Disiembrë poˈo, abëtsemy nyaxwinyëdë jäˈäy tpëjtäˈäktë Jesusë yˈawinax extëm tuˈugë maxuˈunk ets kyoˈknë mä jëyujk animal yajpëjtaˈagyë jyeˈxy. Per ¿oyëdaa njamyajtsëm ko Jesus duˈunyëm extëm tuˈugë maxuˈunk?... * Oy ko tëgatsy njamyajtsëm. ¿Wiˈix? Min nˈokˈijxëm ti tuun jäjtë ja ux mä nety ja borreegë kuentˈäjtpë yajpäättë kamoty, jam Belén pëˈääy.

Ajotkumonë ja borreegë kuentˈäjtpë tˈijxpattë tuˈugë anklës ets yˈanmääyëdë: “Të myiny jyaˈty naxwiiny [...] tuˈugë Yajnitsokpë mët miitsëty, diˈibë dëˈën Nintsënˈäjtëm, ja Kristë”. Ta net yajtukmëtmaytyaktë ko tpäädäˈändë Jesus “yˈabityëty es kyoˈknë mä jëyujk tsäjkää jëˈxtakn”. Ets ko waanë yˈijty, ta mayë anklës kyëxëˈktë ets tmëjkumääytyë Dios.

¿Wiˈixxyëp mnayjawëty koxyëp xymyëdoyë anklës tmëjkumaytyë Dios?... Ja borreegë kuentˈäjtpëty agujk jotkujk jyantsy nyayjäˈäwëdë. Ta nyayˈanmääyëdë: “Joˈom jap Belén es nˈijxëmë tadë diˈibë të jyatyëty”, ta jap tpattë “Mariië es ja Josee, es ja maxuˈunk kyoˈknë mä jëyujk tsäjkää jëˈxtakn”.

Ko waanë yˈijty, ta mayë jäˈäy jyäjttë Belén. Ets ko ja borreegë kuentˈäjtp tyukmëtmaytyakëdë ti nety të tyuny të jyatyëty, ta duˈunyë wyëˈëmëtyaaytyë. ¿Jotkujk mnayjawëty ko xynyijawë tyäˈädë oyˈäjtën diˈib mä Jesus?... Niˈamukë ninuˈun ntsojkëmë Dios, agujk jotkujk njantsy nyayjäˈäwëm. Min nˈokˈijxëm tiko mëjwiin kajaa ttukxondaktë ko netyë Jesus të myaxuˈunkˈaty. Per parë nnijäˈäwëm, min jawyiin nˈokˈijxëm ti tuun jäjtë ko netyë María nyaytyuˈukˈaty.

Mä tuˈugë xëë, ja anklës Gabriel ojts tkuˈixë María parë tˈanmääy ko dyajmaxuˈunkˈatäˈäny tuˈugë uˈunk. Ets ko ja yˈuˈunk mëjë nety yˈitäˈäny ets ko yajtijäˈäny “Dios Tsäjpotmëdë yˈUˈunk”. Ta net jyënany  ko yˈitäˈäny rey ets ko ja yˈanaˈamën ninäˈä kyajëjpkëxäˈäny.

María yëˈë nety nyijawëyaampy wiˈix wyëˈëmäˈäny uˈunkmëët, pes ninäˈänëm kyatsëënë mët tuˈugë yetyëjk. Ta ja anklës Gabriel tyukmëtmaytyakë: “Dios Tsäjpotmëdë myajnitukëdëp mët ja myëkˈäjtën” ets ja “uˈunk diˈibë jäˈtäämp naxwiiny, yëˈë Diosë yˈUˈunk”. Jyobaa yëˈë nety tyunaampy tuˈugë mëjˈäjtën, dyajtsoonäˈäny ja yˈUˈungë jyukyˈäjtën jam tsäjpotm ets tpëjtäˈägäˈäny mä María yˈuˈunktëjk parë yaak pyatët extëm niˈamukë maxuˈunk.

¿Të xyˈixy ko mä jäˈäy ttundë Diosˈuˈunk xëë tpëjtäˈäktë nidëgëëgë “reyes magos” tkuˈixëdë Jesus?... Kyaj duˈun meerë tyuun jyäjtë. Ja “reyes magos”, yëˈë ja jäˈäyëty diˈib yajniwij yajnikajtëbë mëtsäˈä, etsë Dios kyaj tˈoyˈixy diˈib tyuundëp. Min nˈokˈijxëm ti tuun jäjtë ko ojts tninëjkxtë Jesus. Biiblyë jyënaˈany: “Ta tyëjkëdë tëgoty, es tpattë ja mixyuˈunk mëdë tyääk Mariië”. Jesus kyaj nety nyekymyaxuˈungëty ets nan kyaj nety nyekyoˈknë mä jëyujkë jyeˈxy yajpëjtaˈaky; yëˈë nety tuˈugë mixyuˈunk diˈib tsënaapy mä tuˈugë tëjk mëdë José etsë María.

¿Mnijäˈäwëp wiˈix tpattë Jesus ja jäˈäyëty diˈib yajniwij yajnikajtëbë mëtsäˈä?... Waˈan tpattë mët ko ojts tpanëjkxtë diˈib këxëˈk extëm tuˈugë mëtsäˈä. Per mä nety kyayajwoonëjkxtënëm Belén, tyäˈädë “mëtsäˈä” jawyiin ojts myënëjkxëdë Jerusalén mä nety yajpäätyë rey Herodes. Etsë Biiblyë jyënaˈany ko rey Herodes, yëˈë nety pyäädaambyë Jesus parë dyaˈoogäˈäny. ¿Pëndaa ja “mëtsäˈä” jam pyëjtak?... Kyaj yëˈëjëty Dios; yëˈë Satanás, diˈib mëtsipˈäjtëp.

Satanás tsyejpy etsë jäˈäy tmëbëktët ko Jesus yëˈë tuˈugë maxuˈunk diˈib kyaj mbäät nyaygyuwäˈänyëty. Per jamyats ko María yˈanmääyë ja anklës Gabriel ko Jesus yˈanaˈamäˈäny “winë xëë winë tiempë”. Jesus yëˈë anaˈamp jam tsäjpotm ets tim tsojk dyajkutëgoyaˈany niˈamukë pënatyë Dios myëtsipˈäjttëp. Duˈunën mbäät nˈijxëmë Jesus ets duˈunën mbäädë jäˈäy ndukniˈˈijxëm.