BIIBLYË TˈATSOOWËMBITY: “Jäˈtäämp ja tiempë mä ja oˈkpëty diˈibë të nyaxtëkëdë myëdowëp kots ëj [Jesus] ngäjxët, [...] es jikypyëkëp” (Fwank 5:28, 29).

Jesukristë ojts tnaskäjpxë ko mä nety yˈaneˈemy dyajtukwäˈätsäˈänyë oˈkpë jut. Fernando diˈib të yˈokˈyajmaytyakpë mä ja tuˈukpë artikulo, jyënaˈany: “Duˈunyëts ojts nwëˈëmë kojëts ngäjpxtääyë Fwank 5:28, 29. Pes tëyˈäjtën diˈib yaˈˈawijx yajjëjpˈijxp, ets tajëtsë net nwinmääy ko miin këdakpë oyˈäjtën”.

Job diˈib ninäˈä tkamastutyë Dios, myëbëjk ko jäˈtäämbë tiempë mä Dios yajjukypyëkäˈänyëty. Yëˈë dyajtëëy: “Pën tuˈugë jäˈäy oˈkp, ¿mbäät jatëgok jyukypyeky? Mä ja tuunk diˈibëts kuanë nduumpy [nuˈunëts nˈity jutoty] jabom jabomëts nˈawixäˈäny axtë kojëts nˈawäˈätspëtsëmët. Mijts xymyëgäjpxäämp ets ëjts atsowäämp” (Job 14:14, 15).

Marta, ja myëgaˈaxë Lázaro, nan nyijäˈäwëbë nety ko jukypyëkandëbë oˈkpë. Ko yˈoˈkyë Lázaro, ta Jesus yˈanmääyë: “Yëˈë mmëgaˈax jikypyëkëp jatëgok”. Marta ta tˈatsooy: “Ëj nnijäˈäbëts ko jikypyëkëp mä ja tiempë mä ja oˈkpëty jyikypyëktët”. Perë Jesus yˈatsoowë: “Ëjtsë dëˈën ja jikypyëjkën es ja jikyˈäjtën. Diˈibëts xymyëbëjkp, oy yˈoogët, jikypyëkëp” (Fwank 11:23-25). Ok, ta Jesus dyajjukypyejky ja Lázaro. Tyäˈädë yëˈë xypyudëjkëm parë nbawinmäˈäyëm tijaty tunan jatanëp mä ja tiempë myiny kyëdaˈaky. ¡Okpawinmay wiˈix miyonkˈamë jäˈäy jyukypyëkäˈändë abëtsemy nyaxwinyëdë!

BIIBLYË TˈATSOOWËMBITY: Diosë yˈAyuk jyënaˈany ko Jesus kyaj duˈun jyukypyejky extëm ja niduktujkpë jäˈäy, pesë tyäˈädë jäˈäyëty yä jyukypyëjktë Naxwiiny. Perë Biiblyë myaytyakypy wiˈixë Jesus jyukypyejky, jyënaˈany: “Patëjkë tsäjpotm es tyam yˈity agäˈänytsyoo mä Dios” (1 Peedrʉ 3:21, 22). ¿Yëˈëyë naytyuˈugë Jesukristë jukypyëjk tsäjpotm? Kyaj, pes tyukwandak ja yˈëxpëjkpëty: “Netëts nminët jatëgok es nyajnëjxtëdëts miits es mjikyˈattët mët ëj” (Fwank 14:3).

Jesukristë ojts pyatëkë tsäjpotm parë nyayjëjpˈijxë ets tˈaxäjëyaˈany ja yˈëxpëjkpëty. Biiblyë jyënaˈany ko ja nyiwinëˈattë 144,000 jäˈäy diˈib nëjkxandëp tsäjpotm (Diˈibʉ Jatanʉp [Apocalipsis] 14:1, 3). ¿Per ti jam tyunandëp?

