¿Ti miimp mä mwinmäˈäny ko xymyëdoyë tyäˈädë ayuk “wingoomp ja kutëgoˈoyën”? ¿Waˈan xywyinmay tuˈugë jäˈäy diˈib käjpxwäˈkxp mä tsyäjptëjk jyantsy yaˈaxy jyantsy jyoky ets tnëgony dyujkonyë Byiiblyë? ¿O ko yˈagojtmukäˈäny tuˈugë mëj tsää o asteroide mëdë Naxwinyëdë? ¿O tuˈugë mëj ayoˈon diˈib tunan jatanëp abëtsemy nyaxwinyëdë extëmë Tercera Guerra Mundial? Ta näägë jäˈäy diˈib tsëˈkëdëp ko duˈun tmëdowdë, ta diˈib kyaj ttim mëjpëjtäˈäktë etsë wiinkpë jeˈeyë tnëxiˈik ttukxiˈiktë.

Diosë yˈAyuk jyënaˈany ko “myinäˈäny ja kutëgoˈoyën” (Mateo 24:14, Traducción del Nuevo Mundo [TNM]). Tyäˈädë kutëgoˈoyën, nan yëˈë diˈib mä Biiblyë yajtijp “Armajedon”, ets mä jäˈäy “tsyiptunäˈändë mët ja Nintsënˈäjtëm Dios” (Diˈibʉ Jatanʉp [Apocalipsis] 16:14, 16). Tuˈuk tuˈugë relijyonk wiˈixëm tyukniˈˈixëdë mä myinäˈäny ja kutëgoˈoyën ets tëgatsyaty wyinmaytyë mä wiˈix tyunäˈäny jyatäˈänyëty ja ayoˈon. Perë Biiblyë yajxon xytyukmëtmaytyakëm tidën yˈandijpy kutëgoˈoyën, nan xytyuknijäˈäwëm ko wingon yˈijnë ets xyˈanmäˈäyëm ti mbäät nduˈunëm parë nnitsokëm. Min nˈokˈijxëm wiˈixë Biiblyë tmaytyaˈaky diˈibë jäˈäy tëgatsy myëbëjktëp ets ti yˈandijpy kutëgoˈoyën. Ta net nˈixäˈänëm näˈä myinäˈäny.

1. KYAJ YËˈË TˈANDIJY KO NAXWINYËDË TYOOYTYËGOYAˈANY

   Biiblyë jyënaˈany: “[Dios] të dyajnaxkëdaˈagyë naxwinyëdë ets të tmoˈoyë yˈëjx; kyaj yuˈkxäˈäny mä lyugäär winë xëë winë tiempë yˈitäˈäny” (Salmo 104:5). Mä tyäˈädë tekstë ets mä wiinkpë, Biiblyë xyˈanmäˈäyëm ko Dios ninäˈä tkayajkutëgoyaˈanyë Naxwinyëdë ets kyaj tnasˈixëyaˈany ets pën dyajkutëgoyët o ti yajwindëgoyëdët (Eclesiastés 1:4; Isaías 45:18).

2. KYAJ DUˈUNYË XYTYUKJÄˈTÄˈÄNËM TË YAJPËJTAˈAKY TI XËË ETS TI OORË MYINÄˈÄNY

   Biiblyë jyënaˈany ko Dios të ttukniwitsë ti xëë ti oorë dyajminäˈäny ja kutëgoˈoyën. Jyënaˈany: “Ja xëë es ja oorë ni pën tkanijawë, ni yëˈë Diosë yˈanklësëty es ni ëj, ja Diosë yˈUˈunk, yëˈëyë dëˈën jeˈeyë nyijäˈäp ja Dios Teety. Pääty wëˈëmdë miitsëty wijˈyëty es mnayjyëjpˈixëdëp, jaˈa ko kyaj xynyijawëdë näˈä nminäˈänyëts” (Markʉs 13:32, 33). Yajxon yä nˈijxëm ko “Dios Teety” të tpëjtaˈaky ja tiempë näˈä dyajminäˈäny ja kutëgoˈoyën.

3. KYAJ DYAJMINÄˈÄNYË JÄˈÄY ETS NI YËˈË TUˈUGË MËJ TSÄÄ DIˈIB TSOˈOMP TSÄJPOTM

   ¿Wiˈix tsyondäˈägäˈänyë kutëgoˈoyën? Mä Diˈibʉ Jatanʉp o Apocalipsis jyënaˈany: “Netëts nˈijxy ja tsäjp awäˈäts, es kyëxeˈeky tuˈugë poop kuääy. Es diˈibë tyukˈunyaapy txëˈaty Diˈibë Kyuytyiimpy Ja yˈayuk, es nandëˈën txëˈaty Tëyˈäjtën [...]. Netëts nˈijxy ko ja axëk jëyujk es ja naxwinyëdë ryeyëty dyajnaymyukëdë syoldäädëty es tsyiptunäˈäny mët ja diˈibë poop kuääygyëjxy es mët ja nyitsiptuumbëty” (Diˈibʉ Jatanʉp 19:11-21). Tadë ää ayuk niwij nikajp, per mbäät njaygyujkëm ko Dios yëˈë kyaxaambyë yˈanklëstëjk parë dyajkutëgoytyëdë myëtsip.

