¿Nyasˈixëyaambyë Dios etsë jäˈäy yˈakˈanaˈamˈadëˈëtsët ets tpëjtäˈägëdë naxwinyëdë jäˈäy jotmayjëjpˈam? Kyaj. Extëm të nˈijxëm, tim tsojkë Dios ttuktëkëyaˈanyë tyäˈädë jotmay, dyajkutëgoyaˈanyë anaˈambëtëjk diˈib yä Naxwiiny, dyajjëjptëgoyaˈanyë naytyëytyunë ets tijatyë jäˈäy yaˈˈayoowëp. Dios diˈib të dyajkojˈyë Naxwinyëdë etsë jäˈäy, tsyejpy parë nnijäˈäwëm ko tim tsojk duˈun ttunäˈäny. ¿Wiˈix xytyuknijäˈäwëm?

Okpawinmay ko muum mnëjkxäˈäny. Ta jawyiin xyˈixy ja mapë ets xyˈëxtäˈäy wiˈix mjäˈtäˈäny. Mä jam mduˈuyoˈoy, ta xyˈixy ko tijaty mbatypy nëˈääy tuˈääy duˈun extëm ja mapë jyënaˈany. Ta seguurë mnayjawëty ko tam mjäˈtanë mä të xynyitsoonë. Dios nan të xymyoˈoyëmë Biiblyë diˈib tuump extëmë mapë. Jap yajmaytyaˈaky tijaty tunan jatanëp abëtsemy nyaxwinyëdë mä kyajäˈtynyëm ja kutëgoˈoyën. Ko nyaxyë tiempë, ta nbëjkëmë kuentë ko tijaty tuun jäjtëp yä Naxwiiny, duˈun extëm ojts yajnaskäjpxë mä Biiblyë. Ta nnayjäˈäwëm seguurë ko niˈigyë wyingoonë ja kutëgoˈoyën.

Biiblyë jyënaˈany ko nety wyingoonë ja kutëgoˈoyën, ta tyunäˈäny jyatäˈänyëty diˈib ninäˈänëm duˈun kyatuny kyajatyëty. Mä tadë tiempë, tˈixäˈändë naxwinyëdë jäˈäy kanäk pëkyë tyäˈädë ayoˈon diˈib ninäˈänëm duˈun kyatuny kyajatyëty xitsoo yatsoo. Min nˈokˈijxëm tijaty tunan jatanëp.

1. AYOˈON JOTMAY ABËTSEMY NYAXWINYËDË Tuk pëky diˈib ojts yajnaskäjpxë, yëˈë diˈib yajpatp mä Mateo kapitulo 24, jap tmaytyaˈaky tijaty tunan jatanëp diˈib yajtukˈijxwëˈëmäämp ko nety tpatnë “ja tiempë mä jyëjptëgoyanë tyäˈädë jukyˈäjtën” ets ta net “myinäˈäny ja kutëgoˈoyën” (Mateo 24:3, 14, TNM). Extëm ko tyunäˈänyëtyë mëj tsip, jyaˈˈatäˈänyë yuu, mëk ujx abëtsemy nyaxwinyëdë, myëjwindëkëyaˈany niˈigyë axëkˈäjtën, kyaj pën tnekymyëdatäˈäny ja tsojkën etsë relijyonk wyinˈëënäˈändë (bersikulo 6 axtë 26). Ets tëyˈäjtën ko tukëˈëyë tyäˈädë taayëm tyuny jyatyëty. Per ko nety tyim wyingoonë ja kutëgoˈoyën, kanäk pëkyë tyäˈädë ayoˈon tyunäˈäny jyatäˈänyëty xitsoo yatsoo, ets tuˈugyë tyunäˈäny jyatäˈänyëty mëdë tyäˈädë tëgëk pëkypyë diˈib yä nˈakˈixäˈänëm.

