Oˈkpë duˈun yajpäättë extëm myäˈädë mët ko kyaj ti tjawëdë ets kyaj mbäät ti tnekytyundë. Perë Dios diˈibë yajkypy jukyˈäjtën mbäät jatëgok yajjukypyëkëdë. Duˈun dyaˈijxë ko Jesus tmooyë mëjää parë dyajjukypyejky kanäägë jäˈäy. (Käjpxë Eclesiastés 9:5 etsë Fwank 11:11, 43, 44.)

Dios të twandaˈaky ko pyäädaambyë tiempë mä dyajjukypyëkäˈänyë oˈkpë diˈib myëdäjtypy wyinmäˈänyoty. Dios diˈib myëdäjtypy tukëˈëyë mëjää, tsyojkënyëˈajtypy dyajjukypyëkäˈäny pënaty të yˈooktë. (Käjpxë Job 14:14, 15.)

Pënaty jukypyëkandëp nyijawëyandëp pën yëˈëjëty ets yˈëxkapandëp ja fyamilyë etsë myëtnaymyaayëbëty. Ets oyë nyiniˈkx kyëbäjk të wyindëgooynyëdë, Dios moˈoyanëdëp jatëgokë jembyë nyiniˈkx, ets duˈunyëm yˈixˈatäˈändë extëm ijty. (Käjpxë 1 Korintʉ 15:35, 38.)

Niwaanë jäˈäy diˈib jukypyëkandëp jam tsäjpotm (Diˈibʉ Jatanʉp [Apocalipsis] 20:6). Perë nimaybyë jyukypyëkäˈändë yä Naxwiiny mä ja it lugäärë tsujpë. Ta jatëgok dyajtsondäˈägäˈändë jyukyˈäjtën ets ninäˈä kyanekyˈoogäˈändë. (Käjpxë Salmo 37:29 etsë Apostʉlʉty 24:15.)