Omar: Kyajts tyamë relijyonk ndukˈitë. Pääty kyajts nëgoo ti maytyaˈaky nmëdaty.

Bruno: Oy ko xynyigajpxy. Nxëˈatyëts Bruno. Ets mijts, ¿ti mxëˈaty?

Omar: Omar.

Bruno: Pes oy ko nnayˈixyˈäjtëm.

Omar: Oy ¿këdii?

Bruno: Omar, ¿të näˈä relijyonk xyˈoktukˈijtëbë?

Omar: Të, kojëts nmutsˈäjty. Per jats nmastuty kojëts ojts ntsoˈonë mäjëtsë ndëjk etsëts ndëjkë mä unibersidad.

Bruno: ¿Ets ti mniˈëxpëjkë mä unibersidad?

Omar: Yëˈë Historia etsë Ciencias sociales. Xëmëts ntsojkënyëˈaty mä yajnimaytyaˈaky tijaty tëëyëp tuun jäjttë ets tijatyë jäˈäy tyuundë.

Bruno: Oyëtsë nwinmay. Waˈan mijts xynyijawë ko Biiblyë yëˈë tuˈugë liibrë diˈib myaytyakypy tijaty tëëyëp tuun jäjtë. ¿Të näˈä xyˈokpayoˈoybyë tijaty myaytyakypyë tyäˈädë liibrë?

Omar: Kyaj. Nnijäˈäwëbëts ko oyë tadë liibrë, per kyajtsë nety nnijawë pën myaytyakypy tijaty tëëyëp tuun jäjtë.

Bruno: Oy ko kyaj netyë xyjëjpkugäjpxë. Pën mnasˈijxëp tuk minutë majtsk minutë, mbäät ndukmëtmaytyaˈaky tuˈuk majtskë ijxpajtën diˈib tëëyëp tuun jäjtë diˈibë Biiblyë myaytyakypy ets wiˈix tyëyˈäjtëndëkë.

Omar: Oy tiko këdii, per kyajts ti nBiiblyë.

Bruno: Kyaj ti jotmay. Tyäts tuˈugë njaˈa. Min nˈokˈijxëmë 1 Crónicas kapitulo 29 bersikulo 26 etsë 27. Nˈokkäjpxëm: “Etsë David ja yˈuˈungë Jesé ojts yˈaneˈemy mä tukëˈëyë Israel, ets ja tiempë nuˈun ojts yˈaneˈemy Israel ja jyejky 40 jëmëjt. Jam Hebrón ojts yˈaneˈemy jëxtujk jëmëjt, ets jam Jerusalén ojts yˈaneˈemy 33 jëmëjt”.

Omar: ¿Ets yëˈë tyäˈädë myëduˈukpë ijxpajtën?

Bruno: Yëˈë. Pënaty jënandëp ko Biiblyë kyaj tyëyˈäjtënëty, tuk tiempë jyënandë ko David kyaj jyukyˈajty, ko yëˈë tuˈugë jeky myaytyaˈaky.

Omar: ¿Ets tiko?

Bruno: Yëˈko kyaj nëgoo mä David yajnimaytyaˈaky, japyë jeˈeyë mä Biiblyë. Per 1993, ta ojts tpäättë tuˈugë tsäätsetsy mä këxjäˈäy myiny majtskë ayuk diˈib nikajp “David ja tyëjk” ets “rey diˈib Israel”.

Omar: ¿Waˈanë?

Bruno: Mayë jäˈäy nanduˈun jyënandë ko kyaj jyukyˈajtyë Poncio Pilato diˈib tuun gobernadoor ko Jesus jyukyˈajty. Per yajmaytyakp mä Lukʉs kapitulo 3 bersikulo 1 mëdë wiinkpë anaˈambëtëjk diˈib tuundë mä tadë tiempë, okkäjpx.

Omar: Jyënaˈany: “Ponsyë Pilatë yˈijty gobernadoor jap Judeë. Es ja Erodës yˈijty gobernadoor Galileë”...

 Bruno: Duˈunë duˈun. Jekyë ëxpëkyjyaˈaytyëjk kyaj tmëbëkandë pënë Poncio Pilato jantsy jukyˈäjt. Per nyaa 50 jëmëjtëp yajpaty jap Oriente Medio tuˈugë tsäätsetsy mä myiinyë xyëë.

Omar: Kyajtsë netyë taˈadë nnijawë.