2. KYAJ PËN OY NYEKYJYAˈAYˈATY Biiblyë jyënaˈany ko mä ja tiempë jyëjpkëxanë, mas axëëgë jäˈäy jyaˈayˈatäˈändë. Jap jyënaˈany: “Ja jäˈäyëty jyëmbijnëdët atsojkpëty, meenyˈoogëty, mëj këjxmëty, nëgoo nyaygyuyäˈäxëdë këdiinëm pën, kyaj tmëmëdowdë tyääk tyeetyëty, ni ti tkamëjjawëdë, kyaj tmëjˈixtë Dios, kyaj tmëdattë ja oyjyot es ni paˈˈayoˈon, abiˈts, kyaj nyayjëjwijtsëmbitëdë, myëtsip tëgekyë diˈibë oy, yajjäˈäyˈoˈkpëty, oytyiity ttuktëkëdë, es mëj patëp. Yëˈëyë yˈëxtäˈäyandëp ja xik awëˈkëk mä jyapäätyëty tˈawdattët ja Dios” (2 Timotee 3:1-4). Duˈunyëmë jäˈäy jyaˈayˈattë, per mä ja tiempë jyëjpkëxanë, niˈigyë myëjwindëkëyanë ets yˈoˈktëwanë. Päätyë Biiblyë jyënaˈany ko “ayoˈon mëët yˈaknaxäˈäny ja xëë tiempë”. Wiˈix mˈokwinmay, ¿waˈan tyamë jäˈäy duˈun jyaˈayˈattë?

3. WYINDËGOYË NAXWINYËDË Biiblyë jyënaˈany ko Dios yajkutëgoyaampy pënaty “yajmäˈttëp ja naxwinyëdë” (Diˈibʉ Jatanʉp 11:18). ¿Wiˈixën tyamë Naxwinyëdë wyindëgoy? Duˈun extëm ko Noé jyukyˈajty, Biiblyë jyënaˈany: “Ja naxwinyëdë të nety wyindëgooytyaˈay Dios windum, ets ja naxwinyëdë të nety tyuktuky mët ja axëkˈäjtën. Duˈun, ta Dios tˈijxy ja naxwinyëdë, ets të nety wyindëgoy”. Pääty ko Dios tmaytyaky ja axëkjäˈäyëty, ta tˈanmääyë Noé: “Tëjëts nduknibëjtäägë nyajkutëgoyaˈany” (Génesis 6:11-13). ¿Të xypyëkyë kuentë ko tyam niˈigyë myëjwindëkë axëkˈäjtën? Per kyaj yëˈëyëty jeˈeyë, tyam niˈigyë jäˈäy dyajkojnëdë extëmë bombë diˈib mbäät dyajwindëgoyë Naxwinyëdë ets dyajkutëgooytyaˈayë jäˈäy. Ja tuk pëky wiˈix dyajwindëgoytyë Naxwinyëdë, yëˈë ko wanaty wanaty dyajkëjxnëdë diˈibë  jukyˈäjtënë yajjaˈäjtypy, extëmë poj, mejny ets tijaty jukyˈäjtp yä Naxwiiny.

Oknayajtëwëdë: ¿mbäädë netyë jäˈäy tyuk mëgoˈpx jëmëjtëp dyajkutëgoyë naxwinyëdë jäˈäy? Kyaj. Per tyam, mbäät duˈun ttuny. Pes may kujk dyajnipajnëdë tujn pujxn ets të dyajwindëgooynyëdë Naxwinyëdë. Ets diˈib ayoˈon, yëˈë ko jäˈäy kyaj jyawë tjaygyukëdë nuˈunën dyajwindëgoytyë Naxwinyëdë ko tijaty dyajjemybyëtsëmdë. Per diˈib oy, yëˈë ko kyaj tkëˈamˈattë Naxwinyëdë. Dios wyandakypy ko yajkutëgoyaambyë jäˈäy mä tkayajkutëgoynyëm tukëˈëyë jukyˈäjtën diˈib jaˈäjtp yä Naxwiiny.

4. ABËTSEMY NYAXWINYËDË YAJKÄJPXWAˈKXY Ja tuk pëkyë ijxwëˈëmën diˈibë Mateo nyigajpxypy, yëˈë ko abëtsemy nyaxwinyëdë yajtunäˈäny tuˈugë tuunk. Jyënaˈany: “Tyäˈädë oybyë ayuk diˈib nyimaytyakypy ja Anaˈam Kutujkën yajkäjpxwäˈkxäˈäny abëtsemy nyaxwinyëdë parë yajtuknijawët tukëˈëyë nasionk; ets taanëm myinäˈäny ja kutëgoˈoyën” (Mateo 24:14, TNM). Tyäˈädë tuunk mä yajkäjpxwaˈkxyë oybyë ayuk, tim tëgatsy mët diˈib të ttundë mayë relijyonk. Pes yëˈë yajkäjpxwäˈkxp ja “oybyë ayuk diˈib nyimaytyakypy ja Anaˈam Kutujkën”. ¿Diˈibë relijyonk kyäjpxwäˈkxtëbë oybyë ayuk diˈib nyimaytyakypyë Anaˈam Kutujkën “abëtsemy nyaxwinyëdë”?

