“Mä ja tiempë mä yˈanaˈamdë reyëty yëˈë Dios diˈib tsäjpotm dyajnaxkëdäˈägäˈäny tuˈugë anaˈamën diˈib ninäˈä kyakutëgoyaˈany. Etsë tadë anaˈamën kyaj yajmoˈoyaˈanyë wiink käjpn. Dyajjëmbitäˈäny puˈxm ets dyajjëjpkëxäˈäny tukëˈëyë anaˈamën, ets yëˈëyë jeˈeyë itäämp winë xëë winë tiempë.” (Daniel 2:44.)

Diosë Kyutujkën yëˈë tuˈugë gobiernë diˈib tsäjpotm yajpatp ets yëˈë anaˈambë Jesukristë. Yëˈë wyingudëgatsˈataambyë wintsëndëjk diˈib tyam jaˈäjttëp, ets yëˈë yˈixaampy parë yajtunëdë Diosë tsyojkën yä Naxwiiny extëm tsäjpotm (Matewʉ 6:9, 10). Ninäˈä kyawingudëgatsˈatäˈänyëtyë naxwinyëdë jäˈäyë gyobiernë, pes yajkutukäˈäny “winë xëë winë tiempë ja nYajnitsokpëˈäjtëm, ja Nintsënˈäjtëm Jesukristë”. Pääty seguurë ko njukyˈatäˈänëm agujk jotkujk (2 Peedrʉ 1:11).

“Pes këˈëm ja mëjkuˈugopk Satanás nyayajtëgatsyëty es nyayajkëxeˈegyëty extëm tuˈugë Dios ja yˈanklës. Pääty kyaj mëk yajjawë ko yëˈë Satanásë myëduumbëty nandëˈën nyayajtëgatsëdë es nyayajkëxëˈëgëdë extëmë Dios mëduumbëty. Per oknëm ja Dios tyukkumëdowäˈänyëty extëm nyitëkëty.” (2 Korintʉ 11:14, 15.)

Relijyonk diˈib kyaj tyëyˈäjtënëty yajxon nyigëxëˈëgäˈäny ko yëˈë Mëjkuˈu jaˈäjtëdëp. Ets tukëˈëyë jyëjptëgoyaˈany, nanduˈun diˈib panëjkxëdëp ets diˈib yajpëyëˈktëbë nëë neˈpyny. Ta pënaty tsyojktëp “ja jiikypyë Dios” etsë tëyˈäjtënbë, tˈawdatäˈändë mëdë “mëbëjkën”, “mët winë jyot jyäˈäjën es mëdë tëyˈäjtën”. ¡Taanëm jyaˈˈatäˈänyë jotkujkˈäjtën etsë tuˈugyëˈäjtën! (1 Tesalónikʉ 1:9; Éfesʉ 4:5; Fwank 4:23.)

“Dios yajtëtsxëdët tëgekyë ja wyinëë. Kyaj yˈokˈijnët ja oˈkën, jëˈëy yaxën o ja pëjk adoˈonën, jaˈa ko tëgekyë diˈibë të yˈity, të jaˈa nyaxy kyexy.” (Diˈibʉ Jatanʉp 21:3, 4.)

Jyobaa duˈun ttunäˈäny mët yëˈëgyëjxmë yˈUˈunk, diˈib kyëyäjkë jyukyˈäjtën ëtsäjtëmgyëjxm (Fwank  3:16). Ko Jesus yˈanaˈamët, ta njëmbitäˈänëm ak wäˈäts jäˈäy. Kyaj yˈokjaˈˈatanë ayoˈon, pesë Dios yëˈë mëdë jäˈäy yajpäädäˈäny ets dyajtëˈëtsäˈänyë winëë. Kyaj nyekyjaˈˈatäˈänyë ayoˈon ets kyaj pën nyakyyajpäädäˈäny pokyjyaˈay. “Pënaty jukyˈäjttëp tëyˈäjtën myëët tjaˈˈatäˈändë naxwinyëdë ets ttuktsëënëyäˈändë xëmëkyëjxm.” (Salmo 37:29.)

“[Jesukristë] ta tmäjtsy ja sarpyentë, tadë mëjkuˈugopk, ja Satanás, es tkëwëˈëny ttekywyëˈëny mët ja mëj kadenë, es yˈitët tsimy tuk mil jëmëjt. Ta tkujëbijpë këk jutoty, es dyajniˈadijky ijxwëˈëmën mëët këdiibë tnekywyinˈëënët ja naxwinyëdë jäˈäyëty.” (Diˈibʉ Jatanʉp 20:2, 3.)

Ni Mëjkuˈu ets ni kaˈoybyëtëjk tkanekymyëdatäˈändë mëjää, pes yajkëwëënan yajtekywyëënandëp ets yajkujëbipëyäˈändë “këk jutoty” mä kyaj mbäät ti tnekytyundë. Kyaj tijatyë naxwinyëdë jäˈäy tnekytyuktunäˈändë. ¡Jantsy oy njukyˈatäˈänëm ko nety të nˈawäˈätspëtsëˈëmëm mä Satanás etsë kyaˈoybyëtëjk!

