Oy mä jäˈäy tsyoonët, Dios myëdoopy ko myënuˈkxtaˈagyëty (Salmo 145:18, 19). Biiblyë xyˈanmäˈäyëm ets ndukmëtmaytyakëm ti nmëmäˈäy nmëdäjëm (Filipʉs 4:6, 7). Per ta nuˈkxtakën diˈib kyaj tˈoymyëdoy, extëm diˈib yajjäjtp agëbajky. (Käjpxë Matewʉ 6:7.)

Nan kyaj yajmëdoyë nyuˈkxtakën pënaty kyaj tmëmëdowdë Diosë yˈanaˈamën, oy tjanijawëdë (Proverbios 28:9). Extëm nˈokpëjtakëm, Dios kyaj tmëdooyë nyuˈkxtakënë ja israelitëty mët ko yajjäˈäyˈoˈktëbë nety. Pääty, tsojkëp nguytyuˈunëmë yˈanaˈamën parë Dios tmëdowëdë nuˈkxtakën. (Käjpxë Isaías 1:15.)

Pën kyaj nmëdäjtëmë mëbëjkën, Dios kyaj tmëdowäˈänyë nuˈkxtakën (Santya̱ˈa̱gʉ 1:5, 6). Pääty, tsojkëp nˈijtëm seguurë ko yëˈë tamˈäjtp ets ko naytyukjotmaytyuunëp mët ëtsäjtëm. Ets mbäät nyajkëktëjkëmë mëbëjkën ko nˈëxpëjkëmë Biiblyë, pes myëmiimpy tijaty yajkëktëjkëp ja mëbëjkën. (Käjpxë Ebreeʉsʉty 11:1, 6.)

Nan tsojkëp nuˈkxtakëm amumduˈukjot ets mëdë yujyˈat tudaˈakyˈat, duˈun extëmë Jesus ttuuny (Lukʉs 22:41, 42). Pääty en lugäärë Dios nˈanmäˈäyëm ti mbäät ttuny, tsojkëp nduˈunëmë mëjää parë njaygyujkëm ti yëˈë nyiˈanaˈamëp. ¿Wiˈix? Ko ngäjpxëmë Biiblyë. Duˈuntsoo ja nuˈkxtakën tyuˈugyët mët diˈib yëˈë tsyejpy. (Käjpxë 1 Fwank 5:14.)