Bruno: Pes oy ko tyam xynyijawë.

Omar: Wenë, ëjts, duˈunëts xëmë nˈixyë Biiblyë extëm tuˈugë liibrë diˈibë jantsy oy të yajjäˈäy, per kyajts nnijawë wiˈix tyam mbäät xypyudëjkëm. Waˈan tjantsy myaytyaˈaky tijaty tëëyëp tuun jäjtë, per yëˈëyë jeˈeyë.

Bruno: Mayë jäˈäy duˈun wyinmaytyë extëm mijts, per ëjts kyajts duˈun nwinmay. ¿Mnijäˈäwëp tiko? Yëˈko mä juˈunëm tsyondakyë jukyˈäjtën, duˈunyëm nyajtëgoyˈäjtëmë käˈäy ukën, wit xox etsë jëën tëjk. Xëmë ngäjpxäˈän nmaytyäˈägäˈänëm ets nmëdatäˈänëm tuˈugë familyë agujk jotkujk. ¿O kyaj dyuˈunëtyë?

Omar: Tiko këdii, duˈun.

Bruno: Pesë Biiblyë mbäät xypyudëjkëm parë nmëdäjtëm tijaty nyajtëgoyˈäjtëm, ets oy yëˈëjëty tuˈugë liibrë diˈib tëëyëp yajjääy axtë tyambäät xypyudëjkëm.

Omar: ¿Tëyˈäjtënë?

Bruno: Tëyˈäjtën. Biiblyë kyäjpxwijën pyudëjkëbë jäˈäy axtë tyambäät duˈun extëm ko yajjääy.

Omar: Aber oknigäjpx wiˈixën xypyudëjkëm.

Bruno: Xypyudëjkëm parë nnijäˈäwëm wiˈix nˈijtëm mëdë familyë etsë mëtnaymyaayëbë ets wiˈix nˈijxëmë meeny sentääbë. Duˈun extëm tuˈugë mapë diˈib xytyukˈijxëm ja nëˈë tuˈu diˈib oybyëtsëmëp. Extëm nˈokpëjtakëm, ¿këdii tsiptakp tyamë jäˈäy yˈitët oy uˈunkteety ets tnigëbäjkˈatët oyë nyëdoˈoxy?

Omar: Tëyˈäjtën. Tukjëmëjtëts kujk ngasäädëˈattë ets tsipëts nnayjaygyukëdët.

Bruno: Biiblyë myëmiimbyë käjpxwijën mä xyˈanmäˈäyëm ti mbäät nduˈunëm ets xëmë xypyudëjkëm. Extëm nˈokpëjtakëm, min nˈokˈijxëmë Éfesʉ kapitulo 5, bersikulo 28. ¿Mbäät xykyajpxy?

Omar: Oy, jyënaˈany: “Nandëˈën nidëgekyë yetyëjkëty ttsoktët ja yˈuˈunk nyëdoˈoxyëty extëm nyaytsyekyëty këˈëm. Diˈibë tsyejpy ja nyëdoˈoxy, naytsyojkëbë dëˈën këˈëm”.

Bruno: Dyoskujuyëm. ¿Këdii mas oy jyukyˈatët ja familyë pën tuˈugë kasäädë yetyëjk pyaduumbyë tyäˈädë käjpxwijën?

Omar: Nwinmayëts ko oy, per tsip nguytyuˈunëm.

Bruno: Tëyˈäjtën, pes nipën kyawäˈätsjäˈäyëty. Mä tyäˈädë kapitulo tap tuˈugë bersikulo mä xyˈanmäˈäyëm ets kyaj nˈijtëm kujuun. * Tuˈuk tuˈugë kasäädë jäˈäy, tsojkëp nyayjaygyukëdët ets kyaj niduˈuk ttimtukpëtsëmäˈänëdë wyinmäˈäny. Biiblyë yëˈëjëts të xypyudëkëdë mëdëtsë nnëdoˈoxy parëts nayjaygyukëdë.

Omar: Tëyˈäjtën extëm mjënäˈäny.

Bruno: Ëëtsëty, Jyobaa tyestiigëty nmëdäjttëbëts tuˈugë sitio mä Internet mä myinyë käjpxwijën parë kasäädë jäˈäy etsë familyë. Min nˈoktukˈixy, jeˈeyë mdiempë xynyasˈixët tuk minutë majtsk minutë.