Tyäˈädë tiempë diˈib ndukjukyˈäjtëm jyëjpkëxäˈäny mä ja mëk ayoˈon diˈibë Jesus nyigäjpx ko jyënany: “Yˈitäˈäny ja mëk ayoˈon, extëm ni näˈänëm kyajaty axtë mä naxwinyëdë tsyondaky, es ni dëˈën kyanakyjyatäˈänyëty jatëgok” (Matewʉ 24:21).

Tyäˈädë mëk ayoˈon mëjwiin kajaa tyunäˈäny jyatäˈänyëty, ets jyëjpkëxäˈäny mä “Armajedon”, mä tsyiptunäˈäny “ja Nintsënˈäjtëm Dios diˈibë tëgekyë mëkˈäjtën myëdäjtypy” (Diˈibʉ Jatanʉp 16:14, 16).

Pënaty tsyojktëbë tëyˈäjtën jyëjpˈijxtëp parë jyëjptëgoyëdë tyäˈädë axëëkpë jukyˈäjtën. Min nˈokˈijxëm tuˈuk majtskë kunuˈkxën diˈib yajminaambyë Diosë Kyutujkën.

“Tëgoy myay ja jäˈäy” jyukyˈatäˈändë mä ja jembyë jukyˈäjtën agujk jotkujk: Diosë yˈAyuk jyënaˈany ko mayjyaˈay tsyokwëˈëmäˈändë mä ja “mëk ayoˈon” ets jyukyˈatäˈändë mä ja jembyë jukyˈäjtën (Diˈibʉ Jatanʉp 7:9, 10, 14; 2 Peedrʉ 3:13). Ets jyënäˈänäˈändë ko Jesukristë yëˈë të yajtsoˈogëdë “ja Diosë Byorreeguˈunk diˈibë wëˈëmp extëmë wintsëˈkën es yajpojpënitëgoyët yä naxwiiny” (Fwank 1:29).

Kajaa ndukˈoyˈatäˈänëm extëmë Dios xyaˈëxpëkäˈänëm: Mä jembyë jukyˈäjtën, yëˈë “naxwinyëdë wyindukäˈäny mëdë Jyobaa yˈëxpëjkën” (Isaías 11:9). Tyäˈädë ëxpëjkën, nan xytyukniˈˈixëyäˈänëm wiˈix njukyˈäjtëm tuˈugyë mëdë nmëguˈukˈäjtëm ets mët tijatyë Dios të dyajkojy. Jyobaa twandaˈaky: “Ëjts, Jyobaa, ëjtsën mijts xyDiosˈäjtp, Ja diˈib mdukniˈˈijxëp parë këˈëm xytyukˈoyˈatët, Ja diˈib mdukniˈˈijxëp diˈibë nëˈë tuˈu mbäät xyyoˈoy” (Isaías 48:17).

Ja jiiky mëguˈuk diˈib të yˈoˈknëdë jyukypyëkäˈändë: Ko Jesus jyukyˈajty yä Naxwiiny, ojts dyajjukypyekyë myëtnaymyaayëbë Lázaro (Fwank 11:1, 5, 38-44). Tyäˈädë yëˈë xytyukˈijxëm ti diˈibë Jesus tyunaampy ko tyëkët anaˈambë mä Diosë Kyutujkën (Fwank 5:28, 29).

Yajtunäˈänyë tëyˈäjtën ets jyaˈˈatäˈänyë jotkujkˈäjtënë winë xëë: Mä Jesus yˈanaˈamäˈäny yajtunäämbë tëyˈäjtën. Yëˈë nyijäˈäwëp wiˈixë korasoon yajpääty ets mbäät tˈixy pën oyjyaˈay ets pën axëkjäˈäy. Ets pënaty kyaj tmastuˈudäˈändë axëëkpë nëˈë tuˈu, kyaj yajpäädäˈändë mä jembyë jukyˈäjtën (Salmo 37:9, 10; Isaías 11:3, 4; 65:20; Matewʉ 9:4).

Diˈib yä të nˈijxëm, yëˈë jeˈeyë tuˈuk majtsk diˈib ojts yajnaskäjpxë mä Biiblyë diˈib adëwäämp mä tiempë myiny kyëdaˈaky. Ko Diosë Kyutujkën yˈanaˈamtsondäˈägët yä Naxwiiny, xëmë jyaˈˈatäˈäny “mëjwiin kajaa ja tuˈugyëˈäjtën” (Salmo 37:11, 29). Ets tukëˈëyë jyëjptëgoyaˈany diˈib tyamë naxwinyëdë jäˈäy yaˈˈayoop. Dios duˈun të tkëyakyë yˈayuk: “Ëjts nyajkejpy tëgekyë ak jemy [...] tyäˈädë diˈibëts ngajxypy, tëyˈäjtënëˈë es mbäät xymyëbeky” (Diˈibʉ Jatanʉp 21:5).