DIˈIB MIIMP MÄ NYIˈAK: MIJTS MBÄÄT XYMYËWINGONYË DIOS
¿Wingon xyjawë Dios?
“Ko wingon njäˈäwëmë Dios, yëˈë diˈib xyajnayjäˈäwëm seguurë ets xyaˈijtëm mëk. Mjawëp ko xëmë nyaytyukjotmaytyunyëty ets mdukmëtsekyëtyë oyˈäjtën.” (CHRISTOPHER, MIXY DIˈIB GHANA
“Dios mˈijxëp ko mon tuk mnayjawëty ets niˈigyë mtsekyëty extëm kyaj xytyim pawinmay.” (HANNAH, KIXYUˈUNK DIˈIB MÄJKTËGËËGË JYËMËJT DIˈIB ESTADOS UNIDOS)
“Diˈibëts niˈigyë nyajtsobatypy etsëts jotkujk xyajnayjawëty, yëˈë kojëts wingon nyajpääty mëdë Dios.” (GINA, TOXYTYËJK DIˈIB JAMAICA JA JYËMËJT NAA 45)
Christopher, Hannah etsë Gina kyaj yëˈëyëty diˈib duˈun winmääytyëp. Pes mayë jäˈäy abëtsemy nyaxwinyëdë ijttëp seguurë ko Dios yˈixëdë extëmë myëtnaymyaayëbë. Ets mijts, ¿wingon xyjawë Dios? ¿Mˈitäämp oy mëdë Dios o mmëwingonaampy niˈigyë? Waˈan mnayajtëyëty: “¿Wiˈix tuˈugë naxwinyëdë jäˈäy extëm ëjts mbäät tmëwingonyë Dios diˈib tukëˈëyë mëkˈäjtënë myëdäjtypy?”.
MBÄÄT XYMYËWINGONYË DIOS
Biiblyë jyënaˈany ko mbäät nmëwingoˈonëmë Dios. Extëm nˈokpëjtakëm, mä Isaías 41:8 jyënaˈany ko Dios ojtsë Abrahán ttijy “nmëtnaymyaayëbëts”. Okˈix nanduˈun wiˈix nyaˈˈanmäˈäyëm mä Santya̱ˈa̱gʉ 4:8: “Mëwingondë Dios, es yëˈë nandëˈën mmëwingonëdëp miitsëty”. Tyäˈädë yëˈë xytyukˈijxëm ko mbäät mëdë Dios nnaymyaˈayëm. Per ¿wiˈix mbäät nmëwingoˈonëm ets pën kyaj mbäät nˈijxëm?
Parë yaˈˈatsoojëmbitët, min nˈokˈijxëm wiˈixë jäˈäy dyajtsondaˈagyë nyaymyayë. Ko nimajtskë jäˈäy tim jawyiin nyayˈixyˈatëdë, ta nyaytyukˈawanëdë xyëë. Ets pën duˈunyëm nyaymyëgäjpxëdë, ta nyaytyukmëtmaytyäˈägëdë wiˈix wyinmaytyë ets wiˈix nyayjawëdë. Ko nyaxy ja tiempë, ta niˈigyë kyëktëkë ja nyaymyayë ets niˈigyë ko tijaty nyaytyukmëdunëdë. Nanduˈunën jyaty mëdë Dios. Min nˈokˈijxëm wiˈix yˈakˈyajnimaytyaˈaky.