¿Të duˈun mnayajtëyëty? Pën të, nan të mayë jäˈäy duˈun nyayajtëwëdë. Abëtsemy nyaxwinyëdë tnijawëyäˈändë wiˈix yaˈˈatsoojëmbity. Per ¿mbäät nnijäˈäwëm wiˈix yaˈˈatsoojëmbity?

Miyonkˈamë jäˈäy jyënäˈändë ko mbäät. ¿Tiko? Yëˈko të tnijawëdë mä Biiblyë wiˈix yaˈˈatsoojëmbity. ¿Mnijawëyaampy wiˈixë Biiblyë jyënaˈany? Pën duˈun, waˈan xytsyojkënyëˈaty xyˈëxpëkäˈänyë Biiblyë namayˈäjtën mëdë Jyobaa tyestiigëty. *

Mayë jäˈäy naa atsëˈkëdëp ko yaˈˈanëëmëdë ets tˈëxpëktëdë Biiblyë. Ta diˈib jënandëp ko kyaj yˈawäätsëdë parë tˈëxpëktëdë Biiblyë, ko tsip yajjaygyukë o ko kyaj kompromisë ttunäˈändë. Per okˈix wiˈix näägë jäˈäy jyënäˈändë diˈib të tˈëxpëktë Biiblyë.

• Gill diˈib Inglaterra, jyënaˈany: “Ojtsëts mä tsyäjptëjkë katolikëtëjk etsë protestantëty, mä tuˈugë templë sij, mä yˈittë teety etsë määdrë diˈib budista ets axtë niˈëxpëjkëts mä unibersidad mä yajmaytyaˈagyë Dios. Per kyaj yaˈˈatsoowëmbijtääy tijatyëtsë nety nayajtëëwëp. Ta tuˈugë Jyobaa tyestiigë myiny mäjëtsë ndëjk. Mëjˈixy mëjmëdoyëts njäˈäwë ko tˈatsoowëmbijtääy mëdë Biiblyë, tajëts ngupëjky nˈëxpëkäˈäny”.

• Koffi diˈib Benín, jyënaˈany: “Kanäk pëkyë nety diˈibëts nmëmääy nmëdajpy mä jukyˈäjtën, per kyajts yajxon njaygyujkë extëmëts xyjatukmëtmaytyaky ja pastoor diˈib tuump mä tsäjptëjk. Per ta tuˈugë Jyobaa tyestiigë xytyukjaygyujkëts yajxon tijatyëtsë nety nmëmääy nmëdajpy ets yëˈëyë yajtuunë Biiblyë. Kojëts xyajtëëy pën nˈaknijawëyaambyëts niˈigyë, tajëts nˈanmääy ko oy”.

• José diˈib Brasil, jyënaˈany: “Yëˈëtsë nety nnijawëyaampy wiˈix yajpäättë oˈkpë. Duˈunëtsë nety nwinmay ko mbäädëts xyˈaxëktuny etsëts nnayajtëyëty wiˈixëdaa Biiblyë jyënaˈany. Tajëts nˈëxpëjktsondaky mët tuˈugë Jyobaa tyestiigë diˈibëts mëët naymyayëty”.

• Dennize diˈib Nëwinm, jyënaˈany: “Ngäjpxtsondakëtsë Biiblyë, per nitiijëts ngajaygyujkë. Ta tëgok myiindë Jyobaa tyestiigëty mäjëtsë ndëjk etsëts xytyukmëtmaytyaktë kanäk pëky wiˈix nyikejy tijaty miimp mä Biiblyë. Tajëts niˈigyë nˈaknijawëyany”.

• Anju diˈib Nepal, jyënaˈany: “Nnayajtëwëbëtsë nety pënë Dios xykyuentëpëjtakpëts. Tajëts nmënuˈkxtakyë Dios diˈibë Biiblyë yajjääyë. Jakumbom, tajëts xynyimiindë Jyobaa tyestiigëty ets tajëts nˈëxpëjktsondakyë Biiblyë mët yëˈëjëty”.

Extëm jyënäˈändë tyäˈädë jäˈäyëty, yëˈë yajtëyˈäjtëndëjkëbë Jesusë yˈayuk: “Jotkujk yajpäättë pënaty jyäˈäwëdëp ko yajtëgoyˈäjttëbë Dios” (Mateo 5:3, Traducción del Nuevo Mundo). Niˈamukë njotkujkˈatäˈänëm ets yëˈëyë Dios diˈib mbäät xytyuˈumoˈoyëm parë nbatëmë jotkujkˈäjtën. ¿Wiˈix? Mët yëˈëgyëjxmë Biiblyë diˈib yˈAyukˈäjtypy.

¿Wiˈix mbäät xynyijawë ti Biiblyë myaytyakypy? ¿Wiˈix mbäät mbudëkëty? Min nˈokˈijxëm.