Yëˈë sitio diˈib myëdäjttëbë Jyobaa tyestiigëty mä Internet jw.org, të tpëjtäˈäktë parë wyäˈkxëdë “oybyë ayuk diˈib nyimaytyakypy ja Anaˈam Kutujkën”. Myëmiimbyë ëxpëjkpajn diˈib nyimaytyakypyë tyäˈädë oybyë ayuk, naxy 700 ayuk. ¿Diˈibë relijyonk jyotmoobyë tyäˈädë tuunk parë jäˈäy ttukmëtmaytyäˈägëdë Diosë yˈAnaˈam Kyutujkën? Mä nety kyajaˈˈatynyëmë Internet, Jyobaa tyestiigëty duˈunyëmë nety yaˈixyˈattë ko tkäjpxwäˈkxtë oybyë ayuk diˈib nyimaytyakypy ja Anaˈam Kutujkën. Desde 1939, mä tuˈuk tuˈugë rebistë Diˈib Xytyukˈawäˈänëm tmëminyë tyäˈädë ayuk: “Yëˈë nyigajpxypyë Jyobaa yˈAnaˈamën”. Ets tuˈugë liibrë diˈib nyimaytyakypyë relijyonk, jyënaˈany ko nipën duˈun mëk kyatuny extëmë Jyobaa tyestiigëty yˈëwäˈkx kyäjpxwäˈkxtë ets kajabäät. Tuk pëky diˈib yajkäjpxwäˈkxp, yëˈë ko Diosë yˈAnaˈam Kyutujkën tim tsojk dyajjëjptëgoyaˈanyë axëkˈäjtën.

¿Mˈijxypy wiˈix yˈadëy tijaty ojts yajnaskäjpxë diˈib të yajmaytyaˈaky mä tyäˈädë artikulo? Nuˈun  të nyaxy tuk mëgoˈpx jëmëjt, tyäˈädë rebistë nyimaytyakypy tijaty tuun jäjtëp abëtsemy nyaxwinyëdë. Ets pënaty kyäjpxtëp, të tpëktë kuentë ko yëˈë yaˈˈadëëpy diˈib yajtukˈijxwëˈëmp ko ja tiempë jyëjpkëxanë. Per pënaty kyaj tmëbëktë, jyënäˈändë ko kyaj yˈoˈktëy tijaty tuun jäjtëp abëtsemy nyaxwinyëdë ets ko yajniˈigyëdëp tijaty näjxp mä notisyë. Jyënäˈändë ko tyam mbäät yajnijawë amay jotmay diˈib tuun jäjtëp wiinktsoo mët ko jyaˈˈaty, extëmë raadyë etsë telebisionk. Per oy wiˈix jyënäˈändët, ta mayë jäˈäy diˈib pyëjktëbë kuentë ko ta tyuny jyatyëty diˈib ninäˈänëm duˈun kyatuny kyajatyëty.

Näägë ëxpëkyjyaˈay të tpëktë kuentë ko niˈigyë wyindëgooyˈadëˈëtsanë tyäˈädë Naxwinyëdë. Mä jëmëjt 2014 ojts tnigäjpxtë ko miimbë ayoˈon diˈib mbäät dyajjëjptëgoyë naxwinyëdë jäˈäy. Ets ko tˈijxtë yajxon tijaty mbäät yˈayoˈonbëjtaˈaky, ta jyënandë ko mbäät kyutëgoyë naxwinyëdë jäˈäy mët ko xëmë tijaty tjantsy yajjemybyëtsëmdë. Pääty tmëbëktë pënaty yajpëtsëëmdëbë tyäˈädë rebistë ets kyäjpxtëp, ko tyam yëˈë ndukjukyˈäjtëm ja tiempë diˈib jëjpkëxanëp ets ko ta wyingoonë ja kutëgoˈoyën. Per kyaj tiko ntsëˈkëm, niˈigyë mbäät nxondakëm. ¿Tiko duˈun njënäˈänëm? Yëˈko mbäät nnitsokëm.