Yajtëˈëwën diˈib yaˈˈatsoowëmbijtp mä Biiblyë
¿Tiko të nmiˈinëm yä Naxwiiny?
¿Waˈan mwinmay ko jantsy konë xëë jukyˈäjtën?
¿Të näˈä mnayajtëyëty pën yëˈëyë të nimiˈinëm parë nˈëyëˈk nguyäjtëm, nduˈunëm, nbëjk nˈukëm, nmëdäjtëmë uˈunk ënäˈk ets nmëjjäˈäyëm? (Job 14:1, 2.) Biiblyë jyënaˈany ko axtë jäˈäyë kuwijypyë të duˈun nyayajtëyëty. (Käjpxë Eclesiastés 2:11.)
Parë nnijäˈäwëm tiko të nmiˈinëm yä Naxwiiny, tsojkëp nbayoˈoyëm wiˈix tsyondakyë jukyˈäjtën. Ko të yaˈëxpëjkpëtsëmy wiˈix yˈixëtyë kukoˈoxy etsë niniˈkx këbäjk, ta mayë jäˈäy jyënäˈändë ko jantsy kuwijy diˈib të xyajkojëm. (Käjpxë Salmo 139:14.) Pääty tam tiko të xyajkojëm. Ko nnijäˈäwëm tiko të nmiˈinëm yä Naxwiiny, ta kyaj nanëgoobë njukyˈäjtëm.
¿Tiko Dios ojts xyajkojëm?
Ko Dios ojts dyajkojy ja tim jawyiimbë jäˈäy, jantsy oy ja tuunk diˈib tyuknipëjk: dyajjëmbitëdë Naxwinyëdë extëm tuˈugë it lugäärë tsujpë, dyajtuktukët mëdë tyëëm yˈääts ets jyukyˈattët winë xëë. (Käjpxë Génesis 1:28, 31.)
Ko ja Adán mëdë Eva tyëgooytyë, Dios kyaj dyajtëgäjtsy tijaty tyuknibëjtakë ets nan kyaj wyinmääy ko të kyaˈoyë. Biiblyë jyënaˈany ko Dios duˈunyëm tyuny axtë tyambäät parë dyajnitsoˈogäˈäny pënaty mëduunëp ets parë yajtunëdë tsyojkën yä Naxwiiny. Dios nan mdukmëtsojkëp parë mjukyˈatët extëm yëˈë ttuknibëjtakë. (Käjpxë Salmo 37:29.) Biiblyë xyˈanmäˈäyëm ti mbäät nduˈunëm parë ndukˈoyˈäjtëm ti Dios tyuknibëjtakëp.