DIˈIB MIIMP MÄ NYIˈAK
¿Wiˈix jyaty ko tuˈugë jäˈäy yˈooky?
Lionel jyënaˈany: “Duˈunëtsë nety nwinmay ko tëgëk pëkyë lugäär mä nëjkxëm ko nˈoˈkëm: tsäjpotm, infiernë ets purgatooryë. Ets njënanyëts ko kyajts ndimˈoyjyaˈayëty parëts nëjkxët tsäjpotm ets nan kyajts ndimˈaxëkjäˈäyëty parëts nëjkxët infiernë. Per diˈibëtsë nety kyaj yajxon nnijawë, yëˈë ti duˈun yˈandijpy purgatooryë. Kyajtsë netyë Biiblyë ndimkajpxynyëm parëts nnijawët; yëˈëyëtsë nety nnijäˈäwëp wiˈixë jäˈäy jyënäˈändë”.
Fernando jyënaˈany: “Nyajtukniˈˈijxëts ko niˈamukë jäˈäy nyëjkxtë tsäjpotm ko yˈooktë, per kyajtsë nety nˈity seguurë pën tëyˈäjtën. Duˈunëts nwinmääy ko jabäät jyëjpkëjxtäˈäy ko jäˈäy yˈooky”.
¿Të näˈä mnayajtëyëty wiˈix jyaty ko tuˈugë jäˈäy yˈooky? ¿Waˈandaa jap muum yˈayowdë ja jiiky mëguˈuk diˈib të yˈooktë? ¿Waˈan näˈä jatëgok nˈijxëm? ¿Wiˈix mbäät nˈijtëm seguurë ko jukypyëkandëp? Min nˈokˈijxëm wiˈixë Biiblyë jyënaˈany parë nnijäˈäwëm wiˈix yaˈˈatsoowëmbity. Tim jawyiin, nˈokˈijxëm wiˈix jyaty ko tuˈugë jäˈäy yˈooky, ta net nnijäˈäwëm ja jotkujkˈäjtën diˈibë Biiblyë wyandakypy.
¿Wiˈix yajpäättë oˈkpë?
BIIBLYË TˈATSOOWËMBITY: “Diˈib jukyˈäjttëp nyijäˈäwëdëp ko oogandëp, perë oˈkpë nitii tkanijawëdë, nan kyaj nyekyyajmëjuytyë, mët ko tukëˈëyë jyamyajtsënë të yajjäˈäytyëgooynyë. Tukëˈëyë diˈibë mgëˈë mbäät ttuny, tun mëdë mgëˈëm mëjää, yëˈko kyaj jyapëtyë tuunk, kyaj ti yajniwinmayë, kyaj ti yajnijawë, kyaj ti wijyˈäjtënë mä ja oˈkpë jut, * ja lugäär mä mnëjkxy” (Eclesiastés 9:5, 10).
Oˈkpë jut yëˈë mä niˈamukë jäˈäy nyëjkxtë ko yˈooktë. Per yëˈë yˈandijpy ko kyaj ti tnekynyijawëdë ets ko kyaj ti tnekytyundë. ¿Ti Job wyinmääy ko tmaytyakyë oˈkpë jut? Mä tuˈugë xëë, dyajtëgooytyaay tukëˈëyë tijatyë nety myëdäjtypy ets yˈoˈktääy ja yˈuˈunk yˈënäˈk. Ta net yaˈˈayoowë ja axëk puˈuts diˈib tukpëtsëëmdääyë mä nyiniˈkx kyëbäjk. Mä duˈun yˈayoy, ta tmënuˈkxtakyë Dios: “Oyxyëbëts ko mä oˈkpë jut [“infiernë”, extëm jyënaˈanyë La Sagrada Biblia, de Guillermo Jünemann] xyyuˈutsy, ets japëts xyaˈitët yuˈutsy” (Job 1:13-19; 2:7; 14:13). Job kyaj twinmääy ko ja oˈkpë jut o infiernë, yëˈëjëty tuˈugë lugäär mä jäˈäy nyitoy, mä niˈigyë yˈaktimˈayowët. Yëˈë nety wyinmaapy tuˈugë lugäär mä mbäät pyoˈkxy.
Ja tuk pëky parë nnijäˈäwëm wiˈix njäjtëm ko nˈoˈkëm, yëˈë ko ngäjpxëm mä Biiblyë mä yajnimaytyaˈagyë oˈkpë jyukypyëjktë (ixë rekuäädrë “ Niduktujkë oˈkpë jyukypyëjktë diˈibë Biiblyë myaytyakypy”).
Nituˈugë tyäˈädë jäˈäy tkanimaytyaktë ko të nety yajpäättë mä tuˈugë lugäärë jantsy tsujpë o mä tuˈugë ayoowdakn. Koxyëp yajpattë mä tyäˈädë lugäär, ¿ti kyajxyëp tnimaytyaktë? Ets ¿këdii ojtsxyëp yajkujayë mä Biiblyë parë mbäät nnijäˈäwëm mä ojts nyëjkxtë? Perë Biiblyë kyaj ti tmaytyaˈaky. Tyäˈädë jäˈäyëty nitii tkamaytyaktë, pes kyaj ti tjäˈäwëdë, duˈun yajpattë extëmxyëp myëk mäˈädë. Biiblyë duˈun näˈäty tmaytyaˈagyë oˈkën extëm ko nmäˈäjëm. Extëm nˈokpëjtakëm, ko yˈoˈky ja nyëëxë Jairo etsë Lázaro, ta jyënaˈany ko määdëbë nety (Lukʉs 8:52, 53; Fwank 11:11, 13).
Per ¿jabäät jyëjpkëjxtäˈäy ko jäˈäy yˈooky? ¿Mbäät jyotwijy mä duˈun të myanaxy?
^ parr. 7 “Oˈkpë jut” mä ayuk ebreo ja yajtijy Seol ets mä grieegë Hades. Näägë Biiblyë ja të tkäjpxnaxy “infiernë”, perë Biiblyë nimää tkanigajpxy ko jyaˈˈaty tuˈugë ayoowdakn mä jäˈäy nyitoy.
