Mayë jäˈäy jyënäˈändë ko nëgoobë tiempë nyajtëgoˈoyëm ko nuˈkxtakëm, ko kyaj pën tmëdoowˈity. Etsë wiinkpë januˈkxtaktëp, per duˈun tjawëdë ko kyaj pën tˈatsoowëmbity. Tuˈugë jäˈäy diˈib kyaj tmëbëkyë Dios ojts twinmääytyëy wiˈixë Dios yˈixëty, ta tmënuˈkxtaky: “Oyëts jeˈeyë ti ayuˈutsyë xyˈanëëmët”. Per ta jyënany ko Dios “kyaj yˈatsooy”.

Perë Biiblyë jyënaˈany ko Dios myëdoowˈijtypyë nuˈkxtakën. Jap yajkujäˈäyë wiˈix tëëyëp ojts yaˈˈanëëmë tuˈugë käjpn: “[Dios] myëëtˈatäämpy ja paˈëyoˈowën najtsˈëyoˈowën ko ënäty tmëtoy mjëˈëy myäˈäxy, jeˈeyë tmëtoowpaatëty ko ënäty xyˈamëtoy ja näypyutëkë, enätyë mputëkëjaˈanyë” (Isaías 30:19, Tios yˈääw yˈayuk [TY]). Jatuˈugë tekstë jyënaˈany: “Ko myënuˈkxtaˈagyëty ja oyjyaˈay, tyukxondakypy” (Proverbios 15:8).

Mä Biiblyë miimp kujayë nuˈkxtakënë diˈib yajmëdoowˈijt. Mä tuˈugë tekstë jyënaˈany ko Jesus “tˈamdooy tpëjktsooy ja Dios diˈibë mbäät kyutiky es kyaj [...] ttuknaxët ja oˈkën”, ets yajmëdoo, pes ojts yajjukypyekyëty (Ebreeʉsʉty 5:7). Mä Daniel 9:20, 21 etsë 2 Crónicas 7:1, nan myaytyakypy wiˈixë Dios tˈatsoowëmbijtyë nuˈkxtakën.

¿Tiko net näägë jäˈäy wyinmaytyë ko kyaj pën myëdoowˈijtxëtyë nyuˈkxtakën? Pën ntsojkëm etsë Jyobaa, * ja Dios diˈib yajmaytyakp mä Biiblyë tmëdowëdë nuˈkxtakën, tsojkëp yëˈëyë nmëgäjpxëm. Kyaj mbäät nmënuˈkxtakëmë wiink dios ni yëˈë nˈaptëjkˈäjtëm. Etsë Dios diˈib të xyajkojëm, nan tsyejpy ets nˈamdoˈowëm “diˈibë ijtp tiˈigyë [mët] diˈibë yëˈë tsyejpy”, tyäˈädë yëˈë yˈandijpy, nˈamdoˈowëm diˈib yëˈë kyupëjkypy. Ets pën nduˈunëm duˈun, ta xyˈamäˈäyëm ko yëˈë myëdoowˈijtypy wiˈix nuˈkxtakëm (1 Fwank 5:14). Pääty, pën ntsojkëm etsë Dios tmëdoowˈitëdë nuˈkxtakën, tsojkëp nˈixyˈäjtëm ets nmëmëdoˈowëm.

Mayë jäˈäy tmëbëktë ko Dios myëdoowˈijtypy ets yˈatsoowëmbijtypy ko nyuˈkxtäˈäktë, kyaj jeˈeyë nyuˈkxtäˈäktë mët ko duˈun tmëdattë ja kostumbrë mä ryelijyonk. Isaac, diˈib tsoˈomp Kenia, jyënaˈany: “Nuˈkxtakëts parëts nˈamdooyë naybyudëkë etsëts njaygyukëdë Biiblyë. Ko waanë yˈijty, tajëts tuˈugë jäˈäy ojts xymyëwingony ets xymyooyëts ja naybyudëkë diˈibëts nety nyajtëgoyˈajtypy”. Hilda, diˈib tsënaapy Filipinas, myastuˈudaambyë netyë juˈuky. Kanäkˈok tjatuunyë mëjää, per kyaj tmastuty. Ta ja nyaˈay yˈanmääyë parë Dios tˈamdowëdë naybyudëkë. Ko nyuˈkxtaktääy, ta jyënany: “Kyajts nmëbëkany nuˈunëts xypyudëjkë. Kyajtsë nˈääw njot tnekyˈatsojkyë juˈuky, ndimmastutëts”.

¿Waˈandaa Dios mbudëkëdët pën yëˈë mjotmaytyuunëp diˈib tuˈugyëp mët diˈib tyukjotkëdakypy?