Omar: Oy, nuˈunëts ndimwëˈëmët.

Bruno: Tyäˈädë sitio yëˈë jw.org/mco. Yä tsyondaˈaky.

Omar: Jantsy oyatyë retratë.

Bruno: Yëˈëjëtsë nmëguˈuktëjk diˈib käjpxwäˈkxtëp abëtsemy nyaxwinyëdë. Min nˈokˈijxëm mä jyënaˈany “Ëxpëjkpajn”, jap myinyë jemyatypyë rebistë etsë wiinkpë ëxpëjkpajn diˈib kanäk pëky tijaty myaytyakypy ets nan myaytyakypy wiˈixë familyë jyukyˈattët. Extëm nˈokpëjtakëm, nˈokˈijxëmë foyetë Oybyë ayuk diˈib tsoˈomp mä Dios, ëxpëjkën 9 mä jyënaˈany: “¿Wiˈix mbäädë familyë yˈittë agujk jotkujk?”.

 Omar: Jantsy oy, ¡nnijawëyaambyëts wiˈix yaˈˈatsoojëmbity!

Bruno: Yä kanäk pëky tmaytyaˈaky tijaty mbäät pyudëkëtyë kasäädë jäˈäy parë yˈitët agujk jotkujk. Min nˈokˈijxëmë myëmajtskpë yajtëˈëwën. Omar, ¿mgäjpxaambyë tyäˈädë tëgëk wäätspë mä kyakëxynyëmë tyäˈädë parrafo?

Omar: Oy, jyënaˈany: “Pënaty të pyëktë, tsojkëp nyaytsyokëdët ets nyaywyingutsëˈëgëdët. Ets kom nimajtsk ak pokyjyaˈay, tsojkëp nyaybyokymyaˈkxëdët parë yˈittët agujk jotkujk”. Tëyˈäjtën extëm jyënaˈany.

Bruno: Dyoskujuyëm ko të xykyajpxy. Éfesʉ 5:33 yëˈë tuˈugë tekstë diˈib yä yajnigäjpxp. Tyäätsë nBiiblyë, ¿mbäät xykyajpxyë tyäˈädë tekstë?

Omar: Jyënaˈany: “Yëˈë dëˈën jëjpˈam es miits xytsoktët yëˈë mnëdoˈoxy extëm mij këˈëm, es yëˈë kasäädë toxytyëjk twintsëˈëgëdët yëˈë nyaˈay”.

Bruno: ¿Të xypyëkyë kuentë wiˈix yä yajˈyakyë käjpxwijën? Diˈib myaytyäˈägaampy, yëˈë ko tsojkëp niduˈuk niduˈuk ttundët ti ja jyamyëët yˈawijxypy.

Omar: Aber... kyajts oy njaygyukë.

Bruno: Wenë, ¿këdii niˈamukë yetyëjk yëˈë tsyejpy etsë nyëdoˈoxy wyintsëˈëgëdët? Ets ¿këdii niˈamukë toxytyëjk yëˈë tsyejpy etsë nyaˈay tsyokëdët?

Omar: Tëyˈäjtën.

Bruno: Pën ja yetyëjk yˈëxtaabyë winmäˈäny parë ttukˈixyë nyëdoˈoxy ko tsyejpy, ta kyaj tsyiptäˈägäˈänxëty wyintsëˈëgëdët.

Omar: Tëyˈäjtën.

Bruno: Tyäˈädë käjpxwijën ja yajkujäˈäyë naa myajtsk mil jëmëjtëp, per axtë tyambäät xypyudëjkëm. Ko kasäädë jäˈäy tkuytyundë, ta pyudëkëdë parë yˈittë jotkujk.

Omar: Kyajtsë nety ndimwinmay pën duˈunë Biiblyë käjpxwijënë tmëminy.

Bruno: Duˈun Omar, per wiˈix xyˈokˈixy pën nnaybyatëm jatëgok yää. Njatsojkënyëˈajtypyëts njëmbitäˈäny parë nˈijxëmë myëdëgëëkpë yajtëˈëwën: “¿Oydaa ko nyaymyastuˈudëdët ja kasäädë jäˈäy pën kyaj jyotkujkˈattë?”. Tyäˈädë nan yajpatp mä Internet mä ëxpëjkën 9. *

Omar: Oy, tyamëts nanduˈunë nnëdoˈoxy nˈanëëmë parëts mëët ngäjpxët.