Mä juˈunëm tsyondakyë jukyˈäjtën, naxwinyëdë jäˈäy, jajukyˈatandëp winë xëë ets kyaj jyamëjäˈäyëyäˈändë. Per jotmaymyëët njënäˈänëm ko niˈamukë nˈoˈkëm. Axtë tyambäät tyëyˈäjtëndëkë extëmë Job jyënany tyëgëk mil jëmëjtëp.

Niˈamukë njajukyˈatäˈänëm ets kyaj njaˈoogäˈänëm. Biiblyë jyënaˈany ko Dios yëˈë pyëjtakë tyäˈädë tsojkënë mä jot korasoon ets njaygyujkëm tidën yˈandijpy njukyˈäjtëm winë xëë (Eclesiastés 3:11). ¿Mbäätxyëp tuˈugë Dios diˈib tsojkp tpëjtaky mä korasoonë tyäˈädë tsojkën pën kyaj duˈun xyajjukyˈatäˈänëm? Kyaj, pesë Diosë yˈAyuk jyënaˈany ko oˈkën yëˈë tuˈugë mëtsip ets wyandakypy ko “yajkutëgoyaampy” (1 Korintʉ 15:26).

Seguurë nˈijtëm ko oˈkën yëˈë tuˈugë mëtsip. Nituˈugë jäˈäy diˈib kaˈpxyë jyot wyinmäˈäny kyaˈoogäˈäny. Niˈigyë nnaygyuentˈäjtëm ko nˈijxëm nˈayoˈonbäädäˈänëm. Ets ko nbäˈämbajtëm, ta nˈëxtäˈäyëmë ääy tsooy. Nan njëjpkudijëm tijaty mbäät xypyëjkëmë jukyˈäjtën.

¿Mbäädëdaa kyutëgoyë tyäˈädë mëtsip diˈib kanäk mil jëmëjt kujk jyaˈˈaty? Mbäät. Jyobaa kyaj ojts xyajkojëm parë jeˈeyë waanë njukyˈäjtëm. Kyaj ttuknibëjtakë parë nˈoˈkëm. Yëˈë tyuknibëjtakë parë njukyˈäjtëm winë xëë yä Naxwiiny, ets adëëp tijaty yëˈë tyuknibëjtakëp (Isaías 55:11).

Per ¿wiˈixënë Dios dyajjëjptëgoyaˈanyë oˈkën? Nuˈun kujkë tiempë nyaxy, naxwinyëdë jäˈäy jyayajjëjptëgoyandëbë oˈkën, per kyaj myayëdë. Ëxpëkyjyaˈay të tjayajpëtsëmdë tsooy etsë bakunë diˈib mbäät tjëjpkuwäˈägë tuˈuk majtskë päˈäm ets nan të tˈëxpëjkpëtsëmdë ADN mä tijaty jukyˈäjtp. Mä mayë it lugäär, jekyë jäˈäy jyukyˈattë ets kyaj dyuˈunëty tyuk mëgoˈpx jëmëjtëp. Per tsip tmëmadäˈäktëdë oˈkën, pesë Biiblyë jyënaˈany ko “niˈamukë jyëmbittë naxway” (Eclesiastés 3:20).

Diˈib xyjotkujkmoˈoyëm, yëˈë ko oyëyäämbë tyäˈädë jotmay, per kyaj yëˈë dyaˈoyëyaˈanyë naxwinyëdë jäˈäy oy nuˈun jyawijˈyëty. Yëˈë duˈunë Jyobaa diˈib yaˈoyëyaampy, ets yëˈë të dyajtunyë Jesukristë parë nˈawäˈätspëtsëˈëmëm mä oˈkën.