1. YËˈË MÄ KYUTËGOYAˈANYË ANAˈAMBËTËJK

   Biiblyë jyënaˈany: “Yëˈë Dios diˈib tsäjpotm dyajnaxkëdäˈägäˈäny tuˈugë anaˈamën [tuˈugë gobiernë] diˈib ninäˈä kyakutëgoyaˈany. Etsë tadë anaˈamën kyaj yajmoˈoyaˈanyë wiink käjpn. Dyajjëmbitäˈäny puˈxm ets dyajjëjpkëxäˈäny tukëˈëyë anaˈamën, ets yëˈëyë jeˈeyë itäämp winë xëë winë  tiempë” (Daniel 2:44). Extëm të nˈijxëm mä myëdëgëk pëkypyë, ja “naxwinyëdë ryeyëty” tyuˈukmukäˈändë parë “tsyiptunäˈäny mët ja diˈibë poop kuääygyëjxy es mët ja nyitsiptuumbëty” (Diˈibʉ Jatanʉp 19:19). Perë Diosë yˈAnaˈam Kyutujkën yëˈë diˈib yajkutëgoyanëdëp.

2. JYËJPTËGOYAˈANYË TSIP, AXËKˈÄJTËN ETS KO KYAYAJTUNYË TËYˈÄJTËN

   Dios “yajjëjptëgoyaambyë tsip” abëtsemy nyaxwinyëdë (Salmo 46:9). Jatuˈugë tekstë jyënaˈany: “Yëˈëyë oyjyaˈay jukyˈatäämp naxwiiny, ets yëˈë wëˈëmäämp ja diˈib kyaj tyëgoˈoyën. Ja axëkjäˈäyëty, yajpoˈtëˈëgandëp naxwiiny; ets pënaty winˈëˈëndëp yajwijxëˈëgandëp” (Proverbios 2:21, 22). Ets mä Diˈibʉ Jatanʉp jyënaˈany ko Dios yajkojaampy “tëgekyë ak jemy” (Diˈibʉ Jatanʉp 21:4, 5).

3. KYUTËGOYAˈANYË RELIJYONK DIˈIBË DIOS TË TMËDËGOY ETSË NAXWINYËDË JÄˈÄY

   Biiblyë jyënany: “Yëˈë kugajpxyëty nyaskäjpxëdëp diˈib kyaj tyëyˈäjtënëty, etsë saserdotë këˈëm dyajtundë yˈanaˈamën. [...] Per ¿ti mdunandëp ko jyäˈtët ja kutëgoˈoyën?” (Jeremías 5: 31). Jesus jyënany ko mä ja tiempë jyëjpkëxanë mayë jäˈäy yˈanëëmëyaˈanyëty: “Wintsën, Wintsën, mët ja mxëëgyëjxmëts të ngäjxwaˈxyëts ja mˈayuk, es tëts nyajpëtsëmdë ja kaˈoybyëty, es tëts may nduny ja mëjˈäjtën. Netëts ëj nˈanëëmët: Ni näˈäts miits të ngajäˈäyˈattë. ¡Mastuttëgëts miitsëty kaˈoybyë mëduumbëty!” (Matewʉ 7:21-23.)

4. KYUTËGOYAˈANY DIˈIB KYAJ TTUNYË TËYˈÄJTËN ETS DIˈIB TYUNAAMBYË AXËKˈÄJTËN

   Jesukristë jyënany: “Diˈibaty kyaj tmëbëktë ja Diosë yˈUˈunk, jaˈa nëjxtëp mä ja tëytyuˈunën [o yajpayoˈoytyët] winë xëë winë tiempë, mët ko ja jäjën myiiny yä naxwiiny, es niˈigyë oj ttsoktë ja kootsˈat këdiinëm ja jäjën, mët ko axëëk yˈadëˈëtstë” (Fwank 3:19). Tëëyëp, ko jyukyˈajtyë Noé diˈib Dios mëduun, Dios yajkutëgooy niˈamukë axëkjäˈäy diˈibë nety jukyˈäjttëp yä Naxwiiny. Biiblyë jyënaˈany mä 2 Peedrʉ 3:5-7: “Mët ja nëë, ja ayoˈonduu, Dios dyajkutëgooy ja naxwinyëdë jäˈäyëty. Perë tsäjp esë nax diˈibë jaa tyam, Dios të jyënaˈany ko yajtoyaampy ko jäˈäy yajpayoˈoytyët es ko naty dyajkutëgoyaˈany ja pekyjyaˈayëty”.

Ko “Dios dyajkutëgooy ja naxwinyëdë jäˈäyëty” ja tiempë mä Noé jyukyˈajty, yëˈë mëët yaˈijxkijpxyë “ko jäˈäy yajpayoˈoytyët es ko naty dyajkutëgoyaˈany”. Per nˈokjamyajtsëm ko Dios kyaj dyajkutëgooyë Naxwinyëdë, yëˈë yajkutëgooyë axëkjäˈäytyëjk. Nanduˈun mä yajpayoˈoyäˈändë naxwinyëdë jäˈäy, Dios yëˈë yajkutëgoyaambyë myëtsip ets niˈamukë pënaty tsyojkënyëˈäjttëbë axëkˈäjtën. Per kyuwäˈänaambyë myëtnaymyaayëbëty duˈun extëm ojts tkuwäˈänyë Noé mëdë fyamilyë (Matewʉ 24:37-42).

¡Okpawinmay wiˈix jantsy oy njukyˈatäˈänëm ko netyë Dios të dyajjëjptëgoy tukëˈëyë axëkˈäjtën! Duˈunë duˈun, ko Biiblyë tmaytyaˈagyë kutëgoˈoyën, jyotkujkmoobyë jäˈäy. Per waˈan mnayajtëyëty pën jekynyëm yˈaktëgoyˈaty parë myinëdë kutëgoˈoyën ets ti mbäät xytyuny parë mnitsoˈogët. Min nˈokˈijxëm wiˈixë Biiblyë tˈatsoowëmbity.