” (käjpxë Lukʉs 4:9-12).

13, 14. ¿Wiˈix tyamë Satanás dyajtunyë trampë?

¹³ Mä tyäˈädë tiempë, Satanás nan yëˈë yajtuumpy extëm diˈib yajtuun mä Eva ets mä Jesus. Yëˈë yajtuumpy “diˈibë niniˈx këbäjk tsyejpy”, parë dyajmëjwindëkë mä jäˈäy axëëk yˈity tsyëënë ets dyajkääynyiˈiky dyaˈukniˈigyë. Nan tyukˈatsojkypyë jäˈäy parë tˈixët mä kyëxëˈëktë jäˈäy niwäˈäts ëxwäˈäts, ets mas niˈigyë mä Internet, duˈun dyajtëgoy ja diˈib kyaj nyaygyuentˈatyëty. Ets nan tyukˈatsojkypy parë “myëj pyäädëdë ko tii tmëdat tjaygyaptë”, tyuktëkëdë mëjˈat këjxmˈat, tjawëdë ko myëdäjttëbë kutujkën etsë mëkjäˈäyˈäjtën.

¹⁴ “Naxwinyëdë winmäˈäny”, mbäät yaˈijxkijpxyë mët tijaty yajtuumpy tuˈugë äjkxmäjtspë. Ja äjkx mbäät pojënë tjantsy nyiminy, per kyaj tnijawë ko tap ja xuˈuny ayuˈutsyë. Satanás nan yëˈë yajtuumpy tijatyë naxwinyëdë jäˈäy jyäˈäwëp ko yajtëgoyˈajtypy parë ttuktuny diˈibë Dios yajkubojkypy. Kyaj kyëxëˈëky tijaty mëdë Satanás xyajtëgoyäˈänëm ets të ttuknibëjtäägë parë xytyuktëjkëmë axëëkpë tsojkën ets dyajmäˈätyë ngorasoonˈäjtëm. Satanás xytyukmëbëkäˈänëm ko mas jëjpˈam nayajjotkujkˈäjtëm ets kyaj dyuˈunëty nmëmëdoˈojëmë Jyobaa. ¿Naytyukwinˈëënäˈänëmë net?

15. ¿Wiˈix xypyudëjkëmë Jesusë yˈijxpajtën parë njëjpkuwäˈkëm tijaty mëdë Satanás xyajtëgoyäˈänëm?

¹⁵ Eva naytyukwinˈëˈënë Satanás, perë  Jesus kyaj yajmëmadaky. Tyukkäjpxpajtë Biiblyë ko jyënany: “Diosë jyaaybyajtën jyënaˈany” o “nandëˈën jyënaˈany ja Diosë jyaaybyajtën”. Pën nˈëxpëjkëm yajxonë Biiblyë ets pën nˈixyˈäjtëm yajxon, nëjkxëp njamyajtsëmë tekstë diˈib mbäät xypyudëjkëm parë njëjpkuwäˈkëm ko ti xyajtëgoyäˈänëm (Sal. 1:1, 2). Ko nanduˈun nwinmäˈäyëmë yˈijxpajtënë Dios mëduumbë diˈibë Biiblyë myaytyakypy, nan yëˈë xypyudëkëyäˈänëm parë nbanëjkxëmë yˈijxpajtën (Rom. 15:4). Ets xykyuwäˈänäˈänëm mëjwiin kajaa ko nwintsëˈkëmë Jyobaa, ko ntsojkëm diˈib yëˈë tsyejpy ets ko nˈaxëkˈijxëm diˈib yëˈë yˈaxëkˈijxypy (Sal. 97:10).

16, 17. ¿Wiˈixë jot winmäˈäny dyajnigëxëˈëgyë jäˈäyˈäjtën?

¹⁶ Apostëlë Pablo xyˈanmäˈäyëm parë nmëwinmäˈänybyatëm extëmë Dios wyinmay, kyaj extëmë naxwinyëdë jäˈäy wyinmay (Eb. 5:14). Ets xytyukjamyajtsëm ko tsojkëp nguentˈäjtëmë jot winmäˈäny. Jyënany: “Nyajtëgeebyëts oytyiˈibë winmäˈäny diˈibë yaˈˈadijkypy es yaˈixyˈatët ja Dios. Tëgekyë winmäˈänyëty ndukmëdijëpts es tmëmëdowdët ja Kristë” (2 Kor. 10:5). Tijaty nwinmäˈäyëm ja nyigëxëˈëky wiˈix njäˈäyˈäjtëm; pääty jëjpˈam ets nyajtuˈunëmë jot winmäˈäny mä diˈib oy (Filip. 4:8).

