BIIBLYË KYÄJPXWIJËN: “Duˈunyëm [...] mnaybyokymyaˈkxëdët amumduˈukjot nixim niyam, pën jam pën të tmëdëgoyë myëguˈuk. Duˈun extëmë Jyobaa ojts mbokymyaˈkxëdë amumduˈukjot, nanduˈun miitsëty xytyundët” (Colosenses 3:13, TNM).

¿Ti yˈandijpy? Mä Biiblyë duˈunë poky yaˈijxkijpxyë extëmë nuˈkxy, ets ko naybyokymyaˈkxëm duˈunxyëp extëm ko kyaj yˈokˈyajtukëbajnë (Lukʉs 11:4). Tuˈugë liibrë diˈib nyimaytyakypyë Biiblyë jyënaˈany ko diˈib të yajkäjpxnaxy mä ayuk grieegë “maˈkxën”, mbäät yëˈë tˈandijy “ko kyaj pën ndukëbajtëm ja nuˈkxy o ko kyaj atsip ndukëbatäˈänëm”. Pääty ko nbokymyaˈkxäˈänëm ja diˈib të xyajtsayujtëm, ta kyaj nekyˈijxëm ko xymënuˈkxyˈäjtëm. Ko pën nbokymyaˈkxëm kyaj yëˈë tˈandijy ko oy diˈib të ttuny o ko kyaj mëk njäˈäwëm. Yëˈë duˈun yˈandijpy ko kyaj nbëjkëˈëgäˈänëmë akë, oy jyajamëty tiko të njotˈambëjkëm.

¿Xypyudëjkëmë tyäˈädë käjpxwijën? Niˈamukë ndëgoˈoyëm mët ko nbokyjyaˈayˈäjtëm (Romanʉs 3:23). Pääty yˈoyëty nbokymyaˈkxëmë wiinkpë, mët ko seguurë näˈä ntsojkëm ets pën xypyokymyaˈkxëm. ¿Wiˈix ja tuk pëky ndukˈoyˈatäˈänëm ko nbokymyaˈkxëm?

Këˈëm nayˈaxëktuˈunëm pën awäˈändakëm, nbëjkëˈkëmë akë ets pën kyaj nbokymyaˈkxëm. Ko duˈun njäˈäyˈäjtëm mbäät kyaj ti nekytyukxondakëm ets oˈktëy nnayjäˈäwënë. Axtë mbäät xypyatëmë yuu päˈäm. Tuˈugë doktoor diˈib xyëˈäjtypy Yoichi Chida ets tuˈugë maˈestrë diˈib mä Psicología Andrew Steptoe, jyënandë ko të näämnëm yaˈëxpëjkpëtsëmy wiˈix kyutsëˈëgëty ko jäˈäy jyantsy jyotˈambëky ets yˈawäˈändaˈaky, pes mbäädë korasoon wyäˈkˈawë (rebistë diˈibë tsooy nyimaytyakypy Journal of the American College of Cardiology).

Okwinmayë net wiˈix xypyudëjkëm ko nbokymyaˈkxëm. Ko nbokymyaˈkxëm, ta agujk jotkujk nyajpatëm, tuˈugyë nˈijtëm ets oy nnaymyënëjkxëm mëdë wiinkpë. Per diˈib mas jëjpˈam, yëˈë ko yëˈë nety nbanëjkxëmë Jyobaa yˈijxpajtën, diˈib pyokymyeˈkxypy pënaty jodëmbijtp ets diˈib yˈawijxypy parë nanduˈun nduˈunëm (Markʉs 11:25; Éfesʉ 4:32; 5:1).