Génesis yëˈë myaytyaktsoˈompy wiˈix tijaty kyojtsondaky: “Ko tsyonëˈky tsyondaky, yëˈë Dios yëˈë ojts dyajkojy ëgäˈäny yëˈë tsäjp ets yëˈë naxwinyëdë” (Génesis 1:1, Mʉgoxpʉ ja̱ noky mʉdiˈibʉ jyaayʉn Moisés). Ko Dios dyajkojtääyë ääy ujts etsë jëyujk animal, ta net ojts dyajkojy ja tim jawyiimbë naxwinyëdë jäˈäy, Adán mëdë Eva. Dios kyaj ojts yajkojëdë extëmë jëyujk animal, duˈun ojts yajkojëdë extëm yëˈë jyaˈayˈaty, mbäädë nety këˈëm twinˈixtë ti tyunandëp, per yˈixandëbë nety wiˈix wyimbëtsëmy. Pën myëmëdoodëbë nety ja Diosë yˈanaˈamën, mbäädë nety tˈuˈunkˈattë niˈamukë naxwinyëdë jäˈäy diˈibë nety jukyˈatandëp winë xëë ets agujk jotkujk yä Naxwiiny, extëmë Dios ttuknibëjtakë.

Per ta tuˈugë anklës dyajtuundëgooyë Adán mëdë Eva. Duˈun nyayajjëmbijtë Satanás, diˈib nikajp “Mëtsip”. Yëˈë yajtuun tuˈugë tsäˈäny parë twinˈëˈënyë Eva. Tˈanmääy ko oy jyukyˈatët pën kyaj Dios yˈanaˈamëdë. Adán mëdë Eva ta tmëbëjktë extëmë Satanás yˈanmääyëdë, ets ta tmastuttë Dios diˈibë nety të yajkojëdë. Ko duˈun yˈadëtstë, ta dyajtëgooytyë ja jukyˈäjtënë winë xëëbë ets ta ojts xytyukninäjxëm ja poky etsë oˈkën.

Dios ta jyënany ko dyaˈoyëyaˈanyë tyäˈädë jotmay ets ko Adángë yˈuˈunk yˈënäˈk mbäät jyukyˈattë winë xëë. Ojts tnaskäjpxë ko myinäˈäny tuˈugë tëëm ääts diˈib yajkutëgoyaambyë Satanás etsë ayoˈon jotmay diˈib yajtëjkë mëdë Adán etsë Eva (Génesis 3:15). ¿Pënë tadë tëëm ääts? Okë nety yajnijawëyaˈany.

Satanás kyaj ttsejky etsë Dios ttunët tijaty tyuknibëjtakë, ta niˈigyë dyajmëjwindëjkë axëkˈäjtën. Päätyë Dios ojts ttuknibëjtäägë dyajkutëgoyaˈany ja axëkjäˈäytyëjk mëdë ayoˈonduu. Ta tˈanmääyë Noé ets tkojët tuˈugë arkë extëm tuˈugë mëj käjë diˈib kënaanëditëp nëëwingëjxy ets jap tsyoˈogët mëdë fyamilyë etsë jëyujk animal.

Ko nyajxy tuk jëmëjt, ta Noé mëdë fyamilyë pyëtsëëmdë mä ja arkë. Të nety kyutëgooytyaˈay ja axëkjäˈäy, per kyajnëmë nety yajnijawë pënën ja tëëm ääts.

(Yajpääty mä Génesis 1 axtë 11, Juudʉs 6, 14 etsë 15 ets Diˈibʉ Jatanʉp [Apocalipsis] 12:9.)