Mä siiglë 17, tuˈugë ëxpëkyjyaˈay diˈib xyëˈäjtypy Edward Herbert diˈib Gran Bretania, jyënany: “Jäˈäy diˈib kyaj tpokymyeˈkxyë myëguˈuk duˈunxyëp extëm këˈëm tjijtäˈäy ja puentë mä nyaxy”, tyäˈädë yëˈë xytyukˈijxëm ko tsojkëp nbokymyaˈkxëmë nmëguˈukˈäjtëm, yëˈko nan nëjkxëp näˈä ntsojkëm ets nyapokymyaˈkxëm (Matewʉ 7:12). Per tam ja tuk pëky tiko jyëjpˈamëty ets duˈun nduˈunëm, min nˈokˈijxëm wiˈixë apostëlë Pablo jyënany. (Käjpxë Kolosʉ 3:13.)

Kom niˈamukë ak pokyjyaˈay nyajpatëm, ta näˈäty ndukjotmäˈtëmë nmëguˈukˈäjtëm o axëëk nyajnayjäˈäwëm, ets näˈäty ëtsäjtëm duˈun yajtuˈunëm (Romanʉs 3:23). ¿Ti mbäät nduˈunëm parë tuˈugyë nˈijtëm? Dios wyinmäˈänymyooyë Pablo parë dyajkyë tyäˈädë käjpxwijën ko tsojkëp nnaymyëmaˈkxtujkëm ets naybyokymyaˈkxëm. Duˈunyëm tyam xypyudëjkëm oy të nyäjxnë majtsk mil jëmëjt. Min nˈokˈijxëm wiˈix jyënany.

“Naymyëmaˈxtukëdë nixim niyam.” Ko jyënaˈany “naymyëmaˈxtukëdë”, mä ayuk grieegë yëˈë yajjaygyukëyanëp ets naymyëmadakëm. Tuˈugë jäˈäy diˈib yˈëxpëjkpëtsëëmbyë Biiblyë, jyënaˈany ko Dios mëduumbë diˈib myëmadakypyë myëguˈuk “myëmadakypyë diˈib mëdëgooyëp o ja jyaˈayˈäjtën diˈib axëëk yajnayjäˈäwëp”. Ko jyënaˈany “nixim niyam”, yëˈë yˈandijpy naymyëmadakëm aminy axëpy. O ja tuk pëky njënäˈänëm, pën nˈëxkäjpëm ko nan nmëdäjtëmë jäˈäyˈäjtëm diˈib mbäädë nmëguˈukˈäjtëm axëëk yajnayjäˈäwëdë, yëˈë mbäät xypyudëjkëm parë nˈijtëm tuˈugyë mëdë nmëguˈukˈäjtëm diˈib kyaj ndukjotkëdakëmë jyaˈayˈäjtën. Per ¿ti mbäät nduˈunëm ko ti nyajpojkëm?

“Naymyaˈxëdë pën ja pën nyaymyëdëgoyëty mët ja wiinkpë.” Tuˈugë jäˈäy diˈibë yˈëxpëjkpëtsëëmbyë Biiblyë jyënaˈany ko diˈib të yajkäjpxnaxy “naymyaˈxëdë”, mä ayuk grieegë mas kajaa nyikejy, mët ko yëˈë yajjaygyujkëp nˈoyjyaˈaytyakëm mëjwiin kajaa. Wiinkpë ëxpëjkpajn jyënaˈany ko tyäˈädë ayuk mbäät yëˈë tˈandijy “ko ti oyˈäjtën pën ndukmëduˈunëm, ko nduˈunëmë mayˈäjtën ets nduˈunëm tijaty parë wiinkpë ttukˈoyˈatët”. Oyjyaˈaytyakëmë nety ko ja nmëguˈukˈäjtëm nduˈunëmë myayˈäjtën parë nbokymyaˈkxëm, oyë nety të xymyëdëgoˈoyëm. Per ¿tiko nbokymyaˈkxëm? Yëˈko nan nëjkxëp näˈä ntsojkëm ets ttunëdë mayˈäjtën parë xypyokymyaˈkxëm.

“Extëmë [“Jyobaa”, Traducción del Nuevo Mundo] oj mmaˈxëdë, dëˈën xytyundët nandëˈën miitsëty.” Pääty jyëjpˈamëty ets nbokymyaˈkxëmë nmëguˈukˈäjtëm, yëˈko nanduˈunë Jyobaa xypyokymyaˈkxëm (Miqueas 7:18). Nˈokwinmäˈäyëm wiˈixë Jyobaa ttuunë myayˈäjtën pënaty jantsy jodëmbijttëp. Yëˈë kyaj pyokyjyaˈayëty extëm ëtsäjtëm. Per xypyokymyaˈkxëm xondaˈakyˈää xondaˈakyjyot ets amumduˈukjot oy tjanijawë ko ninäˈä xykyaˈˈamdowäˈänëmë mayˈäjtën parë nbokymyaˈkxëm. Jyobaa xymyoˈoyëmë oybyë ijxpajtën tidën yˈandijpy pokymyaˈkxën.

Ko Jyobaa xypyaˈˈayoˈowëm, ta niˈigyë nmëwingoˈonëm ets nbanëjkxäˈänëmë yˈijxpajtën (Éfesʉ 4:32–5:1). Pääty, nˈoknayajtëˈëwëm: “Pënë Jyobaa xypyokymyaˈkxpëts mëjwiin kajaa, ¿tikots ngapokymyaˈkxët ja nmëbokyjyaˈayëts diˈib myëkjäˈäwëp kots të xymyëdëgoy?” (Lukʉs 17:3, 4).