¿Mtsojkënyëˈajtypy mjukyˈatäˈäny winë xëë mëdë mfamilyë mä kyaj nyekyjaˈˈatëdë yuu päˈäm? ¿Mtsojkënyëˈajtypy parë kyaj nyekyjaˈˈatëdë ayoˈon, pëjk adoˈonën etsë oˈk tëgoˈoyën? Tyäˈädë kyaj dyuˈunëty extëmë tsuu kumäˈäy, jantsy tunan jantsy jatanëbë duˈun, pes yëˈë Dios diˈib të twandaˈaky. Min nˈokˈijxëm wiˈix yˈadëwäˈäny diˈib të yajwandaˈaky mä Diˈibʉ Jatanʉp o Apocalipsis 21:3-5 (käjpx).

“Dios yajtëtsxëdët tëgekyë ja wyinnëë.” (Diˈibʉ Jatanʉp 21:4.) ¿Diˈibë winëë yajtëˈëtsaampy? Kyaj yëˈëjëty ja winëë diˈib pëtsëëmp ko nxondakëm ets nan kyaj yëˈëjëty diˈib kyuwaambyë wiin, yëˈë duˈun diˈib pëtsëëmp ko njotmayˈoˈkëm. Dios kyaj jeˈeyë dyajtëˈëtsäˈänyë winëë, nanduˈunën dyajjëjptëgoyaˈanyë ayoˈon etsë pëjk adoˈonën diˈib xyajjëˈëy xyajˈyaxëm.

“Kyaj yˈokˈijnët ja oˈkën.” (Diˈibʉ Jatanʉp 21:4.) Diˈib mas niˈigyë xyajjëˈëy xyajˈyaxëm, yëˈë ko jyaˈˈatyë oˈk tëgoˈoyën. Perë Jyobaa yaˈˈawäˈätspëtsëmaampy pënaty mëmëdoojëp. ¿Wiˈix ttunäˈäny? Ko dyajjëjptëgoyaˈanyë poky kaytyey diˈib të xytyukninäjxëmë Adán (Romanʉs 5:12). Jyobaa wäˈätsë jäˈäy dyajjëmbitäˈäny mët yëˈëgyëjxm ko Jesukristë ojts xykyuˈoˈkëm. * “Dios yajkutëgoyaampy” ja oˈkën diˈib xymyëtsipˈäjtëm (1 Korintʉ 15:26). Ta niˈamukë njukyˈatäˈänëm extëmë Dios ttuknibëjtakë, winë xëë winë tiempë ets kyaj nyekyjaˈˈatëdë yuu päˈäm.

“Kyaj yˈokˈijnët ja [...] pëjk adoˈonën.” (Diˈibʉ Jatanʉp 21:4.) ¿Ti pëjk adoˈonën kyaj nyekyjaˈˈatäˈäny? Jäj jëmuˈumën diˈib yajjäˈäwëp mä jot winmäˈäny, mä jot korasoon ets diˈib yajjäˈäwëp mä niniˈkx këbäjk. Tukëˈëyë tyäˈädë jyaˈˈaty mët ko nbokyjyaˈayˈäjtëm ets yëˈë diˈib miyonkˈamë jäˈäy yaˈˈayoowëdëp.

Tim tsojk jyëgaˈagäˈänyë jëˈëy yaxën, oˈk tëgoˈoyën etsë pëjk adoˈonën. Per waˈan mnayajtëyëty: “¿Mä njukyˈatäˈänëm? ¿Jam tsäjpotmë?”. Kyaj, tim jawyiin duˈun yajwandaˈaky: “Tyamë net ja Dios yˈity mët ja jäˈäyëty”, etsë jäˈäyëty jyukyˈattë yä Naxwiiny (Diˈibʉ Jatanʉp 21:3). Myëmajtsk pëky yajwandaˈaky ko “kyaj yˈokˈijnët ja oˈkën”, tyäˈädë yëˈë yˈandijpy ko të nety yˈokˈijtpë oˈk tëgoˈoyën, per të nety jyëjptëgooytyaˈay. Jam tsäjpotm kyaj jyamˈatyë oˈkën, per yä Naxwiiny taaˈäjtp ets tyëjkë desde ko nety të tsyondaˈagyë jukyˈäjtën. Yajxon nbëjkëmë kuentë ko ja jukyˈäjtënë oybyë, yä Naxwiiny nyajmoˈoyäˈänëm.

Jyobaa tsyejpy ets nmëbëjkëm tijaty të twandaˈaky. Ko nety të tnigäjpxtäˈäy tijaty kunuˈkxën yajmiimpy, ta net jyënany parë nmëbëjkëm: “Ëjts nyajkejpy tëgekyë ak jemy”. Ets yˈaktimjënany: “Këxjäˈäy mët ko tyäˈädë diˈibëts ngajxypy, tëyˈäjtënëˈë es mbäät xymyëbeky” (Diˈibʉ Jatanʉp 21:5). ¿Tiko mijts mëdë mjiiky mëguˈuk xykyanijawëdë mas niˈigyë wiˈix mbäät myajpääty mëdë jäˈäy diˈib agujk jotkujk yˈixandëp wiˈix yˈadëy diˈibë Dios të twandaˈaky?