¹⁷ Pën itäˈänëm wäˈäts, tsojkëp njëjpkudijëmë jot winmäˈäny diˈib kyaj yˈoyëty etsë axëëkpë tsojkën. Jyobaa tsyejpy ets ntsojkëm “wäˈäts ää wäˈäts jot” (1 Tim. 1:5). Per kyaj yˈoyëty njäˈäytyëgoˈoyëm ko korasoon winˈëˈëmp; ets mbäät kyaj nbëjkëmë kuentë nuˈunën xyˈaxëktuˈunëm “tëgekyë diˈibë jaˈäjtp naxwiiny” (Jer. 17:9). Jëjpˈam ets nbanëjkxëm ja käjpxwijën extëmë apostëlë Pablo jyënany: “Naywyinmäˈänyˈixëdë miitsëty këˈëm, es xyˈixtët pën mmëbëjktëp” (2 Kor. 13:5). Pääty, ko nˈëxpëjkëmë Biiblyë, oy ko nnayajtëˈëwëm: “¿Tyukjotkëdakypyë Dios extëmëts nwinmay ets tijatyëts ntsojkënyëˈajtypy?”.

18, 19. ¿Tiko jyëjpˈamëty nduˈunëmë mëjää parë njäˈäyˈäjtëm extëmë Jyobaa ttseky?

¹⁸ Ja tuk pëky diˈib xypyudëkëyäˈänëm parë njëjpkudijëm “tëgekyë diˈibë jaˈäjtp naxwiiny”, yëˈë ko nmëdäjtëm winmäˈänyoty extëm tkujäˈäyë apostëlë Juan: “Dios yajkutëgoyaampy ja naxwinyëdë winmäˈäny mët tëgekyë diˈibë jäˈäy atsojktëp naxwinyëdë winmäˈänygyëjxm, per ja jäˈäy diˈibë kyuytyiimpy ja Diosë tsyojkën, jikyˈäjtp winë xëë winë tiempë” (1 Fwank 2:17). Tijatyë Satanás të dyajnaxkëdaˈaky yä naxwiiny, mbäät kyëxëˈëky ko jakäämp winë xëë, per jäˈtäämbë tiempë mä kyutëgoyaˈany. Pääty kyaj yˈoyëty nnaytyukwinˈëˈënëm tijaty yä naxwiiny, pes tim tsojk nyaxäˈäny kyëxäˈäny.

¹⁹ Apostëlë Pedro xyˈanmäˈäyëm ko tsojkëp njukyˈäjtëm extëmë Dios ttseky, myentrës nˈawijxëm ja Jyobaa myëj xëë, mä “yajnoˈogäˈäny es kyutëgoyaˈany mët ja jëën diˈibë ijtp tsäjwinm, es diˈibë jaaˈäjtp, tëgekyë jyëëywyäˈxtäˈäyët ko mëk tyoyët” (2 Peed. 3:12). Tim tsojk Jyobaa dyajkutëgoyaˈany tukëˈëyë axëkˈäjtën diˈib jaˈäjtp yä naxwiiny. Per mientrës jyaˈty, Satanás duˈunyëm dyajtunäˈäny “tëgekyë diˈibë jaˈäjtp naxwiiny” parë xywyinˈëënäˈänëm extëm twinˈëˈënyë Eva ets extëm tjawinˈëënanyë Jesus. Kyaj yˈoyëty nˈadëtsëm extëmë Eva diˈib yëˈëyë wyinmääy tijaty tyukˈoyˈatëp. Pes ko duˈun nˈadëtsëm, yëˈë nety ndiosˈäjtëmë Satanás. Nˈokpanëjkxëmë Jesusë yˈijxpajtën ets nˈokjëjpkudijëm tukëˈëyë diˈib xyajtëgoyäˈänëm, oyxyëp nuˈunë Satanás xyjatukˈoyˈijxëmbë. Pääty, nˈoktuˈunëmë mëjää parë njäˈäyˈäjtëm extëmë Jyobaa ttseky.