 Mëjwiin kajaa jam tyunäˈändë, pesë Biiblyë jyënaˈany: “Kuniˈxy es jotkujkëty diˈibatyë Dios yajjikypyëkëdëp mä tyäˈädë jawyiimbë jikypyëjkën. Kyaj pyäädëdët ja ayoˈon diˈibë dëˈën extëmë jäˈäy yˈooktë myëmajtsk ok, jaˈa dëˈën tmëdundët ja Dios esë Kristë extëmë teetyëty [saserdotëty], es yˈanaˈamdët mët ja Kristë tuk mil jëmëjt” (Diˈibʉ Jatanʉp 20:6). Niˈamukë tyunäˈändë extëmë rey ets saserdotë ets yˈanaˈamäˈändë mëdë Jesus yä Naxwiiny.

BIIBLYË TˈATSOOWËMBITY: Apostëlë Pablo duˈun tkujäˈäyë yˈää yˈayuk mä Biiblyë: “Ëj nmëbejkypyëts extëm yëˈëjëty nandëˈën ko yëˈë Dios dyajjikypyëkäˈäny tëgekyë oˈkpë diˈibë ijt oyjyaˈay es nandëˈën diˈibë ijt kaˈoyjyaˈay” (Apostʉlʉty 24:15).

¿Pënatyën “oyjyaˈay”? Tuˈugë yetyëjk diˈib ijt oyjyaˈay, yëˈë Daniel, tuˈugë kugajpxy diˈib xëmë Dios mëduun ets duˈun yaˈˈanmääy ko nety yˈooganë: “Mboˈkxäämp, per mbëdëˈëgäämp parë xyˈaxäjët ja mgumäˈäyën ko ja tiempë jyëjpkëxët” (Daniel 12:13). ¿Mä Daniel jyukypyëkäˈäny? Biiblyë jyënaˈany: “Pënaty jukyˈäjttëp tëyˈäjtën myëët tjaˈˈatäˈändë naxwinyëdë, ets ttuktsëënëyäˈändë xëmëkyëjxm” (Salmo 37:29). Jesus nanduˈun jyënany: “Kuniˈxy ja diˈibëty kyaj myëj pyäädëdë, jaˈa ko Dios moˈoyanëdëp ja naxwinyëdë extëmë kyumäˈäny” (Matewʉ 5:5). Daniel etsë wiinkpë Dios mëduumbëty yä jyukypyëkäˈändë Naxwiiny ets jyukyˈatäˈändë winë xëë.

¿Pënatyën “kaˈoyjyaˈay”? Yëˈë miyonkˈamë jäˈäy diˈib të yˈooktë ets kyaj ojts tnijawëdë wiˈixë Biiblyë tyukniˈˈixë ets ni tkakuytyuundë. Ko jyukypyëktët, ta tnijawëyäˈändë pënën Jyobaa * ets pënën Jesukristë ets ta nëjkx ttsoktë (Fwank 17:3). Pënatyë nety wyinˈijxtëp tmëdunäˈändë Jyobaa, ta jyukyˈatäˈändë winë xëë extëmë Jyobaa.

BIIBLYË TˈATSOOWËMBITY: “Dios yajtëtsxëdët tëgekyë ja wyinnëë. Kyaj yˈokˈijnët ja oˈkën, jëˈëy yaxën o ja pëjk adoˈonën” (Diˈibʉ Jatanʉp 21:4). “Tkojäˈändë jëën tëjk ets ttuktsëënëyäˈändë, ets tniˈibäˈän tkojäˈändë uubës ets tjëˈxäˈändë tyëëm.” (Isaías 65:21.)

¡Okpawinmay wiˈix agujk jotkujk njukyˈatäˈänëm mëdë njiikyˈäjt nmëguˈukˈäjtëm! Per ¿tiko nmëbëjkëm ko jantsy jukypyëkandëbë oˈkpë? Min nˈokˈijxëm wiˈix yaˈˈatsoowëmbity.